Сифатсиз ва қалбаки маҳсулотлар кириб келишидан истеъмолчилар ҳуқуқларини ҳимоя қилиш, алкоголли ва тамаки маҳсулотлари ишлаб чиқариш ва уларнинг айланиши устидан давлат назоратини кучайтириш, уларни олиб келиш, ишлаб чиқариш ва сотишдан бюджетга даромадлар кафолатли тушишини таъминлаш мақсадида Вазирлар Маҳкамаси қарор қилади:

1. Белгилаб қўйилсинки:

1998 йил 1 июлдан бошлаб Ўзбекистон Республикаси ҳудудига олиб келинадиган алкоголли маҳсулотларга акциз солиғи, уни ҳисоблаб чиқаришнинг амалдаги тартибини сақлаб қолган ҳолда, 90 фоизли ставка бўйича ундирилади;

маркаланадиган товарларни импорт қилувчилар акциз солиғини тўлиқ миқдорда тўлаганларидан кейин акциз маркаларини сотиб оладилар;

алкоголли маҳсулотларни қуйиш учун идишлар, маркалайдиган ва тиқинлаб беркитиш материаллари фақат алкоголли ичимликлар ишлаб чиқариш ҳуқуқини берувчи махсус рухсатнома (лицензия)га эга бўлган юридик шахслар, шунингдек, «Ўзмевасабзавотузумсаноат-холдинг» компаниясининг ташқи савдо ташкилотлари томонидан белгиланган тартибда импорт қилинади;

Ўзбекистон Республикаси Ҳукуматининг айрим қарорлари билан импорт қилувчиларга бож тўловлари бўйича берилган имтиёзлар улар томонидан Ўзбекистон Республикаси божхона ҳудудига алкоголли ва тамаки маҳсулотлари олиб келинишига жорий этилмайди;

Ўзбекистон Республикаси божхона ҳудуди орқали транспортнинг барча турлари билан алкоголли ва тамаки маҳсулотларини транзит қилиш фақат божхона назорати остида ва уларни кейинчалик чегарадош давлатларнинг ваколатли органларига топшириб, Ўзбекистон Республикаси ҳудуди орқали божхона кузатувига олганлик учун 200 ЭКЮ миқдорида тўлов ундирилган ҳолда амалга оширилади.

2. Белгилансинки, акциз маркалари расмий ҳужжат ҳисобланади, уларни қалбакилаштириш амалдаги қонун ҳужжатларига мувофиқ жавобгарликка олиб келади.

«Давлат белгиси» давлат ишлаб чиқариш бирлашмаси томонидан Ўзбекистон Республикаси Давлат солиқ қўмитаси ва Давлат божхона қўмитаси билан биргаликда алкоголли ва тамаки маҳсулотлари учун ҳимоялаш даражаси кучайтирилган акциз маркаларининг янги намуналари тайёрланганлиги маълумот учун қабул қилинсин.

1998 йил 1 июлдан бошлаб олиб келинаётган ва ишлаб чиқарилаётган алкоголли ва тамаки маҳсулотларига янги намунадаги акциз маркалари жорий этилсин ҳамда 1998 йил 1 сентябрдан бошлаб илгари амалда бўлган акциз маркалари билан маркаланган алкоголли ва тамаки маҳсулотларини Ўзбекистон Республикаси ҳудудида сотиш тақиқлансин.

Акциз маркалари тизимини жорий этиш бўйича идоралараро комиссия (Ҳамидов Б. С.) алкоголли ва тамаки маҳсулотларига янги намунадаги акциз маркаларини жорий этиш тартибини ўн кун муддатда тасдиқласин.

«Ўзкимёсаноат» уюшмаси «Ўзмевасабзавотузумсаноат-холдинг» компанияси билан биргаликда акциз маркаларини елимлаш учун юқори ва паст ҳароратга ҳамда турли даражадаги намликка чидамли махсус елимни бир ой муддатда ишлаб чиқсин ва ишлаб чиқаришга жорий этсин.

3. Ўзбекистон Республикаси Давлат божхона қўмитаси спирт ва акциз маркалари билан маркаланадиган маҳсулотларнинг республика ҳудудига ноқонуний олиб келинишининг олдини олиш юзасидан таъсирчан чора-тадбирлар кўрсин. Божхона постларини мустаҳкамлаш юзасидан бир ой муддатда таклифлар киритсин.

