Futbolni rivojlantirish uchun qoʻshimcha shart-sharoitlar yaratish, uning aholi salomatligini mustahkamlash va jismoniy madaniyatini yuksaltirishdagi rolini oshirish, Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalari futbolni rivojlantirishni muvofiqlashtirish va qoʻllab-quvvatlash masalalaridagi faoliyatini faollashtirish, shuningdek ularning moddiy-texnika bazasini mustahkamlash maqsadida Vazirlar Mahkamasi qaror qiladi:

1. Oʻzbekiston futbol assotsiatsiyasi hamda Oʻzbekiston Respublikasi Jismoniy tarbiya va sport vazirligining Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalariga quyidagi asosiy vazifalarni hal etishni yuklash toʻgʻrisidagi taklifiga rozilik berilsin:

futbolning barcha turlarini, shu jumladan havaskorlik futboli va professional futbolni rivojlantirishning muvofiqlashtirilishini taʼminlash;

futbol klublari va jamoalariga ularning futbol boʻyicha hududiy, respublika va xalqaro musobaqalarga tayyorlanishida va ularda qatnashishida har tomonlama koʻmaklashish;

aholi keng qatlamlari oʻrtasida futbol boʻyicha musobaqalar oʻtkazishni tashkil etish;

Oʻzbekiston oʻsmirlar va yoshlar terma jamoalariga nomzodlar tayyorlash uchun javob beradigan asosiy futbol klublari sifatida ularning huzuridagi futbol boʻyicha bolalar-oʻsmirlar sport maktablarini rivojlantirish hamda futbol klublari uchun rezerv tayyorlash monitoringini amalga oshirish;

futbolchilar, trenyerlar va hakamlar, shuningdek tegishli hududdagi futbol boʻyicha boshqa mutaxassislarni tayyorlash, qayta tayyorlash va ularning malakasini oshirish;

futbolni, shu jumladan xalqaro arenada rivojlantirishga katta hissa qoʻshgan hududiy futbol assotsiatsiyalari aʼzolarini, futbolchilar, trenyerlar va hakamlarni, futbol faxriylari va boshqa mutaxassislarni axborotlar bilan, ilmiy-metodik va moddiy-texnik jihatdan taʼminlashga koʻmaklashish.

2. Oʻzbekiston Futbol federatsiyasi tomonidan ishlab chiqilgan Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalari toʻgʻrisidagi Namunaviy nizom ilovaga muvofiq maʼqullansin.

Qoraqalpogʻiston Respublikasi, viloyatlar va Toshkent shahar futbol federatsiyalariga Oʻzbekiston Futbol federatsiyasi bilan kelishgan holda Namunaviy nizomga muvofiq oʻz ustavlarini bir oy muddatda qayta koʻrib chiqish va adliya organlariga davlat roʻyxatidan oʻtkazish uchun belgilangan tartibda taqdim etish tavsiya qilinsin.

Oʻzbekiston Respublikasi Adliya vazirligi Qoraqalpogʻiston Respublikasi, viloyatlar va Toshkent shahar futbol federatsiyalarining ustavlarini davlat roʻyxatidan oʻtkazishda koʻmaklashsin.

3. Tegishli hududlar hududiy futbol assotsiatsiyalarining prezidentlari hisoblanadigan Qoraqalpogʻiston Respublikasi Vazirlar Kengashi Raisiga, viloyatlar va Toshkent shahar hokimlariga quyidagi vazifalarni hal etish yuklansin:

Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalarining moliyaviy hamda moddiy-texnika bazasini mustahkamlashda, tegishli hududda futbolni rivojlantirish uchun homiylar topishda, shuningdek ularni joylashtirish uchun binolar ajratishda koʻmaklashish;

professional futbol klublari huzuridagi futbol boʻyicha bolalar-oʻsmirlar sport maktablarining rivojlanishini doimiy nazorat qilish hamda ularning moddiy-texnika bazasini mustahkamlashda koʻmaklashish;

tegishli hududda professional futbolni rivojlantirish uchun zarur shart-sharoitlar yaratilishini taʼminlash.

4. Belgilansinki, Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalari ish haqi fondlarini moliyalashtirish Oʻzbekiston Futbol assotsiatsiyasining mablagʻlari hisobiga amalga oshiriladi.

