Oʻzbekiston Respublikasi Prezidentining 2006-yil 11-yanvardagi “Toshkent shahrida yoʻlovchi transportini tashkil qilish tizimini yanada takomillashtirish toʻgʻrisida”gi PF-3713-sonli Farmoniga (Oʻzbekiston Respublikasi qonun hujjatlari toʻplami, 2006-yil, 2-son, 7-modda), Oʻzbekiston Respublikasi Prezidentining 2006-yil 3-iyuldagi “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida”gi PQ-396-sonli qarori (Oʻzbekiston Respublikasi qonun hujjatlari toʻplami, 2006-yil, 27-son, 247-modda) va Oʻzbekiston Respublikasi Vazirlar Mahkamasining 2007-yil 23-martdagi “Oʻzbekiston Respublikasi Prezidentining “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarori bajarilishini taʼminlash yuzasidan qoʻshimcha chora-tadbirlar toʻgʻrisida”gi 57-son qaroriga muvofiq Oʻzbekiston Respublikasi Davlat mulkini boshqarish davlat qoʻmitasi va Oʻzbekiston Respublikasi Moliya vazirligi qaror qiladi:

1. “Toshavtobustrans” aksiyadorlik kompaniyasi avtobus parklarining davlat aksiya paketlarini yopiq kimoshdi savdolarida sotish tartibi toʻgʻrisida”gi nizom ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtgan paytdan boshlab oʻn kundan soʻng kuchga kiradi.

Mazkur Nizom Oʻzbekiston Respublikasi Prezidentining “Toshkent shahrida yoʻlovchi transportini tashkil qilish tizimini yanada takomillashtirish toʻgʻrisida” 2006-yil 11-yanvardagi PF-3713-son Farmoni (Oʻzbekiston Respublikasi qonun hujjatlari toʻplami, 2006-y., 2-son, 7-modda), “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarori (Oʻzbekiston Respublikasi qonun hujjatlari toʻplami, 2006-y., 27-son, 247-modda) va Oʻzbekiston Respublikasi Vazirlar Mahkamasining “Oʻzbekiston Respublikasi Prezidentining “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarori bajarilishini taʼminlash yuzasidan qoʻshimcha chora-tadbirlar toʻgʻrisida” 2007-yil 23-martdagi 57-son qaroriga muvofiq “Toshavtobustrans” aksiyadorlik kompaniyasi avtobus parklarining davlat aksiya paketlarini yopiq kimoshdi savdolarida sotish tartibini belgilaydi.

1. Mazkur Nizomda quyidagi tushunchalar qoʻllaniladi:

arizachi — yopiq kimoshdi savdosida ishtirok etish maqsadida ariza bilan murojaat qilgan yuridik va jismoniy shaxslar;

yopiq kimoshdi savdolari — qatnashish uchun maxsus taklif qilingan shaxslar ishtirokidagi savdolar shakli;

yopiq kimoshdi savdolarini oʻtkazish boʻyicha komissiya (bundan keyingi oʻrinlarda Komissiya deb yuritiladi) — yopiq kimoshdi savdolarini tashkil qilish va oʻtkazish uchun Oʻzbekiston Respublikasi Davlat mulki qoʻmitasining buyrugʻi bilan tashkil qilinadigan vaqtinchalik komissiya;

yopiq kimoshdi savdolari obyekti (bundan keyingi oʻrinlarda savdolar obyekti deb yuritiladi) — avtobus parklarining “Toshavtobustrans” aksiyadorlik kompaniyasi ustav fondiga oʻtkazilgan davlat aksiya paketlari, shuningdek avtobus parklarining qoʻshimcha chiqarilgan va sotilishiga qadar davlat mulki boʻlgan aksiyalari;

yopiq kimoshdi savdolari ishtirokchilari — yopiq kimoshdi savdosida ishtirok etishiga tegishli tartibda ruxsat etilgan yuridik va jismoniy shaxslar;

yopiq kimoshdi savdolari tashkilotchisi (bundan keyingi oʻrinlarda savdo tashkilotchisi deb yuritiladi) — Oʻzbekiston Respublikasining Davlat mulkini boshqarish davlat qoʻmitasi (bundan keyingi oʻrinlarda Davlat mulki qoʻmitasi deb yuritiladi) yoki shartnoma asosida jalb etilgan yopiq kimoshdi savdolarini tashkil etish va oʻtkazishga ixtisoslashgan tashkilot;

yopiq kimoshdi savdolari hujjatlari — yopiq kimoshdi savdolari ishtirokchilari tomonidan Komissiyaga taqdim qilinadigan hujjatlar majmui;

sotuvchi — Davlat mulki qoʻmitasi, “Toshavtobustrans” aksiyadorlik kompaniyasi.

