Oʻzbekiston Respublikasi Soliq kodeksi, “Davlat soliq xizmati toʻgʻrisida”gi Oʻzbekiston Respublikasi Qonunining 7-moddasi, “Advokatura toʻgʻrisida”gi, “Advokatlik faoliyatining kafolatlari va advokatlarni ijtimoiy muhofazasi toʻgʻrisida”gi va “Nodavlat notijorat tashkilotlar toʻgʻrisida”gi Oʻzbekiston Respublikasi qonunlariga muvofiq Oʻzbekiston Respublikasi Moliya vazirligi, Adliya vazirligi va Davlat soliq qoʻmitasi qaror qiladi:

1. Advokatlik byurolari, advokatlar hayʼatlari, advokatlik firmalari va advokatlar tomonidan budjetga soliqlar va majburiy toʻlovlarni hisoblab chiqarish va toʻlash tartibi toʻgʻrisidagi yoʻriqnoma ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Yoʻriqnoma Oʻzbekiston Respublikasi Soliq kodeksi, “Davlat soliq xizmati toʻgʻrisida”gi Oʻzbekiston Respublikasi Qonunining 7-moddasi, “Advokatura toʻgʻrisida”gi, “Advokatlik faoliyatining kafolatlari va advokatlarning ijtimoiy himoyasi toʻgʻrisida”gi va “Nodavlat notijorat tashkilotlar toʻgʻrisida”gi Oʻzbekiston Respublikasi qonunlariga muvofiq ishlab chiqilib, advokatlik byurolari, advokatlar hayʼatlari, advokatlik firmalari va advokatlar tomonidan budjetga soliqlar va majburiy toʻlovlarni hisoblab chiqarish va toʻlash tartibini belgilaydi.

1. “Advokatlik faoliyatining kafolatlari va advokatlarning ijtimoiy himoyasi toʻgʻrisida”gi Oʻzbekiston Respublikasi Qonunining 11-moddasiga muvofiq Advokatura notijorat tashkilotdir va faoliyatni oʻz mablagʻlari hisobidan amalga oshiradi. U advokatlik faoliyati bilan shugʻullanish uchun litsenziya olgan advokatlar tomonidan jismoniy va yuridik shaxslarning huquqlari va qonuniy manfaatlarini himoya qilish maqsadida ixtiyoriylik asosida tashkil etilgan oʻzini oʻzi boshqarish tashkilotidir.

2. Advokaturaning tashkiliy tuzilmalari boʻlib advokatlar kollegiyalari, advokatlik firmalari va advokatlik byurolari (keyingi oʻrinlarda — advokatlik tuzilmalari) hisoblanadi.

Advokatlik faoliyati bilan shugʻullanish huquqini beruvchi litsenziyani belgilangan tartibda olgan jismoniy shaxs oʻz advokatlik byurosini ochib, yakka tartibda faoliyat koʻrsatishga yoxud ixtiyoriylik asosida boshqa advokatlar (sheriklar) bilan hayʼatlar va firmalar tuzishga, shuningdek, advokatlik firmalari va kollegiyalariga aʼzo (muassis) sifatida kirishga haqlidir.

“Advokatura toʻgʻrisida”gi Oʻzbekiston Respublikasi Qonunining 4-moddasiga muvofiq advokatlar byurolari, hayʼatlari va firmalari roʻyxatdan oʻtgan kundan eʼtiboran yuridik shaxs maqomini oladilar hamda koʻrsatilgan yuridik yordam uchun fuqarolardan va yuridik shaxslardan tushadigan pul mablagʻlari (daromadlar) hisobiga faoliyat koʻrsatadilar.

