Hujjat kuchini yo‘qotgan " " 22.02.2021
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI 1994 YILGI BUDJETINING
ASOSIY PARAMETRLARI TOʻGʻRISIDA
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Oʻzbekiston Respublikasi Oliy Kengashining “Oʻzbekiston Respublikasi 1994-yilgi budjetining Asosiy parametrlari toʻgʻrisida”gi 1993-yil 28-dekabrdagi qaroriga muvofiq Vazirlar Mahkamasi qaror qiladi:
1. Oʻzbekiston Respublikasi Moliya vazirligi tomonidan taqdim qilingan, unga muvofiq Oʻzbekiston Respublikasi 1994-yilgi budjetining Asosiy parametrlari ishlab chiqilgan Oʻzbekiston Respublikasining 1994-yilgi budjeti Konsepsiyasi maʼqullansin.
* Konsepsiya rus tilidagi matnda berilgan.
2. Quyidagilar amal qilish va ijro etish uchun qabul qilinsin:
Oʻzbekiston Respublikasi 1994-yilgi budjetining Asosiy parametrlari daromadlar boʻyicha 5181,8 mlrd soʻm miqdorida va xarajatlar boʻyicha 5619,3 mlrd soʻm miqdorida, 437,5 mlrd soʻm miqdoridagi yoki ichki yalpi mahsulotga nisbatan 5 foiz miqdoridagi kamomad bilan 1-ilovaga* muvofiq;
*1-ilova rus tilidagi matnda berilgan.
Qoraqalpogʻiston Respublikasi budjetining, viloyatlar va Toshkent shahri budjetlarining asosiy parametrlari daromadlar boʻyicha 2397,3 mlrd soʻm miqdorida va xarajatlar boʻyicha 2600,1 mlrd soʻm miqdorida, kamomadning 202,8 mlrd soʻm miqdoridagi cheklangan darajasi bilan, shuningdek moliyaviy qoʻllab - quvvatlash uchun respublika budjetidan Qoraqalpogʻiston Respublikasiga beriladigan maqsadli subvensiyalar 19,8 mlrd soʻm miqdorida va Surxondaryo viloyatiga- 13,8 mlrd soʻm miqdorida 2-ilovaga* muvofiq.
*2-ilova rus tilidagi matnda berilgan.
3. Umumrespublika daromadlari va soliqlaridan Qoraqalpogʻiston Respublikasi budjetiga hamda mahalliy budjetlarga 1994-yilda ajratmalar normativlari 3-ilovaga* muvofiq miqdorlarda tasdiqlansin.
*3-ilova rus tilidagi matnda berilgan.
4. Oʻrta va maxsus hunar-texnika bilim yurtlarini mablagʻ bilan taʼminlashga, non, markaziy isitish va issiq suv bilan taʼminlash uchun aholiga sotiladigan issiqlik energiyasi, yoqilgʻi narxlaridagi tafovutlarni toʻlashga, belgilangan norma boʻyicha aholiga sotiladigan bolalar tovarlari narxlaridan 50 foizli chegirishlarga va bepul nonushtalarga qilinadigan xarajatlarni mablagʻ bilan taʼminlash 1994-yildan boshlab mahalliy hokimiyat va boshqaruv organlari tasarrufiga oʻtkazilsin.
5. Xalq xoʻjaligi tarmoqlari boʻyicha yuridik shaxslardan olinadigan daromad soligʻi stavkalari, aksiz olinadigan tovarlarning roʻyxati va aksizlar stavkalari, yer soligʻi stavkalari, transport vositalari egalaridan olinadigan soliq stavkalari, shuningdek, suv xoʻjaligi tizimlaridan suv uchun budjetga olinadigan toʻlovlar miqdorlari 4—8- ilovalarga* muvofiq tasdiqlansin.
*4—8 - ilovalar rus tilidagi matnda berilgan.
6. Respublikadan chetga chiqariladigan mahsulotdan olinadigan soliq stavkasi mahsulot qiymatining 10 foizi miqdorida belgilansin. Stavkasi 1993-yilda amalda boʻlgan darajada saqlanib qolinadigan tabiiy gaz bundan mustasnodir.
