Oʻzbekiston Respublikasi Prezidentining “Normativ-huquqiy hujjatlar amalga oshirilishi monitoringi markazini tashkil qilish toʻgʻrisida” 2005-yil 15-dekabrdagi PQ–237-son qaroriga muvofiq Vazirlar Mahkamasi qaror qiladi:

1. Hukumatning qonun loyihalariga doir ish rejalarini tayyorlash va qabul qilish hamda ularning ijrosi monitoringini olib borish tartibi toʻgʻrisidagi nizom ilovaga muvofiq tasdiqlansin.

2. Vazirliklar, davlat qoʻmitalari, idoralar, mahalliy davlat hokimiyati organlari, xoʻjalik boshqaruvi organlari koʻrsatib oʻtilgan Nizom talablarini hisobga olgan holda 2006-yil 15-iyungacha boʻlgan muddatda, Hukumatning 2006-yilgi qonun loyihalariga doir ish rejasiga kiritish uchun Oʻzbekiston Respublikasi Adliya vazirligi huzuridagi Normativ-huquqiy hujjatlar amalga oshirilishi monitoringi markaziga qonun loyihalarini ishlab chiqish toʻgʻrisida takliflar kiritsinlar.

Oʻzbekiston Respublikasi Adliya vazirligi Hukumatning 2006-yilgi qonun loyihalariga doir ish rejasi loyihasini joriy yilning 15-iyuligacha Vazirlar Mahkamasiga belgilangan tartibda kiritsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari zimmasiga yuklansin.

1. Ushbu Nizom Oʻzbekiston Respublikasi Hukumatining qonun loyihalariga doir ish rejalarini tayyorlash va qabul qilish hamda ularning ijrosi monitoringini olib borish tartibini belgilaydi.

2. Hukumatning qonun loyihalariga doir ish rejalari (keyingi oʻrinlarda Rejalar deb yuritiladi) jamiyatni demokratiyalashtirish va yangilash, mamlakatni isloh qilish va modernizatsiyalashning ustuvor vazifalari hamda yoʻnalishlariga muvofiq, shuningdek huquq ijodkorligi faoliyatini takomillashtirish yoʻnalishlari va Oʻzbekiston Respublikasining qonun hujjatlarini rivojlantirish konsepsiyalari va dasturlari asosida joriy va uzoq muddatli istiqbolni koʻzlab shakllantiriladi.

3. Rejalar loyihalari, qoidaga koʻra bir yil uchun ishlab chiqiladi. Oʻzbekiston Respublikasi Prezidentining topshiriqlariga, Oʻzbekiston Respublikasi Vazirlar Mahkamasining qarorlariga muvofiq Rejalar loyihalari uzoq muddatli istiqbol uchun ishlab chiqiladi.

4. Rejalarda normativ-huquqiy hujjatlarning kompleksliligini va oʻzaro bir-birini toʻldirishini taʼminlash zarurligini hisobga olgan holda, faoliyatning ijtimoiy-iqtisodiy, ijtimoiy-siyosiy, gumanitar va boshqa sohalarida demokratik oʻzgartirishlarni amalga oshirish uchun zarur boʻlgan qonun loyihalarini tayyorlash nazarda tutilishi kerak.

5. Rejalarni tayyorlashda Oʻzbekiston Respublikasi Oliy Majlisi Qonunchilik palatasining qonun loyihalariga doir ish rejalari (rejalar loyihalari), Oʻzbekiston Respublikasi Prezidentining farmonlari, qarorlari, farmoyishlari va topshiriqlarida, Hukumat qarorlarida nazarda tutilgan qonun loyihalari, shuningdek mamlakatni ijtimoiy-iqtisodiy, ijtimoiy-siyosiy rivojlantirish dasturlari hisobga olinadi.

6. Vazirlar Mahkamasi Oʻzbekiston Respublikasi Prezidentini Hukumatning qonun loyihalarini tayyorlash faoliyati toʻgʻrisida, shuningdek Vazirlar Mahkamasi tomonidan Oʻzbekiston Respublikasi Prezidentining qonun loyihalarini tayyorlash boʻyicha topshiriqlarining bajarilishi haqida xabardor qilib boradi.