3. “Nodavlat notijorat tashkilotlari toʻgʻrisida”gi Oʻzbekiston Respublikasi Qonunining 29-moddasiga muvofiq, nodavlat notijorat tashkilotlarining mol-mulkini shakllantirish manbalari quyidagilardan iborat boʻlishi mumkin:

kirish va aʼzolik badallari, agar ular ustavda nazarda tutilgan boʻlsa;

muassislardan, qatnashchilardan (aʼzolardan) bir marotaba va muntazam ravishda keladigan tushumlar;

ixtiyoriy mulkiy badallar va ehsonlar;

tadbirkorlik faoliyatidan olingan, faqat ustav maqsadlari uchun ishlatiladigan daromadlar (foyda);

qonunlarda taqiqlanmagan boshqa tushumlar.

Bunda qatnashchilar (aʼzolar), yaʼni advokatlarning jismoniy va yuridik shaxslarga koʻrsatiladigan yuridik yordam uchun oladigan daromadlarining bir qismi koʻrinishidagi muntazam tushumlari advokatlik tuzilmalarini mablagʻ bilan taʼminlashning asosiy manbasi hisoblanadi. Koʻrsatilgan yuridik yordam uchun kelib tushgan mablagʻlardan advokatlik tuzilmasini saqlab turish uchun ajratmalar miqdori advokatlik tuzilmasining taʼsis hujjatida (ustavida) yoki qatnashchilar (aʼzolar) ning boshqa qarorida belgilanadi.

4. Advokatlik tuzilmasini saqlash uchun xarajatlarga maʼmuriy va xoʻjalik xarajatlari, shuningdek uni saqlash uchun qilingan boshqa xarajatlar kiradi.

5. Advokatlik tuzilmasini saqlash uchun xarajatlar tarkibiga quyidagi xarajatlar kiradi:

a) maʼmuriy va xoʻjalik (texnik) xodimlarni saqlab turish, jumladan kompensatsiya va kafolatli toʻlovlar bilan birgalikda ular mehnatiga haq toʻlashga;

b) kommunal xizmatlar, shuningdek, telefon, telekommunikatsiya va axborot xizmatlari uchun haq toʻlashga;

v) inventar, materiallar, kanselyariya, ofis uchun va boshqa jihozlarni xarid qilishga;

g) transport vositalari, texnikalarni saqlash, ijaraga olishga va boshqa xizmatlarga haq toʻlashga, benzin va yoqilgʻi moylash mahsulotlariga;

d) advokatlarni (advokatura xodimlarini) oʻqitishga, gazetalar, jurnallar va boshqa davriy nashrlarga obuna boʻlishga, boshqa joriy xarajatlarga;

e) joriy taʼmirlashga;

j) texnika va asbob-uskunalarni, orgtexnika vositalari, kompyuterlar va boshqa asosiy vositalarni xarid qilishga;

z) qurilish va kapital taʼmirlashga;

i) advokatlik tuzilmasini saqlab turish uchun boshqa xarajatlarga.

“Advokatura toʻgʻrisida”gi Oʻzbekiston Respublikasi Qonunining 12-moddasiga muvofiq, advokatlik tuzilmasini saqlab turish uchun xarajatlar tarkibiga, shuningdek, mablagʻlari advokatlarning ijtimoiy ehtiyojlariga ishlatiladigan Advokaturani ijtimoiy himoya qilish jamgʻarmasini shakllantirish boʻyicha xarajatlar kiradi. Advokaturani ijtimoiy himoya qilish jamgʻarmasining mablagʻlari quyidagilarga sarflanadi:

a) advokatlik tuzilmasining advokatlariga nafaqalar, kompensatsiya va kafolatli toʻlovlarni toʻlash, ularning taʼtili uchun haq toʻlashga. Bunda advokatlik tuzilmalari taʼtil uchun haq toʻlash maqsadida mablagʻlarni (masalan, ish haqining miqdoridan kelib chiqqan holda) jamlashga haqlidirlar;

b) moddiy yordam sifatida beriladigan turli xil pullik nafaqalarga;

v) sanatoriya-kurortda davolanish uchun va dam olish uylariga yoʻllanmalarni toʻlashga, statsionar va ambulator davolanish haqini toʻlashga;

