Mamlakat iqtisodiyotiga toʻgʻridan toʻgʻri xorijiy va mahalliy investitsiyalarni jalb etish jarayonini yanada rivojlantirish, xorijga Oʻzbekiston Respublikasining investitsiya salohiyati haqida axborot uzatish, respublikada yaratilgan qulay investitsiya muhiti toʻgʻrisida xorijiy ishbilarmon doiralarni keng xabardor etish maqsadida:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi va Moliya vazirligining Oʻzbekiston Respublikasi Tashqi iqtisodiy aloqalar, investitsiyalar va savdo vazirligi huzurida Xorijiy investitsiyalarni axborot bilan taʼminlash va koʻmaklashish agentligi — “Oʻzinfoinvest”ni (bundan keyin matnda Agentlik deb yuritiladi) tashkil etish toʻgʻrisidagi taklifi qabul qilinsin.

2. Quyidagilar Agentlikning asosiy vazifalari etib belgilansin:

Oʻzbekiston Respublikasining iqtisodiy va resurs salohiyati, shuningdek xorijiy investitsiyalarni jalb etish uchun respublikada yaratilgan qulay shart-sharoitlar toʻgʻrisida xorijiy ishbilarmonlar doiralari oʻrtasida hamda ommaviy axborot vositalari orqali keng yoritish va tushuntirish ishlarini olib borish;

xorijiy investorlarni axborot bilan qoʻllab-quvvatlash, ularga istiqbolli loyihalar, Oʻzbekiston Respublikasida investitsiya loyihalarini amalga oshirishda investitsiya faoliyatining normativ-huquqiy asoslari toʻgʻrisida belgilangan imtiyoz va preferensiyalarni hisobga olgan holda axborot taqdim etish;

oʻzaro manfaatli istiqbolli investitsiya loyihalarini amalga oshirish uchun xorijiy investorlar bilan mahalliy tadbirkorlar oʻrtasida uchrashuv va muzokaralarni belgilangan tartibda tashkil etish;

chet mamlakatlarda reklama tadbirlari va aksiyalari (mavzuli koʻrgazmalar, anjumanlar, taqdimotlar, konferensiyalar va seminarlar) oʻtkazish, ixtisoslashtirilgan adabiyotlar, bukletlar chop etish, Internet tizimida ixtisoslashtirilgan axborot veb-saytini tashkil etish va yuritish yoʻli bilan Oʻzbekiston Respublikasining yuksak xalqaro mavqeyini shakllantirish va qoʻllab-quvvatlash.

3. Belgilansinki, Agentlik:

yuridik shaxs huquqlariga ega mustaqil muassasa hisoblanadi va oʻz faoliyati boʻyicha Oʻzbekiston Respublikasi tashqi iqtisodiy aloqalar, investitsiyalar va savdo vaziriga hisob beradi;

respublika budjeti mablagʻlari, oʻzining daromadlari, homiylik yordami va grantlar, shuningdek qonun hujjatlarida taqiqlanmagan boshqa mablagʻlar hisobidan moliyalashtiriladi.

4. Quyidagilar:

xodimlarning umumiy cheklangan soni 18 birlikdan iborat, shu jumladan Oʻzbekiston Respublikasi Tashqi iqtisodiy aloqalar, investitsiyalar va savdo vazirligi markaziy apparati boshqaruv xodimlari sonini 13 birlikka qisqartirish hamda Agentlikka qoʻshimcha 5 ta shtat birligi ajratish orqali, “Oʻzinfoinvest” agentligining tashkiliy tuzilmasi 1-ilovaga* muvofiq;

“Oʻzinfoinvest” agentligi toʻgʻrisidagi nizom 3-ilovaga* muvofiq tasdiqlansin.

Oʻzbekiston Respublikasi tashqi iqtisodiy aloqalar, investitsiyalar va savdo vaziriga xodimlarning belgilangan cheklangan soni va mehnat haqi fondi doirasida Agentlikning tasdiqlangan tuzilmasiga oʻzgartishlar kiritish huquqi berilsin.

5. Agentlik xodimlariga Oʻzbekiston Respublikasi Tashqi iqtisodiy aloqalar, investitsiyalar va savdo vazirligi xodimlari uchun belgilangan mehnatiga haq toʻlash shartlari tadbiq etilsin.

6. Oʻzbekiston Respublikasi Moliya vazirligi har yili davlat budjeti xarajatlarida Agentlik taʼminotiga mablagʻ ajratishni nazarda tutsin.

7. Agentlik Toshkent shahar, Taras Shevchenko koʻchasi, 1-uy manzilidagi Oʻzbekiston Respublikasi Tashqi iqtisodiy aloqalar, investitsiyalar va savdo vazirligi binosiga joylashtirilsin.

8. Oʻzbekiston Respublikasi Prezidentining “Oʻzbekiston Respublikasi Tashqi iqtisodiy aloqalar, investitsiyalar va savdo vazirligi faoliyatini tashkil etish toʻgʻrisida” 2005-yil 26-iyuldagi PQ-136-sonli qaroriga 4-ilovaga muvofiq oʻzgartish va qoʻshimchalar kiritilsin.

9. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

1. Qarorning 1-bandidagi uchinchi xatboshi, 2-bandidagi birinchi xatboshi va 2-ilovasi oʻz kuchini yoʻqotgan deb hisoblansin.

2. 1-ilovaning “Oʻzbekiston Respublikasi Tashqi iqtisodiy aloqalar, investitsiyalar va savdo vazirligi tarkibiga kiruvchi tashkilotlar roʻyxati” nomli boʻlimi quyidagi mazmundagi 12-band bilan toʻldirilsin:

“12. “Oʻzinfoinvest” agentligi”.