7. Vazirlar Mahkamasi Oʻzbekiston Respublikasi Oliy Majlisi palatalarining qonun loyihalarini tayyorlash boʻyicha takliflarini belgilangan tartibda koʻrib chiqadi va ular bilan oʻzining qonun loyihalarini tayyorlash faoliyatini muvofiqlashtirib boradi.

8. Rejalar loyihalari Oʻzbekiston Respublikasi Vazirlar Mahkamasiga Oʻzbekiston Respublikasi Adliya vazirligi tomonidan kiritiladi.

Rejalar loyihalari davlat va xoʻjalik boshqaruvi organlari, mahalliy davlat hokimiyati organlari, davlat tashkilotlari va boshqa tashkilotlarning takliflarini umumlashtirish asosida ishlab chiqiladi.

Rejalar loyihalarini ishlab chiqish Oʻzbekiston Respublikasi Adliya vazirligi huzuridagi Normativ-huquqiy hujjatlarning amalga oshirilishi monitoringi markazi (keyingi oʻrinlarda Markaz deb yuritiladi) tomonidan amalga oshiriladi.

9. Adliya vazirligi va Markaz Hukumatning qonun loyihalarini tayyorlashga doir ishlari masalalari boʻyicha Oʻzbekiston Respublikasi Prezidenti huzuridagi Davlat va jamiyat qurilishi, sud-huquq tizimining qonunchilik asoslarini isloh qilish Kengashi, Oʻzbekiston Respublikasi Prezidenti huzuridagi Amaldagi qonun hujjatlari monitoringi instituti, Jamiyat hayotining barcha tomonlarini erkinlashtirish va yanada isloh qilish hamda maʼmuriy islohotlarni amalga oshirish sohasidagi qonunchilik bazasini takomillashtirish boʻyicha Komissiya, davlat muassasalari va ilmiy muassasalar bilan oʻzaro hamkorlik qiladi.

10. Rejalar loyihalariga kiritish uchun Markazga taqdim etiladigan qonun loyihalarini ishlab chiqish toʻgʻrisidagi takliflarda quyidagilar mavjud boʻlishi kerak:

qonun loyihasining shartli nomi;

qonun loyihasini qabul qilish zarurligining asoslanishi va ushbu qonun loyihasi qabul qilingan taqdirda kutiladigan natijalar;

qonun loyihasini tayyorlash uchun masʼul organning nomi va qonun loyihasini ishlab chiqish boʻyicha hamijrochilar roʻyxati;

qonun loyihasini Vazirlar Mahkamasiga taqdim etish muddati hamda uni Oʻzbekiston Respublikasi Oliy Majlisi Qonunchilik palatasiga kiritishning taxminiy muddati.

11. Davlat va xoʻjalik boshqaruvi organlari, mahalliy davlat hokimiyati organlari, davlat tashkilotlari va boshqa tashkilotlar qonun loyihalarini ishlab chiqishni, ilmiy jihatdan asoslashni hamda qonun loyihalarini ishlab chiqish toʻgʻrisidagi takliflarni Markazga oʻz vaqtida taqdim etishni amalga oshiradilar.

12. Keyingi yil (undan keyingi yillar) Reja loyihasiga kiritish uchun qonun loyihalarini ishlab chiqish toʻgʻrisidagi takliflar ushbu Nizomning 11-bandida nazarda tutilgan davlat organlari, davlat tashkilotlari va boshqa tashkilotlar tomonidan Markazga joriy yilning 1-oktabridan kechikmay taqdim etiladi.

13. Tegishli tashkilotlarning takliflari asosida Adliya vazirligi 1-dekabrdan kechikmay keyingi yil (undan keyingi yillar) uchun Rejani tasdiqlash toʻgʻrisidagi Hukumat qarori loyihasini ishlab chiqishni, manfaatdor vazirliklar, idoralar va boshqa tashkilotlar bilan kelishishni taʼminlaydi hamda uni Vazirlar Mahkamasiga kiritadi.

Vazirlar Mahkamasining keyingi yil (undan keyingi yillar) uchun Rejani tasdiqlash toʻgʻrisidagi qarori joriy yilning 25-dekabridan kechikmay qabul qilinadi.