g) ovqatlanish uchun qoʻshimcha toʻlovlarga, yoʻl chiptalarini berish yoki ularning qiymatini qoplashga;

d) advokatlarning hayoti va sogʻligʻini sugʻurta qilish badallarini toʻlashga;

e) turistik yoʻllanmalar, sport seksiyalariga abonementlarni toʻlashga va boshqa shu kabi xarajatlarga;

j) Oʻzbekiston Advokatlar assotsiatsiyasiga aʼzolik badalini advokat hisobidan toʻlashga;

z) advokatlarning boshqa ijtimoiy ehtiyojlariga.

6. Oʻzbekiston Respublikasi Soliq kodeksining 31-moddasiga muvofiq tijorat bilan shugʻullanmaydigan yuridik shaxslar, ularning tadbirkorlik faoliyatidan oladigan daromadlaridan (foydalaridan) tashqari foyda soligʻidan ozod qilinadi.

Oʻzbekiston Respublikasi Vazirlar Mahkamasining 1998-yil 15-apreldagi 159-son qarori bilan tasdiqlangan Mikrofirmalar va kichik korxonalar uchun soliq solishning soddalashtirilgan tizimini qoʻllash tartibining 1-bandiga muvofiq, soliqqa tortishning soddalashtirilgan tizimi tadbirkorlik faoliyatini amalga oshirayotgan mikrofirmalar va kichik korxonalar uchun qoʻllaniladi.

7. Advokatlik tuzilmalari nodavlat notijorat tashkilotlar sifatida, foyda soligʻini toʻlashdan ozod etiladilar hamda yagona soliq toʻlovchisi hisoblanmaydilar.

8. “Advokatura toʻgʻrisida”gi Oʻzbekiston Respublikasi Qonunining 11-moddasiga muvofiq, advokatlarning mehnatiga koʻrsatilgan yuridik yordam uchun jismoniy va yuridik shaxslardan advokatlar byurolari, hayʼatlari va firmalariga kelib tushgan mablagʻlar hisobidan haq toʻlanadi. Bunda yuridik xizmat uchun haq toʻlash advokat bilan mijoz oʻrtasida ixtiyoriy ravishda tuziladigan bitim (shartnoma) asosida amalga oshiriladi.

Advokat tomonidan koʻrsatilgan yuridik yordam uchun kelib tushgan mablagʻlar advokatlik tuzilmalarining daromadlari hisoblanmaydi.

Mablagʻlarning advokatlik tuzilmasini saqlab turish uchun oʻtkaziladigan (ushlab qolinadigan) qismi tadbirkorlik faoliyatidan olingan daromad boʻlib hisoblanmaydi. Ushbu mablagʻlarga mazkur Yoʻriqnomaning 3 va 4-bandlariga muvofiq advokatlik tuzilmasini saqlab turish uchun muntazam tushumlar sifatida qaraladi.

9. Agar advokatlik tuzilmalari tadbirkorlik faoliyati, yaʼni advokatlik faoliyatidan tashqari boshqa (advokatning yuridik yordam koʻrsatishi bilan bogʻliq boʻlmagan) faoliyat bilan shugʻullansalar, ushbu faoliyatdan olingan daromadlar (foyda) belgilangan tartibda foyda soligʻi yoki yagona soliqqa tortiladi.

10. Moliya yilida soliq solinadigan daromadga ega boʻlgan jismoniy shaxslar — advokatlar jismoniy shaxslarning daromadiga solinadigan soliqni toʻlovchilardir.

11. Advokatlar mehnatiga haq toʻlash shaklida olinadigan daromadlardan jismoniy shaxslar daromadiga solinadigan soliqni ushlab qolish va uni budjetga oʻtkazish advokatlik tuzilmalari tomonidan amalga oshiriladi.

12. Advokatlar mehnatiga haq toʻlash shaklida olinadigan daromadlarni aniqlash uchun asos boʻlib advokatlarning mehnatga haq toʻlash fondi hisoblanadi.

