Oʻzbekiston Respublikasining “Oʻzbekiston Respublikasining Markaziy banki toʻgʻrisida”, “Banklar va bank faoliyati toʻgʻrisida”gi qonunlari hamda Oʻzbekiston Respublikasi Prezidentining “Bank tizimini yanada rivojlantirish va boʻsh pul mablagʻlarini bank aylanmasiga jalb etish chora-tadbirlari toʻgʻrisida”gi 2007-yil 7-noyabrdagi PQ-726-sonli qaroriga muvofiq qaror qilamiz:

1. Bank kassalariga topshirilayotgan naqd pul tushumining barqaror oʻsishini va ularning uzluksiz berilishini taʼminlanishi boʻyicha mansabdor shaxslarning ragʻbatlantirilishi va ularning masʼuliyatini oshirish tartibi toʻgʻrisidagi nizom ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan oʻn kun oʻtgandan keyin kuchga kiritilsin.

3. Mazkur qaror ijrosini nazorat qilish Oʻzbekiston Respublikasi Markaziy bank raisining birinchi oʻrinbosari Q. Rofiyev va Oʻzbekiston Respublikasi Davlat soliq qoʻmitasi raisining birinchi oʻrinbosari E. Gadoyev zimmalariga yuklatilsin.

1. Mazkur Nizom bank kassalariga tushayotgan naqd pul tushumining barqaror oshishi va uni aholi hamda xoʻjalik yurituvchi subyektlarining depozit hisobvaraqlaridan uzluksiz berilishini taʼminlaganlik uchun davlat soliq xizmati, banklar va inkassatsiya xizmatining mansabdor shaxslarini ragʻbatlantirish va ularning masʼuliyatini oshirish tartibini belgilaydi.

2. Bank kassalariga tushayotgan naqd pul tushumining barqaror oʻsishini taʼminlaganlik uchun ragʻbatlantirish tizimi quyidagilar uchun belgilanadi:

Xoʻjalik yurituvchi subyektlar tomonidan chakana savdo, umumiy ovqatlanish, ish va xizmatlar koʻrsatishdan tushgan naqd pul tushumini bank kassalariga topshirilishi ustidan monitoring va nazorat yuritish boʻyicha Markaziy bankning hududiy Bosh boshqarmalarining rahbarlari hamda pul muomalasini tartibga solish boʻlinmalari rahbarlari;

Davlat soliq qoʻmitasining Qoraqalpogʻiston Respublikasi, viloyatlar va Toshkent shahar boshqarmalari, shahar va tuman soliq inspeksiyalari rahbarlari;

Tijorat banklarining Qoraqalpogʻiston Respublikasi, viloyatlar va Toshkent shahar boshqarmalari, shahar va tuman boʻlimlari (filiallari)ning rahbarlari hamda pul muomalasi va kassa operatsiyalari boʻlimlari rahbarlari.

3. Bank kassalariga tushayotgan naqd pul tushumining barqaror oshishini taʼminlaganlik uchun davlat soliq xizmati, tijorat banklari mansabdor shaxslariga mukofot pullari Oʻzbekiston Respublikasi Mehnat kodeksining 153 va 180-moddalariga muvofiq, mazkur tashkilotlarning mehnatga haq toʻlash fondlari va maxsus jamgʻarmalari hisobidan toʻlanadi.

4. Hisobot oyi yakuni boʻyicha tegishli hududlardagi tijorat banklari kassalariga inkassatsiya xizmati orqali topshirilgan naqd pul tushumining oʻtgan oydagiga nisbatan kamida 5 foiz miqdorda oʻsishini taʼminlaganlik uchun ushbu Nizomning 2-bandida koʻrsatib oʻtilgan shaxslar mansab maoshining 20 foizigacha miqdorda ragʻbatlantiriladi.

Bunda ushbu Nizomning 2-bandida koʻrsatilgan Davlat soliq qoʻmitasining Qoraqalpogʻiston Respublikasi, viloyatlar va Toshkent shahar boshqarmalari, shahar va tuman soliq inspeksiyalari rahbarlari tegishli hududda tijorat banklari kassalariga inkassatsiya xizmati orqali savdo va pullik xizmat koʻrsatish sohasidan topshirilgan naqd pul tushumlari oʻtgan oydagiga nisbatan kamida 5 foiz miqdorda oʻsishi taʼminlanganida mukofotlanadilar.