2. Savdolar obyekti birinchi navbatda avtobus parklari mehnat jamoalarining aʼzolariga, shuningdek “Toshavtobustrans” aksiyadorlik kompaniyasi tarkibiga kirgan hamda yoʻlovchilarga bir maromda va bexatar xizmat koʻrsatishni taʼminlaydigan ishonchli avtoyoʻlovchi tashuvchi sifatida oʻzini namoyon etgan avtokorxonalarga sotiladi.

3. Quyidagi talablarga javob beruvchi avtoyoʻlovchi tashuvchi avtokorxonalar yoʻlovchilarga bir maromda va bexatar xizmat koʻrsatishni taʼminlaydigan ishonchli avtoyoʻlovchi tashuvchi sifatida oʻzini namoyon etgan avtokorxonalar deb topiladi:

a) avtoyoʻlovchi tashuvchining aybi bilan sodir etilgan ogʻir oqibatli yoʻl transport hodisasining mavjud emasligi;

b) avtoyoʻlovchi tashuvchi avtokorxonaning bir maromdagi moliyaviy ahvolining mavjudligi. Bunda, bir maromdagi moliyaviy ahvol deganda mazkur avtokorxonaning oxirgi bir yil davomida zarar koʻrmasdan ishlaganligi, davlat budjetidan va xodimlarga ish haqi boʻyicha qarzdorlikning yoʻqligi hamda toʻlov qobiliyatining mavjudligi tushuniladi;

v) avtoyoʻlovchi tashuvchi avtokorxonaning faoliyat yurituvchi yoʻnalishida bir maromda xizmat koʻrsatishi. Bunda bir maromda xizmat koʻrsatish deganda mazkur avtokorxonaga tegishli avtoyoʻlovchi tashuvchilarning belgilangan yoʻnalish boʻyicha ish vaqti intervaliga (oraliq daqiqaga) doimiy rioya etishi tushuniladi.

4. Savdolar obyekti, ularni sotib olishda imtiyozga ega boʻlgan shaxslar tomonidan sotib olinmagan taqdirda, yopiq kimoshdi savdolarining boshqa ishtirokchilariga mazkur Nizomda belgilangan tartibda sotiladi.

5. Savdolar obyekti avtobus parklari faoliyatining ixtisosligini saqlab qolish va avtobuslardan avtobus parklariga biriktirilgan yoʻnalishlarda maqsadli foydalanish majburiyati olingan holda ikki bosqichda sotiladi:

birinchi bosqichda 2007-yil davomida “Toshavtobustrans” AK ustav fondiga berilgan davlat aktivlarini ham oʻz ichiga olgan avtobus parklarining ustav fondidagi 40 foiz aksiya paketlari Davlat mulki qoʻmitasi va “Toshavtobustrans” aksiyadorlik kompaniyasi tomonidan;

ikkinchi bosqichda 2008 — 2010-yillar davomida Oʻzbekiston Respublikasi Davlat mulki qoʻmitasi tomonidan avtobus parklarining davlat aksiya paketlarining qolgan qismi sotiladi.

6. Savdolar obyektini sotishdan tushgan mablagʻlar Oʻzbekiston Respublikasi Vazirlar Mahkamasining “Oʻzbekiston Respublikasi Prezidentining “Toshavtobustrans” aksiyadorlik kompaniyasi korxonalarining davlatga qarashli aksiyalari paketlarini xususiy mulk etib sotish toʻgʻrisida” 2006-yil 3-iyuldagi PQ-396-son qarori bajarilishini taʼminlash yuzasidan qoʻshimcha chora-tadbirlar toʻgʻrisida” 2007-yil 23-martdagi 57-son qaroriga muvofiq taqsimlanadi.