Jismoniy shaxslar daromadiga solinadigan soliqni aniqlash maqsadida, advokatlarning mehnatga haq toʻlash fondi, belgilangan stavkalarda ajratiladigan ijtimoiy sugʻurta badallarini chegirib tashlagan holda quyidagi formula asosida aniqlanadi:

F — advokatlarning mehnatga haq toʻlash fondi;

Y — advokat tomonidan koʻrsatilgan yuridik yordam uchun olingan mablagʻlar (advokat gonorari) hamda mazkur Yoʻriqnomaning 3 va 4-bandiga muvofiq advokatlik tuzilmasini saqlab turish uchun oʻtkaziladigan mablagʻlar oʻrtasidagi farq;

S — mehnatga haq toʻlash fondidan olinadigan ijtimoiy sugʻurta badalining foizdagi stavkasi.

Masalan, koʻrsatilgan yuridik yordam uchun advokatning gonorari 100000 soʻmni tashkil etgan. Bunda, advokatlik tuzilmasining tegishli qaroriga koʻra, advokatlik tuzilmasini saqlab turish uchun muntazam tushum sifatida 30 000 soʻm ushlab qolingan. Oʻzbekiston Respublikasi Vazirlar Mahkamasining 2003-yil 25-dekabrdagi 567-son qaroriga muvofiq, advokatlik tuzilmalari mehnatga haq toʻlash fondidan 25 foizli stavkada ijtimoiy sugʻurta badalini toʻlaydilar. Bunday holda, mehnatga haq toʻlash fondi quyidagicha aniqlanadi:

Mehnatga haq toʻlash fondi va mehnatga haq toʻlash shaklida olinadigan daromadlarni aniqlashning namunaviy sxemasi mazkur Yoʻriqnomaning ilovasida keltirilgan.

13. Jismoniy shaxslarning daromadiga solinadigan soliqni hisoblab chiqarishda mehnatga haq toʻlash shaklida olinadigan daromadlar tarkibiga mazkur Yoʻriqnomaning 12-bandi asosida aniqlanadigan mehnatga haq toʻlash fondidan tashqari, Oʻzbekiston Respublikasi Soliq kodeksining 49-moddasi ikkinchi qismida nazarda tutilgan daromadlar ham kiradi.

14. Jismoniy shaxslarning daromadiga solinadigan soliqni ushlab qolish va budjetga oʻtkazish uchun advokatlik tuzilmalari javobgardir. Soliq summasi ushlab qolinmaganda, ular ushlab qolinmagan soliq summasini hamda u bilan bogʻliq jarima va penyalarni budjetga toʻlashi shart.

15. Jismoniy shaxslarning daromadiga solinadigan soliq ushlab qolinganda advokatlik tuzilmalari ushlab qolingan soliq summasini toʻlov amalga oshirilgan oy tugaganidan keyin besh kun ichida budjetga oʻtkazadilar.

16. Advokatlik tuzilmalari:

ish haqini toʻlash chogʻida advokatning talabiga koʻra unga uning daromadi summasi va turi, shuningdek, ushlab qolingan soliq summasi (agar soliq ushlab qolingan boʻlsa) koʻrsatilgan maʼlumotnomani berishi;

asosiy boʻlmagan ish joyidan olingan daromadlar toʻgʻrisida jismoniy shaxsning roʻyxat raqami, familiyasi, ismi va otasining ismi, doimiy yashash manzili, hisobot yilida qilgan daromadining umumiy summasi va ushlab qolingan soliqning umumiy summasi koʻrsatilgan maʼlumotnomani qonun hujjatlarida belgilangan shaklda moliya yili tugaganidan soʻng oʻttiz kun ichida soliq organlariga taqdim etishi;

yollanib ishlaydiganlarga mehnat haqi tarzida hisoblab chiqarilgan va amalda toʻlangan summalar hamda boshqa daromadlar, shuningdek, bu daromadlarning soliq summalari toʻgʻrisidagi maʼlumotlarni qonun hujjatlarida belgilangan shaklda yilning har choragida, yilning hisobot choragidan keyingi oyning 15-kuniga qadar soliq organlariga taqdim etishi shart.

