Oʻzbekiston Respublikasining “Taʼlim toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) va Oʻzbekiston Respublikasi Vazirlar Mahkamasining 2010-yil 7-iyundagi 109-sonli “Umumtaʼlim maktablarining 9-sinf bitiruvchilarini akademik litseylar va kasb-hunar kollejlarida oʻqitish bilan qamrab olishni taʼminlash boʻyicha normativ-huquqiy bazani yanada takomillashtirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 23-son, 184-modda) muvofiq Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Vazirlar Mahkamasi huzuridagi Davlat test markazi va Xalq taʼlimi vazirligi qaror qiladi:

1. Akademik litsey va kasb-hunar kollejlarining maslahat markazlari toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi Qonuniga va Oʻzbekiston Respublikasi Vazirlar Mahkamasining 2010-yil 7-iyundagi 109-sonli “Umumtaʼlim maktablarining 9-sinf bitiruvchilarini akademik litseylar va kasb-hunar kollejlarida oʻqitish bilan qamrab olishni taʼminlash boʻyicha normativ-huquqiy bazani yanada takomillashtirish toʻgʻrisida”gi qaroriga asosan, maslahat markazi faoliyatini tashkil etish tartibini belgilaydi.

1. Mazkur Nizom harbiy akademik litseylarga nisbatan tatbiq etilmaydi.

2. Vazirlar Mahkamasining 2010-yil 7-iyundagi 109-sonli qarori bilan tasdiqlangan Umumtaʼlim maktablarining 9-sinf bitiruvchilarini oʻrta maxsus, kasb-hunar taʼlimi muassasalariga qabul qilish va rasmiylashtirishni tashkil etish tartibi toʻgʻrisidagi nizomga asosan, oʻquvchilarni qabul qilish davrida har bir akademik litsey va kasb-hunar kollejida (bundan buyon matnda taʼlim muassasasi deb yuritiladi) maslahat markazlari tashkil etiladi.

3. Maslahat markazi oʻz faoliyatini Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari, ushbu Nizom va boshqa qonun hujjatlariga amal qiladi.

4. Maslahat markazining maqsadi umumtaʼlim maktablarining 9-sinf bitiruvchilarini (bundan buyon matnda bitiruvchilar deb yuritiladi) taʼlim muassasalarida oʻqitish bilan toʻliq qamrab olishni samarali tashkil etish hisoblanadi.

5. Quyidagilar maslahat markazining vazifalari hisoblanadi:

bitiruvchilar va ularning ota-onalariga (ularning oʻrnini bosuvchi shaxslarga) ularning istagini inobatga olgan holda kasb-hunar tanlash boʻyicha maslahatlar berish;

bitiruvchilar va ularning ota-onalariga (ularning oʻrnini bosuvchi shaxslarga) taʼlim muassasasida mavjud yoʻnalishlar va kasblar toʻgʻrisida maʼlumotlar berish;

qabul vaqtida taʼlim muassasasi faoliyatiga oid bukletlar, audio-video va boshqa zarur materiallar tayyorlash;

oʻz faoliyati haqida ommaviy axborot vositalari orqali targʻibot-tashviqot ishlarini olib borish;

zarur hollarda bitiruvchilar va ularning ota-onalariga (ularning oʻrnini bosuvchi shaxslarga) taʼlim muassasasida mavjud tegishli yoʻnalishlar va tayyorlanadigan kasblar uchun tibbiy koʻrikdan oʻtish boʻyicha tavsiyalar berish va shart-sharoitlar yaratib berish;

bitiruvchilar va ularning ota-onalariga (ularning oʻrnini bosuvchi shaxslarga) taʼlim muassasasida mavjud yoʻnalishlar va tayyorlanadigan kasblar, ish kirish uchun yoʻllanma berilishi mumkin boʻlgan tashkilotlar, lavozimlar, tegishli qonun hujjatlari hamda sohaga oid asosiy talablar haqida tushuntirish berish;

bitiruvchilar va ularning ota-onalari (ularning oʻrnini bosuvchi shaxslar) uchun kasbga yoʻnaltirish boʻyicha ochiq eshiklar kunlarini tashkil etish hamda ularni taʼlim muassasasida yaratilgan barcha shart-sharoitlar bilan tanishtirish;

taʼlim muassasasiga bitiruvchilarning hujjatlarini qabul qilish;

bitiruvchilarni qamrab olish jarayonining borishini ommaviy axborot vositalari orqali, shuningdek taʼlim muassasasining rasmiy veb-saytida keng yoritilishini taʼminlash;

saralash test sinovlari oʻtkazilganda, bitiruvchilar yoki ularning ota-onalarini (ularning oʻrnini bosuvchi shaxslarni) saralash test sinovlari oʻtkaziladigan kunlar haqida xabardor qilish, shuningdek taʼlim muassasasida tuziladigan komissiyaga saralash test sinovlarini (ijodiy imtihonlarni) tashkil etish va oʻtkazishda bevosita koʻmaklashish va zarur maʼlumotlarni taqdim etish;

saralash test sinovi natijalarini eʼlon qilish hamda abituriyentlarga saralash test sinovi natijalari boʻyicha toʻliq maʼlumot berish;

