Ўзбекистон Республикасининг Божхона кодекси, Ўзбекистон Республикасининг «Давлат божхона хизмати тўғрисида»ги, «Маҳсулот тақсимотига оид битимлар тўғрисида»ги қонунлари ва Ўзбекистон Республикаси Президентининг 2017 йил 3 майдаги ПҚ-2948-сон «Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокида геология-қидирув ишлари олиб бориш ҳақида»ги қарори ҳамда Вазирлар Маҳкамасининг 2017 йил 1 июндаги 333-сон «Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокига нисбатан маҳсулот тақсимотига оид битимни амалга ошириш чоралари ҳақида»ги қарорига мувофиқ Ўзбекистон Республикаси Давлат божхона қўмитаси, Инвестициялар бўйича давлат қўмитаси ва Ташқи савдо вазирлиги қарор қилади:

1. Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокига нисбатан маҳсулот тақсимотига оид битимни амалга ошириш доирасида Ўзбекистон Республикаси божхона чегараси орқали олиб ўтиладиган товарларнинг божхона расмийлаштируви тартиби тўғрисидаги низом иловага мувофиқ тасдиқлансин.

2. Мазкур қарор расмий эълон қилинган кундан эътиборан кучга киради.

Мазкур Низом Ўзбекистон Республикасининг Божхона кодекси, Ўзбекистон Республикасининг «Давлат божхона хизмати тўғрисида»ги, «Ер ости бойликлари тўғрисида»ги ва «Маҳсулот тақсимотига оид битимлар тўғрисида»ги қонунлари, Ўзбекистон Республикаси Президентининг 2017 йил 3 майдаги ПҚ-2948-сон «Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокида геология-қидирув ишлари олиб бориш ҳақида»ги қарори ҳамда Вазирлар Маҳкамасининг 2017 йил 1 июндаги 333-сон «Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокига нисбатан маҳсулот тақсимотига оид битимни амалга ошириш чоралари ҳақида»ги қарорига мувофиқ кўрсатилган Битим доирасида Ўзбекистон Республикаси божхона чегараси орқали олиб ўтилаётган товарларни божхона расмийлаштирувини амалга ошириш тартибини белгилайди.

1. Мазкур Низомда қуйидаги асосий тушунчалардан фойдаланилади:

ваколатли орган — «Ўзбекнефтгаз» АЖ;

Инвесторлар — «Gas Project Development Central Asia AG» компанияси, «Altmax Нolding Ltd» компанияси ва «Ўзнефтегазқазибчиқариш» АЖ, шунингдек уларнинг ҳуқуқий ворислари ва йўл қўйиладиган цессионарлари;

МТБ — Ўзбекистон Республикаси Сурхондарё вилоятида газ-кимё комплексини қуриш, «Мустақилликнинг 25 йиллиги» конида дастлабки қидирув ва уни ишлатиш билан бирга «Ўзбекистон мустақиллиги» инвестиция блокига нисбатан 2017 йил 5 апрелдаги маҳсулот тақсимотига оид битим;

нефть-газ маҳсулоти — нефть-газ операцияларини амалга ошириш жараёнида аниқланган, қазиб олинган, тайёрланган, қайта ишланган ва (ёки) сақланган ҳамда тегишли етказиш жойига технологик йўқотишларни айириб ташлаган ҳолда етказилган нефть, табиий газ, конденсат, бошқа углеводород маҳсулотлари ва йўлдош маҳсулотлар;

нефть-газ операциялари — шартнома майдони ва шартномадан ташқари майдон доирасида геология-қидирув ишлари билан боғлиқ бўлган лойиҳалаштириш, товарлар, ишлар ва хизматларни харид қилиш, ер қаърини геологик ўрганиш, шу жумладан қидирув (баҳолаш) қудуқларини бурғулаш, саноат конларини ободонлаштириш ва ишлатиш, қазиб чиқариш, барқарорлаштириш, тайёрлаш (шу жумладан табиий газни тайёрлаш), ажратиб олиш (шу жумладан, тайёр олтингугуртни олиш), қўзғатиш, дам бериб ҳайдаш, йиғиш, сақлаш, ортиш, юклаб жўнатиш, қайта ишлаш, шартнома майдонида қазиб олинган углеводородлар ва олтингугуртни етказиш жойига етказиб бериш, шартнома майдонига нисбатан йўқ қилиш ва консервация қилиш операциялари бўйича фаолият, шунингдек мазкур операциялар билан бевосита боғлиқ бўлган ва МТБни бажариш доирасида ҳамда мақсадларида амалга ошириладиган бошқа фаолият;