7. Savdolar tashkilotchisi yopiq kimoshdi savdolarini oʻtkazishdan oldin quyidagi tayyorgarlik tadbirlarini amalga oshiradi:

“Toshavtobustrans” aksiyadorlik kompaniyasi avtobus parklarining mehnat jamoalarida savdolar obyektining xususiy mulk etib sotilishida yopiq kimoshdi savdolarining maqsad va vazifalari toʻgʻrisida tushuntirish ishlarini olib borish;

“Toshavtobustrans” aksiyadorlik kompaniyasi avtobus parklarining mehnat jamoalari aʼzolarining, shuningdek yopiq kimoshdi savdolariga taklif qilish uchun “Toshavtobustrans” aksiyadorlik kompaniyasi korxonalarining roʻyxatlarini tuzish va ularning sotilayotgan aksiyalarga boʻlgan talabini oʻrganish;

yopiq kimoshdi savdolarini oʻtkazish uchun zarur boʻlgan hujjatlarni tayyorlash;

yopiq kimoshdi savdolarini oʻtkazish joyi va sanasini belgilash va bu haqda Komissiya aʼzolarini xabardor qilish;

yopiq kimoshdi savdolari boshlanishidan 30 kun oldin arizachilarga xabarnoma yuborish. Xabarnomada quyidagi maʼlumotlar koʻrsatilishi lozim:

yopiq kimoshdi savdolarini oʻtkazish joyi, sanasi va tartibi;

savdolar obyektining tavsifi va boshlangʻich narxi;

yopiq kimoshdi savdolari ishtirokchilari toʻlaydigan zakalat summasi miqdori;

oʻzaro hisob-kitob va tomonlarning javobgarligi;

qonun hujjatlari va yopiq kimoshdi savdolari shartlariga zid boʻlmagan boshqa maʼlumotlar.

8. Arizachilar quyidagi hujjatlarni savdolar tashkilotchisiga taqdim etadilar:

a) jismoniy shaxslar:

ariza (ikki nusxada);

ish joyidan berilgan maʼlumotnoma;

lot boshlangʻich qiymatining 10 foizidan kam boʻlmagan miqdorda zakalat summasining toʻlanganligini tasdiqlovchi toʻlov hujjatining nusxasi;

“Mersedes-Bens” avtobuslaridan maqsadli foydalanish boʻyicha majburiyatlarni zimmasiga olish toʻgʻrisidagi arizachining imzosi bilan tasdiqlangan yozma roziligi;

b) yuridik shaxslar:

ariza (ikki nusxada);

qonun hujjatlarida belgilangan tartibda rasmiylashtirilgan yuridik shaxsning davlat roʻyxatidan oʻtkazilganligi toʻgʻrisida guvohnomaning nusxasi;

yopiq kimoshdi savdosida qatnashish uchun yuridik shaxsning oʻz vakiliga bergan ishonchnomasi;

lot boshlangʻich qiymatining 10 foizidan kam boʻlmagan miqdorda zakalat summasining toʻlanganligini tasdiqlovchi toʻlov hujjatining nusxasi;

“Mersedes-Bens” avtobuslaridan maqsadli foydalanish boʻyicha majburiyatlarni zimmasiga olish toʻgʻrisidagi arizachining oʻz muhri bilan tasdiqlagan yozma roziligi.

Mazkur hujjatlar taqdim etilganda savdolar tashkilotchisi tomonidan qabul qilingan hujjatlarning roʻyxati koʻrsatilgan holda arizaning ikkinchi nusxasiga belgi qoʻyiladi va u arizachiga qaytariladi.

Arizalar savdolar tashkilotchisi tomonidan arizalarni roʻyxatga olish kitobida hisobga olinadi.

9. Arizalarni qabul qilish jarayonida savdolar tashkilotchisi:

arizachilarni taqdim etiladigan hujjatlar roʻyxati va namunalari bilan taʼminlaydi, ularni toʻldirish va rasmiylashtirish tartibini tushuntiradi;

taqdim qilingan hujjatlarning ilovalari bilan birga saqlanishini taʼminlash choralarini koʻradi;

taqdim qilingan arizalar, arizachilar haqidagi maʼlumotlar hamda ariza va maʼlumotlarning sir tutilishini taʼminlaydi.

10. Arizachilardan arizalarni qabul qilish yopiq kimoshdi savdolari boshlanishidan bir kun oldin toʻxtatiladi.

Arizalar qabul qilinishi toʻxtatilishi bilan savdolar tashkilotchisi tomonidan arizachilarning roʻyxati tuziladi va yopiq kimoshdi savdolari hujjatlarini ilova qilgan holda Komissiyaga koʻrib chiqish uchun taqdim etiladi.

11. Arizachi yopiq kimoshdi savdolarining boshlanishidan bir soat oldin savdolar tashkilotchisini yozma ravishda xabardor qilish orqali oʻz arizasini qaytarib olishga haqli.

