Oʻzbekiston Respublikasi bilan Yevropa hamjamiyatlari va ularga aʼzo davlatlar oʻrtasidagi Sheriklik va hamkorlik toʻgʻrisidagi bitimning kuchga kirishi uchun zarur boʻlgan barcha tartibotlar yakunlanganligi munosabati bilan, Yevropa Ittifoqi Kengashi Bosh kotibining notasiga muvofiq Sheriklik va hamkorlik toʻgʻrisidagi bitim 1999-yil 1-iyuldan boshlab kuchga kiradi.

Sheriklik va hamkorlik toʻgʻrisidagi bitim moddalarini amalga oshirish va uning qoidalari Oʻzbekiston Respublikasi vazirliklari va idoralari tomonidan bajarilishini muvofiqlashtirish maqsadida Vazirlar Mahkamasi qaror qiladi:

1. Oʻzbekiston Respublikasi vazirliklari va idoralarining Sheriklik va hamkorlik toʻgʻrisidagi bitimning moddalari va qoidalarini amalda roʻyobga chiqarish boʻyicha chora-tadbirlari rejalarini oʻz ichiga oluvchi Hukumatning asosiy tashkiliy chora-tadbirlarini ishlab chiquvchi idoralararo komissiya tarkibi ilovaga* muvofiq tasdiqlansin.

Belgilansinki, Oʻzbekiston Respublikasi qonun hujjatlarini Yevropa Ittifoqi qonun hujjatlariga yaqinlashtirish, parlamentlararo va siyosiy muloqotni kengaytirish, ijtimoiy, ilmiy, texnologiya va madaniy hamkorlik asoslarini taʼminlash, moliya bozori, savdo va investitsiyalar rivojlanishiga koʻmaklashish boʻyicha kompleks chora-tadbirlarni ishlab chiqish idoralararo komissiyaning asosiy vazifasi hisoblanadi.

Idoralararo komissiya Hukumatning asosiy tashkiliy chora-tadbirlari kompleks dasturini 1999-yil 5-avgustgacha tasdiqlash uchun Vazirlar Mahkamasiga kiritsin.

2. Oʻzbekiston Respublikasi Tashqi ishlar vazirligi Oʻzbekiston Respublikasi delegatsiyasi tarkibi, Oʻzbekiston — Yevropa Ittifoqi Hamkorlik kengashining Bryussel shahrida (Belgiya) boʻlib oʻtadigan birinchi majlisi kun tartibi loyihasi va qarorlari loyihalari boʻyicha takliflarni 1999-yil 16-avgustgacha ishlab chiqsin va kiritsin.

3. Oʻzbekiston Respublikasi Tashqi ishlar vazirligi manfaatdor vazirliklar va idoralar bilan birgalikda Hamkorlik kengashining birinchi majlisi yakunlangach Oʻzbekiston — Yevropa Ittifoqi Hamkorlik qoʻmitasining Oʻzbekistonga oid qismi va Hamkorlik kengashi tomonidan tashkil etiladigan boshqa organlar tarkibi boʻyicha takliflar kiritsin.

4. Oʻzbekiston Respublikasi Tashqi ishlar vazirligi va Tashqi iqtisodiy aloqalar vazirligining vazirliklarda xodimlarning belgilangan soni doirasida Yevropa Ittifoqi bilan hamkorlik boʻyicha tarkibiy boʻlinmalar tashkil etish toʻgʻrisidagi takliflari qabul qilinsin.

5. Oʻzbekiston Respublikasi Tashqi ishlar vazirligi huzuridagi “Jahon” axborot agentligi vazirliklar va idoralarga, Oʻzbekiston Respublikasining chet eldagi diplomatik vakolatxonalariga, shuningdek respublika oliy oʻquv yurtlariga tarqatish uchun Sheriklik va hamkorlik toʻgʻrisidagi bitim matni bosilgan risolalarni oʻzbek, rus va ingliz tillarida zarur miqdorda chiqarsin.

Risolalarni chiqarish boʻyicha xarajatlar Oʻzbekiston Respublikasi Vazirlar Mahkamasining zaxira jamgʻarmasi mablagʻlari hisobiga amalga oshirilsin.

6. Vazirlar Mahkamasining 1996-yil 5-dekabrdagi 494-f-son farmoyishi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.