Oʻzbekiston Respublikasi Vazirlar Mahkamasining 2004-yil 28-oktabrdagi 508-son qarori bilan tasdiqlangan “Oʻsimlik dunyosi obyektlaridan foydalanish, ularni Oʻzbekiston Respublikasiga olib kirish va uning tashqarisiga olib chiqish tartibi toʻgʻrisida nizom” hamda “Respublika oʻrmonlarini himoya qilish boʻyicha ayrim meʼyoriy hujjatlarni tasdiqlash toʻgʻrisida” 1999-yil 22-noyabrdagi 506-son qarori talablariga muvofiq, oʻsimlik dunyosi obyektlaridan maxsus foydalanish toʻgʻrisidagi ruxsatnomalar namunalarini tasdiqlash hamda oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalarini toʻldirish va hisobini yuritishni tartibga solish maqsadida buyuraman:

1. Quyidagilar:

a) Oʻsimlik dunyosi obyektlaridan maxsus foydalanish toʻgʻrisidagi ruxsatnomalar namunalari:

“Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma” 1-ilovaga muvofiq;

“Oʻrmon fondining yaylov hududlarida pichan oʻrish uchun oʻrmon chiptasi” 2-ilovaga muvofiq;

“Oʻrmon fondining yaylov hududlarida chorva mollarini oʻtlatish uchun oʻrmon chiptasi” 3-ilovaga muvofiq;

“Oʻrmon fondi hududlarida daraxt kesish uchun chipta” 4-ilovaga muvofiq;

b) Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalarini toʻldirish va hisobini yuritish tartibi toʻgʻrisidagi yoʻriqnoma 5-ilovaga muvofiq tasdiqlansin.

2. Ushbu buyruq Oʻzbekiston Respublikasi Adliya vazirligida davlat roʻyxatiga olingan kundan oʻn kun oʻtgandan soʻng kuchga kiritilsin.

3. Ushbu buyruqning bajarilishini nazorat qilish Davlat bionazorati boshligʻi K. Abidovga yuklatilsin.

Oʻzbekiston Respublikasi Vazirlar Mahkamasining 2004-yil 28-oktabrdagi 508-son qarori bilan tasdiqlangan “Oʻsimlik dunyosi obyektlaridan foydalanish, ularni Oʻzbekiston Respublikasiga olib kirish va uning tashqarisiga olib chiqish tartibi toʻgʻrisida nizom” hamda “Respublika oʻrmonlarini himoya qilish boʻyicha ayrim meʼyoriy hujjatlarni tasdiqlash toʻgʻrisida” 1999-yil 22-noyabrdagi 506-son qarori talablariga muvofiq, oʻsimlik dunyosi obyektlaridan maxsus foydalanish toʻgʻrisidagi ruxsatnomalar namunalarini tasdiqlash hamda oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalarini toʻldirish va hisobini yuritish tartibini belgilaydi.

Ushbu Yoʻriqnoma oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari (korxonalar, tashkilotlar va muassasalarga biriktirilgan oʻrmonlar bundan mustasno), shuningdek oʻrmon fondi hududlarida daraxt kesish uchun chipta blankalarini toʻldirish va hisobini yuritishda Oʻrmon xoʻjaligi bosh boshqarmasi, uning tizimidagi tashkilotlarga hamda qaramogʻida davlat oʻrmon fondi boʻlgan vazirliklar, davlat qoʻmitalari va idoralarga taalluqlidir.

1. Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalari qatiy hisobot hujjatlari hisoblanadi. Oʻzbekiston Respublikasi Davlat Gerbi tasviri, hisobga olish raqamlariga ega va himoya darajalari bilan taʼminlangan, ikki tarafiga oʻrmon xoʻjaligi bosh boshqarmasi yoki tegishli tashkilotning oʻzbek va rus tillaridagi nomi joylashtirilgan hujjatlar hisoblanadi.

2. Ruxsatnoma (chipta) blankalari tasdiqlangan namunalarga muvofiq Oʻrmon xoʻjaligi bosh boshqarmasi va qaramogʻida davlat oʻrmon fondi boʻlgan vazirliklar, davlat qoʻmitalari va idoralar tomonidan mustaqil tayyorlanadi.

3. Oʻzbekiston Respublikasi Tabiatni muhofaza qilish davlat qoʻmitasi bilan kelishmasdan ruxsatnoma (chipta) blankalariga oʻzgartish va qoʻshimchalar kiritishga yoʻl qoʻyilmaydi.