12. Yopiq kimoshdi savdolarini oʻtkazish uchun Davlat mulki qoʻmitasi, Moliya vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Toshkent shahar hokimligi, “Toshshahartransxizmat” uyushmasi va “Toshavtobustrans” aksiyadorlik kompaniyasi masʼul xodimlari tarkibidan kamida 9 kishidan iborat Komissiya tuziladi.

Mazkur davlat boshqaruv organlari va tashkilotlar Davlat mulki qoʻmitasining yozma soʻrovnomasi olingan kundan uch kun ichida Komissiya tarkibiga kiritish uchun oʻz nomzodlari roʻyxatini taqdim etadilar va keyinchalik Komissiya aʼzosi sifatida Komissiya ishida qatnashishi uchun zarur shart-sharoitlarni yaratib beradilar.

13. Komissiya oʻz faoliyatini mazkur Nizomga hamda belgilangan tartibda ishlab chiqilgan va tasdiqlangan oʻz reglamentiga muvofiq amalga oshiradi.

14. Komissiyaga Davlat mulki qoʻmitasi tomonidan belgilangan nomzod raislik qiladi.

15. Komissiya yigʻilishi zaruratga qarab, Komissiya raisining taklifiga asosan oʻtkaziladi.

Komissiya majlisi uning aʼzolarining uchdan ikki qismi, shu jumladan Komissiya raisi unda qatnashganda vakolatli hisoblanadi.

16. Komissiya majlisining qarori uning aʼzolarining oddiy koʻpchilik ovozi bilan qabul qilinadi va bayonnoma bilan rasmiylashtiriladi.

Komissiyaning har bir aʼzosi bitta ovozga ega boʻladi. Ovozlar teng boʻlganda Komissiya raisining ovozi hal qiluvchi hisoblanadi.

17. Komissiyaning asosiy vazifalari quyidagilardan iborat:

oshkoralik, xolis baholash va talablar yaxlitligi asosida yopiq kimoshdi savdolari ishtirokchilari uchun teng raqobat sharoitlarini yaratib berish;

yopiq kimoshdi savdolarini oʻtkazish hamda savdo gʻoliblarini aniqlash bilan bogʻliq masalalarni hal qilish, muddatlarini choʻzish faktlarini bartaraf qilish;

yopiq kimoshdi savdolarini oʻtkazish;

yopiq kimoshdi savdolarini oʻtkazish natijalarini bayonnoma bilan rasmiylashtirish;

mazkur Nizom va boshqa qonun hujjatlari talablariga koʻra yopiq kimoshdi savdolari oʻtkazilishining qonuniyligini taʼminlash va yuzaga kelgan qoidabuzarliklarni (til biriktirish, savdo qoidalarini buzish) bartaraf etish choralarini koʻrish;

yopiq kimoshdi savdolarining oʻtkazilishi ustidan nazoratni amalga oshirish.

18. Komissiya yigʻilishlarini tashkil qilish, oʻtkazish va hujjatlarini rasmiylashtirish savdolar tashkilotchisi tomonidan amalga oshiriladi.

19. Savdolar tashkilotchisi tomonidan taqdim etilgan hujjatlar Komissiya tomonidan yopiq kimoshdi savdolari oʻtkazilish kunida auksion boshlanishidan oldin koʻrib chiqiladi. Bunda Komissiya quyidagi qarorlardan birini qabul qiladi:

arizachilarning yopiq kimoshdi savdolarida qatnashishga ruxsat berish yoki rad etish toʻgʻrisida;

har bir lot boʻyicha yetarli ishtirokchilar aniqlanganda yopiq kimoshdi savdolarini oʻtkazish toʻgʻrisida;

har bir lot boʻyicha yetarli ishtirokchilar aniqlanmaganda yopiq kimoshdi savdolarini oʻtkazishni keyinga qoldirish toʻgʻrisida.

20. Komissiya tomonidan har bir lot boʻyicha yetarli ishtirokchilar aniqlanib yopiq kimoshdi savdolarini oʻtkazish toʻgʻrisida qaror qabul qilinganda yopiq kimoshdi savdolari ishtirokchilarining roʻyxati tuziladi va ushbu ishtirokchilarga raqamlangan chiptalar beriladi.

Yopiq kimoshdi savdolarida ishtirok etishi rad etilgan arizachilar mazkur roʻyxatga kiritilmaydilar, savdolarda qatnashmaydilar va bu haqda ularga yopiq kimoshdi savdolari boshlanishidan bir kun oldin xabarnoma yuboriladi.

