Ўзбекистон Республикасининг мустақиллиги эълон қилиниши муносабати билан қарор қиламан:

1. Озодликдан маҳрум қилиш ва озодликдан маҳрум қилиш билан боғлиқ бўлмаган жазога ҳукм этилган қуйидаги шахслар жазодан озод қилинсин:

а) 60 ёшдан ошган эркаклар ва 55 ёшдан ошган аёллар;

6) I ва II гуруҳ ногиронлари;

в) вояга етмаган болалари бўлган ва ҳомиладор аёллар;

г) Улуғ Ватан уруши қатнашчилари ва уларга тенглаштирилган шахслар.

2. 5 йилгача муддатга озодликдан маҳрум қилишга ёки озодликдан маҳрум қилиш билан боғлиқ бўлмаган жазога ҳукм этилган аёллар жазодан озод қилинсин.

3. 3 йилгача муддатга озодликдан маҳрум қилишга ёки озодликдан маҳрум қилиш билан боғлиқ бўлмаган жазога ҳукм этилган вояга етмаган ўғил болалар жазодан озод қилинсин.

4. Фармоннинг 1 ва 2-моддаларида айтиб ўтилган шахслар сургун ва бадарға каби қўшимча жазони ўташдан озод қилинсин.

5. Фармоннинг 1, 2 ва 3-моддалари таъсирига тушмаган ҳамда оғир бўлмаган жиноятлар учун, шунингдек эҳтиётсизлик натижасида содир қилинган жиноятлар учун биринчи марта судланган шахсларга ўталмаган жазо муддатининг ярми қисқартирилсин.

6. Терговдаги ва ҳали судда кўрилмаган қуйидаги барча ишлар:

а) ушбу Фармон кучга киргунга қадар Фармоннинг 1-моддасида санаб ўтилган шахслар томонидан содир қилинган жиноятлар ҳақидаги;

б) ушбу Фармон кучга киргунга қадар Фармоннинг 2-моддасида айтиб ўтилган шахслар томонидан содир этилган ва қонунда 5 йилгача муддатга озодликдан маҳрум қилиш ёки озодликдан маҳрум қилиш билан боғлиқ бўлмаган жазо белгиланиши кўрсатилган жиноятлар ҳақидаги;

в) ушбу Фармон кучга киргунга қадар Фармоннинг 3-моддасида санаб ўтилган шахслар томонидан содир этилган ва қонунда 3 йилгача муддатга озодликдан маҳрум қилиш ёки озодликдан маҳрум қилиш билан боғлиқ бўлмаган жазо белгиланиши кўрсатилган жиноятлар ҳақидаги ишлар ҳаракатдан ётқизилсин.

7. Фармоннинг 1, 2, 3 ва 5-моддаларида айтиб ўтилган қуйидаги шахсларга:

а) алоҳида хавфли давлат жиноятлари учун, шунингдек миллий ва ирқий тенг ҳуқуқлиликни бузганлик; давлат сирини ошкор қилганлик; бандитизм; ахлоқ тузатиш меҳнат колониялари фаолиятини издан чиқарувчи хатти-ҳаракатлар; контрабанда; оммавий тартибсизликлар; қалбаки пул ва қимматбаҳо қоғозларни ясаганлик ёки ўтказганлик; валюта операциялари қоидаларини бузганлик учун ҳукм қилинганларга;

б) алоҳида хавфли рецидивист деб танилганларга;

в) қасддан одам ўлдирганлик; қасддан оғир тан жароҳати етказганлик; милиция ходими ёки халқ дружиначисининг ҳаётига тажовуз қилганлик; айбни оғирлаштирадиган ҳолатларда номусга текканлик; давлат, кооператив ёки жамоат мулкига тамагирлик қилганлик; давлат ёки жамоат мулкини алоҳида йирик миқдорларда талон-торож қилганлик; давлат ёки жамоат мулкини хонага ёки мулк сақланадиган жойга кириб ўғирлаганлик; уйга кириб ўғирлик қилганлик; айбни оғирлаштирадиган ҳолатларда талончилик; босқинчилик; айбни оғирлаштирадиган ҳолатларда тамагирлик (рэкет); айбни оғирлаштирадиган ҳолатларда пора олганлик, пора берганлик, пора олиш ва беришда воситачилик қилганлик; ашаддий безорилик, ўта ашаддий безорилик учун, шунингдек Ўзбекистон ССР Жиноят кодексининг 209-2, 209-3, 210-1-моддаларида; 213-моддасининг 2-қисмида ва 216-2, 216-3, 216-4, 216-5-моддаларида кўзда тутилган жиноятларни содир этганлик учун жазога ҳукм қилинганларга;

г) қасддан содир этилган жиноятлар учун бир неча бор судланганларга ҳамда Фармон мазкур моддасининг «а» ва «в» бандларида кўрсатилган жиноятлар учун судланганларга;

д) аввал афв этиш ёки амнистия туфайли жазодан озод этилган ва яна қасддан жиноят содир қилганларга;

е) алкоголизм, гиёҳвандлик ёки таносил касаллигига қарши даволаш курсини тўлиқ ўтмаганларга;

ж) жазони ўташ даврида режимни ашаддий бузувчиларга нисбатан амнистия қўлланилмайди.

8. Ушбу Фармон эълон қилинган кундан бошлаб кучга киради, фақат Ўзбекистон ССР судлари томонидан судланган ва республика тергов органлари томонидан жиноий жавобгарликка тортилган шахсларга тадбиқ қилинади ва уч ой ичида ижро этилиши лозим.