Ўзбекистон Республикаси «Истеъмолчиларнинг ҳуқуқларини ҳимоя қилиш тўғрисида»ги Қонунини бажара бориб, Вазирлар Маҳкамасининг 2000 йил 5 августдаги «Ички бозорни дори-дармон воситалари ва тиббиёт буюмлари билан таъминлашга доир чора-тадбирлар тўғрисида»ги 307-сон ва 1999 йил 14 январдаги «Дори-дармон воситалари ва тиббиёт буюмлари сотишни тартибга солиш тўғрисида»ги 19-сон қарорлари ижросини таъминлаш, сотувга чиқарилаётган дори воситалари таннархини ошиб кетишини олдини олиш мақсадида буюраман:

1. Ўзбекистон Республикаси фармацевтика бозорида ўзининг сифатли маҳсулотлари билан танилган, халқаро GMP сертификатига эга чет эл фармацевтика фирмаларининг (илова) маҳсулотлари улардан бевосита харид қилинганда, ҳар бир серияси тўлиқ лаборатория таҳлилидан ўтказилмасдан ишлаб чиқарувчи фирмалар томонидан берилган сифат сертификатига асосан сотувга чиқаришга рухсат этилсин.

2. Иловада кўрсатилган чет эл фирмаларининг ёки уларнинг дистрибюторлари томонидан йилнинг ҳар чораги охирида Дори воситалари ва тиббий техника сифатини назорат қилиш Бош бошқармасига Ўзбекистон фармацевтика бозорига киритилган дори воситаларининг тури, миқдори ва сериялари кўрсатилган маълумотнома тақдим этиш сўралсин.

3. Фармацевтика фаолиятининг улгуржи савдо билан шуғулланиш ҳуқуқига эга бўлган лицензиатларига:

иловада келтирилган чет эл фирмалари маҳсулотлари бевосита харид қилинганда уларнинг дори турлари ассортименти бўйича камида 10 фоизини белгиланган тартибда, ваколатланган лабораторияларда танлаб таҳлил қилиш ишлари амалга оширилсин;

иловада келтирилган фирмалар маҳсулотларига ишлаб чиқариш сертификатлари тақдим этилмаган ҳолларда ваколатланган лабораторияларда тўлиқ назорати ўтказиш;

ушбу дори воситаларининг улгуржи савдоси амалга оширилмаган ҳолларда, дори воситаларига расмийлаштириладиган юк хатларида уларнинг сериялари, ишлаб чиқарувчи фирма сетификатлари тасдиқланган санаси ёки назорат-таҳлил лабораториясида ўтказилган назорат таҳлили баённомасининг хулосаси ва қайд этиш рақами кўрсатилишини жорий этиш вазифалари юклатилсин.

4. Дори воситалари ва тиббий техника сифатини назорат қилиш Бош бошқармаси бошлиғи А. Н. Юнусхўжаевга:

йилнинг ҳар чораги якуни натижаларига асосланиб, сериявий сифат назоратидан озод этилган чет эл фирмалари рўйхатини сифатли маҳсулотлари билан танилган янги фирмалар билан тўлдириш ёки текширув натижасида талабларга жавоб бермайдиган сифатсиз дори воситалари ишлаб чиқарган фирмаларни рўйхатдан чиқариш бўйича таклифлар киритиш вазифаси топширилсин.

5. Ушбу буйруқ кучга киритилиши муносабати билан Соғлиқни сақлаш вазирлигининг 2000 йил 31 октябрдаги 565-сон буйруғи ўз кучини йўқотган деб ҳисоблансин.

6. Ушбу буйруқ ижросининг назорати вазир муовини М. Х. Ходжибеков зиммасига юклатилсин.