Ushbu Nizomning 2-bandida koʻrsatilgan tijorat banklarining rahbarlari — mazkur banklarning tegishli Qoraqalpogʻiston Respublikasi, viloyatlar va Toshkent shahar boshqarmalari, shahar va tumanlardagi boʻlimlari (filiallari) kassalariga savdo va pullik xizmat koʻrsatish sohalaridan hamda aholi qoʻlidagi boʻsh pul mablagʻlarini muddatli omonatlarga jalb qilish hisobiga tushayotgan naqd pul tushumi hajmi oshirilganda, kassa operatsiyalarining kirim va chiqim qismi nisbati oʻtgan oy koʻrsatkichiga nisbatan kam boʻlmaganida hamda aholi va xoʻjalik yurituvchi subyektlarga ularning hisobvaraqlaridagi mavjud mablagʻlari doirasida qonun hujjatlariga muvofiq berilishi lozim boʻlgan naqd pul toʻlovlari, ayniqsa birinchi navbatda toʻlanadigan ish haqi va unga tenglashtirilgan toʻlovlar oʻz vaqtida amalga oshirilgan taqdirda mukofotlanadilar.

5. Mukofotlash mukofotlanayotgan shaxsning umumiy ishga qoʻshgan shaxsiy hissasiga qarab yuqori tashkilotning buyrugʻi (qarori) asosida amalga oshiriladi.

6. Markaziy bank, Davlat soliq qoʻmitasi va tijorat banklarining oʻz jamoa shartnomalariga, ichki mehnat tartibi qoidalariga va boshqa lokal hujjatlariga binoan bank kassalariga tushayotgan naqd pul tushumining barqaror ortib borishini taʼminlaganligi uchun Markaziy bankning hududiy Bosh boshqarmalari, davlat soliq xizmati, tijorat banklarining tegishli mansabdor shaxslariga nisbatan mehnat qonunchiligi doirasida ragʻbatlantirishning boshqa usullari ham qoʻllanilishi mumkin.

7. Joylarda inkassatsiya xizmati orqali bank kassalariga topshirilgan naqd pul tushumlarining miqdori oʻtgan oydagiga nisbatan kamaygan hollarda ushbu Nizomning 2-bandida koʻrsatib oʻtilgan shaxslarga nisbatan Oʻzbekiston Respublikasi Mehnat kodeksining 181-moddasiga muvofiq intizomiy jazo choralari, jumladan hayfsan yoki oʻrtacha oylik ish haqining 30 foizidan ortiq boʻlmagan miqdorda jarima qoʻllanilishi mumkin.

Tijorat banklari aholi va xoʻjalik yurituvchi subyektlarga ularning hisobvaraqlaridagi mavjud mablagʻlari doirasida amaldagi qonunchilikka muvofiq berilishi lozim boʻlgan naqd pul toʻlovlari, ularning talabi boʻyicha uzluksiz berilishini taʼminlanmaganliklari uchun ularning rahbar xodimlariga Oʻzbekiston Respublikasi Prezidentining “Banklardagi depozit hisobvaraqlardan naqd pul toʻlovlarini uzluksiz taʼminlash kafolatlari toʻgʻrisida” 2005-yil 5-avgustdagi PQ-147-sonli qaroriga asosan choralar koʻriladi.

Intizomiy jazolarni qoʻllash Oʻzbekiston Respublikasi Mehnat kodeksining 182-moddasiga qatʼiy rioya etgan holda amalga oshiriladi.

8. Ushbu Nizom talablarining bajarilishini Oʻzbekiston Respublikasi Markaziy banki va Davlat soliq qoʻmitasi nazorat qiladi.

9. Oʻzbekiston Respublikasi Markaziy banki va Davlat soliq qoʻmitasi bank kassalariga tushayotgan naqd pul tushumlarining barqaror koʻpayib borishini ragʻbatlantirishga doir chora-tadbirlarning bajarilishi toʻgʻrisida tegishli hududiy (Bosh) boshqarmalaridan olingan maʼlumotlar asosida tijorat banklari, soliq va inkassatsiya xizmatining shahar va tuman boʻlimlari boʻyicha umumlashtiradi va tahlil qiladi.

10. Oʻzbekiston Respublikasi Markaziy banki va Davlat soliq qoʻmitasi bank kassalariga tushayotgan naqd pul tushumlarining barqaror oʻsib borishini taʼminlaganlik uchun mansabdor shaxslarni ragʻbatlantirish hamda naqd pul mablagʻlarining uzluksiz berilishini taʼminlash yuzasidan ularning masʼuliyatini oshirish borasida amalga oshirilgan chora-tadbirlar natijalari boʻyicha har oyda Respublika pul-kredit siyosati komissiyasiga tegishli materiallar va takliflarni kiritadi.

11. Mazkur Nizom Oʻzbekiston Respublikasi Mehnat va aholini ijtimoiy muhofaza qilish vazirligi va Oʻzbekiston Kasaba uyushmalari Federatsiyasi Kengashi bilan kelishilgan.