2008-yil 17-18-mart kunlari Oʻzbekiston Respublikasi Prezidentining Birlashgan Arab Amirliklariga Rasmiy tashrifi chogʻida imzolangan Oʻzbekiston Respublikasi bilan Birlashgan Arab Amirliklari oʻrtasida siyosiy, savdo-iqtisodiy, investitsiyaviy va madaniy-gumanitar hamkorlikni rivojlantirish toʻgʻrisidagi ikki tomonlama hukumatlararo hamda idoralararo bitimlarni toʻlaqonli va oʻz vaqtida amalga oshirishni taʼminlash maqsadida:

1. Quyidagilar:

Oʻzbekiston Respublikasi Prezidentining Birlashgan Arab Amirliklariga Rasmiy tashrifi chogʻida imzolangan bitim va erishilgan kelishuvlarni amalga oshirish Tadbirlari dasturi 1-ilovaga* muvofiq;

Birlashgan Arab Amirliklari bilan savdo-iqtisodiy va investitsiyaviy hamkorlik doirasida amalga oshirish uchun ishlab chiqilayotgan loyihalar roʻyxati 2-ilovaga* muvofiq tasdiqlansin.

Ushbu Qaror ilovalarida koʻrsatilgan vazirliklar va idoralar, masʼul ijrochilar Birlashgan Arab Amirliklari bilan siyosiy, savdo-iqtisodiy, investitsiyaviy va madaniy-gumanitar sohalarda keng qamrovli hamkorlikni rivojlantirish boʻyicha tasdiqlangan tadbirlar amalga oshirilishini taʼminlasin.

2. Oʻzbekiston Respublikasi Tashqi ishlar vazirligi, Tashqi iqtisodiy aloqalar, investitsiyalar va savdo vazirligi, Iqtisodiyot vazirligi Rasmiy tashrif davomida imzolangan hujjatlar va bitimlar ijrosi, ushbu Qaror bilan tasdiqlangan Tadbirlar dasturida nazarda tutilgan aniq tadbirlarning oʻz vaqtida ishlab chiqilishi va amalga oshirilishi ustidan tizimli nazorat oʻrnatsin.

3. Mazkur Qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi tashqi ishlar vaziri V.I. Norov zimmalariga yuklansin.

Ushbu Qaror bilan tasdiqlangan Tadbirlar dasturining ijrosi yuzasidan Oʻzbekiston Respublikasi Prezidenti Devoniga har chorakda axborot berib borilsin.