Iqtisodiy islohotlar yanada chuqurlashtirilishi va bank tizimi erkinlashtirilishini taʼminlash, bank qonunchiligini takomillashtirish, Oʻzbekiston Respublikasi Markaziy banki faoliyatini tashkil etish darajasi va samaradorligini oshirish, respublika tijorat banklarining rivojlanishiga hamda barqaror faoliyat koʻrsatishiga koʻmaklashish maqsadida:

1. Respublika bank kengashi 1-ilovaga* muvofiq tarkibda tuzilsin.

Belgilab qoʻyilsinki, Respublika bank kengashi doimiy ishlovchi kollegial organ boʻlib, oʻz faoliyatida Oʻzbekiston Respublikasi Prezidentiga va Oʻzbekiston Respublikasi Oliy Majlisiga hisobot beradi.

2. Respublika bank kengashining asosiy vazifalari quyidagilardan iborat etib belgilansin:

bank tizimini yanada isloh qilish va erkinlashtirish, bank qonunchiligini takomillashtirish boʻyicha takliflar ishlab chiqish;

muntazam tahlil asosida makroiqtisodiyot va budjet siyosati bilan oʻzaro bogʻliq boʻlgan pul-kredit siyosatini shakllantirish va amalga oshirish boʻyicha tavsiyalar ishlab chiqish, shu siyosatning iqtisodiyot va jamiyat hayotining barcha tomonlarini isloh qilish maqsadli vazifalari hamda ustuvor yoʻnalishlariga, mamlakatni iqtisodiy va ijtimoiy rivojlantirishga doir qabul qilingan kompleks dasturlarga muvofiqligini aniqlash;

milliy valyutaning barqarorligini taʼminlash, pul tizimini mustahkamlash, pul massasining oʻsishini cheklash hamda bankdan tashqari aylanmani kamaytirish, pul aylanmasida naqd va naqdsiz pul massasining maqbul nisbatini taʼminlash boʻyicha takliflar tayyorlash;

aholining bank tizimiga ishonchini mustahkamlash, pul mablagʻlarining bank omonatlariga jalb etilishini ragʻbatlantirish, fuqarolar omonatlari himoya etilishi kafolatlarining kuchli mexanizmini yaratish borasidagi kompleks chora-tadbirlarni amalga oshirish;

tijorat banklarining investitsiya jarayonida va iqtisodiyotning tarkibiy oʻzgarishlarida ishtirok etishini faollashtirishga qaratilgan qoʻshimcha omillarning samarali tizimini ishlab chiqish;

valyuta siyosatini yanada erkinlashtirish, banklararo valyuta bozorini rivojlantirish, mamlakatning eksport salohiyatini oshirish, oltin-valyuta zaxiralari barqaror va muttasil koʻpayib borishini taʼminlash, davlatning valyuta mablagʻlaridan samarali foydalanish boʻyicha takliflar tayyorlash;

respublikaning bank tizimini hamda banklararo munosabatlar mexanizmini rivojlantirish va takomillashtirish, tijorat banklarining mustaqilligini, ular faoliyatining ishonchliligi va barqarorligini oshirish, ularning xalqaro kredit reytingini koʻtarish, xalqaro moliya-kredit tizimiga keng koʻlamda qoʻshilish borasidagi chora-tadbirlarni ishlab chiqish.

3. Respublika bank kengashi toʻgʻrisidagi Nizom 2-ilovaga muvofiq tasdiqlansin.

4. Oʻzbekiston Respublikasi Adliya vazirligi, Markaziy banki manfaatdor tuzilmalar bilan birgalikda bir oy muddatda amaldagi qonunchilikka ushbu Farmondan kelib chiqadigan oʻzgartish va qoʻshimchalar kiritish toʻgʻrisidagi takliflarni Vazirlar Mahkamasiga taqdim etsin.

5. Mazkur Farmonning ijrosini nazorat qilish Oʻzbekiston Respublikasi Prezidentining Davlat maslahatchisi V.A. Golishev va Oʻzbekiston Respublikasi Markaziy banki raisi F.M. Mullajonov zimmmalariga yuklatilsin.