bitiruvchilarning hujjatlari bilan birgalikda shaxsiy hujjatlari yigʻma jildini shakllantirish va saqlash;

bitiruvchilarni taʼlim muassasasiga oʻqitish bilan qamrab olish boʻyicha tegishli statistik maʼlumotlarni tayyorlash va ularni hududiy oʻrta maxsus, kasb-hunar taʼlimi boshqarmasi yoki tegishli vazirlik va idoraga taqdim etish;

saralash test sinovlaridan, shuningdek madaniyat, sanʼat va boshqa ijodiy yoʻnalishlari boʻyicha ijodiy imtihonlardan oʻta olmagan bitiruvchilarning hujjatlarini bitiruvchilar va ularning ota-onalari (ularning oʻrnini bosuvchi shaxslar) roziligi bilan qamrab olish imkoniyati mavjud boʻlgan taʼlimi muassasalariga dalolatnoma asosida oʻtkazilishini taʼminlash.

Maslahat markazi qonun hujjatlariga muvofiq boshqa vazifalarni ham amalga oshirishi mumkin.

6. Maslahat markazi faoliyatiga taʼlim muassasasining direktori rahbarlik qiladi.

7. Taʼlim muassasasi direktori har yili 10-martga qadar maslahat markazining masʼul kotibligiga 3 nafar nomzodning roʻyxatini hududiy oʻrta maxsus, kasb-hunar taʼlimi boshqarmasiga, boshqa vazirlik yoki idora tasarrufidagi taʼlim muassasasi direktori esa, tegishli vazirlik yoki idoraga kelishish uchun kiritadi.

8. Maslahat markazi aʼzolari soni har bir taʼlim muassasasida ish hajmi, qabul rejasi va kvotasidan kelib chiqib, kamida 5 kishidan iborat boʻladi.

9. Maslahat markazi aʼzolari tarkibiga taʼlim muassasasining amaliyotchi psixologi hamda tajribali pedagoglari kiritilishi lozim.

Boshqa vazirlik yoki idora tasarrufidagi taʼlim muassasasining maslahat markazi aʼzolari tarkibiga tegishli vazirlik yoki idoraning vakili ham kiritilishi mumkin.

10. Maslahat markazi aʼzolari tarkibi taʼlim muassasasi direktorining buyrugʻi bilan tasdiqlanadi. Mazkur buyruq bilan maslahat markazi masʼul kotibi va aʼzolarining vazifalari, huquq va majburiyatlari belgilanadi.

11. Maslahat markazi rahbari:

maslahat markazi faoliyatiga umumiy rahbarlik qiladi;

maslahat markazi faoliyati bilan bogʻliq masalalar boʻyicha qarorlar qabul qiladi hamda maslahat markaziga yuklangan vazifalarning bajarilishi uchun shaxsan javob beradi;

maslahat markazi masʼul kotibi va aʼzolarining vazifalarini taqsimlaydi hamda ularning huquq va majburiyatlarini belgilaydi;

maslahat markazi masʼul kotibi va aʼzolari tomonidan bajarilishi majburiy boʻlgan buyruqlar chiqaradi hamda koʻrsatmalar beradi;

zarurat boʻlganda, maslahat markazi tarkibiga oʻzgartirishlar kiritadi.

maslahat markazi yigʻilishi bayonnomalarini tasdiqlaydi;

qabul qilingan hujjatlarni roʻyxatga olish kitoblarini imzolaydi va muhr bilan tasdiqlaydi;

qabul bilan bogʻliq hujjatlarning toʻgʻri rasmiylashtirilishi, hisobotining olib borilishi va belgilangan tartibda saqlanishini nazorat qiladi;

maslahat markazining faoliyat yuritishi uchun zarur boʻlgan texnik vositalar va kanselyariya mollari bilan taʼminlaydi;

saralash test sinovlari oʻtkaziladigan taʼlim muassasalarida faoliyat koʻrsatadigan komissiya tarkibida aʼzo sifatida ishtirok etadi va komissiya raisiga saralash test sinovlarini oʻtkazishda amaliy yordam koʻrsatadi;

bitiruvchilar va ularning ota-onalarini (ularning oʻrnini bosuvchi shaxslarni) va boshqa fuqarolarni qabul qiladi.

12. Bitiruvchilarni oʻqitish bilan taʼlim muassasasiga qamrab olish jarayonini qonun hujjatlariga muvofiq tashkil etish va amalga oshirish uchun maslahat markazi rahbari va masʼul kotibi masʼuldir.

13. Maslahat markazlari faoliyati har yili 1-dekabrga qadar taʼlim muassasasi direktorining buyrugʻiga asosan tugatiladi.

14. Maslahat markazi ishidan norozi boʻlgan shaxslar qonun hujjatlarida belgilangan tartibda shikoyat qilish huquqiga ega.

15. Ushbu Nizom Oʻzbekiston Respublikasi Sogʻliqni saqlash vazirligi, Mehnat va aholini ijtimoiy muhofaza qilish vazirligi, Madaniyat va sport ishlari vazirligi, Qishloq va suv xoʻjaligi vazirligi, Oʻzbekiston Badiiy akademiyasi, Davlat soliq qoʻmitasi hamda “Oʻzbekiston temir yoʻllari” DATK bilan kelishilgan.