4. Har bir ruxsatnoma (chipta) blankasi bosmaxona raqami va indeksiga ega boʻladi. Indeks raqamdan oldin joylashtiriladi.

Blanka indeksi oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalari tegishli hududda Oʻrmon xoʻjaligi bosh boshqarmasi va uning tizimidagi tegishli organni yoki qaramogʻida davlat oʻrmon fondi boʻlgan vazirliklar, davlat qoʻmitalari va idoralarni identifikatsiyalaydi.

5. Blankalarni rangli himoyasi mazkur Yoʻriqnomaning 21—24-bandlariga muvofiq belgilanadi.

6. Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma blankasi bir nusxada toʻldiriladi. Blankaning asl nusxasi oʻsimlik dunyosi obyektidan foydalanuvchiga, uning bir nusxasi Oʻzbekiston Respublikasi Tabiatni muhofaza qilish davlat qoʻmitasining Davlat biologiya nazoratiga taqdim etiladi, ikkinchi nusxasi ruxsatnomani rasmiylashtirgan tashkilotda saqlanadi.

Oʻrmon fondining yaylov hududlarida pichan oʻrish uchun va chorva mollarini oʻtlatish uchun oʻrmon chiptalari, shuningdek oʻrmon fondi hududlarida daraxt kesish uchun chipta blankalari uch nusxada boʻlib, chiptaning birinchi nusxasi oʻsimlik dunyosi obyektidan foydalanuvchiga beriladi va oʻrmondan foydalanish muddati tugagunga qadar foydalanuvchida saqlanishi lozim. Ikkinchi nusxasi oʻrmon boʻlim boshligʻida saqlanib, daraxt kesish, pichan oʻrish va mol boqish uchun asosiy hujjat boʻlib hisoblanadi va oʻrmon xoʻjaliklarida yuritiladigan hisobotlarda aks ettiriladi. Uchinchi nusxasi chipta rasmiylashtirgan oʻrmon xoʻjaligida saqlanadi.

7. Mazkur Yoʻriqnoma asosida oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun oʻrmon chiptalari hamda daraxt kesish uchun chipta blankalarini berishda, oʻrmon xoʻjaligi bosh boshqarmasi va uning tizimidagi tashkilotlarga quyidagi namunadagi indekslar beriladi:

seriya A — oʻrmon xoʻjaligining blankalari alifbo tartibi boʻyicha olib borilish tartibini belgilaydi;

seriya XOʻ — mahalliy davlat hokimiyat organlari yoki boshqa tashkilot tasarrufidagi oʻrmonni belgilaydi.

8. Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun Oʻzbekiston Respublikasi Tabiatni muhofaza qilish davlat qoʻmitasi tomonidan tasdiqlangan biologik resurslardan foydalanish yillik normalari uchun belgilangan toʻlovlar amalga oshirilgandan soʻng, Oʻrmon xoʻjaligi bosh boshqarmasi tomonidan ruxsatnoma blankasini toʻldirish va rasmiylashtirish amalga oshiriladi.

Ruxsatnoma blankasida quyidagilar koʻrsatiladi:

chipta tartib raqami, tabiatdan foydalanishi koʻzda tutilgan tashkilot nomi, tashkilot rahbari yoki jismoniy shaxsning familiyasi, ismi, otasining ismi;

ruxsatnoma amal qiladigan hudud (viloyat, tuman, muayyan oʻrmon xoʻjaligi hududi, aylanma va boʻlagi);

terish-tayyorlash nazarda tutilgan tur nomi, uning miqdori va ruxsatnomani amal qilish muddati;

ruxsatnomani rasmiylashtirish uchun asos (hujjatning sanasi va raqami).

9. Ruxsatnoma blankasi Oʻrmon xoʻjaligi bosh boshqarmasi boshligʻi tomonidan imzolanadi va gerbli muhr bilan tasdiqlanadi.

Agarda yovvoyi oʻsimliklarning dorivor, oziq-ovqatbop va texnik xomashyosini terish va tayyorlash turlari koʻp boʻlsa, ruxsatnomaning orqasiga yozish tavsiya etiladi.