Оператор — МТБда назарда тутилган ишларни бажаришни ташкил қилиш учун тузилган «Surhan Gas Chemical Operating Company» МЧЖ ХК;

пудратчи — Инвестор ва (ёки) Оператор билан МТБ бўйича нефть-газ операциялари билан боғлиқ бўлган товарларни етказиб бериш, ишларни бажариш ёки хизматлар кўрсатиш тўғрисида шартнома (контракт) тузган ҳар қандай жисмоний ёки юридик шахс. Ушбу тушунча, пудратчи билан МТБ бўйича нефть-газ операциялари билан боғлиқ бўлган товарларни етказиб бериш, ишларни бажариш ёки хизматлар кўрсатиш тўғрисида шартномалар (контрактлар) тузилган иккиламчи пудратчиларни ҳам ўз ичига олади;

товарлар — Инвестор, Оператор, уларни МТБ бўйича нефть-газ операцияларини бажариш учун жалб қилинган пудратчилари томонидан олиб кириладиган озиқ-овқат ва ноозиқ-овқат истеъмол товарлар, ускуналар, моддий-техник ресурслар, транспорт воситалари ва бошқа кўчар мулк, шунингдек эҳтиёт қисмлар, жиҳозлар ва қисмлар, ЁММ (ёқилғи-мойлаш материаллари), нефть-газ операцияларини бажариш учун лойиҳа ва техник ҳужжатлар.

Мазкур Низомда алоҳида изоҳ берилмаган бошқа барча тушунчалар ушбу тушунчалар учун МТБда ва божхона қонунчилигида берилган маънони англатади.

2. Товарларни етказиб бериш (олиб кириш) шартномалари (контрактлари) экспорт мамлакатники каби импорт мамлакатнинг ҳам Ташқи иқтисодий фаолият товарлар номенклатураси (бундан буён матнда ТИФ ТН деб юритилади) бўйича кодига шартли ҳаволага эга бўлиши мумкин.

ТИФ ТН бўйича якуний код келиб тушган товарни божхона расмийлаштирувини амалга ошириш пайтида аниқланади.

Бунда, агар ТИФ ТН бўйича товарларнинг коди дастлабки олтита белги даражасида ўзгармаса шартномаларга ўзгартириш киритилмаган ҳолда божхона расмийлаштируви амалга оширилади.

3. Иқтисодий сиёсат чоралари қўлланиладиган товарлар қонун ҳужжатларида ва МТБда белгиланган тартибда ва шартларда олиб кирилади.

4. Инвестор ва (ёки) Оператор ва уларнинг пудратчилари томонидан олиб кирилиб, эркин муомалага чиқаришга мўлжалланган ҳамда вақтинча олиб кириш режимига жойлаштирилиб, олиб чиқилаётган товарларнинг божхона расмийлаштируви МТБнинг 21-моддасига мувофиқ божхона тўловларини (божхона йиғимларидан ташқари) тўлашдан озод этилган ҳолда амалга оширилади.

5. Инвестор ва (ёки) Оператор томонидан олиб кирилаётган товарларнинг, шунингдек вақтинча олиб кириш режимига жойлаштирилиб, олиб чиқилаётган товарларнинг божхона расмийлаштируви пайтида берилган имтиёзлар ҳисобини юритиш учун божхона юк декларацияси (бундан буён матнда БЮД деб юритилади) божхона тўловларини ҳисобга олган ҳолда тўлдирилади.

6. Инвестор, Оператор томонидан Ўзбекистон Республикаси божхона чегарасидан олиб ўтиладиган товарларга нисбатан божхона расмийлаштируви учун божхона йиғимларининг ўз вақтида ва тўлиқ тўланиши учун Инвестор ва/ёки Оператор жавобгар бўлади. Бунда пудратчи томонидан Ўзбекистон Республикаси божхона чегараси орқали олиб ўтилаётган товарларга нисбатан божхона расмийлаштируви учун божхона йиғимларининг ўз вақтида ва тўлиқ тўланиши учун Инвестор ва/ёки Оператор ва пудратчи ўртасида тузилган шартномалар (контрактлар) шартларига мувофиқ пудратчи жавобгар бўлади.

