Oʻzbekiston Respublikasi Prezidentining 2018-yil 6-martdagi PQ-3589-son “Avtomobil transportini boshqarish tizimini yanada takomillashtirish chora-tadbirlar toʻgʻrisida”gi qaroriga muvofiq buyuraman:

1. Oʻzbekiston avtomobil transporti agentligining Avtomobil transportini rivojlantirish jamgʻarmasi haqidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2018-yil 6-martdagi PQ-3589-son “Avtomobil transportini boshqarish tizimini yanada takomillashtirish chora-tadbirlar toʻgʻrisida”gi qaroriga muvofiq Oʻzbekiston avtomobil transporti agentligining avtomobil transportini rivojlantirish jamgʻarmasi (bundan buyon matnda Jamgʻarma deb yuritiladi) mablagʻlarini shakllantirish, boshqarish va ulardan foydalanish tartibini belgilaydi.

1. Jamgʻarma yuridik shaxs hisoblanmaydi va uning mablagʻlari Oʻzbekiston avtomobil transporti agentligining (bundan buyon matnda “Oʻzavtotrans” agentligi deb yuritiladi) shaxsiy gʻazna hisobvaragʻida (bundan buyon matnda hisobvaraq deb yuritiladi) jamlanadi va ushbu Nizomda belgilangan maqsadlarga sarflanadi.

2. Jamgʻarma mablagʻlari, tashkiliy-huquqiy shaklidan qatʼi nazar, faqat yuridik shaxslarga ajratiladi.

3. Jamgʻarma faoliyatini boshqarish va uning mablagʻlarini taqsimlash “Oʻzavtotrans” agentligi hayʼati (bundan buyon matnda Hayʼat deb yuritiladi) tomonidan amalga oshiriladi.

4. Hayʼat uning majlisida tarkibining yarmidan koʻpi qatnashgan taqdirda vakolatli hisoblanadi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Qabul qilingan qaror bayonnoma shaklida rasmiylashtiriladi.

5. Jamgʻarma faoliyatini boshqarish va uning mablagʻlarini taqsimlashda quyidagilar Hayʼatning asosiy vazifalari hisoblanadi:

Jamgʻarmaga kelib tushgan mablagʻlar doirasida daromadlar va xarajatlar smetasini tasdiqlash;

Jamgʻarma mablagʻlaridan maqsadli va samarali foydalanilishini nazorat qilish;

Jamgʻarma mablagʻlarini mazkur Nizomda belgilangan maqsadlar uchun yoʻnaltirish (ajratish) toʻgʻrisida qaror qabul qilish;

Jamgʻarmaning chorak yakuni boʻyicha daromadlari va xarajatlari ijrosi toʻgʻrisidagi hisobotni koʻrib chiqish hamda tasdiqlash;

Jamgʻarma mablagʻlaridan foydalanish yoʻnalishlari boʻyicha ijro organlarini (bundan buyon matnda Ijro organlari deb yuritiladi) shakllantirish;

Jamgʻarma mablagʻlaridan maqsadli foydalanilmaganlik holatlari aniqlanganda zudlik bilan ularni bartaraf etish, asossiz xarajatlar va keltirilgan zarar oʻrnini qoplash boʻyicha tegishli choralar koʻrish.

6. Hayʼat oʻz faoliyatini Ijro organlari orqali amalga oshiradi.

7. Quyidagilar Ijro organlarining asosiy vazifalari hisoblanadi:

Jamgʻarma mablagʻlaridan foydalanish yoʻnalishlari boʻyicha loyihalarni shakllantirish;

Jamgʻarma mablagʻlaridan foydalanish yoʻnalishlari boʻyicha kelib tushgan murojaatlarni koʻrib chiqish;

Hayʼat tomonidan yuklatilgan boshqa vazifalarni amalga oshirish.

8. Ijro organlari tomonidan Jamgʻarma mablagʻlaridan moliyalashtirilishi lozim boʻlgan loyihalar ularni moliyalashtirishning maqsadga muvofiqligi va zarurligini baholash maqsadida “Oʻzavtotrans” agentligining ilmiy-texnik Kengashiga ekspertizadan oʻtkazish uchun kiritiladi.