10. Oʻrmon fondining yaylov hududlarida pichan oʻrish uchun oʻrmon chiptasi blankasida quyidagilar koʻrsatiladi:

chipta tartib raqami, toʻldirilgan sanasi, xoʻjalik nomi, oʻrmon boʻlimi, aylanma, boʻlagi;

pichanzordan foydalanuvchi va uning manzili, pasport maʼlumotlari, shartnoma tartib raqami;

pichan oʻrish uchun unga ajratilgan maydon oʻlchami;

oʻrmon chiptasining amal qilish muddati;

oʻrmon chiptasini rasmiylashtirish uchun asos (hujjatning sanasi va raqami).

11. Blanka toʻldirilishiga masʼul boʻlgan shaxs tomonidan tabiatdan foydalanuvchi uchun ijro etilishi majburiy boʻlgan yaylov hududlarda pichan oʻrish uchun beriladigan oʻrmon chiptasi (oʻsimliklarni noyob turlarini saqlash, turli turdagi qushlar tomonidan tuxumlar qoʻyadigan joylarda pichan oʻrishga yoʻl qoʻymaslik boʻyicha va h. k.) berish shartlari kiritilishi mumkin.

12. Oʻrmon chiptasi blankasi oʻrmon xoʻjaligi mansabdor shaxsi tomonidan imzolanadi va gerbli muhr bilan tasdiqlanadi.

13. Oʻrmon chiptasi blankasining old tomonida foydalanuvchi tomonidan oʻrmon chiptasini olgan kun va imzosi, oʻrmon chiptasining orqa tomonida esa, oʻrmondan foydalanish qoidalari bilan tanishganligi haqidagi sana va imzosi qoʻyiladi.

14. Oʻrmon fondining yaylov hududlarida chorva mollarini oʻtlatish uchun oʻrmon chiptasi blankasida quyidagilar koʻrsatiladi:

chipta tartib raqami, uning toʻldirilgan sanasi;

xoʻjalik nomi, oʻrmon boʻlimi, aylanma, boʻlagi, chorva mollarini oʻtlatish uchun unga ajratilgan maydon oʻlchami;

yaylovdan foydalanuvchi va uning manzili, pasport maʼlumotlari, shartnoma tartib raqami;

chorva mollarining turi va soni;

oʻrmon chiptasining amal qilish muddati.

15. Blanka toʻldirilishiga masʼul boʻlgan shaxs tomonidan tabiatdan foydalanuvchi uchun ijro etilishi majburiy boʻlgan yaylov hududlarida pichan oʻrish uchun beriladigan oʻrmon chiptasi (oʻsimliklarni noyob turlarini saqlash, turli turdagi qushlar tomonidan tuxumlar qoʻyadigan joylarda chorva mollarini oʻtlatishga yoʻl qoʻymaslik boʻyicha va h. k.) berish shartlari kiritilishi mumkin.

16. Oʻrmon chiptasi blankasi oʻrmon xoʻjaligi mansabdor shaxsi tomonidan imzolanadi va gerbli muhr bilan tasdiqlanadi.

Chiptaga, shuningdek bosh oʻrmonchi, bosh hisobchi va foydalanuvchining imzolari qoʻyiladi.

17. Oʻrmon chiptasining orqa tomonida foydalanuvchining oʻrmondan foydalanish qoidalari bilan tanishganligi haqida imzosi va sana qoʻyiladi.

18. Oʻrmon fondi hududlarida daraxt kesish uchun beriladigan chipta blankasida quyidagilar koʻrsatiladi:

chipta tartib raqami va berilgan sanasi;

viloyat nomi, oʻrmon xoʻjaligi, oʻrmon boʻlimi, foydalanish turi, kesish turi, hisoblash usuli;

chipta berishga asos (hujjatning sanasi va raqami);

ishbop, oʻtin, shox-shabba va jami kesishga ruxsat etilgan yogʻoch miqdori;

oʻrmonlar guruhi, boʻlak, kesishga ruxsat etilgan maydon, ishbop, oʻtin, shox-shabba hisobotlari;

oʻrmon mahsuloti uchun toʻlanadigan summani xoʻjalik gʻaznasiga kirim qilish muddatlari, kesishga ruxsat etilmagan daraxt turlari, yogʻoch tayyorlashni tugatish muddati, vaqtincha yogʻoch toʻplanadigan joylar, tashishga ruxsat etilgan miqdor, tashib tugatish muddati, muddatidan oldin kesishga ruxsat etilishi, kesilgan maydonlarni tozalash usuli va uni tugatish muddati, ayrim shartlar;

oʻrmon xoʻjaligi rahbari va muhandisning imzosi, oʻrmondan foydalanuvchining oʻrmon kesish qoidalari bilan tanishganligi toʻgʻrisidagi imzosi, yogʻoch tayyorlash va tashib ketish muddatini choʻzish haqida maʼlumotlar.