4. «Ўздавстандарт» маркази «Ўзмевасабзавотузумсаноат-холдинг» компанияси ва «Давлат белгиси» давлат ишлаб чиқариш бирлашмаси билан биргаликда алкоголли маҳсулотлар ишлаб чиқарувчи корхоналар учун ишлаб чиқарилаётган маҳсулот сифатини назорат қилишни таъминлаш мақсадида қалбакилаштиришдан ҳимояланган мувофиқлик белгилари (этикетка ва тиқинларда)ни жорий этсин ва алкоголли маҳсулотларни кўрсатиб ўтилган мувофиқлик белгилари билан маркалаш тартибини бир ой муддатда тасдиқласин.

1998 йил 1 сентябрдан бошлаб Ўзбекистон Республикаси ҳудудида ишлаб чиқарувчи корхоналар томонидан мувофиқлик белгилари мавжуд бўлмаган алкоголли маҳсулотлар ишлаб чиқарилиши тақиқлансин.

5. «Ўздавстандарт» маркази «Ўзкимёсаноат» уюшмаси, «Ўзмевасабзавотузумсаноат-холдинг» компанияси, Ўзбекистон Республикаси Молия вазирлиги ва Давлат солиқ қўмитаси билан биргаликда спирт ва алкоголли маҳсулотлар ишлаб чиқарилишини, идишларга қуйилишини, сақланишини ва улгуржи сотилишини ҳисобга олиш ва назорат қилиш юзасидан Низом ишлаб чиқсин ва тасдиқлаш учун Вазирлар Маҳкамасига киритсин.

6. Ҳисобга олинмаган алкоголли маҳсулотлар ва спирт ишлаб чиқарилишининг олдини олиш мақсадида «Ўзкимёсаноат» уюшмаси «Ўзмевасабзавотузумсаноат-холдинг» компанияси билан биргаликда спирт ва алкоголли маҳсулотлар ишлаб чиқариш технология линияларини бу маҳсулотларни ҳисобга олиш приборлари билан жиҳозлашни ташкил этиш тўғрисида икки ой муддатда Вазирлар Маҳкамасига таклифлар киритсин.

7. Ўзбекистон Республикаси Молия вазирлиги Давлат солиқ қўмитаси, Ички ишлар вазирлиги ва «Ўздавстандарт» маркази билан биргаликда спирт ва алкоголли маҳсулотлар ишлаб чиқарувчи корхоналарни, ҳисобга олинмаган маҳсулотлар ишлаб чиқариш ва уларни сотиш йўлларини аниқлаш учун зарур ҳолларда уларни ишлаб чиқариш учун хом ашё етказиб берувчи корхоналарда ҳам муқобил текширишларни назарда тутган ҳолда, шунингдек фойдаланилган хом ашё миқдори ва сифати ишлаб чиқарилган маҳсулот миқдори ва сифатига мувофиқлигини ялпи текширишдан ўтказсинлар.

Текшириш натижалари тўғрисида 1998 йил 1 августгача Вазирлар Маҳкамасига ахборот берилсин.

8. Белгилаб қўйилсинки, алкоголли маҳсулотлар фақат юридик шахслар томонидан турғун савдо тармоғи орқали сотилади. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

1998 йил 1 июндан бошлаб алкоголли маҳсулотларнинг майда чакана савдо тармоқлари (савдо залига эга бўлмаган дўконлар, киоскалар ва палаткалар)да, деҳқон бозорларида ва улгуржи бозорларда сотилишини тўхтатиш чора-тадбирларини кўрсинлар;

акциз маркалари билан маркаланмаган алкоголли маҳсулотларни сотганлик учун юридик шахсларни алкоголли маҳсулотлар сотиш ҳуқуқини берувчи рухсатнома /лицензия/лардан маҳрум қилсинлар.

9. Белгилаб қўйилсинки:

спирт ва алкоголли маҳсулотлар ишлаб чиқарувчи корхоналар раҳбарлари — хом ашё ресурсларини сарфлаш ва уларни сақлаш, ишлаб чиқаришни ҳисобга олиш ҳамда уни назорат қилиш тартиби бузилганлиги, белгиланган стандартларга мувофиқ келмайдиган маҳсулотлар ишлаб чиқарилганлиги, уларни акциз маркалари билан маркалаш қоидаларига риоя қилинмаганлиги учун;

юридик шахсларнинг раҳбарлари ҳамда тегишли мансабдор шахслари ва жисмоний шахслар — ишлаб чиқарувчи корхоналар томонидан акциз солиғи солинадиган маркаланмаган маҳсулотлар ортиб жўнатилганлиги учун, шунингдек, уларнинг ноқонуний тайёрланганлиги, олиб келинганлиги, сақланганлиги, транспортда ташилганлиги ва сотилганлиги учун қонун ҳужжатларида белгиланган тартибда жиноий жавобгарликкача бўлган жавобгарликка тортиладилар.