5. Oʻzbekiston Respublikasi Xalq taʼlimi vazirligi huzuridagi Bolalar sportini rivojlantirish jamgʻarmasi hamda Oʻzbekiston futbolini qoʻllab-quvvatlash jamgʻarmasi professional futbol klublari huzuridagi futbol boʻyicha bolalar-oʻsmirlar sport maktablarini yanada rivojlantirishni taʼminlash maqsadida:

professional futbol klublari huzuridagi futbol boʻyicha yangi bolalar-oʻsmirlar sport maktablarini qurish va mavjudlarini rekonstruksiya qilish uchun 2010-yilda teng ulushlarda 8 mlrd soʻm miqdorida mablagʻ ajratishni nazarda tutsinlar;

professional futbol klublari huzuridagi futbol boʻyicha bolalar-oʻsmirlar sport maktablarini rivojlantirish uchun tegishli loyiha-smeta hujjatlari bir oy muddatda tayyorlanishini taʼminlasinlar hamda ularni belgilangan tartibda tasdiqlash uchun taqdim etsinlar.

6. Fargʻona (X. Neʼmatov), Namangan (B. Yusupov) va Samarqand (Oʻ. Barnoyev) viloyatlari hokimliklari Oʻzbekiston Futbol federatsiyasi bilan birgalikda:

“Fargʻona” (Fargʻona shahri), “Navbahor” (Namangan shahri), “Dinamo” (Samarqand shahri) markaziy stadionlarini mukammal taʼmirlash yuzasidan tegishli loyiha-smeta hujjatlari tayyorlanishini bir oy muddatda taʼminlasinlar hamda ularni belgilangan tartibda tasdiqlash uchun taqdim etsinlar;

7. Oʻzbekiston Futbol assotsiatsiyasiga Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalarining rahbar va shtatdagi xodimlariga nisbatan talablarni, ularning malakasini, ishbilarmonlik, kasbiy va boshqa sifatlarini, malakasini oshirish davriyligini hisobga olgan holda belgilash tavsiya etilsin.

8. Oʻzbekiston matbuot va axborot agentligi, Oʻzbekiston milliy teleradiokompaniyasi hamda boshqa ommaviy axborot vositalari Qoraqalpogʻiston Respublikasida, viloyatlar va Toshkent shahrida ommaviy futbol harakatining rivojlanishini, eng yaxshi futbol klublari, sport maktablari, jismoniy tarbiya jamoalari, futbol boʻyicha trenyerlar va boshqa mutaxassislar faoliyatini muntazam ravishda va keng yoritsinlar, rasmiy futbol oʻyinlari oʻtkazilishini targʻib va reklama qilsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

1. Ushbu Namunaviy nizom Qoraqalpogʻiston Respublikasi, viloyatlar va Toshkent shahar hududiy futbol assotsiatsiyalari faoliyatining asosiy prinsiplari va yoʻnalishlarini belgilaydi.

2. Ushbu Namunaviy nizomda quyidagi asosiy tushunchalar qoʻllaniladi:

Xalqaro Futbol Federatsiyasi — jahonda futbolning barcha turlarini, havaskorlik futbolini va professional futbolni rivojlantirishni muvofiqlashtirish va boshqarish yuzasidan mutlaq huquqqa ega boʻlgan tashkilot;

Osiyo Futbol Konfederatsiyasi — mamlakatlarning Osiyo qitʼasiga kiradigan Milliy futbol federatsiyalarini birlashtiruvchi hamda Osiyodagi futbolning barcha turlarini, havaskorlik futbolini va professional futbolni rivojlantirishni muvofiqlashtirish va boshqarish yuzasidan mutlaq huquqqa ega boʻlgan tashkilot;

Oʻzbekiston Futbol assotsiatsiyasi — Oʻzbekistonda futbolning barcha turlarini, shu jumladan havaskorlik futbolini va professional futbolni rivojlantirishni muvofiqlashtiruvchi tashkilot;

Sport va jismoniy tarbiya — ommaviy tadbirlar reglamenti (Reglament) — sport va jismoniy tarbiya — ommaviy tadbirlarni tashkil etish va oʻtkazish tartibini belgilaydigan hamda ular yuzasidan shartlar va talablarni qoʻllanish va bajarish tartibini belgilaydigan qoidalar yigʻindisidan iborat boʻlgan asosiy hujjat;

Sport va jismoniy tarbiya — ommaviy tadbirlar toʻgʻrisida Nizom (Nizom) — sport va jismoniy tarbiya — ommaviy tadbirlarni tashkil etish va oʻtkazish tartibini belgilaydigan asosiy hujjat;

oʻquv-trenirovka yigʻinlari — sport yoʻnalishiga, pedagogik va tarbiyaviy xaraktyerga ega boʻlgan, futbolchilarni musobaqalarda va jismoniy tarbiya-ommaviy tadbirlarda muvaffaqiyatli qatnashishga tayyorlash uchun sport mahoratini oshirishga yoʻnaltirilgan uyushtirilgan tadbirlar;

futbol boʻyicha trener — yuqori malakali va sport rezervi futbolchilarini tayyorlash boʻyicha mutaxassis hisoblanadigan shaxs;