7. Оператор нефть-газ операцияларини амалга ошириш учун қонун ҳужжатларига мувофиқ божхона омборини ташкил этиш ҳуқуқига эга.

8. Товарлар эркин муомалага чиқариш (импорт) божхона режимига Божхона юк декларациясини тўлдириш тартиби тўғрисидаги йўриқноманинг (рўйхат рақами 2773, 2016 йил 6 апрель) 5-бобига мувофиқ БЮД қуйидаги хусусиятларни инобатга олган ҳолда тўлдирилади:

24-графанинг чап кичик бўлмасида битимнинг коди «79» кўрсатилади;

37-графанинг охирги учта рақамига Товарларни олиб ўтиш хусусиятлари таснифлагичига асосан «062» коди кўрсатилади;

44-графада қуйидагилар кўрсатилади:

301 тартиб рақами ва «КНТ» ҳарфли коди остида — Оператор ва пудратчилар томонидан олиб кирилаётган товарларга нисбатан тегишли шартноманинг (контрактнинг) рақами, санаси ва қиймати;

МТБнинг рақами ва санаси;

Инвестор ва (ёки) Оператор ва пудратчи томонидан олиб кирилаётган товарларга нисбатан Инвестор ва (ёки) Оператор хатининг рақами ва санаси.

9. Эркин муомалага чиқариш (импорт) божхона режимига мувофиқ божхона расмийлаштируви амалга оширилаётган товарларга нисбатан товарларни чиқариб юбориш (расмийлаштириш) мувофиқлик сертификати ва экологик сертификат мавжуд бўлмаган ҳолларда уларни кейинчалик тақдим этилиши билан қўлланилиши мумкин.

10. Эркин муомалага чиқариш (импорт) божхона режимига жойлаштирилган товарлар Инвестор ва (ёки) Оператор ёхуд пудратчининг аризасига мувофиқ Ўзбекистон Республикаси божхона ҳудудидан ташқарига реэкспорт божхона режимида Ўзбекистон Республикаси Божхона кодексининг 6-бобида белгиланган тартиб ва шартларга амал қилган ҳолда олиб чиқилиши мумкин.

11. Инвестор, Оператор ёки пудратчининг эркин муомалага чиқариш учун мўлжалланган товарлари божхона омбори божхона режимига жойлаштирилиши мумкин.

12. Товарларни вақтинча олиб кириш божхона режимида Ўзбекистон Республикаси ҳудудига олиб кириш Ўзбекистон Республикаси Божхона кодексининг 11-боби асосида Инвестор ва (ёки) Оператор ёки пудратчининг аризасига мувофиқ амалга оширилади.

13. Товарлар вақтинча олиб кириш божхона режимига Инвестор ва (ёки) Оператор ёхуд пудратчи томонидан олиб кириш мақсадларига кўра кўрсатилган муддатга Божхона юк декларациясини тўлдириш тартиби тўғрисидаги йўриқноманинг (рўйхат рақами 2773, 2016 йил 6 апрель) 8-бобига мувофиқ БЮД қуйидаги хусусиятларни инобатга олган ҳолда тўлдирилади:

24-графанинг чап кичик бўлмасида битимнинг коди «79» кўрсатилади;

37-графанинг охирги учта рақамига Товарларни олиб ўтиш хусусиятлари таснифлагичига асосан «062» коди кўрсатилади;

44-графада қуйидагилар кўрсатилади:

301 тартиб рақами ва «КНТ» ҳарфли коди остида — Оператор ва пудратчилар томонидан олиб кирилаётган товарларга нисбатан тегишли шартноманинг (контрактнинг) рақами, санаси ва қиймати;

МТБнинг рақами ва санаси;

Инвестор ва (ёки) Оператор ва пудратчи томонидан олиб кирилаётган товарларга нисбатан Инвестор ва (ёки) Оператор хатининг рақами ва санаси.

14. МТБнинг бутун амал қилиш муддати давомида товарларнинг вақтинча олиб кирилишини БЮДда кўрсатилган дастлабки муддатидан кўпроқ муддатга узайтириш Ўзбекистон Республикаси Божхона кодексининг 64-моддасига мувофиқ божхона органлари томонидан амалга оширилади.