1. Respublika bank kengashi (quyida — “Kengash” deb yuritiladi) Oʻzbekiston Respublikasi Prezidentining 2002-yil 15-noyabrdagi PF-3162-son Farmoniga muvofiq Oʻzbekiston Respublikasida pul-kredit va bank tizimini yanada rivojlantirish hamda takomillashtirish maqsadida tuzilgan doimiy ishlovchi kollegial organ hisoblanadi.

2. Kengash oʻz faoliyatida Oʻzbekiston Respublikasining Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmon va farmoyishlariga, Oʻzbekiston Respublikasi Vazirlar Mahkamasining qarorlariga, Oʻzbekiston Respublikasi Markaziy bankining Kengash vakolatiga kiruvchi masalalar boʻyicha normativ-huquqiy hujjatlariga hamda mazkur Nizomga amal qiladi.

3. Kengashning asosiy vazifalari quyidagilardan iborat:

bank tizimini yanada isloh qilish va erkinlashtirish, bank qonunchiligini takomillashtirish boʻyicha takliflar ishlab chiqish;

muntazam tahlil asosida makroiqtisodiyot va budjet siyosati bilan oʻzaro bogʻliq boʻlgan pul-kredit siyosatini shakllantirish va amalga oshirish boʻyicha tavsiyalar ishlab chiqish, shu siyosatning iqtisodiyot va jamiyat hayotining barcha tomonlarini isloh qilish maqsadli vazifalari hamda ustuvor yoʻnalishlariga, mamlakatni iqtisodiy va ijtimoiy rivojlantirishga doir qabul qilingan kompleks dasturlarga muvofiqligini aniqlash;

milliy valyutaning barqarorligini taʼminlash, pul tizimini mustahkamlash, pul massasining oʻsishini cheklash hamda bankdan tashqari aylanmani kamaytirish, pul aylanmasida naqd va naqdsiz pul massasining maqbul nisbatini taʼminlash boʻyicha takliflar tayyorlash;

aholining bank tizimiga ishonchini mustahkamlash, pul mablagʻlarining bank omonatlariga jalb etilishini ragʻbatlantirish, fuqarolar omonatlari himoya etilishi kafolatlarining kuchli mexanizmini yaratish borasidagi kompleks chora-tadbirlarni amalga oshirish;

tijorat banklarining investitsiya jarayonida va iqtisodiyotning tarkibiy oʻzgarishlarida ishtirok etishini faollashtirishga qaratilgan qoʻshimcha iqtisodiy omillarning samarali tizimini ishlab chiqish;

valyuta siyosatini yanada erkinlashtirish, banklararo valyuta bozorini rivojlantirish, mamlakatning eksport salohiyatini oshirish, oltin-valyuta zaxiralari barqaror va muttasil koʻpayib borishini taʼminlash, davlatning valyuta mablagʻlaridan samarali foydalanish boʻyicha takliflar tayyorlash;

respublikaning bank tizimini hamda banklararo munosabatlar mexanizmini rivojlantirish va takomillashtirish, tijorat banklarining mustaqilligini, ularning xalqaro kredit reytingini koʻtarish, xalqaro moliya-kredit tizimiga keng koʻlamda qoʻshilish borasidagi chora-tadbirlarni ishlab chiqish.

4. Kengash oʻz zimmasiga yuklangan vazifalarni amalga oshirishi uchun:

pul-kredit siyosati asosiy yoʻnalishlari hamda pul massasi parametrlari loyihasini kelgusi yilga moʻljallangan makroiqtisodiyot va budjet siyosatining ustuvor yoʻnalishlari bilan bogʻliq holda koʻrib chiqadi;

pul muomalasining barqarorligini mustahkamlash, kredit berish va hisob-kitoblar tizimini takomillashtirish, moliyaviy isntitutlar faoliyatini rivojlantirish boʻyicha takliflarni koʻrib chiqadi;

inflatsiya jarayonlarining pasayishini, bank ssudalari boʻyicha qarzdorlik oʻsishi cheklanishini taʼminlashga qaratilgan takliflarni koʻrib chiqadi;

valyuta siyosatining asosiy yoʻnalishlari va oltin-valyuta zaxiralarini boshqarish tamoyillari boʻyicha tavsiyalarni ishlab chiqadi;

Oʻzbekiston Respublikasining bank tizimini takomillashtirish masalalarini koʻrib chiqadi;

qonunchilikda uning vakolatiga kiritilgan boshqa masalalarni hal etadi.