futbolchi — havaskorlik yoki professional asosda futbol bilan muntazam ravishda shugʻullanadigan, oʻz sport mahoratini doimiy oshirib boradigan va futbol boʻyicha oʻtkaziladigan musobaqalarda muntazam qatnashadigan shaxs;

futbol boʻyicha hakam — futbol boʻyicha musobaqalarni oʻtkazishda ularning Qoidalariga va reglamentlovchi hujjatlariga muvofiq ularni nazorat qilish va boshqarishni taʼminlaydigan shaxs;

futbol boʻyicha terma jamoalar — futbolchilarning texnik-taktik tayyorgarligini takomillashtirish va sport mahoratini oshirish maqsadida shakllantirilgan, rahbarlar, menejyerlar, maʼmurlar, trenyerlar, futbolchilar, vrachlar, farmatsevtlar, massajchilar, psixologlar, ilmiy va xizmat koʻrsatuvchi xodimlar va boshqa mutaxassislardan iborat boʻlgan jamoalar.

3. Qoraqalpogʻiston Respublikasi, viloyatlar va Toshkent shahar Hududiy futbol assotsiatsiyalari (keyingi oʻrinlarda hududiy assotsiatsiyalar deb ataladi) futbolni rivojlantirishdan manfaatdor boʻlgan yuridik va jismoniy shaxslarni birlashtiruvchi, tegishli hududlarda futbolning barcha turlarini, shu jumladan havaskorlik futbolini va professional futbolni rivojlantirishni muvofiqlashtiruvchi nodavlat notijorat tashkilotlar hisoblanadi.

4. Hududiy assotsiatsiya belgilangan tartibda davlat roʻyxatidan oʻtkazilgan vaqtdan boshlab yuridik shaxs maqomiga ega boʻladi.

5. Hududiy assotsiatsiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Namunaviy nizomga, shuningdek oʻz ustaviga hamda Oʻzbekiston Futbol federatsiyasi hujjatlariga amal qiladi.

6. Quyidagilar Hududiy assotsiatsiyaning maqsadi va vazifalari hisoblanadi:

futbolning barcha turlarini, havaskorlik futbolini va professional futbolni rivojlantirishning muvofiqlashtirilishini taʼminlash;

futbol klublari va jamoalariga ularning futbol boʻyicha hududiy, respublika va xalqaro musobaqalarga tayyorlanishida va ularda qatnashishida har tomonlama koʻmaklashish;

aholi keng qatlamlari oʻrtasida futbol boʻyicha musobaqalar oʻtkazishni tashkil etish;

Oʻzbekiston oʻsmirlar va yoshlar terma jamoalariga nomzodlar tayyorlash uchun javob beradigan asosiy futbol klublari sifatida ularning huzuridagi futbol boʻyicha bolalar-oʻsmirlar sport maktablarini rivojlantirish hamda futbol klublari uchun rezerv tayyorlash monitoringini amalga oshirish;

futbolchilar, trenyerlar va hakamlar, shuningdek tegishli hududdagi futbol boʻyicha boshqa mutaxassislarni tayyorlash, qayta tayyorlash va ularning malakasini oshirish;

futbolni, shu jumladan xalqaro arenada rivojlantirishga katta hissa qoʻshgan hududiy futbol assotsiatsiyalari aʼzolarini, futbolchilar, trenyerlar va hakamlarni, futbol faxriylari va boshqa mutaxassislarni axborotlar bilan, ilmiy-metodik va moddiy-texnik jihatdan taʼminlashga koʻmaklashish;

joylarda futbol boʻyicha sport-ommaviy tadbirlar oʻtkazish orqali tinchlik, doʻstlik va oʻzaro hamfikrlik gʻoyalarini targʻib qilish;

futbolni targʻib qilish va rivojlantirish, uning manfaatlari va qadriyatlarini himoya qilish, tegishli hududlarda joylashgan turli tashkilotlarda futbolni muvofiqlashtirish va rivojlantirish;

futbolni axborotlar bilan, ilmiy-metodik va moddiy-texnik jihatdan taʼminlash;

futbolchilar, trenyerlar va hakamlarning, shuningdek tegishli hududdagi futbol boʻyicha boshqa mutaxassislarning huquq va manfaatlarini himoya qilish.

7. Hududiy assotsiatsiya oʻz faoliyatini kontraktlar (shartnomalar), oʻzaro ixtiyoriy hamkorlik va oʻzaro munosabatlarning taqiqlanmagan boshqa shakllari asosida amalga oshiradi.

