Oʻzbekiston Respublikasi Vazirlar Mahkamasining “Kommunal xoʻjaligida energiyani tejaydigan texnologiyalarni joriy etish kompleks dasturini amalga oshirish chora-tadbirlari toʻgʻrisida” 2005-yil 5-noyabrdagi 241-son qaroriga muvofiq “Oʻzdavneftgazinspeksiya” tomonidan “Sanoatkontexnazorat” davlat inspeksiyasi, “Oʻzkommunxizmat” agentligi, Oʻzbekiston Respublikasi Iqtisodiyot vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Respublika budjetidan va mahalliy budjetlardan moliyalashtiriladigan korxonalar va tashkilotlardagi tabiiy gazdan foydalaniladigan mavjud bugʻ qozonlari va isitish tizimlarini oʻrganish boʻyicha ishlar olib borildi.

Oʻrganish davomida Respublika budjetidan va mahalliy budjetlardan moliyalashtiriladigan korxonalar va tashkilotlarning 3526 obyektida 10980 maʼnaviy eskirgan va tejamsiz bugʻ qozoni agregatlaridan foydalanilayotganligi aniqlandi. Foydalanilayotgan bugʻ qozoni agregatlarida issiqlik energiyasi ishlab chiqarish uchun tabiiy gaz sarfi salmogʻi mamlakatimiz ishlab chiqaruvchilari tomonidan ishlab chiqarilayotgan zamonaviy bugʻ qozoni agregatlari koʻrsatkichlaridan 25-30 foiz ortiqdir.

Resurslarni tejaydigan zamonaviy texnologiyalarni joriy etish, tabiiy gaz isteʼmolini va ishlab chiqarilayotgan issiqlik energiyasi nobudgarchiligini qisqartirish maqsadida Vazirlar Mahkamasi qaror qiladi:

1. Respublika budjetidan va mahalliy budjetlardan moliyalashtiriladigan korxonalar va tashkilotlarning maʼnaviy eskirgan va tejamsiz bugʻ qozoni agregatlarini 2007-2008-yillarda respublika mintaqalari boʻyicha mamlakatimizda ishlab chiqarilgan resurslarni tejaydigan zamonaviy bugʻ qozoni agregatlari, tabiiy sirkulatsiyali maishiy bugʻ qozonlari bilan almashtirish dasturi (keyingi oʻrinlarda matnda “Dastur” deb yuritiladi) 1-2-ilovalarga* muvofiq tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Oʻzdavneftgazinspeksiya”, “Sanoatkontexnazorat” davlat inspeksiyasi, “Oʻzkommunxizmat” agentligi bilan birgalikda bir oy muddatda Respublika budjetidan va mahalliy budjetlardan moliyalashtiriladigan korxonalar va tashkilotlarning maʼnaviy eskirgan va tejamsiz bugʻ qozoni agregatlarini 2007-2008-yillarda shaharlar, tumanlar boʻyicha almashtirishning mintaqaviy dasturlarini ishlab chiqsinlar va tasdiqlasinlar.

3. Belgilansinki:

bugʻ qozoni agregatlarini oʻrnatishga “Sanoatkontexnazorat” davlat inspeksiyasining tegishli ruxsatnomalariga ega boʻlgan ixtisoslashtirilgan korxonalar qoʻyiladilar;

bugʻ qozoni agregatlarining aniq obyektga texnik tutashtirilishi, belgilangan standartlarga muvofiqligi, obyektlarning tabiiy gaz bilan taʼminlanganligi va yoqilgʻining muqobil turlaridan foydalanish imkoniyati ustidan nazorat qilish va masʼuliyat “Sanoatkontexnazorat” davlat inspeksiyasi, “Oʻzdavneftgazinspeksiya”, “Oʻztransgaz” aksiyadorlik kompaniyasiga yuklanadi.

4. Dasturning bajarilishi uchun shaxsiy javobgarlik Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga, tegishli vazirliklar, idoralar, Respublika budjeti va mahalliy budjetlardan moliyalashtiriladigan korxonalar va tashkilotlarning rahbarlariga yuklansin.

5. “Oʻzdavneftgazinspeksiya” va “Sanoatkontexnazorat” davlat inspeksiyasining hisob-kitobi boʻyicha maʼnaviy eskirgan va tejamsiz bugʻ qozoni agregatlarini resurslarni tejaydigan zamonaviy bugʻ qozoni agregatlari, tabiiy sirkulatsiyali maishiy bugʻ qozonlari bilan almashtirish natijasida tabiiy gaz isteʼmoli qisqarishi hisobiga budjet mablagʻlarini tejash isteʼmol qilinadigan gaz qiymatining 50 foizigachani tashkil etishi maʼlumot uchun qabul qilinsin.

6. Oʻzbekiston Respublikasi Moliya vazirligi:

2007-2008-yillarga Davlat budjeti parametlarini shakllantirishda vazirliklar, idoralar va mintaqalarning asoslangan hisob-kitoblari boʻyicha Respublika budjetidan va mahalliy budjetlardan moliyalashtiriladigan korxonalar va tashkilotlarning maʼnaviy eskirgan va tejamsiz bugʻ qozoni agregatlarini almashtirish uchun zarur mablagʻlarni nazarda tutsin;

Dasturni bajarish uchun ajratilgan budjet mablagʻlaridan maqsadli foydalanilishi ustidan nazoratni amalga oshirsin.

7. Belgilansinki, Yoqilgʻi-energetika resurslarini tejash boʻyicha komissiya Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, Respublika budjetidan va mahalliy budjetlardan moliyalashtiriladigan korxonalar va tashkilotlarning takliflari va asoslangan hisob-kitoblari asosida, zarurat boʻlganda, Dasturga oʻzgartirishlar kiritish toʻgʻrisida qaror qabul qiladi va Oʻzbekiston Respublikasi Moliya vazirligi bilan kelishgan holda maʼnaviy eskirgan va tejamsiz bugʻ qozonlarini almashtirish uchun budjetdan ajratiladigan mablagʻlarga obyektlar boʻyicha tuzatish kiritadi.

8. “Oʻzdavneftgazinspeksiya” “Sanoatkontexnazorat” davlat inspeksiyasi, “Oʻztransgaz” aksiyadorlik kompaniyasi, “Oʻzkommunxizmat” agentligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Dasturning bajarilishi ustidan doimiy monitoring olib borsin va yilning har choragida uning bajarilishi toʻgʻrisida Vazirlar Mahkamasiga axborot taqdim etsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M.Xanov zimmasiga yuklansin.