El-yurtimiz ozodligi va erkinligi yoʻlida, xalqimizning qadr-qimmati, or-nomusini, milliy anʼanalarimiz va urf-odatlarimizni himoya qilishda, bosqinchi va yovuz kuchlarga qarshi mashaqqatli kurashlarda qurbon boʻlganlar xotirasi minnatdor avlodlar yodida abadiy saqlanib qoladi.

Mustabid tuzum davrida million-million begunoh insonlarning umri xazon boʻlganini, qancha-qancha oilalar xonavayron boʻlib, qancha-qancha goʻdaklar yetim qolganini tarix, bugungi va kelajak avlod hech qachon unutmaydi.

Xalqimizning ana shunday ming-minglab fidoyi va matonatli oʻgʻil-qizlarining xotirasini eslash, haqiqat va adolatni tiklash, zamondoshlarimiz, xususan, oʻsib kelayotgan yosh avlod qalbi va ongida oʻtganlar xotirasiga hurmat va ehtirom tuygʻusini tarbiyalash maqsadida:

1. “Shahidlar xotirasi” xayriya jamgʻarmasi faollari, ijodkor ziyolilar, keng jamoatchilik vakillarining mamlakatimizda Qatagʻon qurbonlarini yod etish kunini belgilash haqidagi taklifi maʼqullansin.

2. Qatagʻon qurbonlarini yod etish marosimi har yili 31-avgust kuni Mustaqillik bayrami arafasida poytaxtimiz Toshkent shahridagi “Shahidlar xotirasi” yodgorlik majmuida oʻtkazilishi belgilab qoʻyilsin.

3. Respublika “Maʼnaviyat va maʼrifat” jamoatchilik kengashi, “Shahidlar xotirasi”, “Nuroniy” jamgʻarmalari, Madaniyat ishlari vazirligi, Fanlar akademiyasi va ijodiy uyushmalarga bir oy muddatda Qatagʻon qurbonlarini yod etish kuni bilan bogʻliq maʼnaviy-maʼrifiy tadbirlar dasturini ishlab chiqish va amalga oshirish vazifasi topshirilsin.

4. Bu yil mamlakatimizda ilk bor oʻtkaziladigan Qatagʻon qurbonlarini yod etish kuniga puxta tayyorgarlik koʻrish va marosimni yuksak darajada tashkil etish maqsadida tuzilgan komissiya tarkibi ilovaga* muvofiq tasdiqlansin.

5. Toshkent shahar hokimligi tegishli idora va tashkilotlar bilan birgalikda “Qatagʻon qurbonlari xotirasi” muzeyini tashkil etish, “Shahidlar xotirasi” yodgorlik majmuini sayyohlik yoʻnalishlari roʻyxatiga kiritish, ziyoratgoh hududini yanada obodonlashtirish va bu erda maxsus radiolashtirish tizimini joriy qilish masalasini hal etsin.

6. Oʻzteleradiokompaniya, OʻzA va boshqa ommaviy axborot vositalariga Qatagʻon qurbonlarini yod etish kunining maʼno-mazmunini va tarbiyaviy ahamiyatini keng targʻib qilish tavsiya etilsin.

7. Mazkur Farmon ijrosini nazorat qilish Prezidentning Davlat maslahatchisi X. Sultonov zimmasiga yuklansin.