8. Hududiy assotsiatsiya maqsadi va vazifalariga erishish uchun:

futbol boʻyicha chempionatlar va kuboklarni, turli turnirlar, festivallar, konferensiyalar va simpoziumlarni tashkil etadi va oʻtkazadi;

futbolchilar, trenyerlar va hakamlar, shuningdek tegishli hududdagi futbol boʻyicha boshqa mutaxassislar uchun, shu jumladan respublika va xalqaro kurslar, seminarlar va yigʻinlar tashkil qiladi va oʻtkazadi;

tegishli hududda futbolni rivojlantirishni muvofiqlashtiradi, hududiy assotsiatsiya aʼzolari, futbolchilar, trenyerlar va hakamlar, shuningdek tegishli hududdagi futbol boʻyicha boshqa mutaxassislar oʻrtasida vujudga kelishi mumkin boʻlgan kelishmovchiliklar va bahslarni tartibga solishni taʼminlaydi;

Hududiy assotsiatsiya ustavini, futbol va uning qoidalarini buzish va suiisteʼmol qilishning turli shakllarini, musobaqaga zararli va boshqa salbiy metodlar yoki amaliyotning joriy etilishini bartaraf etishga yoʻnaltirilgan zarur chora-tadbirlarni tashkil qiladi;

futbolchilar, trenyerlar va hakamlarni, shuningdek tegishli hududdagi futbol boʻyicha boshqa mutaxassislarni tayyorlash, qayta tayyorlash va ularning malakasini oshirishni tashkil qiladi;

futbol boʻyicha ilmiy-metodik va ommabop adabiyotlar nashr etish, shuningdek tadbirkorlik bilan shugʻullanishni va qonun hujjatlariga zid boʻlmagan boshqa faoliyatni belgilangan tartibda amalga oshiradi.

9. Assotsiatsiya Oʻzbekiston Futbol assotsiatsiyasiga futbol boʻyicha terma jamoalarni, futbol klublarini, futbolchilar, trenyerlar va hakamlarni, shuningdek, tegishli hududdagi futbol boʻyicha boshqa mutaxassislarni tavsiya etadi.

10. Hududiy assotsiatsiya:

tegishli hududlarning terma jamoalari va futbol klublarining hujjatlarini rasmiylashtirmasdan Xalqaro Futbol Federatsiyasi, Osiyo Futbol Konfederatsiyasi va Oʻzbekiston Futbol assotsiatsiyasi tomonidan oʻtkaziladigan musobaqalarda va boshqa sport musobaqalarida qatnashishiga;

futbolchilar, trenyerlar, hakamlar va futbol boʻyicha boshqa mutaxassislar tomonidan futbol oʻyinlari qoidalarining, Reglament va Nizomning, oʻzlarining faoliyatiga taalluqli boshqa hujjatlar normalari va talablarining buzilishiga;

Xalqaro Futbol Federatsiyasi, Osiyo Futbol Konfederatsiyasi, Oʻzbekiston Futbol assotsiatsiyasining tegishli ruxsatnomalariga ega boʻlmagan shaxslar tomonidan trenerlik va hakamlik faoliyati yuritilishiga yoʻl qoʻymaslik boʻyicha zarur chora-tadbirlarni koʻrishi kerak.

11. Hududiy assotsiatsiya futbol boʻyicha terma jamoalarni va ularning rezervini va/yoki alohida futbolchilarni tayyorlash boʻyicha oʻquv-trenirovka mashgʻulotlari yigʻinlarini tashkil etish va oʻtkazish masalalaridagi oʻz faoliyatini ham respublika hududida, ham chet elda amalga oshirishi mumkin.

12. Hududiy assotsiatsiya oʻzining maqsadi, vazifalari va funksiyalarini toʻlaqonli bajarish uchun doimiy faoliyat koʻrsatadigan organlarga ega boʻlishi, zarur mablagʻlarni qidirib topishi, bogʻlanish telefonlari (faks)ga, elektron pochta va sayt (veb-sayt)ga ega boʻlishi, Hududiy assotsiatsiya xodimlariga oʻz zimmasiga yuklangan funksiyalarini toʻlaqonli va samarali bajarishi uchun zarur shart-sharoitlar yaratishi kerak.

13. Hududiy assotsiatsiya oʻz ishlari va tadbirlarining yillik rejalarini ishlab chiqadi va tasdiqlash uchun Oʻzbekiston Futbol federatsiyasiga taqdim etadi.

14. Hududiy assotsiatsiya Xalqaro Futbol Federatsiyasi, Osiyo Futbol Konfederatsiyasi va boshqa xalqaro organlarda Oʻzbekiston futbol federatsiyasi nomidan mustaqil ravishda vakillik qilishi mumkin emas.

15. Hududiy assotsiatsiya Xalqaro Futbol Federatsiyasi, Osiyo Futbol Konfederatsiyasi va Oʻzbekiston Futbol federatsiyasi shafeligida tegishli hududda futbol boʻyicha musobaqalar va boshqa tadbirlarning tashkil etilishi va oʻtkazilishi uchun javob beradi.