9. “Oʻzavtotrans” agentligining ilmiy-texnik Kengashi taqdim etilgan loyihalarni koʻrib chiqadi, ularning maqsadga muvofiqligi va zarurligini baholaydi va oʻz qarorini bayonnoma bilan rasmiylashtiradi.

“Oʻzavtotrans” agentligi ilmiy-texnik Kengashining loyihani moliyalashtirishning maqsadga muvofiqligi toʻgʻrisidagi qarori loyihani Hayʼatga moliyalashtirish uchun taqdim etishga asos boʻladi.

10. Hayʼat Ijro organi tomonidan taqdim etilgan loyihalarni koʻrib chiqadi va quyidagilar haqida qaror qabul qiladi:

loyihani Jamgʻarma mablagʻlaridan moliyalashtirish yoxud loyihani moliyalashtirishni rad etish toʻgʻrisida;

loyihani (loyihalarni) qayta ishlashga yoki qoʻshimcha baholashga yoʻnaltirish toʻgʻrisida.

11. Hayʼatning loyihani Jamgʻarma mablagʻlaridan moliyalashtirish toʻgʻrisidagi qarori asosida Jamgʻarmaning dastlabki smetasini tuzish uchun Hayʼat tomonidan ishchi guruh tuziladi.

Ishchi guruh Jamgʻarmaning dastlabki smetasini tuzishda:

Jamgʻarma pul mablagʻlarining navbatdagi yilga tushumlarini umumiy hajmini belgilaydi;

prognoz qilinayotgan yil boshidagi Jamgʻarma mablagʻlarining qoldigʻi va yil davomida prognoz qilinayotgan tushumlar va xarajatlar hajmini hisobga oladi.

Ishchi guruh tomonidan tuzilgan Jamgʻarmaning dastlabki smetasi Hayʼat tomonidan koʻrib chiqiladi va qonun hujjatlarida belgilangan tartibda tasdiqlanadi.

12. Jamgʻarma mablagʻlari quyidagi manbalar hisobidan shakllantiriladi:

shahar, shahar atrofi, shaharlararo va xalqaro avtomobilda yoʻlovchilar va yuk tashishlarni amalga oshirishga litsenziyalar berish va ularning amal qilish muddatini uzaytirish uchun toʻlanadigan davlat boji mablagʻlarining 100 foizi;

“Oʻzavtotrans” agentligining hududiy boshqarmalari inspektorlari tomonidan avtomobil tashuvchilari sohasida tuzilgan maʼmuriy huquqbuzarliklar toʻgʻrisidagi bayonnomalar boʻyicha undiriladigan jarimalar summasining 84 foizi;

Jamgʻarmaga yuklangan vazifalarni amalga oshirish uchun jalb etiladigan xalqaro moliya institutlari, xorijiy hukumat tashkilotlari va boshqa donorlar kreditlari (zaymlari) va grantlari;

davlat va xususiy hamkorlik doirasidagi xususiy investitsiyalar hamda qonunchilikda taqiqlanmagan boshqa manbalar.

13. Jamgʻarmaning mablagʻlari quyidagi maqsadlarga yoʻnaltiriladi:

ilmiy-tadqiqot ishlariga;

yoʻlovchilar avtovokzallari va avtostansiyalari, shuningdek mahalliy davlat hokimiyati organlariga qarashli boʻlgan umumiy foydalanishdagi yoʻlovchilar yoʻnalishlari oraliq bekatlarini qurish, rekonstruksiya qilish va taʼmirlash boʻyicha dasturlarga (bundan buyon matnda infratuzilma obyektlari deb yuritiladi);

avtotransport vositalarini xarid qilishga;

avtomobil transportini boshqarish tizimiga axborot-kommunikatsiya texnologiyalarini joriy etishga;

“Oʻzavtotrans” agentligini saqlashni moliyalashtirishga;

Oʻzbekiston Respublikasi Prezidentining 2018-yil 5-martdagi PQ-3584-son “Oʻzbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga transportda chiqish vaqtida xavfsizligini taʼminlash chora-tadbirlari toʻgʻrisida”gi qarorining 5-bandiga asosan Ixtisoslashtirilgan kompaniyalar tomonidan jalb etilayotgan kreditlarni qaytarish va ular boʻyicha foizlar hamda komissiyalarni toʻlash bilan bogʻliq xarajatlarni qoplashga.