15. Инвестор, Оператор ва пудратчилар:

а) божхона органига олиб ўтилаётган товарларни кўрсатиш ва божхона органига уларни тегишли божхона режимида расмийлаштириш учун зарур ҳужжатларни тақдим этишга;

б) қонун ҳужжатларида белгиланган божхона йиғимларни тўлашга;

в) нефть-газ операцияларига мўлжалланган товарлар тасарруфдан чиқарилган ҳолларда, қонун ҳужжатларида белгиланган тартибда божхона тўловларини тўлашга;

г) вақтинча олиб кириш муддатлари тугаганида товарларни Ўзбекистон Республикаси ҳудудидан ташқарига олиб чиқиш ёки уларни қонун ҳужжатларига мувофиқ бошқа божхона режимига жойлаштиришга мажбур.

16. Ушбу Низомнинг 14-бандида назарда тутилган мажбуриятлар тузилган шартномалар асосида Инвестор, Оператор ёки пудратчилар, иккиламчи пудратчилар томонидан ваколат берилган шахслар томонидан бажарилиши мумкин.

17. Оператор, зарур ҳолларда, Инвесторларнинг топшириғига биноан ва ваколатли органнинг розилиги билан кернларнинг, қатлам суюқликлари намуналарини ва нефть-газ операциялар жараёнида олинган ахборот ва маълумот ҳужжатларини ишлов бериш, таҳлил қилиш ва ўрганишни амалга ошириш мақсадида тегишли божхона органларига ёзма мурожаат асосида Ўзбекистон Республикаси ташқарисига/ичкарисига олиб чиқиши/кириши мумкин.

18. Оператор, зарур ҳолларда, Инвесторларнинг топшириғига биноан ва ваколатли органнинг розилиги билан Ўзбекистон Республикаси ташқарисига/ичкарисига лойиҳавий, техник, ҳисоб ҳужжатлари, сейсмик ёзувлар маълумотларининг аслини ва бошқа геологик маълумотларни ишлов бериш, таҳлил этиш ва ўрганиш мақсадида олиб чиқиши/кириши мумкин. Оператор олиб чиқиб кетилган кўрсатилган ёзувлар ва маълумотларни Ўзбекистон Республикасига қайтариб олиб келишга мажбур.

19. Инвесторлар, Оператор, пудратчилар, иккиламчи пудратчилар, етказиб берувчилар ва бошқа шахсларнинг нефть-газ операцияларини МТБ бўйича бажариш учун жалб қилинадиган ва Ўзбекистон Республикаси ҳудудида доимий турар жойига эга бўлмаган ходимлари, қонун ҳужжатларида белгиланган тартибда, ҳар қандай маиший буюмларни ва бошқа шахсий нарсаларни, шу жумладан мебель, маиший техника ва ҳоказоларни, ушбу ходимлар ва уларнинг оила аъзолари томонидан фақат шахсий мақсадларда фойдаланиш шарти билан ҳеч қандай божхона тўловларисиз (божхона йиғимларидан ташқари) Ўзбекистон Республикасига олиб кириш ва Ўзбекистон Республикасидан қайтариб олиб чиқиб кетишга ҳақлидир.

Ўзбекистон Республикаси ҳудудида бундай буюмларга нисбатан бўлган мулк ҳуқуқини бошқа шахсга бериш қонун ҳужжатларига мувофиқ божхона тўловлари ва солиқ солинишига олиб келади.

20. Мулк ҳуқуқи Инвестордан ва/ёки Оператордан Ўзбекистон Республикасига ёки у томондан ваколатли органга (ташкилотга) ўтганда, Инвестор, Оператор ёки пудратчи томонидан олиб кириладиган товарлар божхона тўловларидан озод қилинади.

21. Олиб кирилган товарлардан мақсадга номувофиқ фойдаланилган ҳолда, шу жумладан, улар тасарруфдан чиқарилганда, божхона органи белгиланган тартибда Ўзбекистон Республикасининг қонун ҳужжатларига мувофиқ тўланиши лозим бўлган барча божхона тўловларини ундиради.

22. Мазкур Низом «Узбекнефтегаз» АЖ ва Оператор билан келишилган.