Mamlakatimizda va butun Oʻrta Osiyo mintaqasida eng nufuzli va yetakchi oliy oʻquv yurtlaridan biri boʻlgan Mirzo Ulugʻbek nomidagi Oʻzbekiston Milliy universitetining yoshlarning intellektual va maʼnaviy salohiyatini oshirish, yurtimiz ilm-fani va madaniyati, zamonaviy taʼlim tizimini rivojlantirish, yuksak malakali mutaxassislar tayyorlash, yigit-qizlarimizni vatanparvarlik va umuminsoniy qadriyatlarga hurmat ruhida tarbiyalash borasidagi beqiyos oʻrni va ulkan hissasini inobatga olib hamda ushbu bilim dargohi tashkil etilganining 90 yilligini munosib nishonlash maqsadida:

1. Oʻzbekiston Respublikasi Oliy va oʻrta maxsus taʼlim vazirligi va Fanlar akademiyasining 2008-yil sentyabr oyida Oʻzbekiston Milliy universitetining 90 yilligini nishonlash toʻgʻrisidagi taklifi maʼqullansin.

2. Oʻzbekiston Milliy universitetining 90 yilligiga bagʻishlangan tadbirlarni oʻtkazish boʻyicha tashkiliy qoʻmita tarkibi ilovaga* muvofiq tasdiqlansin.

3. Tashkiliy qoʻmita bir hafta muddat ichida ushbu sanaga bagʻishlangan tadbirlar rejasini ishlab chiqsin hamda ularning “Yoshlar yili” Davlat dasturida belgilangan maqsad va vazifalarga uygʻun va hamohang ravishda oʻtkazilishiga alohida eʼtibor qaratsin.

2008-yilning avgust oyida “Mamlakatimiz oliy taʼlim tizimi va ilm-fani rivojida Oʻzbekiston Milliy universitetining roli” mavzusida xalqaro ilmiy konferensiya oʻtkazishni yuqori saviyada tashkil etsin.

2008-yil sentyabr oyida “Yoshlik” talabalar shaharchasi stadionida “Yoshlar bugungi va ertangi kunimizning hal qiluvchi kuchidir” shiori ostida mamlakatimiz oliy oʻquv yurtlari talabalarining festivalini tashkil etishni taʼminlasin.

4. Vazirlar Mahkamasiga Oʻzbekiston Milliy universiteti majmuasi hududida bayram oldidan keng koʻlamdagi qurilish va rekonstruksiya, taʼmirlash ishlari olib borish, oʻquv binolari, talabalarning turar-joylari va boshqa ijtimoiy infratuzilma obyektlarini har tomonlama obod qilish boʻyicha tayyorgarlik ishlarini amalga oshirish topshirilsin.

5. Oʻzbekiston Milliy axborot agentligi, Oʻzbekiston Milliy teleradiokompaniyasi va boshqa ommaviy axborot vositalariga mazkur sanani oʻtkazish bilan bogʻliq tadbirlarni keng yoritish tavsiya etilsin.

6. Mazkur Qarorning bajarilishini nazorat qilish Oʻzbekiston Respublikasi Bosh vazirining oʻrinbosari R. Qosimov zimmasiga yuklansin.