Oʻzbekiston Respublikasi Prezidentinig 2001-yil 17-apreldagi PF-2832-son “Kommunal xizmat koʻrsatish sohasida iqtisodiy islohotlarni chuqurlashtirishning yangi bosqichi toʻgʻrisida”gi Farmoni va Oʻzbekiston Respublikasi Vazirlar Mahkamasining 2001-yil 18-apreldagi 178-son “Aholiga kommunal xizmat koʻrsatishni takomillashtirishga doir qoʻshimcha chora-tadbirlar toʻgʻrisida”gi qarori ijrosini taʼminlash maqsadida Oʻzbekiston Respublikasi Markaziy banki Boshqaruvi va Oʻzbekiston Respublikasi Moliya vazirligining 2001-yil 25-apreldagi 01/1-291-son qaroriga asosan qaror qiladi:

1. Tashkilotlar va muassasalar tomonidan oʻz xodimlaridan kommunal xizmatlar uchun haqni ish haqidan ushlab qolish koʻrinishida qabul qilish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtgan kundan boshlab oʻn kundan keyin kuchga kiradi.

Mazkur Nizom (matn davomida — nizom) Oʻzbekiston Respublikasining Fuqarolik kodeksi, Mehnat kodeksi, Oʻzbekiston Respublikasi Prezidentining 2001-yil 17-apreldagi “Kommunal xizmat koʻrsatish sohasida iqtisodiy islohotlarni chuqurlashtirishning yangi bosqichi toʻgʻrisida” PF-2832-son Farmoni, Oʻzbekiston Respublikasi Vazirlar Mahkamasining 2001-yil 18-apreldagi “Aholiga kommunal xizmat koʻrsatishni takomillashtirishga doir qoʻshimcha chora-tadbirlar toʻgʻrisida” 178-son qarori va boshqa qonun hujjatlariga muvofiq, koʻrsatilgan kommunal xizmatlar uchun oʻz vaqtida haq toʻlanishini taʼminlash maqsadida ishlab chiqilgan.

1. Ushbu Nizom barcha mulkchilik shakllaridagi korxonalar, tashkilotlar va muassasalar (matn davomida — korxona) tomonidan kommunal xizmatlar uchun oʻz xodimlaridan ularning yozma roziligini olgan holda ish haqidan ushlanmalar koʻrinishida toʻlovni qabul qilish qoidalarini belgilaydi.

2. Korxona oʻz xodimlaridan kommunal xizmatlar uchun toʻlovni belgilangan tartibda ish haqidan ushlanma koʻrinishida qabul qilib, keyin xodimlarning yozma arizasi asosida kommunal xizmatlar koʻrsatadigan korxonalar va tashkilotlar (matn davomida — Kommunal tashkilotlar) hisobvaragʻiga ushbu mablagʻlarni oʻtkazadi.

3. Kommunal xizmatlar uchun ish haqidan ushlanma toʻgʻrisidagi arizada xodim oʻz shaxsiy hisobvaragʻi, kommunal xizmatlar qiymati va turi, kommunal tashkilot rekvizitlari va ushlanma amalga oshirilishi zarur boʻlgan davrni koʻrsatishi kerak.

4. Agar xodim kasalligi, taʼtildagi va boshqa sabablar bilan ishda boʻlmasa, ish haqidan ushlanma keyingi oyda amalga oshiriladi.

4-1. Xodimning ish haqidan ushlab qolishda ushlanmalarning umumiy miqdori xodimga beriladigan mehnat haqining ellik foizidan oshishi mumkin emas.

5. Korxona kommunal xizmatlar uchun ish haqidan ushlangan mablagʻlarni toʻlov topshiriqnomasi bilan kommunal xizmatlar koʻrsatadigan korxona va tashkilotlarning hisobvaraqlariga oʻtkazadi. Toʻlov topshiriqnomasining “Toʻlov detallari” boʻlimida “Xodimlarning ish haqidan kommunal toʻlovlar ushlanishi” koʻrsatilishi lozim. Bunda toʻlov topshiriqnomasiga xodim (xodimlar)ning familiya va initsiali, ularning yashash joyi, kommunal xizmatlar turi koʻrsatilgan reyestr ilova qilinadi.

6. Kommunal xizmatlar toʻlangani toʻgʻrisidagi toʻlov hujjatlarining koʻchirma nusxalarini Korxona xodimga mablagʻlar Kommunal tashkilotlar hisobvaragʻiga oʻtkazilganidan keyin ertasi kuni topshiradi.

7. Kommunal tashkilotga xizmat koʻrsatadigan bank kommunal xizmatlar uchun kelib tushgan mablagʻlarni ana shu mablagʻlar bankning korrespondentlik hisobvaragʻiga kelib tushgan kundan keyingi bank kunidan kechiktirmay kommunal tashkilot hisobvaragʻiga qayd etishi kerak.

8. Mulkchilik shakllaridan qatʼi nazar korxonalarning rahbarlari:

oʻz xodimlari oʻrtasida ish haqidan ushlab qolish yoʻli bilan kommunal toʻlovlarni toʻlash tartibi va imkoniyatlari toʻgʻrisida tegishli tushuntirish ishini doimiy ravishda oʻtkazishlari;

oʻz xodimlari yozma ravishda murojaat qilganida tegishli hisob-kitoblarni bajarishlari, kommunal xizmatlar uchun ish haqidan ushlanadigan toʻlov summalarini aniqlashlari;

mablagʻlar kommunal tashkilotlar hisobvaragʻiga oʻtkazilganidan keyin ish haqidan ushlanma amalga oshirilgan xodimga kommunal toʻlovlar toʻlanganini tasdiqlaydigan, korxona bosh buxgalteri imzo chekkan hujjat topshirilishi kerak.

9. Ushbu mablagʻlarning kommunal tashkilotlar hisobvaragʻiga oʻz vaqtida oʻtkazilishi uchun korxonalarning rahbarlari va bosh buxgaltyerlari shaxsan javobgar boʻladilar.

10. Mazkur Nizomda belgilangan talablarni buzishda aybdor boʻlgan mansabdor shaxslar qonun hujjatlariga muvofiq javobgarlikka tortiladilar.