Mamlakatimizda shakar ishlab chiqarish hajmlarini koʻpaytirish, “Xorazm-shakar” davlat korxonasining ishlab chiqarish quvvatlaridan foydalanish samaradorligini oshirish, uni xom ashyo bilan taʼminlashni yaxshilash maqsadida Vazirlar Mahkamasi qaror qiladi:

1. “Oziqovqatsanoat” uyushmasi, Oʻzbekiston Respublikasi Qishloq va suv xoʻjaligi vazirligi, Makroiqtisodiyot va statistika vazirligi, Moliya vazirligi hamda Xorazm viloyati hokimligining:

qand lavlagi ekin maydonlarini Xorazm viloyati xoʻjaliklarida 10 ming gektar maydonda jamlash, 2001-yilda qand lavlagi yalpi hosilini 220 ming tonnagacha yetkazish toʻgʻrisidagi;

mavsumlar oraligʻidagi davrda “Xorazm-shakar” davlat korxonasida shakar xom ashyosidan 126 ming tonnagacha shakar ishlab chiqarishni tashkil etish toʻgʻrisidagi takliflariga rozilik berilsin.

Oʻzbekiston Respublikasi Qishloq va suv xoʻjaligi vazirligi, Xorazm viloyati hokimligi qand lavlagi ekinlarini faqat muttasil yuqori qand lavlagi hosili olinayotgan va sugʻorish suvlari bilan kafolatli taʼminlangan xoʻjaliklardagina joylashtirsinlar, qand lavlagi oʻstirish texnologiyasiga rioya etilishi ustidan qatʼiy nazoratni taʼminlasinlar. Bazaviy qand miqdori kamida 15,5 foiz boʻlishi belgilab qoʻyilsin.

2. Quyidagilar:

shakar xom ashyosidan shakar ishlab chiqarishni tashkil etish uchun 2001-2002-yillarda “Amerikas interneshnl Ink” (AQSH) kompaniyasining 1,5 mln AQSH dollari miqdoridagi bevosita investitsiyalarini jalb etgan holda shakar zavodining qisman rekonstruksiya qilinishi;

“Amerikas interneshnl Ink” (AQSH) kompaniyasi loyiha boshlangan vaqtdan boshlab 10 oy mobaynida shakar xom ashyosini qayta ishlaydigan zavodni ishga tushirish majburiyatini oʻz zimmasiga olishi maʼlumot uchun qabul qilinsin.

Oʻzbekiston Respublikasi Makroiqtisodiyot va statistika vazirligi ushbu loyihani Oʻzbekiston Respublikasining 2001-yilgi investitsiya dasturi aniq manzilli qismining bevosita xorijiy investitsiyalar hisobiga mablagʻ bilan taʼminlanadigan loyihalar boʻlimiga kiritsin.

3. “Oziqovqatsanoat” uyushmasi:

Oʻzbekiston Respublikasi Qishloq va suv xoʻjaligi vazirligi, Xorazm viloyati hokimligi bilan birgalikda qand lavlagi ekuvchi xoʻjaliklar bilan 2001-yil hosilidan qand lavlagi xarid qilish yuzasidan kontraktatsiya shartnomalari tuzishni bir oy muddatda tugallasin, ularda qand lavlagi ekuvchi xoʻjaliklarni yetishtirilgan qand lavlagi uchun, qand miqdori va olingan hosilga qarab, tabaqalashtirilgan haq toʻlash tarzida ragʻbatlantirish mexanizmlarini nazarda tutsin;

qand lavlagi ekuvchi xoʻjaliklarga shartnomaviy narx boʻyicha xarid qilinadigan xom ashyo qiymatining 40 foizi miqdorida, xoʻjaliklarning ilgari olingan avans boʻyicha qarzini hisobga olgan holda, 2 bosqichda avans toʻlasin, shu jumladan avansning 15 foizini 2001-yil 27-martgacha va 25 foizini qand lavlagi ekib boʻlingandan va nihollar toʻliq undirib olingandan keyin toʻlasin. Berilgan avanslar belgilangan tartibda “Oʻzagrosugʻurta” kompaniyasida sugʻurta qilinsin;

Oʻzbekiston Respublikasi Qishloq va suv xoʻjaligi vazirligi bilan birgalikda 2001-yilda ekish uchun, tender asosida aniqlangan narx boʻyicha 40 tonna qand lavlagi urugʻi xarid qilinishini taʼminlasin;

“Amerikas interneshnl Ink” (AQSH) kompaniyasi bilan birgalikda, shakar zavodi qisman rekonstruksiya qilib boʻlingandan keyin, tender asosida, har yili 126 ming tonna shakar ishlab chiqarish uchun zarur miqdorda shakar xom ashyosi yetkazib berilishini taʼminlasin;

Ukrainaning “Biryuza-4” ilmiy-texnika shirkati bilan 2001-yil mavsumida shakar zavodini ishga tushirishga tayyorlashda qatnashish uchun 10 nafar mutaxassisni jalb etish yuzasidan kontrakt tuzsin.

Oʻzbekiston Respublikasi Mehnat va aholini ijtimoiy muhofaza qilish vazirligi taklif etilgan mutaxassislarga mehnat faoliyati huquqiga belgilangan tartibda ruxsatnoma bersin.

5. Oʻzbekiston Respublikasi Qishloq va suv xoʻjaligi vazirligi respublika xoʻjaliklarida yetishtirilgan qand lavlagi urugʻini Qirgʻiziston Respublikasining Kant shahridagi ixtisoslashtirilgan korxonada qayta ishlash, keyinchalik qayta ishlashdan olingan mahsulotlarni belgilangan tartibda Oʻzbekiston Respublikasiga olib kelish (qaytarish) masalalarini bir hafta muddatda hal etsin.

6. Quyidagilar bojxona toʻlovlari (bojxona rasmiylashtirilishi uchun yigʻimlardan tashqari) toʻlashdan ozod qilinsin:

“Oziqovqatsanoat” uyushmasi tomonidan import boʻyicha keltiriladigan 30 tonna qand lavlagi urugʻi;

qayta ishlashdan olingan mahsulotlarni belgilangan tartibda Oʻzbekiston Respublikasiga qaytarib keltirgan holda, Qirgʻiziston Respublikasiga qayta ishlashga olib ketiladigan 10 tonna qand lavlagi urugʻi (sof ogʻirligi);

shakar ishlab chiqarish uchun zarur boʻlgan ilovaga muvofiq yordamchi materiallar va ehtiyot qismlar.

7. “Oʻzavtotrans” davlat korporatsiyasi va “Oʻzbekiston temir yoʻllari” kompaniyasi belgilangan tartibda “Oziqovqatsanoat” uyushmasiga qand lavlagi, shakar xom ashyosi, shakar, melassa va boshqa yordamchi materiallar va asbob-anjomlar tashish uchun avtotransport vositalari, shuningdek kodlar va temir yoʻl vagonlari ajratsinlar.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.