16. Hududiy assotsiatsiya rahbariyati va maʼmuriyati tarkibini saylash tartibi qonun hujjatlariga muvofiq va Hududiy assotsiatsiyaning oʻz ustavida nazarda tutilgan tashkiliy-huquqiy shakliga muvofiq belgilanadi.

Hududiy assotsiatsiyaning birinchi vitse-prezidenti va shtatlar jadvali OʻFA bilan kelishgan holda Hududiy assotsiatsiya tomonidan tasdiqlanadi.

Hududiy assotsiatsiya (apparati)ning rahbariyati va maʼmuriyati tarkibi tuzilmasi ushbu Namunaviy nizomga ilovada belgilangan.

17. Hududiy assotsiatsiya belgilangan tartibda tegishli hududda futbolni yanada rivojlantirish masalalarini hal etish boʻyicha oʻz qoʻmitalari, kengashlari va komissiyalarini tashkil etishi, shuningdek jamgʻarmalar va boshqa tashkilotlar tashkil qilishi, noshirlik faoliyati hamda oʻzining maqsadi va vazifalariga muvofiq boshqa faoliyat turlari bilan shugʻullanishi mumkin.

18. Futbol uchun moʻljallangan sport inshootlari, futbol tashkilotlari, shuningdek terma jamoalar rahbarlari, futbol klublari va futbol boʻyicha boshqa jamoalar, tegishli hududning futbol boʻyicha barcha darajalardagi trenyerlari Hududiy assotsiatsiya bilan kelishilgan holda lavozimga tayinlanadi va lavozimdan ozod qilinadi.

19. Futbolchilar bilan oʻquv-trenirovka mashgʻulotlarini oʻtkazish faqat Oʻzbekiston Futbol assotsiatsiyasi tomonidan belgilangan tartibda futbol boʻyicha trenerlik faoliyatiga yoʻl qoʻyilgan shaxslar tomonidan amalga oshiriladi.

Futbol boʻyicha trenyerlar, futbolchilar, futbol boʻyicha hakamlar va tegishli hudud futboli boʻyicha boshqa mutaxassislarning kontraktlari (shartnomalari)ni roʻyxatdan oʻtkazish tartibi Oʻzbekiston Futbol assotsiatsiyasi tomonidan belgilanadi.

20. Futbol boʻyicha trenyerlar, hakamlar va tegishli hududdagi futbol boʻyicha boshqa mutaxassislarni tayyorlash hamda ularning malakasini oshirish boʻyicha mashgʻulotlarni oʻtkazish faqat Oʻzbekiston Futbol assotsiatsiyasi tomonidan ushbu faoliyat bilan shugʻullanishga belgilangan tartibda qoʻyilgan shaxslar tomonidan amalga oshiriladi.

21. Oʻquv-trenirovka yigʻinlarini tashkil etish va oʻtkazish Hududiy assotsiatsiya qarorlariga muvofiq amalga oshiriladi.

22. Hududiy assotsiatsiyalar Kalendariga kiritilgan futbol musobaqalari hududiy maqomidan, darajasi va koʻlamidan qatʼi nazar Hududiy assotsiatsiyaning rasmiy musobaqalari hisoblanadi hamda Hududiy assotsiatsiyaning rahbarligida va OʻFAning kuzatuvi ostida oʻtkaziladi.

Assotsiatsiya taqvimiga kiritilgan musobaqalarni boshqarish, ularni oʻtkazish Assotsiatsiya tomonidan roʻyxatdan oʻtkazilgan hakamlar tomonidan amalga oshiriladi.

Assotsiatsiyaning rasmiy musobaqalarida qatnashishga qoʻyish musobaqalar toʻgʻrisidagi Reglamentga va Nizomga hamda Futbol oʻyini qoidalariga muvofiq amalga oshiriladi.

Assotsiatsiyaning rasmiy musobaqalari oʻtkazilayotganda:

Assotsiatsiyaning aʼzolari hisoblanmagan, Assotsiatsiyada akkreditatsiyadan oʻtmagan hamda Assotsiatsiyaning rasmiy homiylari hisoblanmagan tashkilotlarning ramzlari, logotiplari va qisqartma soʻzlaridan reklama maqsadlarida foydalanishga;

Assotsiatsiyada akkreditatsiyadan oʻtmagan jismoniy va yuridik shaxslar tomonidan har qanday suratga olish va translatsiyalarga;

Oʻzbekiston Futbol Assotsiatsiyasi tomonidan maʼqullanmagan sport kiyimlari, inventar va jihozlardan, shuningdek elektron, oʻlchov, texnik va boshqa yordamchi vositalardan foydalanishga yoʻl qoʻyilmaydi.