17. Oʻzbekiston Respublikasi Soliq kodeksining 66-moddasiga muvofiq, tadbirkorlik faoliyati bilan shugʻullanuvchi yuridik shaxslar qoʻshilgan qiymat soligʻi toʻlovchilardir.

Advokatlik tuzilmalari qoʻshimcha qiymat soligʻini toʻlovchi hisoblanmaydilar, mazkur Yoʻriqnomaning 18 va 19-bandida nazarda tutilgan hollar bundan mustasno.

18. Agar advokatlik tuzilmalari tadbirkorlik faoliyati, yaʼni advokatlik faoliyatidan tashqari boshqa (advokatning yuridik yordam koʻrsatishi bilan bogʻliq boʻlmagan) faoliyat bilan shugʻullansalar, ushbu faoliyat doirasidagi tovarlar (ishlar, xizmatlar) realizatsiyasi boʻyicha oborot belgilangan tartibda qoʻshimcha qiymat soligʻiga tortiladi.

19. Advokatlik tuzilmalari tovarlarni import qilishda bojxona toʻlovlarini (shu jumladan qoʻshimcha qiymat va aksiz soligʻini) belgilangan tartibda toʻlaydilar, qonunchilikda nazarda tutilgan hollar bundan mustasno.

20. Oʻzbekiston Respublikasi Soliq kodeksining 110-moddasiga muvofiq tovarlar ishlab chiqaruvchi, ishlar bajaruvchi, xizmatlar koʻrsatuvchi yuridik shaxslar ekologiya soligʻi toʻlovchilardir.

Yuridik yordam advokat bilan mijoz oʻrtasida tuzilgan shartnoma asosida advokat (jismoniy shaxs) tomonidan koʻrsatilishini inobatga olib, ushbu yuridik yordam ekologiya soligʻiga tortilmaydi.

Agar bevosita advokatlik tuzilmasi tomonidan tovarlar ishlab chiqarilsa, ishlar bajarilsa va xizmatlar koʻrsatilsa, ushbu faoliyatdan belgilangan tartibda ekologiya soligʻi toʻlanadi.

21. Oʻzbekiston Respublikasi Soliq kodeksining 92, 102 va 119-moddalariga muvofiq advokatlik tuzilmalari nodavlat notijorat tashkilotlar sifatida mol-mulk soligʻi, yer soligʻi va suv resurslaridan foydalanganlik uchun soliqni toʻlashdan ozod qilinadilar.

Agar advokatlik tuzilmalari tadbirkorlik faoliyati, yaʼni advokatlik faoliyatidan tashqari boshqa (advokatning yuridik yordam koʻrsatishi bilan bogʻliq boʻlmagan) faoliyat bilan shugʻullansalar, ushbu faoliyat uchun foydalanilgan mol-mulk, yer uchastkalari va suv resurslari belgilangan tartibda mol-mulk soligʻi, yer soligʻi va suv resurslaridan foydalanganlik uchun soliqqa tortiladi.

22. Obodonlashtirish va ijtimoiy infratuzilmani rivojlantirish soligʻini hisoblash chiqarish va budjetga toʻlash tartibi toʻgʻrisidagi yoʻriqnoma (2002-yil 15-fevral, roʻyxat raqami 1100-son — Meʼyoriy hujjatlari axborotnomasi, 2002-y., 3-son)ning 1-bandiga muvofiq, obodonlashtirish va ijtimoiy infratuzilmani rivojlantirish soligʻini toʻlovchilar tadbirkorlik faoliyati bilan shugʻullanuvchi yuridik shaxslardir.

Advokatlik tuzilmalari obodonlashtirish va ijtimoiy infratuzilmani rivojlantirish soligʻini toʻlovchi hisoblanmaydilar.

