Oʻzbekiston Respublikasining “Jismoniy tarbiya va sport toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 2000-y., 5-6-son, 147-modda) va Oʻzbekiston Respublikasi Vazirlar Mahkamasining 2005-yil 5-apreldagi 96-son “Oʻzbekiston Respublikasi Madaniyat va sport ishlari vazirligi toʻgʻrisidagi nizomni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2005-y., 14-son, 104-modda) muvofiq buyuraman:

1. Oʻzbekiston Respublikasida sport turlari reyestri toʻgʻrisidagi nizom ilovaga muvofiq tasdiqlansin.

2. Ushbu buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi “Jismoniy tarbiya va sport toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 2000-y., 5-6-son, 147-modda) va Oʻzbekiston Respublikasi Vazirlar Mahkamasining 2005-yil 5-apreldagi 96-son qarori (Oʻzbekiston Respublikasi qonun hujjatlari toʻplami, 2005-y., 14-son, 104-modda) bilan tasdiqlangan Oʻzbekiston Respublikasi Madaniyat va sport ishlari vazirligi toʻgʻrisidagi nizomga muvofiq Oʻzbekiston Respublikasida rivojlanayotgan sport turlari va sportning tarkibiy qismlari roʻyxatini va ularni Oʻzbekiston Respublikasi sport turlari reyestriga kiritish tartibini aniqlaydi.

1. Sport turlari boʻyicha reyestr (keyingi oʻrinlarda Reyestr deb yuritiladi) Oʻzbekiston Respublikasi hududida shugʻullaniladigan sport turlarining tizimlashtirilgan roʻyxati.

Reyestr Oʻzbekiston Respublikasida rivojlanayotgan sport turlari va sportning tarkibiy qismlari boʻyicha yagona bazani yaratish maqsadida tuziladi.

2. Reyestr Oʻzbekiston Respublikasi Madaniyat va sport ishlari vazirligi (keyingi oʻrinlarda vakolatli organ deb yuritiladi) tomonidan tuziladi va yuritiladi.

3. Ushbu Nizomda quyidagi asosiy tushunchalardan foydalaniladi:

sport turi — odamning sport musobaqalariga oʻziga xos tayyorlanishini tavsiflaydigan, musobaqalarni oʻtkazish va ularda qatnashish talablari, tartibi va shart-sharoitlari ularga muvofiq belgilanadigan oʻz qoidalariga ega boʻlgan jismoniy tarbiya va sport sohasidagi faoliyat turi;

sportning tarkibiy qismi — sport turining ajralmas qismi boʻlib, musobaqalarning bir yoki bir nechta turini oʻz ichiga oladi.

4. Sport turi yoki sportning tarkibiy qismi Reyestrga respublika sport federatsiyalari (uyushmalari, markazlari va boshqalar), jismoniy tarbiya va sport tashkilotlari taqdimnomalari asosida kiritiladi.

5. Reyestrga sport turini yoki sportning tarkibiy qismini kiritish uchun vakolatli organga quyidagi hujjatlar taqdim etiladi:

a) sport turining yoki sportning tarkibiy qismining aniq nomi koʻrsatilgan taqdimnoma;

b) sport federatsiyasining (uyushma, markaz va boshqalar), jismoniy tarbiya va sport tashkilotining davlat roʻyxatidan oʻtganligi toʻgʻrisida oʻrnatilgan tartibda tasdiqlangan guvohnomaning nusxasi;

v) sport turi boʻyicha musobaqa oʻtkazishning yagona qoidalari;

g) sport federatsiyasining (uyushma, markaz va boshqalar), jismoniy tarbiya va sport tashkiloti rahbarlarining roʻyxati (F.I.O., lavozimi, telefon raqami);

d) sport federatsiyasining (uyushma, markaz va boshqalar) xalqaro sport tashkilotiga aʼzo boʻlganligi toʻgʻrisidagi (agar aʼzo boʻlsa) hujjatning nusxasi va uning oʻrnatilgan tartibda tasdiqlangan oʻzbek tilidagi tarjimasi;

e) Oʻzbekiston Respublikasi hududlarida sport turining rivojlanayotganligi toʻgʻrisida Qoraqalpogʻiston Respublikasi Madaniyat va sport ishlari vazirligi, viloyatlar va Toshkent shahar madaniyat va sport ishlari boshqarmalaridan maʼlumot.

6. Sport turini Reyestrga kiritish uchun ushbu sport turi respublika hududlarining kamida toʻrttasida rivojlangan boʻlishi kerak, qishki sport turlari bundan mustasno.