14. Jamgʻarma mablagʻlarini mazkur Nizomning 13-bandida nazarda tutilmagan maqsadlarga yoʻnaltirilishiga yoʻl qoʻyilmaydi.

15. Ilmiy-tadqiqot ishlarini moliyalashtirishda Ijro organi tomonidan quyidagi talablarga javob beradigan loyihalar tanlab olinadi:

avtomobil transporti xavfsizligini taʼminlashda ilgʻor innovatsion texnologiyalarni joriy etishga;

yuqori sifatli transport xizmatlar standartlari, nazariy-metodik hujjatlar va avtomobil transportini iqtisodiy-matematik modellashga (optimallashga);

yangi texnika, texnologiya va materiallarning asosan muayyan turlarini yaratish yoki kompleks nazariy va eksperimental izlanishlar davomida amaliy natijalarga erishishga yoʻnaltirilgan loyihalar.

16. Ilmiy-tadqiqot ishlarini moliyalashtirishda “Oʻzavtotrans” agentligi ilmiy-texnik Kengashi tomonidan ekspertizadan oʻtkazilgan loyihalar loyihani moliyalashtirish maqsadga muvofiqligi toʻgʻrisidagi qarori boʻlgandagina Jamgʻarma mablagʻlaridan moliyalashtiriladi.

17. Infratuzilma obyektlarining har yilgi qurilish, rekonstruksiya qilish va taʼmirlash hajmlari Oʻzbekiston Respublikasi Prezidentining 2018-yil 6-martdagi PQ-3589-son “Avtomobil transportini boshqarish tizimini yanada takomillashtirish chora-tadbirlari toʻgʻrisida”gi qarori bilan tasdiqlangan parametrlari, shuningdek Oʻzbekiston Respublikasi Prezidenti hamda Hukumatining tegishli qarorlari va topshiriqlari asosida shakllantiriladi.

18. Ijro organi tomonidan infratuzilma obyektlarini qurish, rekonstruksiya qilish va kapital taʼmirlash yuzasidan qonun hujjatlarida belgilangan tartibda manzilli roʻyxatlar tuziladi va “Oʻzavtotrans” agentligi tomonidan tasdiqlanadi hamda tasdiqlangan manzilli roʻyxatlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishiladi.

19. Infratuzilma obyektlarini qurish, rekonstruksiya qilish va kapital taʼmirlashni amalga oshirish uchun pudratchi tashkilotlarni aniqlash qonun hujjatlarida belgilangan tartibda amalga oshiriladi.

20. Infratuzilma obyektlarini qurish, rekonstruksiya qilish va kapital taʼmirlash yuzasidan pudratchi tashkilotlarni moliyalashtirish (toʻlovlarni amalga oshirish) Oʻzbekiston Respublikasi Vazirlar Mahkamasining 2003-yil 12-sentabrdagi 395-son qarori bilan tasdiqlangan Markazlashtirilgan manbalar hisobiga qurilishni tashkil etish, moliyalashtirish va kreditlash tartibi toʻgʻrisidagi nizomga muvofiq amalga oshiriladi.

21. Manzilli roʻyxatga kiritilgan infratuzilma obyektlarini qurish, rekonstruksiya qilish va kapital taʼmirlash yuzasidan loyiha hujjatlari, ajratilgan moliyalashtirish mablagʻlarining maqsadli foydalanilganligi, bajarilgan ishlarning hajmi va sifatini nazorat qilish “Oʻzavtotrans” agentligi tomonidan amalga oshiriladi.

22. Infratuzilma obyektlarini qurish, rekonstruksiya qilish va kapital taʼmirlash yuzasidan manzilli roʻyxatga yil davomida qoʻshimcha obyektlarni kiritishga avariya holatlari hamda moliyalashtirish manbalari mavjud boʻlgan taqdirda yoʻl qoʻyiladi.