19. Daraxt kesish uchun chipta blankasi oʻrmon xoʻjaligi mansabdor shaxsi tomonidan imzolanadi va gerbli muhr bilan tasdiqlanadi.

20. Blanka daraxt kesilganligi toʻgʻrisidagi dalolatnomaga asosan, oʻrmonni qayta tiklash tadbirlari: yosh daraxtlarni saqlab qolish; madaniy oʻrmonlar barpo qilish; oʻrmonlarni tabiiy koʻpayishiga sharoit yaratish maydonlari koʻrsatiladi.

21. Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun beriladigan ruxsatnoma blankalari och yashil rangdagi A-4 format qogʻozda chiqariladi. Qogʻoz varagʻi mayda shtrixlangan rasm bilan himoyalanadi.

22. Oʻrmon fondining yaylov hududlarida pichan oʻrish uchun beriladigan oʻrmon chiptasi blankalari och qoʻngʻir rangdagi A-4 format qogʻozda chiqariladi. Qogʻoz varagʻi mayda shtrixlangan rasm bilan himoyalanadi.

23. Oʻrmon fondining yaylov hududlarida chorva mollarini oʻtlatish uchun beriladigan oʻrmon chiptasi blankalari och koʻk rangdagi A-4 format qogʻozda chiqariladi. Qogʻoz varagʻi mayda shtrixlangan rasm bilan himoyalanadi.

24. Oʻrmon fondi hududlarida daraxt kesish uchun chipta blankalari och sariq rangdagi A-4 format qogʻozda chiqariladi. Qogʻoz varagʻi mayda shtrixlangan rasm bilan himoyalanadi.

25. Oʻrmon fondi yerlarida yovvoyi holda oʻsuvchi dorivor, oziq-ovqatbop va texnik oʻsimliklarni terish va tayyorlash uchun ruxsatnoma, oʻrmon fondining yaylov hududlarida pichan oʻrish va chorva mollarini oʻtlatish uchun beriladigan oʻrmon chiptalari, shuningdek oʻrmon fondi hududlarida daraxt kesish uchun chipta blankalari va ularning berilishining qatiy hisobi qonun hujjatlari asosida, oʻsimlik dunyosi obyektlaridan maxsus foydalanish uchun ruxsatnomalarni (chipta) berish vakolati berilgan Oʻrmon xoʻjaligi bosh boshqarmasi, uning tizimidagi tashkilotlar hamda qaramogʻida davlat oʻrmon fondi boʻlgan vazirliklar, davlat qoʻmitalari va idoralar tomonidan yuritiladi.

26. Blankalar toʻldirish jarayonida buzilsa, ular qonun hujjatlarida qatiy hisobot hujjatlari uchun belgilangan tartibda hisobdan chiqariladi va yoʻq qilinadi.

27. Foydalanish uchun berilgan ruxsatnomalar (chiptalar) oʻsimlik dunyosidan foydalanuvchilar tomonidan boshqa shaxslarga berilmaydi.

28. Foydalanuvchi tomonidan tabiatni muhofaza qilish haqidagi qonun hujjatlari buzilgan taqdirda, oʻsimlik dunyosi obyektlaridan foydalanish uchun berilgan ruxsatnoma (chipta)ni olib qoʻyishga faqat tabiatni muhofaza qilish boʻyicha davlat inspektorlari va oʻrmon idoraviy qoʻriqchiligi (davlat oʻrmon fondi hududida) vakolatlidir.

29. Maxsus foydalanish uchun beriladigan barcha ruxsatnomalar (chiptalar) nusxalari uch kunlik muddat ichida Oʻzbekiston Respublikasi Tabiatni muhofaza qilish davlat qoʻmitasining hududiy boʻlinmalariga yuborilishi lozim.

30. Mazkur Yoʻriqnoma Oʻzbekiston Respublikasi Qishloq va suv xoʻjaligi vazirligi Oʻrmon xoʻjaligi bosh boshqarmasi bilan kelishilgan.