Oʻzbekiston Respublikasi Prezidentining “Oʻzbekiston Respublikasi Davlat bojxona qoʻmitasi faoliyatini tashkil etish borasidagi qoʻshimcha chora-tadbirlar toʻgʻrisida” 2006-yil 9-martdagi PQ–302-son qarori 12-bandini bajarish yuzasidan Vazirlar Mahkamasi qaror qiladi:

1. Oʻzbekiston Respublikasining bojxona chegarasi orqali olib oʻtilayotganda koʻzdan kechirish majburiy boʻlgan tovarlar roʻyxati ilovaga* muvofiq tasdiqlansin.

2. Oʻzbekiston Respublikasi Davlat bojxona qoʻmitasi:

respublikaning bojxona chegarasi orqali olib oʻtilayotgan va koʻrsatib oʻtilgan Roʻyxatga kiritilgan tovarlar yuk bojxona deklaratsiyalari taqdim etish joylarida puxta koʻzdan kechirilishini taʼminlasin;

tovarlar respublikaning bojxona chegarasi orqali olib oʻtilayotganda ularni bojxonada koʻzdan kechirishni amalga oshirishning samaradorligi yuzasidan doimiy monitoring oʻrnatsin.

2¹. Belgilansinki, koʻrsatib oʻtilgan Roʻyxatga kiritilgan tovarlarni chegaradosh bojxona postlarida koʻzdan kechirilishi quyidagi hollarda:

tovarga ilova qilingan hujjatlardagi maʼlumotlar oʻzaro bir-biriga muvofiq boʻlmagan yoxud tashilayotgan tovarlarning toʻliq nomi va kodlari Tovarlarni tavsiflash va kodlashning uygʻunlashtirilgan tizimiga muvofiq kamida 6 ta belgi darajasida koʻrsatilmaganda;

bojxona nazoratining texnik vositalarini qoʻllash yakunlari boʻyicha amaldagi maʼlumotlarning tovarga ilova qilingan hujjatlardagi maʼlumotlarga nomuvofiqligi aniqlanganda;

transport vositasining yuk boʻlmasiga bevosita (erkin) kirish imkoniyati mavjud boʻlganda;

Oʻzbekiston Respublikasi Davlat bojxona qoʻmitasiga respublikaning boshqa huquqni muhofaza qilish organlari yoki respublika davlat boshqaruvi boshqa organlaridan tushgan materiallar, shuningdek xorijiy davlatlarning bojxona va boshqa davlat organlaridan hamda xalqaro tashkilotlardan olingan bojxonada koʻzdan kechirishni amalga oshirish zarurligi toʻgʻrisidagi maʼlumotlar mavjud boʻlganda;

davlat bojxona xizmati organlari xodimlarida bojxona qonun hujjatlari buzilganligi toʻgʻrisida asosli gumoni mavjud boʻlganda majburiy tartibda amalga oshiriladi.

Bunda koʻzdan kechirish davlat bojxona xizmati organi xodimining bildirgisi asosida hamda bojxona posti boshligʻining yoxud uning vazifasini bajaruvchi shaxsning yozma ruxsati bilan amalga oshiriladi.

3. Oʻzbekiston Respublikasi Davlat bojxona qoʻmitasiga Oʻzbekiston Respublikasi Vazirlar Mahkamasi bilan kelishgan holda koʻrsatib oʻtilgan Roʻyxatga eksport-import operatsiyalari tendensiyalariga koʻra oʻzgartirishlar kiritish huquqi berilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.