“Odam savdosiga qarshi kurashish toʻgʻrisida” Oʻzbekiston Respublikasining 2008-yil 17-apreldagi OʻRQ-154-son Qonuniga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

2. Vazirlar Mahkamasining 1999-yil 12-apreldagi 171-son qarori (Oʻzbekiston Respublikasi QT, 1999-y., 4-son, 18-modda) bilan tasdiqlangan Oʻzbekiston Respublikasida vasiylik va homiylik toʻgʻrisidagi nizom ikkinchi qismining 4-bandi quyidagi tahrirda bayon qilinsin:

“4. Maktabgacha taʼlim, umumtaʼlim, davolash muassasalari, aholini ijtimoiy muhofaza qilish muassasalari, fuqarolarning oʻzini oʻzi boshqarish organlari, uy-joy xoʻjaligi organlari, huquqni muhofaza qilish organlari, voyaga yetmaganlar ishi boʻyicha komissiyalar, odam savdosidan jabrlanganlarga yordam koʻrsatuvchi va ularni himoya qiluvchi ixtisoslashtirilgan muassasalar va boshqa muassasalar, shuningdek fuqarolar vasiylik va homiylik organlariga:

ota-onasi yoki farzandlikka oluvchilari boʻlmagan bolalar toʻgʻrisida;

ota-onasi ota-onalik huquqidan mahrum qilingan bolalar toʻgʻrisida;

ota-onasining tarbiyasida boʻlishi bolalar manfaatlariga zid boʻlganda, shuningdek ularning hayoti va sogʻligʻi uchun bevosita tahdid mavjud boʻlgan bolalar toʻgʻrisida;

ota-onasi 6 oydan ortiq yoʻq boʻlgan bolalar toʻgʻrisida, agar bu bolalarning manfaatlari uchun zarur boʻlsa;

ota-onasining kasalligi sababli ota-onasining qarovisiz qolgan bolalar toʻgʻrisida;

ota-onasi ularni tarbiyalash, davolash muassasalaridan, aholini ijtimoiy muhofaza qilish muassasalaridan va boshqa shunga oʻxshash muassasalardan olishdan bosh tortgan bolalar toʻgʻrisida;

odam savdosidan jabrlangan bolalar toʻgʻrisida;

sud tomonidan muomalaga layoqatsiz yoki muomalaga layoqati cheklangan deb eʼtirof etilgan shaxslar toʻgʻrisida;

sogʻligʻi tufayli homiy tayinlanishiga muhtoj boʻlgan voyaga yetgan muomalaga layoqatli shaxslar toʻgʻrisida maʼlumotlar berishga majburdirlar”.