Савдо тармоқларида акциз маркаси бўлмаган алкоголли ва тамаки маҳсулотлари сотилганлиги учун маҳаллий давлат солиқ хизмати органи раҳбарлари ва мансабдор шахсларига эгаллаб турган лавозимидан бўшатишгача бўлган жавобгарлик юклансин.

10. Ўзбекистон Республикаси Вазирлар Маҳкамасининг 1996 йил 26 ноябрдаги 418-сон қарорига иловага мувофиқ қўшимчалар ва ўзгартиришлар киритилсин.

Ўзбекистон Республикаси Молия вазири акциз солиғи солинадиган маҳсулотлар ишлаб чиқарадиган корхоналарда молия инспекторлари таркибини қайта кўриб чиқсин ва бир ой муддатда ушбу лавозимларни юқори малакали мутахассислар билан бутласин.

11. «Ўзтелерадио» компанияси, Ўзбекистон Республикаси Давлат матбуот қўмитаси Давлат солиқ қўмитаси ва Давлат божхона қўмитаси билан биргаликда акциз солиғи солинадиган маҳсулотларни олиб келиш, транспортда ташиш, ишлаб чиқариш ва сотиш тартибига риоя қилишга оид олиб борилаётган тадбирларни ва қонун бузувчиларга нисбатан кўрилаётган жавобгарлик чора-тадбирларини кенг ёритсинлар.

12. Ўзбекистон Республикаси Адлия вазирлиги манфаатдор вазирликлар ва идоралар билан биргаликда икки ҳафта муддатда Ҳукуматнинг тегишли қарорларига ўзгартиришлар ва қўшимчалар киритиш тўғрисида таклиф киритсин.

13. Мазкур қарорнинг бажарилишини назорат қилиш Бош вазир Ў.Султонов зиммасига юклансин.

I. 6-банднинг учинчи хатбоши ўз кучини йўқотган деб ҳисоблансин.

II. 2-илова — «Ўзбекистон Республикаси Молия вазирлигининг бюджетга акциз солиғи тўлиқ ва ўз вақтида тушиши устидан назорат ўрнатувчи молия инспекторлари тўғрисида низом»нинг:

I бўлими — «Умумий қоидалар» иккинчи банди қуйидаги таҳрирда баён қилинсин:

«Молия инспекторлари Ўзбекистон Республикаси Молия вазири томонидан лавозимга тайинланадилар ва лавозимдан озод этиладилар. Бунда молия инспекторлари билан меҳнат шартномаси бир йилгача муддатга тузилади».

II бўлими — «Молия инспекторларининг асосий функциялари» қуйидаги мазмундаги хатбошилар билан тўлдирилсин:

«ҳар ойда акциз маркаларининг амалда мавжудлигини рўйхатдан ўтказадилар, шикастланган акциз маркаларини йўқ қилишга топширишдан олдин улар миқдорининг мувофиқлигини текширадилар;

акциз солиғи солинадиган маҳсулотлар ишлаб чиқариш учун хом ашёнинг тўлиқ кирим қилинишини назорат қиладилар, тайёр маҳсулот чиқишининг белгиланган стандартлар ва нормативларга мувофиқлигини таҳлил қиладилар;

зарур ҳолларда ҳар чоракда камида бир марта ҳам корхоналарнинг ўзида, ҳам мустақил лабораторияларда лаборатория тадқиқотлари ўтказган ҳолда, асосий ва қўшимча маҳсулотлар намуналарини оладилар».

III бўлими — «Молия инспекторларининг ҳуқуқлари» қуйидаги мазмундаги хатбошилар билан тўлдирилсин:

«давлат солиқ хизмати органларининг мансабдор шахслари билан биргаликда улгуржи харидорлар томонидан уларга сотилган акциз солиғи солинадиган маҳсулотлар тўғри кирим қилинишини, шунингдек, хом ашё етказиб берувчи корхоналарни муқобил текшириш. Қонун бузишлар аниқланган ҳолларда текширишлар натижалари бўйича далолатномалар тузиш ва уларни чора кўриш учун тегишли солиқ ҳамда ҳуқуқни муҳофаза қилиш органларига юбориш;

корхона жойлашган жойдаги солиқ органларидан дебитор бўлган товар олувчи корхоналарнинг олинган ва сотилган маҳсулотлари ҳажмлари тўғрисидаги зарур бўлган маълумотларни сўраб олиш;

корхоналарнинг хом ашё ва материаллар келиб тушиши, акциз солинадиган ва қўшимча маҳсулотлар ишлаб чиқариш ҳамда сотиш билан боғлиқ барча пул ва бухгалтерия ҳужжатларини текшириш».