Keyingi yillarda mamlakatimiz aholisi oʻrtasida milliy istiqlol gʻoyasini keng targʻib etish, dunyoda va yon-atrofimizda sodir boʻlayotgan siyosiy jarayonlarga nisbatan yurtdoshlarimizda ongli munosabatni, faol grajdanlik pozitsiyasini shakllantirish, yoshlarimizni Vatanga muhabbat va sadoqat ruhida tarbiyalash borasida muayyan ishlar amalga oshirilmoqda.

Shu bilan birga, joylarda bu masalada eskicha yondashuvlar, rasmiyatchilik va yuzakilik holatlari ham koʻzga tashlanayotganini qayd etish lozim. Oʻtkazilayotgan aksariyat tadbirlarning maʼno-mazmuni va saviyasi bugungi kun talablariga javob bermaydi, yurtimizda amalga oshirilayotgan keng koʻlamli yangilanish va oʻzgarishlar mohiyatini hayotiy misollar orqali ochib berish, milliy manfaatlarimizga qarshi qaratilgan turli informatsion xurujlarga nisbatan taʼsirchan va hujumkor targʻibot-tashviqot ishlarini tashkil etishda sustkashlikka yoʻl qoʻyilmoqda.

Bu borada belgilab berilgan ustuvor vazifalarning ijrosini taʼminlash, ilmiy va ijodiy ziyolilar, keng jamoatchilikning bu ishlardagi ishtirokini kuchaytirish maqsadida:

1. Aholi oʻrtasida olib borilayotgan maʼnaviy-maʼrifiy va targʻibot-tashviqot ishlarining taʼsirchanligi va samarasini oshirishga qaratilgan qoʻshimcha chora-tadbirlar dasturi 1-ilovaga*, mazkur dasturni amalga oshirish boʻyicha respublika komissiyasi tarkibi 2-ilovaga* muvofiq tasdiqlansin.

2. Respublika komissiyasi (Sh. Mirziyoyev);

bir hafta muddatda Respublika “Maʼnaviyat va maʼrifat” kengashi tomonidan tegishli vazirlik va idoralar bilan birgalikda ushbu dasturda belgilangan chora-tadbirlarni bajarish boʻyicha amaliy ish rejasi ishlab chiqilib, qabul qilinishini taʼminlasin;

dasturda belgilangan chora-tadbirlarni amalga oshirishda aholi bilan jonli muloqot va suhbatlar, bevosita fikr almashuvlar oʻtkazish, targʻibot-tashviqot ishlarini aniq hayotiy misollar orqali sodda va tushunarli tilda, keng jamoatchilikni jalb etgan holda tashkil etishga alohida eʼtibor qaratsin.

3. Mazkur Qarorning bajarilishini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.