Keyingi yil (undan keyingi yillar) uchun Rejani tasdiqlash toʻgʻrisidagi qaror loyihasini ishlab chiqish, kelishish, Hukumatga kiritish va uni qabul qilish Oʻzbekiston Respublikasi Vazirlar Mahkamasining Ish tartibiga muvofiq amalga oshiriladi.

14. Qabul qilingan Rejalar Oʻzbekiston Respublikasi Vazirlar Mahkamasi tomonidan Oʻzbekiston Respublikasi Oliy Majlisi palatalariga joʻnatiladi.

15. Tasdiqlangan Rejaga oʻzgartirish va qoʻshimchalar kiritish Oliy majlis palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari asosida, shuningdek Oʻzbekiston Respublikasi Adliya vazirligi taklifiga binoan Vazirlar Mahkamasi tomonidan amalga oshiriladi.

Adliya vazirligining Rejalarni oʻzgartirish va ularga qoʻshimchalar kiritish toʻgʻrisidagi takliflari ham uning oʻz tashabbusiga koʻra, ham manfaatdor tashkilotlarning takliflari asosida kiritiladi.

16. Tegishli organlar va tashkilotlarning rahbarlari Rejalarda nazarda tutilgan qonun loyihalarining sifati va ularni tayyorlash muddatlariga rioya qilinishi uchun shaxsan javob beradilar.

Qonun loyihasini tayyorlash uchun masʼul organ rahbari:

qonun loyihasi ishlab chiqilishini tashkil qiladi, hamijrochi organlar va tashkilotlar ishlarini muvofiqlashtiradi, ishlarga manfaatdor tashkilotlar vakillarini jalb etadi va kelishilgan qonun loyihasini belgilangan tartibda Vazirlar Mahkamasiga kiritadi;

zarur hollarda manfaatdor tashkilotlar, shu jumladan nodavlat notijorat va ilmiy-tadqiqot muassasalari vakillarini jalb etgan holda ishchi guruhlar tashkil qiladi;

Vazirlar Mahkamasiga qonun loyihasini tayyorlashning borishi toʻgʻrisida muntazam ravishda axborot beradi va Hukumat qarorini talab qiladigan masalalar boʻyicha takliflar kiritadi;

har chorakning dastlabki oyi birinchi kunidan kechikmay Markazga Rejalarning oʻzi tomonidan bajarilishi toʻgʻrisida axborot joʻnatadi.

17. Oʻzbekiston Respublikasi Adliya vazirligi tegishli qonun loyihalarini tayyorlash boʻyicha faoliyatni muvofiqlashtiradi va unga metodik jihatdan rahbarlikni amalga oshiradi.

18. Rejalar ijrosi monitoringi Markaz tomonidan amalga oshiriladi.

19. Rejalar ijrosi monitoringi qonun loyihasini tayyorlash muddatlariga, belgilangan tartibiga rioya qilinishi yuzasidan, shuningdek ularning amalga oshirilayotgan islohotlarning maqsadi va vazifalariga, inson huquqlari va erkinligini himoya qilish talablariga, xalqaro normalar va standartlarga, Oʻzbekiston Respublikasi Konstitutsiyasiga hamda qonunlariga muvofiqligini baholash uchun amalga oshiriladi.

20. Rejalar ijrosi monitoringini amalga oshirish uchun Markaz qonun loyihalariga doir ishlar masalalari boʻyicha axborotlarni soʻrab oladi, davlat boshqaruvi organlari va boshqa tashkilotlar vakillarini belgilangan tartibda jalb etadi, qonun loyihalariga doir ishlarning bajarilishini tekshiradi, statistik hamda boshqa axborotlarni tahlil qiladi va umumlashtiradi.

21. Adliya vazirligi har chorakda, hisobot choragidan keyingi oyning 5-kunigacha Vazirlar Mahkamasiga qonun loyihalariga doir ishlarning bajarilishi toʻgʻrisida axborot beradi.

Qonun loyihalarini ishlab chiqish muddatlari buzilgan taqdirda Adliya vazirligi tegishli chora-tadbirlar koʻrish uchun bu toʻgʻrida Vazirlar Mahkamasini xabardor qiladi.