21. Savdolar obyektini baholash ushbu faoliyatni amalga oshirish uchun litsenziyaga ega boʻlgan baholovchi jismoniy yoki yuridik shaxs tomonidan qonun hujjatlarida belgilangan tartibda amalga oshiriladi.

22. Savdolar obyektini baholash yuzasidan baholovchining hisoboti savdolar tashkilotchisiga taqdim etiladi.

23. Savdolari obyekti yopiq kimoshdi savdolariga lotlar boʻyicha sotuvga qoʻyiladi.

24. Yopiq kimoshdi savdolari lotlar boʻyicha oʻtkaziladi. Har bir lot boʻyicha kamida ikkita ishtirokchi aniqlanganda mazkur lot boʻyicha kimoshdi savdolari oʻtkaziladi.

25. Yopiq kimoshdi savdolarini tegishli malakaga ega boʻlgan kimoshdi savdolari oʻtkazuvchisi (bundan keyingi oʻrinlarda auksionchi deb yuritiladi) oʻtkazadi.

Yopiq kimoshdi savdolari auksionchi tomonidan savdolar obyektining qisqacha taʼrifi va boshlangʻich narxi, shuningdek mazkur kimoshdi savdolari qadamining eʼlon qilinishi bilan boshlanadi.

Baho qadami auksionchi tomonidan sotuvchi bilan kelishilgan holda belgilanadi.

Uch qadamdan soʻng auksionchi tomonidan talabga qarab savdo obyektining baho ortishi tomoniga qarab oʻzgartirilishi mumkin.

26. Yopiq kimoshdi savdolari jarayonida auksionchi bahoni eʼlon qiladi, yopiq kimoshdi savdolari ishtirokchilari esa obyektni ushbu baho boʻyicha sotib olishga tayyorliklarini ishtirokchining maxsus raqamli belgisini koʻtarish orqali bildiradilar.

27. Yopiq kimoshdi savdolari savdolar obyektiga eng yuqori bahoni taklif qilgan yopiq kimoshdi savdolari ishtirokchisini aniqlangunga qadar davom etadi.

Yopiq kimoshdi savdolari erishilgan bahoni uch marta eʼlon qilinib, ushbu baho uchun ishtirokchi oʻzining maxsus raqamli belgisini koʻtarmaganidan keyin tugallanadi.

Yopiq kimoshdi savdolarining gʻolibi boʻlib, auksionchi tomonidan raqami oxirgi eʼlon qilingan yopiq kimoshdi savdolarining ishtirokchisi hisoblanadi.

28. Yopiq kimoshdi savdolarining tugashi bilan auksionchi savdo obyektining sotilganligini, sotilgan bahosini va gʻolibning raqamini eʼlon qiladi.

29. Yopiq kimoshdi savdolari gʻolibi tegishli savdo obyektini sotib olishni rad etgan taqdirda, mazkur savdo obyektini sotib olish undan keyingi oʻrinda turgan yopiq kimoshdi savdosi ishtirokchisiga uning yopiq kimoshdi savdolarida taklif qilgan bahosi boʻyicha taklif etiladi. Agar mazkur ishtirokchi ham ushbu savdo obyektini sotib olishni rad etsa yoki mazkur baho boʻyicha bittadan ortiq ishtirokchi mavjud boʻlsa mazkur savdo obyekti yopiq kimoshdi savdolariga takroran qoʻyiladi.

Savdolar obyekti yopiq kimoshdi savdolariga ularning oʻtkazilish shartlari oʻzgartirilmasdan takroran qoʻyilganda, mazkur yopiq kimoshdi savdolarida qatnashish uchun takliflar tegishli nomzodlarga savdolar tashkilotchisi tomonidan takroriy yopiq kimoshdi savdolari boshlanishidan kamida oʻn kun oldin yuboriladi.

30. Yopiq kimoshdi savdolari natijalari boʻyicha bayonnoma yopiq kimoshdi savdolari gʻolibi va sotuvchi tomonidan yopiq kimoshdi savdolarining oʻtkazilish kunida imzolanadi.

Yopiq kimoshdi savdolari gʻolibi mazkur bayonnomani imzolashdan bosh tortsa kiritilgan zakalat summasi qaytarilmaydi. Savdolar tashkilotchisi bayonnomani imzolashdan bosh tortsa, toʻlangan zakalat summasini ikki barobar miqdorda qaytarishi, shuningdek yopiq kimoshdi savdolari gʻolibiga yopiq kimoshdi savdolarida qatnashishi tufayli yetkazilgan zararning zakalat summasidan ortiq boʻlgan qismini toʻlashi shart.