5. Kengash oʻz zimmasiga yuklatilgan vazifalarga muvofiq quyidagi huquqlarga ega:

bank qonunchiligini takomillashtirish borasida qonunchilikka oid tashabbuslarni tayyorlashda ishtirok etish;

oʻz vakolatiga kiruvchi masalalar boʻyicha Oʻzbekiston Respublikasi Prezidenti devoniga, Oʻzbekiston Respublikasi Oliy Majlisi va Vazirlar Mahkamasiga takliflar kiritish;

oʻz majlislariga davlat boshqaruvi organlarining mansabdor shaxslarini, idoralar, banklar va tashkilotlarning rahbarlarini, nohukumat va jamoat tashkilotlari, ommaviy axborot vositalarining vakillarini taklif qilish;

ekspert va konsultantlar sifatida olimlar hamda mutaxassislarni jalb etish.

6. Kengash aʼzolari soni 10 kishidan iboratdir.

Kengash raisi, Rais oʻrinbosari va aʼzolari Oʻzbekiston Respublikasi Prezidenti tomonidan tayinlanadilar.

Kengash aʼzolari oʻz faoliyatini jamoatchilik asosida amalga oshiradilar.

7. Kengash raisi uning faoliyatiga umumiy rahbarlikni amalga oshiradi, Kengash majlislarida raislik qiladi. Kengash raisi boʻlmagan hollarda uning vazifalarini Kengash raisining oʻrinbosari bajaradi.

Kengash raisi va uning oʻrinbosarlari Kengash aʼzolari orasidan Kengash jami aʼzolarining koʻpchilik ovozi bilan saylanadilar.

8. Kengash aʼzolari quyidagi huquqlarga ega:

Kengash majlislarida muhokama etish uchun masalalar kiritish, Kengash vakolatiga kiruvchi masalalar boʻyicha zarur qonunchilik va normativ hujjatlarini, axborot-tahliliy materiallarni olish;

Kengash majlislariga hujjatlarni tayyorlashda ishchi guruhlarida qatnashish.

9. Kengash aʼzolarining burchlari quyidagilardan iborat:

Kengash majlislarida shaxsan ishtirok etish;

Markaziy bank va tijorat banklarining faoliyati toʻgʻrisida xizmatga oid maʼlumotni, shuningdek maxfiy tusdagi maʼlumotlarni oshkor qilmaslik.

10. Kengash oʻz majlislarini yilning har choragida kamida bir marta oʻtkazadi.

11. Kengashning majlislari Kengash raisi yoki u boʻlmagan taqdirda Kengash raisining oʻrinbosari tomonidan, shuningdek Oʻzbekiston Respublikasi Markaziy banki Raisining yoxud Kengash aʼzolaridan kamida uch kishining talabiga binoan tayinlanadi.

12. Kengash hujjatlarining tayyorlash, qarorlarning loyihalarini ishlab chiqish uchun Kengash olimlar va mutaxassislarni jalb etgan holda muvaqqat ishchi guruhlarini tuzishi mumkin.

13. Kengash qarorlari kvorum besh kishidan iborat boʻlgan taqdirda ishtirok etuvchi Kengash aʼzolarining koʻpchilik ovozi bilan qabul qilinadi. Ovozlar teng kelib qolgan hollarda Kengash majlisida raislik qiluvchining ovozi hal qiluvchi hisoblanadi.

14. Kengash qarorlari bayonnomalar bilan rasmiylashtiriladi, ular Kengash raisi tomonidan imzolanadi.

15. Kengash qarorlari Kengashning barcha aʼzolariga, Oʻzbekiston Respublikasi Markaziy banki Boshqaruviga hamda boshqa manfaatdor hukumat tuzilmalari, idoralar va tijorat banklariga yetkaziladi.

16. Kengash raisi Kengash amalga oshirayotgan ishlar va u qabul qilayotgan qarorlar toʻgʻrisida Oʻzbekiston Respublikasi Prezidentini hamda Oʻzbekiston Respublikasi Oliy Majlisini muntazam xabardor qilib turadi.