Консерва ва вино-ароқ саноати корхоналарининг ишлаб чиқариш қувватларидан янада тўла ва самарали фойдаланиш, мева-сабзавот экинлари ва узум ҳосилдорлигини ошириш ҳисобига ўз хом ашё базасини мустаҳкамлаш, шунингдек «Ўзмевасабзавотузумсаноат-холдинг» холдинг компаниясининг ўз таркибига кирувчи корхоналарни бошқаришдаги ролини ошириш мақсадида Вазирлар Маҳкамаси қарор қилади:

1. «Ўзмевасабзавотузумсаноат-холдинг» холдинг компанияси Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда компаниянинг мева-сабзавот ва узумчилик хўжаликларига тегишли экин майдонларида пахта, бошоқли дон экинлари ва ихтисосни белгиламайдиган бошқа экинларни босқичма-босқич қисқартириш жадвалларини икки ҳафта муддатда ишлаб чиқсин.

«Ўзмевасабзавотузумсаноат-холдинг» холдинг компаниясига кўрсатиб ўтилган жадвалларни ҳисобга олган ҳолда компания хўжаликлари ерларида мева-сабзавот, картошка ва узум экишни мустақил равишда прогнозлаштириш ҳуқуқи берилсин.

2. Ўзбекистон Республикаси Давлат мулки қўмитаси, «Ўзмевасабзавотузумсаноат-холдинг» холдинг компанияси ва ҳудудий «Мевасабзавот» бирлашмаларининг компания ҳамда ҳудудий бирлашмалар таркибига кирувчи вино-ароқ ва спирт саноати акциядорлик жамиятлари устав жамғармасини давлатга тегишли мол-мулкни капиталлаштириш, бюджет олдидаги қарзлар таркибини ўзгартириш, шунингдек бошқа манбалар ҳисобига акциялар давлат улушини 1 ва 1а-иловаларга* мувофиқ назорат пакетигача етказиш йўли билан кўпайтириш тўғрисидаги таклифи қабул қилинсин.

3. Тижорат банкларига ҳар йили сабзавот, мева ва узум етиштиришга ихтисослаштирилган қишлоқ хўжалиги корхоналарига аванс бериш учун, шунингдек тайёрлаш мавсуми даврида улар билан ҳисоб-китоб қилиш ва моддий-техника ресурслари сотиб олиш учун «Ўзмевасабзавотузумсаноат-холдинг» холдинг компаниясига, йил давомида қайтариш шарти билан, кредит ажратиш тавсия этилсин.

4. Барқарор молиялаштиришни ҳамда «Ўзмевасабзавотузумсаноат-холдинг» холдинг компанияси корхоналарининг қишлоқ хўжалиги товар ишлаб чиқарувчилари билан ўз вақтида ҳисоб-китоб қилишини таъминлаш учун қишлоқ хўжалиги корхоналарининг 1,2 млрд. сўмлик мева-сабзавот маҳсулотларини етиштириш юзасидан харажатларига уларга «Ўзбекнефтгаз» компанияси, «Ўзкимёсаноат» уюшмаси, Энергетика ва электрлаштириш вазирлиги ва қишлоқ хўжалигига хизмат кўрсатувчи бошқа идоралар корхоналарининг маҳсулот (хизматлар) тарзидаги товар кредити билан аванс беришга рухсат этилсин, бу корхоналарнинг бюджетга вақтида тўланмаган қарзлари таркиби тегишли равишда ўзгартирилсин.

Ўзбекистон Республикаси Молия вазирлиги бу корхоналарнинг таркиби ўзгартириладиган бюджетга вақтида тўланмаган қарзларини Молия вазирлигининг «Ўзмевасабзавотузумсаноат-холдинг» холдинг компаниясига 2 йил муддатга кредити сифатида расмийлаштирсин.

5. Ўзбекистон Республикаси Молия вазирлиги «Ўзмевасабзавотузумсаноат-холдинг» холдинг компанияси ҳамда хизмат кўрсатувчи тижорат банклари билан биргаликда холдинг компанияси корхоналарининг ўз айланма маблағларини тўлдириш ва узумчиликни ривожлантириш масаласини икки ой муддатда кўриб чиқсин ва ҳал қилсин.

Ўз айланма маблағларини тўлдириш манбаларидан бири сифатида 2000 йилда алкоголли маҳсулотларга акциз солиғини ошириш масаласи кўриб чиқилсин.

6. «Ўзқишлоқхўжаликтаъминоттузатиш» давлат-кооператив қўмитаси «Ўзмевасабзавотузумсаноат-холдинг» холдинг компанияси билан биргаликда холдинг компанияси хўжаликларига сабзавот, картошка, мева ва узум етиштиришда экин қатор ораларида агротехника тадбирларини ўтказиш учун машина-трактор парклари томонидан шартномавий асосда хизматлар кўрсатишга доир тадбирларни икки ҳафта муддатда ишлаб чиқсин ва тасдиқласин.

7. «Ўзмевасабзавотузумсаноат-холдинг» холдинг компанияси таркибига кирувчи мева, сабзавот ва узум етиштиришга ихтисослаштирилган қишлоқ хўжалиги корхоналари нархларни шакллантириш ва моддий-техника ресурслари, кимёвий дорилар, минерал ўғитлар ва ёнилғи-мойлаш материаллари билан таъминлаш шартлари бўйича пахтачилик хўжаликлари ва ғалла экувчи хўжаликларга тенглаштирилсин.

8. Ўзбекистон Республикаси Қишлоқ ва сув хўжалиги вазирлиги, «Ўзмевасабзавотузумсаноат-холдинг» холдинг компанияси, Қорақалпоғистон Республикаси Вазирлар Кенгаши ва вилоятлар ҳокимликлари виночилик саноатини янада ривожлантириш ва экспортга мўлжалланган маҳсулотлар ишлаб чиқаришни кўпайтириш учун қишлоқ хўжалигини узумнинг ўта қимматли навлари билан таъминлаш мақсадида мева кўчатлари етиштирувчи хўжаликлар фаолиятини такомиллаштириш чора-тадбирларини кўрсинлар.

10. Ҳудудий «Мевасабзавот» бирлашмалари раисларини, раис ўринбосарларини ва бош бухгалтерларини аттестациядан ўтказиш бўйича 2-иловага* мувофиқ махсус идоралараро комиссия тузилсин.

Ҳудудий «Мевасабзавот» бирлашмалари раҳбар ходимлари ва мутахассисларини аттестациядан ўтказиш бўйича комиссия:

Аттестациядан ўтказиш тартиби тўғрисидаги Низомни ўн кун муддатда ишлаб чиқсин ва тасдиқласин;

ҳудудий «Мевасабзавот» бирлашмалари раҳбарлари ва мутахассисларини икки ой муддатда аттестациядан ўтказсин.

12. Вазирлар Маҳкамасининг «Республика мева-сабзавот хўжалигида монополиядан чиқариш ва ихтисослаштиришни чуқурлаштириш чора-тадбирлари тўғрисида» 1997 йил 18 июлдаги 363-сон қарорига 6-7-иловаларнинг спирт ва алкоголли маҳсулотлар ишлаб чиқарувчи акциядорлик жамиятларидаги акциялар пакетлари улушларини ўзгартиришга оид қисмига мазкур қарорга 1 ва 1а-иловаларга мувофиқ ўзгартиришлар киритилсин.

13. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари М.З. Усмонов зиммасига юклансин.