7. Sport turini yoki sportning tarkibiy qismini Reyestrga kiritish masalasi vakolatli organning hayʼat yigʻilishida muhokama qilinadi va uning qarori bilan tasdiqlanadi. Qabul qilingan qaror toʻgʻrisida hayʼat yigʻilishidan soʻng uch kun oʻtmasdan yozma ravishda maʼlumot beriladi.

8. Reyestrga kiritilgan sport turiga oʻn belgili tartib raqami (kod) beriladi. Ushbu raqam jismoniy tarbiya sohasidagi davlat statistika shakllariga kiritiladi. Har bir son quyidagilarni aniqlaydi:

a) birinchi, ikkinchi va uchinchi sonlar — sport turining bazali tartib raqami 001 dan 999 gacha;

b) toʻrtinchi va beshinchi — sportning tarkibiy qismlarining bazali tartib raqami 01 dan 99 gacha, sport turida tarkibiy qismlar boʻlmasa — 00;

v) oltinchi — sport bilan shugʻullanish mavsumini hamda oʻyinli va oʻyinli emas sport turini aniqlaydi:

0 — mavsumli emas, oʻyinli emas;

1 — yozgi, oʻyinli emas;

2 — qishki, oʻyinli emas;

3 — mavsumli emas, oʻyinli;

4 — yozgi, oʻyinli;

5 — qishki, oʻyinli;

g) yettinchi — sport turlari quyidagicha boʻladi:

1 — milliy sport turlari;

2 — faqat Oʻzbekiston Respublikasi hududlarida rivojlangan;

3 — xalqaro sport tashkiloti mavjud boʻlgan sport turi;

4 — xalqaro sport tashkiloti mavjud boʻlgan sport turi va u Xalqaro Olimpiya qoʻmitasi tomonidan tan olingan;

5 — xalqaro sport tashkiloti mavjud boʻlgan sport turi va u Xalqaro Olimpiya qoʻmitasi tomonidan tan olingan hamda Olimpiya oʻyinlari dasturiga kiritilgan;

d) sakkizinchi — sport turining idoraviy mansubligini bildiradi:

0 — hech qanday tashkilotga mansub emas;

1 — Oʻzbekiston Respublikasi Mudofaa vazirligiga;

2 — Oʻzbekiston Respublikasi Ichki ishlar vazirligiga;

3 — Oʻzbekiston Mudofaasiga koʻmaklashuvchi “Vatanparvar” tashkiloti Markaziy Kengashiga;

4 — Oʻzbekiston Respublikasi Madaniyat va sport ishlari vazirligiga;

e) toʻqqizinchi — maxsus belgi:

0 — sport turi bilan shugʻullanish cheklanmagan;

9 — faqat maxsus davlat tizimlarida rivojlantirish mumkin;

j) oʻninchi — sport turi bilan shugʻullanayotganlar jinsini bildiradi:

1 — erkaklar va ayollar;

2 — erkaklar;

3 — ayollar.

9. Reyestrga oʻzgartirishlar va qoʻshimchalar vakolatli organning buyrugʻi asosida kiritiladi.

10. Reyestrga kiritilgan sport turi boʻyicha quyidagilarga ruxsat etiladi:

oliy va oʻrta maxsus taʼlim muassasalari mutaxassislarini tayyorlash;

sport maktablari, oʻrnatilgan tartibda – boʻlimlarni ochish;

turli hududiy, respublika va xalqaro musobaqalarni oʻtkazish;

murabbiylarga, sport hakamlariga va sportchilarga toifa va unvon berish;

Oʻzbekiston Respublikasi nomidan turli xalqaro musobaqalarda ishtirok etish;

qonunchilikka zid boʻlmagan boshqa maqsadlarda faoliyat olib borish.

11. Reyestr mazkur Nizomning ilovasiga muvofiq shaklda yuritiladi.

12. Sport turi yoki sportning tarkibiy qismi mazkur Nizomning 5 va 6-bandlari talabiga javob bermagan taqdirda, Reyestrga kiritilmaydi. Sport turini yoki sportning tarkibiy qismini Reyestrdan chiqarish masalasi vakolatli organning hayʼat yigʻilishida muhokama qilinib, tegishli qaror bilan tasdiqlanadi.

13. Mazkur Nizomda koʻrsatilgan talablarning buzilishiga yoʻl qoʻygan shaxslar qonunchilikda belgilangan tartibda javobgar boʻladilar.

14. Mazkur Nizom Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Mudofaa vazirligi, Ichki ishlar vazirligi, Davlat statistika qoʻmitasi, Oʻzbekiston Kasaba uyushmalari Federatsiyasi Kengashi hamda Oʻzbekiston Mudofaasiga koʻmaklashuvchi “Vatanparvar” tashkiloti Markaziy Kengashi bilan kelishilgan.