Davlat va xoʻjalik boshqaruvi organlari faoliyatining oshkoraligini taʼminlash, keng jamoatchilik va aholining Oʻzbekistonda amalga oshirilayotgan siyosiy, iqtisodiy va ijtimoiy islohotlarning borishi toʻgʻrisida muntazam xabardor qilish mamlakatni demokratik yangilash va modernizatsiyalashning, oshkora fuqarolik jamiyati qurishning muhim yoʻnalishi hisoblanadi.

Shu bilan birga, davlat va xoʻjalik boshqaruvi organlarining ushbu bosqichdagi ishlari axborotlar almashishning zamonaviy talablari va standartlariga hali toʻliq javob bermaydi, zarur darajadagi faollik mavjud emas, yetarli tashabbuskorlik koʻrsatilmayapti.

Aholini, milliy va xorijiy ommaviy axborot vositalarini Oʻzbekiston Respublikasi davlat va xoʻjalik boshqaruvi organlari faoliyati, mamlakatda izchil amalga oshirilayotgan ijtimoiy-siyosiy va ijtimoiy-iqtisodiy sohalardagi islohotlar toʻgʻrisida xabardor qilish samaradorligini oshirish maqsadida Vazirlar Mahkamasi qaror qiladi:

1. Vazirliklar, davlat qoʻmitalari, agentliklar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, xoʻjalik boshqaruvi organlari (keyingi oʻrinlarda idoralar deb ataladi) tarkibida xodimlarning umumiy soni doirasida axborot xizmatlari tashkil etilsin, quyidagilar ularning asosiy vazifalari etib belgilansin:

idora rahbariyati tomonidan belgilanadigan axborot siyosatini shakllantirish va amalga oshirishda qatnashish;

idora faoliyati sohasidagi normativ-huquqiy hujjatlarning milliy ommaviy axborot vositalarida eʼlon qilinishini taʼminlash;

milliy va xorijiy ommaviy axborot vositalarida idora faoliyatining dolzarb jihatlarini, tegishli sohadagi yagona davlat siyosatini amalga oshirish masalalarini yoritish;

internet tarmogʻida idora veb-resurslarini tashkil etish, ularning samarali faoliyatini taʼminlash;

idora faoliyatiga nisbatan ijtimoiy fikrning ahvolini hamda milliy va xorijiy ommaviy axborot vositalari pozitsiyasini tahlil qilish va ular toʻgʻrisida idora rahbariyatini xabardor qilish.

2. Davlat va xoʻjalik boshqaruvi organlarining axborot xizmati toʻgʻrisidagi Namunaviy nizom ilovaga muvofiq tasdiqlansin.

3. Yuqorida koʻrsatib oʻtilgan idoralar:

ekspertizadan oʻtkazish va keyinchalik tegishli idora rahbari tomonidan tasdiqlash uchun ikki oy muddatda Namunaviy nizom asosida idoralar axborot xizmatlarining nizomi va tashkiliy-shtat tuzilmasi loyihalarini ishlab chiqsinlar hamda koʻrib chiqish uchun Vazirlar Mahkamasining Axborot tizimlari va telekommunikatsiyalar masalalari kompleksiga kiritsinlar;

ikki oy muddatda axborot xizmatlarini jurnalistika, jamoatchilik bilan aloqalarni tashkil etish sohasidagi yuqori malakali mutaxassislar bilan taʼminlasinlar;

axborot xizmatini uning ishlarini samarali tashkil etish uchun zarur boʻlgan zamonaviy moddiy-texnik baza bilan taʼminlasinlar;

axborot xizmatining idoraning boshqa boʻlinmalari, idoraga qarashli tuzilmalar bilan zarur darajadagi oʻzaro hamkorligini tashkil etsinlar;

axborot xizmatlari tomonidan mamlakatimiz va xorijiy ommaviy axborot vositalari vakillari bilan muntazam ravishda (har oyda kamida bir marta) matbuot konferensiyalari, brifinglar oʻtkazilishini amalda joriy etsinlar;

bir oy muddatda idoraviy normativ hujjatlarga ushbu qaror talablaridan kelib chiqadigan oʻzgartirish va qoʻshimchalar kiritsinlar.

