Ўзбекистон Республикасининг «Мудофаа тўғрисида»ги Қонунига мувофиқ ҳамда 1992 йил 1 ноябрдан бошлаб кўрсатилган қўшинларни собиқ ҳарбий тузилмалар томонидан молиялаштирилиши тўхтатилганлигини инобатга олиб:

1. Республика ҳудудида жойлашган кимёвий қўшинлар ҳарбий қисмлари иловага* мувофиқ Ўзбекистон Республикаси юрисдикциясига олинсин.

2. Ўзбекистон Республикаси юрисдикциясига олинган кимёвий қўшинлар ҳарбий қисмларига раҳбарлик қилиш Ўзбекистон Республикаси Мудофаа вазирлиги зиммасига юклансин. Ўзбекистон Республикаси юрисдикциясига олинган кўрсатиб ўтилган ҳарбий тузилмалар сони эллик фоизга қисқартирилсин.

3. Ўзбекистон Республикаси Молия вазирлиги (ўртоқ Бакибаев) Ўзбекистон Республикаси Қуролли Кучларининг қўшилма, ҳарбий қисм ва муассасаларини молиявий таъминлашнинг амалдаги меъёрларидан келиб чиқиб, юрисдикцияга олинган қўшинларни молиялаштиришни таъминласин.

4. Ўзбекистон Республикаси Вазирлар Маҳкамаси бир ой муддатда Орол денгизи ва Оролбўйи экологиясини тиклаш муаммоларини ўрганиш ҳамда Ўзбекистон Республикаси халқ хўжалигини ривожлантириш учун кимёвий қўшинлар ва уларнинг таркибидаги Давлат синов полигонидан келгусида фойдаланиш бўйича таклифлар киритсин.

5. Ўзбекистон Республикаси юрисдикциясига ўтаётган ҳарбий тузилмаларнинг қўмондонлик таркиби шахсий таркибнинг ўз зиммасига юклатилган вазифаларни сўзсиз бажаришини таъминласин, бунда Ўзбекистон Республикаси барча ҳарбий хизматчилари, ҳарбий ташкилотлар ишчи ва хизматчилари, уларнинг оила аъзолари, шунингдек, нафақага чиққан ҳарбий хизматчиларнинг ижтимоий ва ҳуқуқий ҳимоя қилишни кафолатлаши ёдда тутилсин.