Hujjat kuchini yo‘qotgan " " 22.02.2021

Oʻzbekiston Respublikasi Prezidenti
huzuridagi Vazirlar Mahkamasining

qarori

“OZODLIK” OBIDASINING ENG YaXShI LOYIhASI
UChUN RESPUBLIKA TANLOVINI OʻTKAZISh HAqIDA

LexUZ sharhi

Mazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.

Oʻzbekiston Respublikasi Prezidentining Farmonini bajarish yuzasidan va respublika jamoatchiligining istaklarini hisobga olib, Vazirlar Mahkamasi qaror qiladi:

1. Mustaqillik maydonidagi “Ozodlik” obidasining eng yaxshi loyihasi uchun 1991-yilning oktyabridan 30-dekabrigacha ochiq tanlov eʼlon qilinsin.

2. Tanlovning dasturi va shartlari hamda maslahatchilar kengashining ilova qilingan tarkibi* tasdiqlansin.

* Tarkib berilmaydi.

3. Toshkent shahar ijroiya qoʻmitasiga, Oʻzbekiston Respublikasi Madaniyat vazirligiga, Oʻzbekiston Yozuvchilar, Meʼmorlar, Rassomlar uyushmalariga tanlovni yuksak tashkiliy va gʻoyaviy-badiiy darajada oʻtkazish topshirilsin.

4. Oʻzbekiston Respublikasi Moliya vazirligi belgilangan mukofotlarni mablagʻ bilan taʼminlash manbaini aniqlasin.

5. 1991-yil 1-noyabrga qadar Toshkent shahar ijroiya qoʻmitasi qoshida “Ozodlik” obidasi qurilishiga hissa qoʻshmoqchi boʻlgan davlat, jamoat va kooperativ tashkilotlari hamda alohida shaxslardan ixtiyoriy xayriya mablagʻlari yigʻish uchun “Ozodlik” jamgʻarmasi ochilsin.

6. Oʻzbekiston Respublikasi Davlat telekoʻrsatuv va radioeshittirish qoʻmitasiga, OʻzTAG, roʻznomalar tahririyatiga tanlovning oʻtkazilishi, yakuni va “Ozodlik” obidasi qurilishining borishini yoritish topshirilsin.

Oʻzbekiston Respublikasi Vitse-Prezident Sh. MIRSAIDOV

Toshkent sh.,

1991-yil 1-noyabr,

276-son

Vazirlar Mahkamasining
1991-yil 1-noyabrdagi
276-son qarori bilan
TASDIQLANGAN

Mustaqillik maydonidagi “Ozodlik” obidasining chizma
loyihasi — obida konsepsiyasini ishlab chiqish uchun
ochiq tanlov dasturi va shartlari

Oʻzbekiston Prezidentining 1991-yil 6-sentabrdagi Farmoniga muvofiq va respublika koʻp sonli jamoatchiligining Toshkentdagi V, I. Lenin maydonini Mustaqillik maydoni deb oʻzgartirish haqidagi xohish-istaklarini hisobga olib, bu maydonda “Ozodlik” obidasi oʻrnatishga qaror qilingan.

Obidani qurish uchun hozirgi maydon chegarasida joy tanlanishi lozim.

Obidani maydonning qayeriga joylashtirish tanlovda qatnashadigan mualliflar ixtiyoriga havola etiladi.

Ushbu tanlovni oʻtkazish uchun Oʻzbekiston Respublikasi Prezidentining Farmoni va obidani qurish uchun Toshkent shahar ijroiya qoʻmitasining yer ajratish toʻgʻrisidagi qarori asos hisoblanadi.

Tanlovni oʻtkazuvchilar:

Oʻzbekiston Respublikasi Madaniyat vazirligi, Oʻzbekiston Meʼmorlar uyushmasi va Rassomlar uyushmasi.

Tanlovning maqsadi va vazifalari

Oʻzbekiston Respublikasi mustaqilligi, uning koʻp asrli madaniyati va milliy anʼanalari mavzuini monumental sanʼat va meʼmorchilik vositasida namoyon etish.

Meʼmoriy va monumental yechimdagi loyihaviy takliflar “Ozodlik” obidasini yaratish gʻoyasining maydondagi meʼmoriy-qurilish majmui bilan uygʻunlashgan boʻlishi, joy qiyofasi, dendrologiya vaziyatiga mos kelishi kerak.

Tanlov shartlari

1. Tanlov 1991-yilning oktyabridan 31-dekabriga qadar oʻtkaziladi.

2. Tanlovda qatnashishga meʼmorlar, haykaltaroshlarning ijodiy jamoalari va barcha xohlovchilar taklif etiladi.

3. Boshlangʻich manbalar:

ushbu dastur;

masshtabi 1:1000 boʻlgan bosh rejadan olingan koʻchirma nusxa;

joyning topografik sʼyomkasi, unga masshtabi 1:500 boʻlgan qizil belgili reja ilova qilingan.

Tuziladigan loyiha tarkibi

Tanlovning loyihaviy materiallari erkin chizmada 1X1 planshetda taqdim etiladi.

1. Maydonning 1:500 masshtabdagi bosh rejasi.

2. Fasad, planlar, kesmalar va perspektiva 1:50; 1:25 masshtabda beriladi.

3. Obida modeli 1:25 masshtabda beriladi (modelning eng katta oʻlchami 1 m dan oshmasligi kerak).

4. Tushuntiruv xati.

5. Fotoalbom (oq-qora).

Mualliflarning xohishiga koʻra qoʻshimcha materiallar berilishi mumkin.

Tanlov materiallari toʻla holda 1991-yil 30-dekabr soat 18 gacha quyidagi manzilga topshirilishi zarur:

Toshkent, S-1, Pushkin koʻchasi, 7, Oʻzbekiston Meʼmorlar uyushmasi.

Boshqa shaharliklar uchun koʻrsatilgan vaqt pochta kvitansiyasidagi muddat hisoblanadi.

Koʻrsatilgan muddatdan keyin topshirilgan loyihalar muhokamaga qoʻyilmaydi.

Tanlov ishtirokchilarini mukofotlash

Eng yaxshi loyihaviy takliflar uchun quyidagi mukofotlar belgilangan:

Bitta birinchi mukofot‎‎‎		10000 soʻm‎
Bitta ikkinchi mukofot‎‎‎		7500 soʻm‎
Ikkita uchinchi mukofot‎‎‎		5000 soʻmdan‎
Uchta ragʻbatlantiruvchi mukofot‎‎‎		2500 soʻmdan‎

Tanlov gʻolibi loyihani hayotga joriy etish huquqiga ega boʻladi.

Tanlov dasturi va shartlariga javob bermaydigan loyihalar, shuningdek, muddat oʻtgandan keyin topshirilgan loyihalar tanlov hakamligi tomonidan koʻrib chiqilmaydi.

1992-yilning 10-yanvaridan 25-yanvarigacha Oʻzbekiston Meʼmorlar uyushmasi zalida jamoatchilik muhokamasi uchun tanlov loyihalarining koʻrgazmasi boʻladi.

Tanlov yakunlari haqidagi qaror 1992-yilning 1-fevraligacha qabul qilinadi.

Tanlov natijalari respublika matbuotida va telekoʻrsatuv orqali eʼlon qilinadi.