23. Tegishli hududning turli tashkilotlari tomonidan oʻtkaziladigan futbol musobaqalari Hududiy assotsiatsiya tomonidan tasdiqlanishi kerak. Futbol oʻyini qoidalariga rioya qilinishini va turli tashkilotlar tomonidan oʻtkaziladigan musobaqalarni ularni tartibga soluvchi hujjatlarga muvofiq boshqarishni nazorat qilishni taʼminlash faqat Hududiy assotsiatsiya tomonidan tavsiya etilgan futbol hakamlari tomonidan amalga oshirilishi kerak.

24. Futbolni ommalashtirishga, uni ilmiy-metodik va texnik jihatdan taʼminlashga, futbol murabbiylari, futbolchilar va futbol hakamlarining, shuningdek futbol boʻyicha boshqa mutaxassislarning malakasini oshirishga yoʻnaltirilgan festivallar, konferensiyalar, simpoziumlar, kurslar, seminarlar, yigʻinlar, sport-koʻngilochar, jismoniy tarbiya-sogʻlomlashtirish va boshqa sport tadbirlarini tashkil etish va oʻtkazish Hududiy assotsiatsiyaning qaroriga koʻra amalga oshiriladi.

25. Tegishli hududning futbol boʻyicha terma jamoalari va ularning zaxirasi Assotsiatsiya va Oʻzbekiston Futbol assotsiatsiyasi tomonidan tasdiqlanadi.

Terma jamoalar va ularning zaxirasini shakllantirish shartlari, talablari va tartibi belgilangan tartibda tasdiqlanadi.

Tegishli hududning futbol boʻyicha terma jamoalari va ularning zaxirasi katta yoshdagilar, yoshlar (oʻsmirlar), oʻsmirlar va bolalar toifasiga boʻlinishi mumkin.

Tegishli hududning futbol boʻyicha terma jamoalari va ularning zaxirasiga kiritish uchun futbol hakamlari, futbolchilar, shuningdek futbol boʻyicha boshqa mutaxassislar Oʻzbekiston Futbol assotsiatsiyasi tomonidan belgilangan talablarga javob berishi kerak.

Tegishli hududning terma jamoalarini taʼminlash, ularni tayyorlash, shu jumladan oʻquv-trenirovka yigʻinlari oʻtkazish hamda musobaqalarda va/yoki jismoniy tarbiya-ommaviy tadbirlarda qatnashish:

terma jamoa aʼzolarining ovqatlanishi, yoʻl yurishi, joylashishi va sutkalik puli, shuningdek ularni farmakologiya va tiklanish vositalari, vitaminlar va oqsil-glyukoza preparatlari, umumiy davolanish maqsadidagi dori-darmonlar va bogʻlash materiallari bilan taʼminlash;

sport inshootlari, jihozlar, inventar va texnik vositalardan foydalanganlik uchun ijara toʻlovi;

terma jamoalar aʼzolarining energiyaga boʻlgan ehtiyojini, sarflangan kuch-quvvati va jismoniy resurslari kompensatsiyasi uchun oziq-ovqatlarning asosiy komponentlari bilan taʼminlash;

terma jamoalar aʼzolarini zarur sport buyumlari, kiyim-bosh, inventar va jihozlar bilan taʼminlash, ularning tiklanish tadbirlari (fizioterapevtik, psixologik va boshqalar);

terma jamoalar aʼzolarini tayyorlash uchun audio va video jihozlar hamda materiallar sotib olish, oʻquv-metodik jihatdan taʼminlash va davolash-pedagogik tekshiruvlar va nazorat qilish hamda terma jamoalar futbolchilarini samarali tayyorlash maqsadida ilmiy tadqiqotlarni tashkil etish va olib borish;

terma jamoalar aʼzolarini akkreditatsiyadan oʻtkazishga, ularga viza olish uchun haq toʻlash va ularning musobaqalar, jismoniy tarbiya-ommaviy tadbirlarda va oʻquv-mashq yigʻinlarida qatnashganligi uchun badal toʻlash, doping-nazoratdan oʻtish;

aeroportlar, temir yoʻl, avtomobil va suv vokzallari yigʻimlarini toʻlash, sport inventari va jihozlarini transportda tashish, yoqilgʻi-moylash materiallari va boshqa zarur materiallar bilan taʼminlash;

futbol murabbiylari va mutaxassislari, shu jumladan xorijiy murabbiylar va mutaxassislar mehnatiga haq toʻlash, terma jamoalar aʼzolarini qonun hujjatlarida belgilangan tartibda sugʻurta qilish, vakillik xarajatlari va koʻzda tutilmagan xarajatlar (apellatsiya, daʼvo, faks, xalqaro telefon soʻzlashuvlaridan foydalanganlik uchun haq toʻlash, ogʻir jarohatlar olinganda tibbiy yordam uchun haq toʻlash, Internet xizmatlar), shikast yetkazganlik uchun haq toʻlash va boshqa xarajatlar bilan bogʻliq xarajatlarni taqozo etadi.