23. Oʻzbekiston Respublikasi Prezidenti va Hukumatining tegishli qarorlari bilan tasdiqlangan avtotransport vositalarini yangilash (xarid qilish) boʻyicha parametrlar doirasida tashuvchilarga avtotransport vositalarini xarid qilish uchun shartnoma asosida qaytarish sharti bilan mablagʻlar ajratiladi.

24. Jamgʻarmadan mablagʻlarni olish uchun murojaatchi “Oʻzavtotrans” agentligiga quyidagi hujjatlarni taqdim etadi:

Jamgʻarmadan pul mablagʻlari olish uchun talabnoma;

mablagʻ oluvchi toʻgʻrisida asosiy maʼlumotlar (tashkiliy-huquqiy shakli, taʼsischilar, faoliyatning asosiy turi va boshqalar);

soʻralayotgan mablagʻ miqdori, mablagʻlar maqsadi;

mablagʻlardan foydalanishning nazarda tutilayotgan yoʻnalishidagi biznes-reja;

soliq inspeksiyasi tomonidan tasdiqlangan oxirgi hisobot davriga buxgalterlik balansi (1-son shakl) va moliyaviy natijalar haqida hisobot (2-son shakl), yangi tashkil etilgan xoʻjalik yurituvchi subyektlar bundan mustasno.

25. Mablagʻlar olish uchun “Oʻzavtotrans” agentligi va mablagʻlarni oluvchi oʻrtasida qonun hujjatlarida belgilangan tartibda ikki tomonlama shartnoma rasmiylashtiriladi.

26. Avtomobil transportini boshqarish tizimiga axborot-kommunikatsiya texnologiyalarini joriy etishga Jamgʻarmaning daromadlar va xarajatlar smetasi doirasida mablagʻlar ajratiladi.

27. Avtomobil transportini boshqarish tizimiga axborot-kommunikatsiya texnologiyalarini joriy etishga mablagʻlar ajratish Oʻzbekiston Respublikasi Prezidentining 2018-yil 6-martdagi PQ-3589-son qarori bilan tasdiqlangan Avtomobil transporti boshqaruv tizimida axborot-kommunikatsiya texnologiyalarini joriy etish Dasturi doirasida ustuvor ravishda amalga oshiriladi.

28. “Oʻzavtotrans” agentligini saqlash bilan bogʻliq xarajatlar qonun hujjatlariga muvofiq tuzilgan “Oʻzavtotrans” agentligining daromadlar va xarajatlar smetasi doirasida moliyalashtiriladi.

29. Ekologik, sogʻlomlashtirish va xayriya jamgʻarmalari, madaniyat, sogʻliqni saqlash muassasalari, mehnat organlari, jismoniy tarbiya va sport, oʻquv muassasalari, mahalliy davlat hokimiyati organlari, fuqarolarning oʻzini-oʻzi boshqarish organlari uchun subsidiyalar, toʻlovlar, homiylik va xayriya yordami shaklidagi mablagʻlar faqat Oʻzbekiston Respublikasi Vazirlar Mahkamasi qaror va farmoyishlariga muvofiq amalga oshiriladi.

30. Oʻzbekiston Respublikasi Prezidentining 2018-yil 5-martdagi PQ-3584-son “Oʻzbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga transportda chiqish vaqtida xavfsizligini taʼminlash chora-tadbirlari toʻgʻrisida”gi qarorining 5-bandiga asosan Ixtisoslashtirilgan kompaniyalar tomonidan jalb etilayotgan kreditlarni qaytarish va ular boʻyicha foizlar hamda komissiyalarni toʻlash bilan bogʻliq xarajatlarni qoplashga yoʻnaltiriladigan mablagʻlar “Oʻzavtotrans” agentligini saqlash bilan bogʻliq xarajatlar doirasida amalga oshiriladi.

31. Jamgʻarmaning joriy yilda foydalanilmay qolgan mablagʻlari keyingi yilga oʻtadi.

32. Hayʼat Jamgʻarma mablagʻlarining qonuniyligi va maqsadli yoʻnaltirilishi uchun javobgar boʻladi.

33. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javobgar boʻladi.

34. Mazkur Nizom Oʻzbekiston Respublikasi Moliya vazirligi va Savdo-sanoat palatasi bilan kelishilgan.