Agar advokatlik tuzilmalari tadbirkorlik faoliyati, yaʼni advokatlik faoliyatidan tashqari boshqa (advokatning yuridik yordam koʻrsatishi bilan bogʻliq boʻlmagan) faoliyat bilan shugʻullansalar, ushbu faoliyatdan olingan sof foyda belgilangan tartibda obodonlashtirish va ijtimoiy infratuzilmani rivojlantirish soligʻiga tortiladi.

23. Yuridik yordam advokat va mijoz oʻrtasida tuzilgan shartnoma asosida advokat (jismoniy shaxs) tomonidan koʻrsatilganligi sababli, advokatlik tuzilmasining advokatlari tomonidan koʻrsatilgan yuridik yordam hajmidan Budjetdan tashqari pensiya jamgʻarmasiga hamda Oʻzbekiston Respublikasi Moliya vazirligi huzuridagi Respublika yoʻl jamgʻarmasiga majburiy ajratmalar oʻtkazilmaydi.

Agar bevosita advokatlik tuzilmasi tomonidan tovarlar ishlab chiqarilsa, ishlar bajarilsa va xizmatlar koʻrsatilsa, ushbu tovarlar (ishlar, xizmatlar) realizatsiyasi hajmidan belgilangan tartibda Budjetdan tashqari pensiya jamgʻarmasi va Respublika yoʻl jamgʻarmasiga ajratmalar oʻtkaziladi.

24. Oʻzbekiston Respublikasi Vazirlar Mahkamasining 2003-yil 21-avgustdagi 361-son qarori bilan tasdiqlangan Oʻzbekiston Respublikasi Moliya vazirligi huzuridagi Respublika yoʻl jamgʻarmasi daromadlarini shakllantirish va sarflash foydalanish tartibi toʻgʻrisidagi nizomning 29-bandiga muvofiq nodavlat notijorat tashkilotlar tijorat va xoʻjalik faoliyati boʻlmagan faoliyatdan olingan daromadlar va tushumlar boʻyicha Oʻzbekiston Respublikasi Moliya vazirligi huzuridagi Respublika yoʻl jamgʻarmasiga majburiy ajratmalar toʻlashdan ozod etiladi.

Advokatning koʻrsatilgan yuridik yordam uchun olgan gonorari, ustavda nazarda tutilgan kirish va aʼzolik badallari, ixtiyoriy mulkiy badallar va ehsonlar, advokatlardan bir marotaba va muntazam ravishda keladigan tushumlar tijorat yoki xoʻjalik faoliyatidan olingan daromadlar yoki tushumlar hisoblanmaydi.

25. Advokatlik tuzilmalari yagona ijtimoiy toʻlov oʻrniga mehnatga haq toʻlash fondidan 25 foizlik majburiy ijtimoiy sugʻurta badallarini toʻlaydilar.

26. Mehnatga haq toʻlash fondidan ajratmalar hamda fuqarolarning ish haqidan majburiy sugʻurta badallari, soliqlar ushlanishini hisobga olmasdan, ish haqi (daromad) ning barcha turlariga (shu jumladan advokaturani ijtimoiy himoya qilish jamgʻarmasidan toʻlanadigan toʻlovlarga) hisoblanadi, qonunchilikda belgilangan toʻlovlar bundan mustasno.

Bunda mehnatga haq toʻlash fondidan ajratiladigan majburiy ajratmalar summasi quyidagi formula asosida aniqlanadi:

CF — advokatlarning mehnatga haq toʻlash jamgʻarmasidan ajratiladigan ijtimoiy sugʻurta badali summasi;

Y — advokat tomonidan koʻrsatilgan yuridik yordam uchun olingan mablagʻlar (advokat gonorari) hamda mazkur Yoʻriqnomaning 3 va 4-bandiga muvofiq advokatlik tuzilmasini saqlab turish uchun oʻtkaziladigan mablagʻlar oʻrtasidagi farq;

V — Advokaturani ijtimoiy himoya qilish jamgʻarmasidan ajratiladigan va sugʻurta badallari hisoblanishi nazarda tutilgan toʻlovlar. Bunda sugʻurta badallari hisoblanishi nazarda tutilmaydigan toʻlovlar, advokatlik tuzilmalari tomonidan ijtimoiy sugʻurta badallarini hisoblab chiqarish va toʻlashda hisobga olinmaydi;

S — mehnatga haq toʻlash fondidan olinadigan ijtimoiy sugʻurta badalining foizdagi stavkasi.