Terma jamoalarning oʻquv-trenirovka yigʻinlarida va/yoki jismoniy tarbiya-ommaviy tadbirlarda qatnashishi bilan bogʻliq boshqa xarajatlar qonun hujjatlari bilan tasdiqlangan meʼyorlar boʻyicha qoplanadi.

Xorijiy valyutadagi xarajatlar belgilangan tartibda tasdiqlangan meʼyorlarga, shuningdek Reglament va/yoki Nizomning moliyaviy shartlariga yoxud qabul qilish shartlariga muvofiq ajratilgan va kelishilgan mablagʻlar doirasida aniqlanadi.

26. Hududiy assotsiatsiya oʻz faoliyatini samarali taʼminlash maqsadida qonun hujjatlariga muvofiq oʻz mulki boʻlgan va/yoki ijaraga olingan maʼmuriy va qoʻshimcha binolarga ega boʻlishi, sport bazasini (sport zallari, basseynlar, maydonchalar va hokazolarni) ijaraga olishi, tibbiyot xonasi, kino-, foto-, videolaboratoriyalar, metodika xonasi, jihozlar va inventar, metodik adabiyotlar, koʻrgazmali qoʻllanmalar, avtotransport, texnik va elektron vositalar, yer uchastkalari, binolar, inshootlar, turarjoy fondiga, soʻmda va xorijiy valyutada pul mablagʻlariga, qimmatli qogʻozlar hamda boshqa koʻchar va koʻchmas mulkka ega boʻlishi mumkin.

27. Hududiy assotsiatsiya OʻFA yoki boshqa tashkilotlar tomonidan berilgan mol-mulkning, shuningdek, Hududiy assotsiatsiyaning oʻzi boshqa qonuniy asoslarda sotib olgan mol-mulkning egasi hisoblanadi.

28. Hududiy assotsiatsiyaning mablagʻlari va mol-mulki quyidagi manbalardan:

kirish badallari;

yillik aʼzolik badallari;

homiylardan tushadigan mablagʻlar;

xoʻjalik faoliyatidan, shu jumladan noshirlik faoliyatidan olingan daromadlar;

Assotsiatsiya ustavida nazarda tutilgan tadbirlarni oʻtkazishdan tushgan tushumlar;

Oʻzbekiston Futbol assotsiatsiyasi va boshqa tashkilotlarning moliyaviy qoʻllab-quvvatlashi, shuningdek jismoniy va yuridik shaxslarning xayriya badallari;

pulli xizmatlar koʻrsatish, Hududiy assotsiatsiyaning rasmiy ramzlaridan foydalanish, davlat tashkilotlari va boshqa tashkilotlardan tushadigan subsidiyalar, shuningdek qonun hujjatlariga zid boʻlmagan boshqa manbalar va daromadlardan shakllantiriladi.

29. Hududiy assotsiatsiyaning moliyaviy mablagʻlari va daromadlari futbolni rivojlantirish va ommalashtirish qatnashchilari, Hududiy assotsiatsiya aʼzolari va har qanday boshqa shaxslar oʻrtasida taqsimlanmaydi hamda faqat Hududiy assotsiatsiyaning tegishli maqsadlari, vazifalari va faoliyati xarajatlariga yoʻnaltirilishi mumkin.

30. Qonun hujjatlarida nazarda tutilgan soliqlar va boshqa majburiy toʻlovlar belgilangan tartibda Hududiy assotsiatsiya tomonidan toʻlanadi.

31. Hududiy assotsiatsiya qonun hujjatlariga muvofiq oʻz faoliyati natijalarining buxgalteriya hisobini amalga oshiradi, statistika hisoboti yuritadi, hisobot maʼlumotlari va balans hisob-kitoblarining ishonchliligini taʼminlaydi.

32. Hududiy assotsiatsiya va uning organlarining mol-mulki va hujjatlari qonun hujjatlarida belgilangan tartibda hisobga olinadi.

33. Hududiy assotsiatsiya tegishli hududda futbolni rivojlantirishga tegishli barcha masalalarda Oʻzbekiston Futbol federatsiyasi bilan mustahkam aloqada ishlaydi va unga hisob beradi. Hududiy assotsiatsiya Oʻzbekiston Futbol federatsiyasiga har yilgi hisobot taqdim etadi.