4. Oʻzbekiston Respublikasi Oliy va oʻrta maxsus taʼlim vazirligi (R.S.Qosimov) Oʻzbekiston Respublikasi Vazirlar Mahkamasining 2006-yil 7-avgustdagi 163-son qarori bilan tasdiqlangan Ommaviy axborot vositalari sohasida kadrlarni tayyorlash va qayta tayyorlash Davlat dasturini amalga oshirish doirasida idoralarning axborot xizmatlari xodimlarini oʻqitish va ularning malakasini oshirishni tashkil etsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.N. Aripov va R.S. Qosimov zimmasiga yuklansin.

1. Axborot xizmati (keyingi oʻrinlarda Xizmat deb ataladi) davlat va xoʻjalik boshqaruvi organi (keyingi oʻrinlarda idora deb ataladi) markaziy apparatining tarkibiy boʻlinmasi hisoblanadi.

2. Xizmat oʻz faoliyatida Oʻzbekiston Respublikasi Konstitutsiyasiga, qonunlariga, Oʻzbekiston Respublikasi Oliy Majlisining qarorlariga va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, idoraning normativ hujjatlariga va ushbu Nizomga amal qiladi.

3. Xizmat oʻz faoliyatini idoraning hududiy va tarkibiy boʻlinmalari hamda respublikaning boshqa vazirliklari va idoralari tegishli xizmatlari bilan oʻzaro yaqin hamkorlikda amalga oshiradi.

4. Quyidagilar Xizmatning asosiy vazifalari hisoblanadi:

idora rahbariyati tomonidan belgilanadigan axborot siyosatini shakllantirish va amalga oshirishda qatnashish;

idora faoliyati sohasidagi normativ-huquqiy hujjatlarning milliy ommaviy axborot vositalarida eʼlon qilinishini taʼminlash;

milliy va xorijiy ommaviy axborot vositalarida idora faoliyatining dolzarb jihatlarini, tegishli sohadagi yagona davlat siyosatini amalga oshirish masalalarini yoritish;

internet tarmogʻida idora veb-resurslarini tashkil etish, ularning samarali faoliyatini taʼminlash;

idoraga nisbatan ijtimoiy fikrning ahvolini hamda mahalliy, respublika va xorijiy ommaviy axborot vositalari munosabatini tahlil qilish va ular toʻgʻrisida idora rahbariyatini xabardor qilish.

5. Quyidagilar Xizmatning asosiy funksiyalari hisoblanadi:

Xizmat oldida turgan vazifalarni samarali hal etish uchun zarur boʻlgan axborotlarni idoraning boshqa boʻlinmalari bilan oʻzaro hamkorlikda toʻplash va ishlash;

ommaviy axborot vositalari uchun xabarlarni (press-relizlar, byulletenlar, obzorlar va shu kabilarni) tayyorlash va tarqatish;

idora faoliyatiga doir masalalar boʻyicha bosma materiallarni tayyorlash hamda milliy va xorijiy nashrlarda eʼlon qilish, tele va radioeshittirishlarni tashkil etish, tegishli sohadagi davlat siyosatini amalga oshirish;

idora rahbariyati va xodimlarining ommaviy axborot vositalari vakillari bilan matbuot konferensiyalari, brifinglari, musohabalari va boshqa uchrashuvlarini tashkil etish;

idora faoliyatiga doir masalalar boʻyicha ijtimoiy fikrni hamda milliy va xorijiy ommaviy axborot vositalari pozitsiyasini oʻrganishga doir tahliliy ishlarni amalga oshirish. Idora rahbariyatiga axborot berish uchun eʼlon qilingan dolzarb materiallar sharhlarini tayyorlash;

ommaviy axborot vositalari bilan axborot-maʼlumotnoma ishlarini amalga oshirish uchun idora faoliyatining asosiy yoʻnalishlari boʻyicha tahliliy, statistik va boshqa materiallarning tizimlashtirilgan maʼlumotlar bankini tashkil etish;

idora faoliyatini eng toʻliq va xolisona yoritish maqsadida milliy va xorijiy ommaviy axborot vositalari hamda jurnalistlar bilan oʻzaro hamkorlikni amalga oshirish;

internet tarmogʻida idoraning veb-saytini tashkil etish va uni zamonaviy darajada saqlash.