7. Jamoa xoʻjalik aʼzolari mehnatiga haq toʻlash fondidan olinadigan soliq stavkasi 15 foiz miqdorida belgilansin.
8. Belgilab qoʻyilsinki, 1994-yil 1-yanvardan boshlab amortizatsiya ajratmalarini hisoblash asosiy fondlar qiymatiga qarab, 1993-yil 1-apreldagi holatiga koʻra oshiruvchi koeffitsiyentlarni qoʻllanmasdan qayta hisoblab chiqishni nazarda tutgan holda amalga oshiriladi.
Birlashmalar, korxonalar va tashkilotlar tomonidan haqiqatda ajratiladigan amortizatsiyalarning 20 foizi respublika budjetida markazlashtirilsin.
9. Belgilab qoʻyilsinki, 1994-yildan boshlab mulk soligʻi faqat asosiy ishlab chiqarish fondlari qiymatidan olinadi.
10. Belgilab qoʻyilsinki, 1994-yil 1-yanvardan boshlab yuridik shaxslardan olinadigan daromad soligʻini hisoblashda aylanma mablagʻlarni koʻpaytirishga yoʻnaltiriladigan foyda soliq solinadigan bazadan chiqarib tashlanadi.
11. Belgilab qoʻyilsinki, budjetga toʻlovlar va budjetdan tashqari fondlarga boshqa majburiy toʻlovlar boʻyicha oʻz vaqtida toʻlanmagan soliqlar summasidan olinadigan penyalar kechiktirilgan har bir kun uchun 0,2 foiz miqdorida hisoblanadi.
12. Oʻzbekiston Respublikasi Moliya vazirligi vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga markazlashtirilgan kapital sarflarni mablagʻ bilan taʼminlash uchun yilning har choragida banklarga, 5 foizli yillik toʻlov bilan, belgilangan yillik hajm doirasida kredit liniyasi ochsin.
13. 1994-yil 1-yanvardan boshlab, mulkchilik shaklidan qatʼiy nazar, korxonalar, tashkilotlar va muassasalarning mehnatga haq toʻlash fondidan ajratmalarning umumiy foizi 40 foiz miqdorida belgilansin va u quyidagi tartibda taqsimlansin:
Ijtimoiy sugʻurta jamgʻarmasiga - 32,5 foiz;
Kasaba uyushmalari federatsiyasi Kengashiga - 2,0 foiz;
Ish bilan taʼminlash jamgʻarmasiga – 2,0 foiz;
Mahalliy budjetlarga – 3,5 foiz.
Oldingi tahrirga qarang.
(14-band Oʻzbekiston Respublikasi Vazirlar Mahkamasining 1996-yil 30-dekabrdagi 466-son qaroriga muvofiq oʻz kuchini yoʻqotgan)
15. Ijtimoiy sugʻurta jamgʻarmasiga, Oʻzbekiston kasaba uyushmalari federatsiyasi Kengashiga, Ish bilan taʼminlash jamgʻarmasiga, davlat geologiya va mineral resurslar qoʻmitasiga, “Oʻzavtoyoʻl” davlat konserniga yilning har choragida, 1993-yil yakunlaridan boshlab, budjetdan tashqari tegishli fondlar manbalari va moddalari boʻyicha daromatlar va xarajatlarning ijrosi toʻgʻrisida Moliya vazirligiga hisobot taqdim qilish vazifasi yuklatilsin.
16. Davlat soliq bosh boshqarmasi daromatlarni soliq olishdan yashirish hollarini bartaraf etish va soliq toʻlovlarni toʻliq qamrab olish chora-tadbirlarini koʻrish hisobiga budjetga tushishi kerak boʻlgan toʻlovlarning toʻliq va oʻz vaqtida tushishi ustidan nazoratni kuchaytirilsin.
17. Oʻzbekiston Respublikasi Vazirlar Mahkamasining “1992-yilda geologik-qidiruv ishlarini mablagʻ bilan taʼminlash manbalarini shakllantirish tartibi toʻgʻrisida” 1992-yil 11-martdagi 120-son qarori 1994-yilda ham amalda boʻlsin.
Vazirlar Mahkamasining Raisi I. KARIMOV
Toshkent sh.,
1993-yil 1-dekabr,
№ 615-son