Замонавий ўзбек композиторлик ижодиётининг ютуқларини кенг тарғиб қилиш, анъанавий мусиқа санъати билан замонавий композиторлик ҳамда ижро мактабларининг муштарак ривожланишини таъминлаш, ёш авлод қалбида миллий ва умуминсоний қадриятларга, хусусан, мусиқа санъатига бўлган меҳру муҳаббат туйғуларини камол топтириш, шунингдек ижодий ҳамкорлик доирасини янада кенгайтириш мақсадида Вазирлар Маҳкамаси қарор қилади:

1. Ўзбекистон Бастакорлар уюшмасининг Маданият ишлари вазирлиги, «Ўзбекнаво» гастроль-концерт бирлашмаси ва «Ўзтелерадиокомпания» билан ҳамкорликда 1998 йил 22 — 27 сентябрь кунлари Тошкент шаҳрида халқаро замонавий симфоник мусиқа фестивалини ўтказиш тўғрисидаги таклифи қабул қилинсин.

2. Фестивални ўтказиш ташкилий қўмитаси таркиби 1-иловага, фестиваль Низоми 2-иловага, сарф-харажатлар сметаси 3-иловага мувофиқ тасдиқлансин.

3. Ташкилий қўмита бир ҳафта муддатда:

фестивалга тайёргарлик кўриш ва уни ўтказиш тадбирлари режасини;

фестиваль бош дирекцияси таркибини;

фестиваль дастурини ишлаб чиқсин ва тасдиқласин ҳамда ҳомийлар рўйхатини аниқласин.

4. Ҳомийларнинг фойдадан тўлайдиган солиқ бўйича базаси қонунчиликда белгиланган миқдорларда камайтирилиши назарда тутилсин.

5. «Ўзбектуризм» миллий компанияси ташкилий қўмита буюртмасига мувофиқ фестиваль қатнашчилари учун меҳмонхоналардан жой ажратсин.

6. Ўзбекистон Республикаси Ташқи ишлар вазирлиги, Давлат божхона қўмитаси ва «Ўзбекистон ҳаво йўллари» миллий авиакомпанияси хорижий иштирокчиларни божхона, виза ва аэропорт тўловларидан озод этсинлар.

7. Ўзбекистон Республикаси Молия вазирлиги фестивалга тайёргарлик кўриш ва уни ўтказиш билан боғлиқ сарф-харажатларни қоплаш учун республика бюджетидан 4789,5 минг сўм ажратсин.

Маълумот учун қабул қилинсинки:

сарф-харажатларнинг 3198,0 минг сўми ҳомийлар ҳисобидан қопланади;

50 нафар хорижий иштирокчининг Ўзбекистонга келиб-кетиш — транспорт харажатлари уларнинг ўз зиммасида, Ўзбекистон ҳудудидаги харажатлари қабул қилувчи томон зиммасида бўлади.

8. «Ўзтелерадиокомпания», ЎзА, оммавий ахборот воситаларига фестиваль ишини мунтазам ёритиб бориш тавсия этилсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Азизхўжаев зиммасига юклансин.

Фестиваль ўзбек миллий симфоник мусиқа санъати анъаналарини ва бугунги ютуқларини, композиторлик ва ижро мактаблари ижодиётининг ёрқин намуналарини кенг тарғиб қилиш, замонавий симфоник мусиқа ижодкорларининг интилишларини рағбатлантириш ҳамда ижодий ҳамкорлик доирасини янада кенгайтириш ниятида таъсис этилган.

Фестиваль 1998 йил 22 — 27 сентябрь кунлари Тошкент шаҳрида ўтказилади.

Ўзбекистон Бастакорлар уюшмаси, Маданият ишлари вазирлиги, «Ўзбекнаво» гастроль-концерт бирлашмаси, «Ўзтелерадио» компанияси, Тошкент давлат консерваторияси фестивалнинг асосий таъсисчиларидир.

Фестиваль доирасида қуйидаги тадбирлар ўтказилади:

1. Фестивалга тақдим этилган Ўзбекистон ва чет эл композиторларининг симфоник, камер асарларидан концертлар;

2. Орган мусиқаси концерти;

3. «Миллий анъаналар ва ҳозирги замон композиторлик ижодиёти» мавзусида давра суҳбати.

Фестивалда ўзбекистонлик ва хорижий мусиқа санъати намояндалари, композитор, дирижёр, мусиқашунос ва бошқа ижодкорлар қатнашиши мумкин. Ҳар бир мамлакатдан икки киши таклиф этилади. Тошкентга келиб-кетиш — транспорт харажатлари иштирокчининг ўз зиммасида бўлади.

Қатнашувчилар ташкилий қўмитага белгиланган муддатда мусиқий асарларининг клавир, партитура ва овозларини тақдим этадилар. Ҳар бир асарнинг ижроси 30 дақиқадан ошмаслиги ва қуйидаги йўналишлардан иборат бўлиши лозим:

симфоник асарлар (увертюра, поэма, симфония, концерт ва ҳ.к.);

камер асарлари (вокал, чолғу, оркестр ва ҳ.к.).

Фестивалга тақдим этилган мусиқий асарларнинг ижро этилишини таъминлаш;

фестиваль қатнашчиларининг фестивалда иштирок этиши билан боғлиқ сарф-харажатларни, шу жумладан, меҳмонхонада яшаш, овқатланиш, Ўзбекистон ҳудудида транспортда юриш харажатларини қоплаш.