31. Yopiq kimoshdi savdolarining natijasi boʻyicha tuzilgan bayonnoma asosida sotuvchi va savdolar obyektini sotib oluvchi oʻrtasida 10 kungacha muddatda tegishli oldi-sotdi shartnomasi tuziladi.

Oldi-sotdi shartnomasini roʻyxatga olish qonun hujjatlarida belgilangan tartibda amalga oshiriladi.

32. Yopiq kimoshdi savdolarini tashkil qilish va oʻtkazish boʻyicha xarajatlar sotuvchi va sotib oluvchi tomonidan teng miqdorda toʻlanadigan komission toʻlovlar hisobidan amalga oshiriladi. Komission toʻlovlar miqdori yopiq kimoshdi savdolari tashkilotchisi tomonidan Davlat mulki qoʻmitasi bilan kelishilgan holda savdolarni tashkil qilish va oʻtkazish xarajatlaridan oshmaydigan miqdorda belgilanadi.

33. Zakalat summasi savdolar tashkilotchisi tomonidan uch bank ish kuni ichida yopiq kimoshdi savdolari ishtirokchilariga quyidagi hollarda qaytarib beriladi:

a) arizachi yopiq kimoshdi savdolari boshlanishidan oldin savdolar tashkilotchisini yozma ravishda xabardor qilish orqali oʻz arizasini qaytib olganda;

b) Komissiya tomonidan arizachining yopiq kimoshdi savdolarida ishtirok etishini rad etish toʻgʻrisida qaror qabul qilinganda;

v) yopiq kimoshdi savdolari oʻtkazilmaganda;

g) yopiq kimoshdi savdolari ishtirokchilari oʻtkazilgan savdolarda gʻolib boʻlmaganida. Bunda yopiq kimoshdi savdolarida gʻolib boʻlmagan ishtirokchilar toʻlangan zakalat summasi bilan boshqa lotlar boʻyicha oʻtkaziladigan keyingi yopiq kimoshdi savdolarida qatnashishlari mumkin. Bunday holda, yopiq kimoshdi savdosida qatnashayotgan ishtirokchi tomonidan toʻlangan zakalat summasi boshqa lotlar boʻyicha oʻtkaziladigan yopiq kimoshdi savdolarida qatnashish uchun yetarli boʻlmasa, ishtirokchi etmay qolgan zakalat summasining qolgan qismini tegishlicha toʻldirib, yopiq kimoshdi savdolarida qatnashishi mumkin.

34. Savdolar obyektlarining sotib olinish qiymatini toʻlash, mazkur savdolarda qatnashish uchun toʻlangan zakalat summasini hisobga olgan holda, savdolar obyektining oldi-sotdi shartnomasi tuzilgan paytdan boshlab mazkur shartnoma va qonun hujjatlarida belgilangan muddatlarda amalga oshiriladi.

35. Savdolar obyektining oldi-sotdi shartnomasi shartlari yopiq kimoshdi savdolari gʻolibi tomonidan bajarilmagan taqdirda, sotuvchi toʻlov shartlari bajarilmaganligi haqida rasmiy xabarnoma yuboradi. Savdolar obyektining qiymati shartnomada belgilangan muddatlarda toʻlanmasa, tegishli yopiq kimoshdi savdolari natijalari bekor qilinadi.

Yopiq kimoshdi savdolarining natijalari bekor qilinganda, sotib olingan savdolar obyekti mazkur Nizomda belgilangan tartibda yopiq kimoshdi savdolariga takroran qoʻyiladi.

36. Sotuvchi, yopiq kimoshdi savdolari tashkilotchisi, Komissiya va ishtirokchilari mazkur Nizomda oʻrnatilgan yopiq kimoshdi savdolarini oʻtkazish qoidalarining aniq va bir xilda qoʻllanilishi uchun qonun hujjatlarida belgilangan tartibda masʼuldirlar.

37. Yopiq kimoshdi savdolarida tuziladigan shartnomalarning bajarilishi ustidan doimiy nazorat Davlat mulki qoʻmitasi tomonidan amalga oshiriladi.

38. Yopiq kimoshdi komissiyasining qarorlari ustidan sudga shikoyat qilinishi mumkin.

39. Mazkur Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi va “Toshshahartransxizmat” uyushmasi bilan kelishilgan.