Navoiy viloyatidagi sugʻoriladigan yerlarda qishloq xoʻjaligi ishlab chiqarishini barqaror rivojlantirishni taʼminlash, shuningdek Fransiya Respublikasi bilan hamkorlikni yanada kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumati bilan Fransiya Respublikasi Hukumati oʻrtasida 2009-yil 15-dekabrdagi Moliyaviy Protokolga binoan “Navoiy viloyatidagi “Navoiy” va “Uchqora” nasos stansiyalarini rekonstruksiya qilish” loyihasini amalga oshirish uchun Fransiya Respublikasi Hukumati tomonidan, besh yillik imtiyozli davrni qoʻshgan holda, 20 yil muddatga 15,0 mln yevro miqdorida imtiyozli ssuda berilayotganligi maʼlumot uchun qabul qilinsin.

2. Belgilab qoʻyilsinki, “Navoiy viloyatidagi “Navoiy” va “Uchqora” nasos stansiyalarini rekonstruksiya qilish” loyihasini amalga oshirish doirasida:

Oʻzbekiston Respublikasi Qishloq va suv xoʻjaligi vazirligi loyihaning oʻz vaqtida amalga oshirilishi, jalb etilayotgan imtiyozli ssudadan maqsadli va samarali foydalanilishi uchun masʼul boʻlgan ijro etuvchi organ hisoblanadi;

imtiyozli ssuda boʻyicha asosiy qarzni qaytarish va foizlarni toʻlash bilan bogʻliq xarajatlar davlat budjeti mablagʻlari hisobiga amalga oshiriladi.

3. “Navoiy viloyatidagi “Navoiy” va “Uchqora” nasos stansiyalarini rekonstruksiya qilish” loyihasini amalga oshirish uchun Fransiya Respublikasi Hukumatining imtiyozli ssudasini qaytarish va uning boʻyicha foizlarni toʻlashning prognoz jadvali ilovaga* muvofiq tasdiqlansin.

4. Oʻzbekiston Respublikasi Moliya vaziriga Oʻzbekiston Respublikasi Moliya vazirligi bilan Natiksis banki oʻrtasida ssuda toʻgʻrisidagi bitimni Oʻzbekiston Respublikasi Hukumati nomidan imzolash vakolati berilsin.

5. Oʻzbekiston Respublikasi Qishloq va suv xoʻjaligi vazirligi ikki oy muddatda:

loyiha boʻyicha injiniring ishlarini bajarish uchun Oʻzbekiston Respublikasi qonun hujjatlariga muvofiq Fransiya konsalting tashkiloti tanlanishini taʼminlasin;

loyihaning texnik-iqtisodiy asoslashi ishlab chiqilgandan keyin uning vakolatli ekspertiza organlarida kelishilishini va tasdiqlash uchun belgilangan tartibda Oʻzbekiston Respublikasi Vazirlar Mahkamasiga kiritilishini taʼminlasin.

6. Oʻzbekiston Respublikasi Tashqi ishlar vazirligi Qishloq va suv xoʻjaligi vazirligining buyurtmanomalariga binoan koʻrsatib oʻtilgan loyihani amalga oshirishda ishtirok etuvchi xorijiy mutaxassislarga kirish vizalarining konsullik yigʻimlari va boshqa yigʻimlar undirilmasdan rasmiylashtirilishini belgilangan tartibda taʼminlasin.

7. Oʻzbekiston Respublikasi Ichki ishlar vazirligi Qishloq va suv xoʻjaligi vazirligining buyurtmanomalariga binoan koʻrsatib oʻtilgan loyihani amalga oshirishda ishtirok etuvchi xorijiy mutaxassislarga, ularni davlat bojlari toʻlashdan ozod qilgan holda, koʻp martalik vizalarning berilishi va muddati uzaytirilishini, shuningdek vaqtinchalik yashash joyi boʻyicha vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini belgilangan tartibda taʼminlasin.

8. Oʻzbekiston Respublikasi Mehnat va aholini ijtimoiy muhofaza qilish vazirligi Qishloq va suv xoʻjaligi vazirligining buyurtmanomalariga binoan koʻrsatib oʻtilgan loyihani amalga oshirishda ishtirok etuvchi xorijiy mutaxassislarni Oʻzbekiston Respublikasi hududida mehnat faoliyatiga jalb etishga ruxsatnomalar, shuningdek ularning mehnat faoliyatini amalga oshirish huquqiga tasdiqnomalar berilishi (muddati uzaytirilishi)ni belgilangan tartibda taʼminlasin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.