Ўзбекистон Республикаси Вазирлар Маҳкамасининг 2010 йил 20 августдаги 181-сон «Хизматчиларнинг асосий лавозимлари ва ишчилар касблари классификаторини тасдиқлаш тўғрисида»ги қарори (Ўзбекистон Республикаси қонун ҳужжатлари тўплами, 2010 й., 34-сон, 291-модда) ижросини таъминлаш мақсадида буюраман:

1. Ўзбекистон Республикаси хизматчиларининг асосий лавозимлари ва ишчилар касблари классификаторига ўзгартириш ва қўшимчалар киритиш тартиби иловага мувофиқ тасдиқлансин.

2. Мазкур буйруқ Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

1. Ушбу Тартиб Ўзбекистон Республикаси Вазирлар Маҳкамасининг 2010 йил 20 августдаги 181-сон «Хизматчиларнинг асосий лавозимлари ва ишчилар касблари классификаторини тасдиқлаш тўғрисида»ги қарорига (Ўзбекистон Республикаси қонун ҳужжатлари тўплами, 2010 й., 34-сон, 291-модда) мувофиқ Ўзбекистон Республикаси хизматчиларининг асосий лавозимлари ва ишчилар касблари классификаторига (кейинги ўринларда Классификатор деб юритилади) ўзгартириш ва қўшимчалар киритиш жараёнини белгилайди.

2. Классификаторга ўзгартириш ва қўшимчалар Хизматчилар лавозимлари ва ишчилар касблари жадвалига ўзгартириш ва қўшимчалар киритиш орқали амалга оширилади.

3. Классификаторга ўзгартириш ва қўшимчалар киритиш қуйидаги ҳолларда амалга оширилади:

илмий-техникавий тараққиёт, бошқарув ва ишлаб чиқаришни ташкил этишнинг такомиллаштирилиши натижасида Классификаторда кўрсатилмаган, янги лавозимлар ва касбларни Хизматчилар лавозимлари ва ишчилар касблари жадвалига киритилганда;

эскирган ва моҳиятини йўқотган хизматчиларнинг асосий лавозимлари ва ишчиларнинг касбларини Хизматчилар лавозимлари ва ишчилар касблари жадвалидан чиқариб ташланганда;

Касбларнинг халқаро стандарт классификатори талабларига мувофиқ лавозим ва касб кодига ўзгартиришлар киритиш, шунингдек ходимларни тоифалаштириш (тегишли ходимлар тоифасига лавозим ва касбларнинг бириктирилиши) ва маълумот даражасига қўйиладиган энг кам талаблар ўзгартирилганда;

Ўзбекистон Республикаси Меҳнат ва аҳолини ижтимоий муҳофаза қилиш вазирлиги ва унинг ҳудудлардаги таркибий бўлинмалари, ихтисослашган илмий муассасалар томонидан амалга оширилган меҳнат бозоридаги касб ва лавозимлар тузилмалари таҳлили натижасида.

4. Классификаторга ўзгартириш ва қўшимчалар киритиш учун асос бўлиб қуйидагилар ҳисобланади:

давлат, хўжалик бошқарув органлари ва ташкилотларнинг Ўзбекистон Республикаси Меҳнат ва аҳолини ижтимоий муҳофаза қилиш вазирлигига тақдим этилган таклифлари;

Ўзбекистон Республикаси Меҳнат ва аҳолини ижтимоий муҳофаза қилиш вазирлиги ва унинг ҳудудлардаги таркибий бўлинмалари, ихтисослашган илмий муассасалар томонидан амалга оширилган меҳнат бозоридаги касб ва лавозимлар тузилмалари таҳлили натижаси бўйича тузилган хулосалари.

5. Таклифларни кўриб чиқиш ва Классификаторга ўзгартириш ва қўшимчалар киритишнинг мақсадга мувофиқлиги юзасидан хулоса бериш учун Ўзбекистон Республикаси Меҳнат ва аҳолини ижтимоий муҳофаза қилиш вазирлигида Эксперт ишчи гуруҳи тузилади. Хизматчиларнинг асосий лавозимлари ва ишчилар касблари классификаторига киритилаётган ўзгартириш ва қўшимчалар тармоқнинг ўзига хос хусусиятларидан келиб чиқиб, махсус ўрганишни тақозо этса, ушбу ўзгартириш ва қўшимчалар тегишли тармоқ давлат органлари ва хўжалик бошқарув органлари билан келишилади. Бунда тегишли илмий муассаса мутахассислари белгиланган тартибда жалб қилиниши мумкин.

6. Эксперт ишчи гуруҳи хулосаси асосида Ўзбекистон Республикаси Меҳнат ва аҳолини ижтимоий муҳофаза қилиш вазирининг Классификаторга ўзгартириш ва қўшимчалар киритиш тўғрисидаги буйруғи қабул қилинади ва тасдиқланади.

7. Хизматчиларнинг асосий лавозимлари ва ишчилар касблари жадвалига эскирган ва моҳиятини йўқотган лавозимлар ва касбларни ўз ичига олган ҳолда ўзгартиришлар киритилган ушбу жадвалнинг тегишли қатори тўлиқ ўзгартирилади (чиқариб ташланади).

Хизматчиларнинг асосий лавозимлари ва ишчилар касблари жадвалига қўшимчалар киритилаётган қатор касб (лавозим) кодини, унинг номини, касбларнинг миллий стандарт классификатори бўйича кодни, шахснинг тоифасини ва таълим даражасининг талаб қилинадиган минимумини ўз ичига олган ҳолда тўлиқ кўрсатилади.

8. Классификаторга киритилаётган ўзгартириш ва қўшимчалар уни янги таҳрирда чоп этилишини талаб этмайди.

9. Классификаторга киритилган ўзгартириш ва қўшимчалар кучга киргандан сўнг тегишли давлат ва хўжалик бошқаруви органлари ҳамда ташкилотлар ички ҳужжатларини ушбу ўзгартириш ва қўшимчаларга мувофиқлаштириш чораларини кўришлари лозим.

10. Мазкур Тартиб нормаларининг бузилишида айбдор шахслар қонун ҳужжатларида белгиланган тартибда жавобгарликка тортиладилар.