Respublikada oʻtkazilayotgan sud-huquq islohotlariga binoan qonunchilikka kiritilgan oʻzgartirish va qoʻshimchalar, xususan, jinoiy jazoning liberallashtirish munosabati bilan odil sudlovni amalga oshirish amaliyotida kelib chiqayotgan masalalarni turli hal etish boʻyicha tushuntirishlar berish zaruriyati tugʻilganligi tufayli “Sudlar toʻgʻrisida”gi Qonunning 17 va 47-moddalariga asosan, Oʻzbekiston Respublikasi Oliy sudi Plenumi hamda Oliy xoʻjalik sudi Plenumi qaror qiladi:

Oʻzbekiston Respublikasi Oliy sudi Plenumining va Oliy xoʻjalik sudi Plenumining 1996-yil 20-dekabrdagi “Sud hokimiyati toʻgʻrisida”gi 1/60-sonli qarori:

1. 3-bandning ikkinchi xatboshisidagi “Oliy Majlis” degan soʻzlar “Oliy Majlis Senati” degan soʻzlar bilan almashtirilsin.

2. 9-bandning birinchi xatboshisidagi “tuman, shahar, viloyat, harbiy, xoʻjalik sudlari va Qoraqalpogʻiston Respublikasi Oliy sudi” degan soʻzlar “Qoraqalpogʻiston Respublikasi fuqarolik va jinoyat ishlari boʻyicha oliy sudlari, fuqarolik va jinoyat ishlari boʻyicha tuman (shahar) sudlari, harbiy sudlar, Qoraqalpogʻiston Respublikasi xoʻjalik sudi, viloyat va Toshkent shahar xoʻjalik sudlari” degan soʻzlar bilan almashtirilsin.

3. 9-bandning ikkinchi xatboshisidagi “tuman, shahar, viloyat, harbiy, xoʻjalik sudlarining sudyalari” degan soʻzlar “Qoraqalpogʻiston Respublikasi fuqarolik va jinoyat ishlari boʻyicha oliy sudlari, fuqarolik va jinoyat ishlari boʻyicha viloyat va Toshkent shahar sudlari, fuqarolik ishlari boʻyicha tumanlararo, tuman (shahar) sudlari, jinoyat ishlari boʻyicha tuman (shahar) sudlari, harbiy sudlar, Qoraqalpogʻiston Respublikasi xoʻjalik sudi, viloyat va Toshkent shahar xoʻjalik sudlarining sudyalari” degan soʻzlar bilan almashtirilsin.

4. 10-band quyidagi tahrirdagi birinchi xatboshi bilan toʻldirilsin: “Sudlar faoliyatini tashkiliy taʼminlash, zaxirani shakllantirish, sudyalik lavozimiga nomzodlarni tavsiya etish ishlarini Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi amalga oshiradi”.

5. 14-bandning beshinchi xatboshisidagi “xavfli jinoyatchilarga nisbatan qonunning butun kuchini tatbiq etishlari” degan soʻzlar chiqarilsin.