Masalan, koʻrsatilgan yuridik yordam uchun advokatning gonorari 100000 soʻmni tashkil etgan. Bunda advokatlik tuzilmasining tegishli qaroriga koʻra, advokatlik tuzilmasni saqlab turish uchun muntazam tushum sifatida 30 000 soʻm ushlab qolingan.

Bundan tashqari, advokatlik tuzilmasi tomonidan advokat hisobiga Advokaturani ijtimoiy himoya qilish jamgʻarmasi mablagʻlaridan 2000 soʻm miqdorida aʼzolik badali toʻlangan, shuningdek, 3000 soʻm miqdorida moddiy yordam berilgan. Bunda, Oʻzbekiston Respublikasi Vazirlar Mahkamasining 1994-yil 11-maydagi 249-son qarori bilan tasdiqlangan Pensiyani hisoblab chiqarishda hamda sugʻurta badallarini hisoblashda hisobga olinmaydigan ish haqi va daromadlar turlari roʻyxatiga muvofiq moddiy yordam boʻyicha ijtimoiy sugʻurta badali hisoblanmaydi. Aʼzolik badali muntazam ravishda advokat hisobiga toʻlanishini inobatga olib, ushbu toʻlov advokatning daromadi hisoblanadi va u boʻyicha ijtimoiy sugʻurta badali hisoblanadi (bunda aʼzolik badali pensiyani hisoblashda ham hisobga olinadi).

Oʻzbekiston Respublikasi Vazirlar Mahkamasining 2003-yil 25-dekabrdagi 567-son qaroriga muvofiq, advokatlik tuzilmalari mehnatga haq toʻlash fondidan 25 foizli stavkada ijtimoiy sugʻurta badalini toʻlaydilar.

Bunday holda, mehnatga haq toʻlash fondidan ajratiladigan ijtimoiy sugʻurta badali summasi quyidagicha aniqlanadi:

Fuqarolarning ish haqidan majburiy ijtimoiy sugʻurta badali summasi quyidagicha aniqlanadi:

CF1 — ish haqidan majburiy ijtimoiy sugʻurta badali summasi;

C1 — ish haqidan majburiy ijtimoiy sugʻurta badalining foizdagi stavkasi.

Yuqorida koʻrsatilgan misolda fuqarolarning ish haqidan 2,5 foizli majburiy sugʻurta badali summasi quyidagicha aniqlanadi:

27. Soliqlar va majburiy toʻlovlarni mazkur Yoʻriqnomaga asosan toʻgʻri hisoblab chiqarilishi va budjetga toʻlanishi ustidan nazorat belgilangan tartibda davlat soliq xizmati organlari tomonidan amalga oshiriladi.

28. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari roʻyxatdan oʻtkazuvchi organlar sifatida advokatlik tuzilmalari tomonidan oʻzlarining taʼsis shartnomalari va ustavlariga rioya etilishi ustidan nazoratni olib boradilar.

Advokatlik tuzilmalari mazkur Yoʻriqnoma talablariga rioya etmaganlik uchun qonunchilikda belgilangan tartibda javobgarlikka tortiladilar.

29. Mazkur Yoʻriqnoma Oʻzbekiston Respublikasi Mehnat va aholini ijtimoiy himoya qilish vazirligi hamda Oʻzbekiston Advokatlar assotsiatsiyasi bilan kelishilgan.