Gʻoʻzani defoliatsiya qilishni samarali oʻtkazish, dalalarni paxta hosilini erta muddatlarda yigʻishtirib olishga oʻz vaqtida tayyorlash va paxta terish mashinalaridan foydalanish darajasini oshirish maqsadida:

1. Oʻzbekiston Respublikasi Qishloq va suv xoʻjaligi vazirligining Qoraqalpogʻiston Respublikasi Vazirlar Kengashi va viloyatlar hokimliklari bilan kelishilgan 2007-yilda gʻoʻza defoliatsiya qilinadigan 1-ilovaga* muvofiq maydonlar va uning maqbul muddatlari toʻgʻrisidagi taklifiga rozilik berilsin.

2. Qoraqalpogʻiston Respublikasi Vazirlar Kengashi, viloyatlar va tumanlar hokimliklari gʻoʻzaning ekilgan muddatlari, yetilish, paxtaning ochilish davri, navi va joylardagi ob-havo — iqlim sharoitlarini hisobga olgan holda, tumanlar va paxta yetishtiruvchi fermer xoʻjaliklari boʻyicha gʻoʻzani 1-ilovada belgilangan muddatlarda defoliatsiya qilish yuzasidan aniq chora-tadbirlar koʻrsinlar.

Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlari, Oʻzbekiston Respublikasi qishloq va suv xoʻjaligi vaziri zimmalariga gʻoʻza belgilangan muddatlarda sifatli defoliatsiya qilinishi va defoliantlarni ishlatish normalari va tavsiyalariga qatʼiy rioya etilishi uchun shaxsiy javobgarlik yuklansin.

Oʻzbekiston Respublikasi Bosh prokuraturasi defoliatsiya oʻtkazilishi, eng avvalo defoliantlarni solish muddatlari va belgilangan meʼyorlariga rioya etilishi ustidan qatʼiy nazorat oʻrnatsin.

3. Oʻzbekiston Respublikasi Vazirlar Mahkamasi (Sh.M. Mirziyoyev):

2007-yilning 15-avgustigacha defoliatsiyaga tayyorgarlik koʻrish va oʻtkazishga oid jami ishlar kompleksini olib boruvchi respublika ishchi komissiyasini, shuningdek Qoraqalpogʻiston Respublikasi, viloyatlar va tumanlarda xuddi shunday ishchi komissiyalarini tashkil qilsin, ularning tarkibiga Oʻzbekiston Respublikasi Qishloq va suv xoʻjaligi vazirligi, Respublika oʻsimliklarni himoya qilish va agrokimyo markazi, “Oʻzpaxtasanoat” uyushmasi, Oʻzbekiston “Sifat” markazi, “Qishloqxoʻjalikkimyo” hududiy aksiyadorlik jamiyatlari mutaxassislari kiritilsin;

ishchi komissiyalar bilan birgalikda defoliatsiya ishlari boʻyicha kompleks chora-tadbirlar oʻtkazilishi ustidan qattiq va doimiy nazoratni taʼminlasin hamda agrotexnika tadbirlarini oʻtkazishning belgilangan muddatlari va normalariga rioya etishni taʼminlamayotgan mansabdor shaxslarga nisbatan qattiq shaxsiy javobgarlik choralarini koʻrsin.

4. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzkimyosanoat” va “Oʻzqishloqxoʻjalikmash-xolding” kompaniyalari, “Oʻzagromashservis” uyushmasi, “Qishloqxoʻjalikkimyo” hududiy aksiyadorlik jamiyatlari joriy yilning 20-avgustigacha:

fermer xoʻjaliklari boʻyicha defoliatsiya oʻtkazish maydonlarini aniqlab, har bir tuman boʻyicha defoliantlar bilan taʼminlash, defoliatsiyani maqbul muddatlarda sifatli oʻtkazilishini tashkil etish va oʻtkazish tadbirlarini ishlab chiqsinlar. Gʻoʻza defoliatsiya qilinadigan maydonlarni aniqlashda urugʻlik ekin maydonlari hisobga olinmasin.

defoliatsiyani yerda bajariladigan usullar bilan oʻtkazish uchun texnik vositalar va apparatlar tayyorlanishini tugallasinlar;

maydonchalarni tayyorlashni taxt qilib qoʻysinlar va ularda defoliantlar eritmasini tayyorlash uchun zarur idishlar va boshqa texnik vositalar mavjud boʻlishini taʼminlasinlar.

5. “Oʻzbekiston havo yoʻllari” milliy aviakompaniyasi “Oʻzkimyosanoat” AK buyurtmanomalari boʻyicha gʻoʻza defoliatsiyasini oʻtkazish uchun samolyotlar ajratsin va ularning mintaqalarga 2-ilovaga* muvofiq 2007-yil 18-avgustgacha yetib borishini taʼminlasin.

Viloyatlar hokimliklari joriy yilning 18-avgustiga qadar maxsus aerodromlar tayyorlanishini, shu jumladan uchuvchilar uchun zarur maishiy shart-sharoitlar yaratilishini tugallasinlar.

6. “Oʻzneftmahsulot” kompaniyasi yonilgʻi-moylash materiallarining zarur zaxirasini yaratsin hamda purkagichlar va samolyotlar ishini taʼminlash uchun gʻoʻzani defoliatsiya qilish davrida ularning belgilangan tartibda uzluksiz yetkazib berilishini tashkil etsin.

7. Oʻzbekiston Respublikasi Moliya vazirligi, Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi bir hafta muddatda, asosli buyurtmanomalarga binoan, tijorat banklariga fermer xoʻjaliklari uchun gʻoʻza defoliatsiyasini oʻtkazishga zarur kredit mablagʻlarini, keyinchalik ulardan defoliantlar xarid qilish hamda “Qishloqxoʻjalikkimyo” hududiy aksiyadorlik jamiyatlari va “SAR” aviakompaniyasi xizmatlariga haq toʻlash uchun foydalanish maqsadida, belgilangan tartibda ajratib bersin.

8. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.