6. Xizmat oʻz vakolatlari doirasida milliy va xorijiy axborot agentliklari hamda ommaviy axborot vositalarining idora faoliyati toʻgʻrisidagi materiallarni tayyorlashda koʻmaklashish toʻgʻrisidagi buyurtmanomalari va soʻrovlarini koʻrib chiqadi.

7. Xizmat oʻziga yuklangan vazifalar va funksiyalarni bajarish uchun quyidagi huquqlarga ega:

Xizmatning vazifalari va funksiyalarini bajarish uchun zarur boʻlgan axborotlarni idoraning boshqa boʻlinmalaridan, idoraga qarashli tashkilotlardan belgilangan tartibda soʻrab olish;

idoraning yigʻilishlarida, majlislarida va boshqa tadbirlarida qatnashish;

qoʻyilgan vazifalarni bajarish uchun idora rahbari bilan kelishgan holda idoraning boshqa boʻlinmalari xodimlarini, shuningdek boshqa tashkilotlarning mutaxassislari va ekspertlarini jalb etish, shu jumladan kontrakt asosida jalb etish;

boshqa idoralarning axborot xizmatlari bilan belgilangan tartibda oʻzaro hamkorlik qilish;

rahbariyatning topshirigʻiga koʻra davlat organlarida, respublika va xalqaro ahamiyatga ega boʻlgan tadbirlarda Xizmat vakolatiga taalluqli masalalar boʻyicha idora nomidan vakillik qilish;

oʻz vakolatlari doirasida bosma nashrlarni nashr etish;

idoraning axborot siyosatini takomillashtirishga doir takliflarni, Xizmat faoliyati masalalari boʻyicha normativ hujjatlar loyihalarini rahbariyatning koʻrib chiqishi uchun kiritish.

8. Xizmat xodimlari soni u amalga oshiradigan vazifalarning murakkabligi va hajmiga koʻra idora rahbari tomonidan, xodimlarning tasdiqlangan umumiy soni doirasida belgilanadi.

9. Xizmat faoliyati idora rahbari tomonidan tasdiqlanadigan ishlar rejasi asosida tashkil etiladi.

10. Xizmatni idora rahbari tomonidan lavozimga tayinlanadigan va lavozimdan ozod qilinadigan rahbar boshqaradi. Xizmat rahbari ayni bir vaqtda idora rahbarining matbuot kotibi hisoblanadi.

Xizmat rahbari:

Xizmat faoliyatini muvofiqlashtiradi hamda Xizmatga yuklangan vazifalar va funksiyalarning bajarilishi uchun shaxsan javob beradi;

Xizmat faoliyatini tashkil etadi, rejalashtiradi va nazorat qiladi, idoraning boshqa boʻlinmalari bilan oʻzaro hamkorlikni amalga oshiradi;

Xizmatda kadrlarni tanlash va joy-joyiga qoʻyishni taʼminlaydi, xodimlar oʻrtasida vazifalarni taqsimlaydi;

Xizmat xodimlarining malakasini va kasb boʻyicha saviyasini oshirish uchun shart-sharoitlar yaratadi.

11. Xizmat xodimlari Xizmat rahbarining taqdimnomasiga koʻra belgilangan tartibda lavozimga tayinlanadi va lavozimdan ozod qilinadi.

12. Xizmat faoliyatining axborot, huquqiy, moddiy-texnik va transport taʼminoti, shuningdek uning xodimlariga ijtimoiy-maishiy xizmat koʻrsatish idoraning tarkibiy boʻlinmalari uchun belgilangan tartibda amalga oshiriladi.