34. Hududiy assotsiatsiya qonun hujjatlariga muvofiq roʻyxatdan oʻtkazuvchi va boshqa organlarga hisobotlar taqdim etadi.

35. Assotsiatsiya tomonidan Xalqaro Futbol Federatsiyasi, Osiyo Futbol Konfederatsiyasi va Oʻzbekiston Futbol assotsiatsiyaning qarorlari, Futbol oʻyini qoidalari buzilganligi uchun belgilangan tartibda quyidagi tegishli intizomiy choralar qoʻllanilishi mumkin:

Hududiy assotsiatsiyaning jamoa aʼzolariga, tegishli hududning futbol boʻyicha sport tadbirlarini ommalashtiradigan yoki oʻtkazadigan futbol klublari va tashkilotlariga — ogohlantirish, jarima solish, oʻyinni tomoshabinlarsiz oʻtkazish, oʻyin natijalarini bekor qilish, muayyan stadionda oʻyin oʻtkazishni taqiqlash, oʻyinni betaraf maydonda oʻtkazish, musobaqalarda qatnashishni taqiqlash, transferni taqiqlash, ochkolarni olib tashlash, quyi divizionga oʻtkazish, aʼzolikdan chiqarish;

Hududiy assotsiatsiyaning yakka tartibdagi aʼzolariga (futbol boʻyicha trenyerlarga, futbolchilarga, futbol boʻyicha hakamlarga, shuningdek tegishli hududdagi futbol boʻyicha boshqa mutaxassislarga) — ogohlantirish, jarima, musobaqalarda qatnashish natijalarini bekor qilish, musobaqalarda ishtirok etishdan chetlatish, musobaqalarda ishtirok etishni taqiqlash, oʻyinda qatnashishdan mahrum etish, mukofotdan mahrum qilish, malakasidan mahrum qilish yoki uni pasaytirish, tegishli hududda futbol bilan bogʻliq boʻlgan har qanday faoliyatda ishtirok etishdan chetlatish.

36. Hududiy assotsiatsiyani tugatish belgilangan tartibda amalga oshiriladi.

Hududiy assotsiatsiyani tugatish Oʻzbekiston Respublikasi Fuqarolik kodeksi va boshqa qonun hujjatlarida nazarda tutilgan tartibda amalga oshiriladi.

37. Kreditorlar talablari qondirilgandan keyin qolgan mol-mulk Hududiy assotsiatsiya ishtirokchilari (aʼzolari), shuningdek rahbar organlar aʼzolari yoki Hududiy assotsiatsiya xodimlari oʻrtasida taqsimlanishi mumkin emas va ulardan futbolni rivojlantirish uchun belgilangan tartibda foydalaniladi.

38. Davlat tashkilotlari va boshqa tashkilotlar Hududiy assotsiatsiyaga har tomonlama yordam koʻrsatishi mumkin. Davlat tashkilotlari va boshqa tashkilotlar tomonidan yordam koʻrsatish qonun hujjatlarida belgilangan tartibda tuzilgan kontraktlar (shartnomalar) asosida amalga oshiriladi.

39. Assotsiatsiyaning Oʻzbekiston Futbol assotsiatsiyasiga aʼzoligi Oʻzbekiston Futbol assotsiatsiyasi ustaviga muvofiq belgilanadi.

40. Futbol boʻyicha paydo boʻladigan barcha bahsli masalalar, qoidaga koʻra,Assotsiatsiya va Oʻzbekiston Futbol assotsiatsiyasida koʻrib chiqiladi.

41. Federatsiyaning xatti-harakati oqibatida Xalqaro Futbol Federatsiyasi, Osiyo Futbol Konfederatsiyasi yoki boshqa vakolatli tashkilotlar tomonidan Oʻzbekiston Futbol federatsiyasiga jarima sanksiyalari qoʻllanilgan taqdirda, unda bu sanksiyalar Federatsiyaning oʻzi tomonidan qoplanishi kerak.

42. Federatsiyaning moliyaviy-xoʻjalik faoliyatini tekshirish qonun hujjatlarida belgilangan tartibda amalga oshiriladi.

43. Federatsiya faoliyatini nazorat qilish roʻyxatdan oʻtkazgan va boshqa vakolatli tashkilotlar tomonidan, belgilangan tartibda amalga oshiriladi.

44. Xalqaro Futbol Federatsiyasi, Osiyo Futbol Konfederatsiyasi va Oʻzbekiston Futbol federatsiyasining normativ hujjatlari Federatsiya va tegishli hududda futbolni rivojlantirayotgan barcha tashkilotlar uchun amal qilinadigan hujjatlar hisoblanadi.

45. Mazkur Namunaviy nizomda tartibga solinmagan munosabatlar tegishli qonun hujjatlariga muvofiq belgilanadi.