Ўзбекистон Республикаси Президентининг 2009 йил 23 июнда қабул қилинган «Ўзбекистон Республикасида паспорт тизимини янада такомиллаштириш чора-тадбирлари тўғрисида»ги ПФ-4117-сонли Фармонига мувофиқ ҳамда замонавий халқаро стандартлар ва талабларни инобатга олган ҳолда Ўзбекистон Республикаси фуқароси паспортини, шунингдек, фуқаролиги бўлмаган шахсларга ҳаракатланиш ҳужжатларини расмийлаштириш, бериш ва алмаштириш тартибини янада такомиллаштириш мақсадида:

1. Қуйидагилар:

Ўзбекистон Республикасида паспорт тизими тўғрисидаги низом 1-иловага мувофиқ;

Ўзбекистон Республикасининг фуқаролиги бўлмаган шахсларининг биометрик ҳаракатланиш ҳужжати тўғрисидаги низом 2-иловага мувофиқ тасдиқлансин.

2. Ўзбекистон Республикаси Президентининг 1999 йил 26 февралда қабул қилинган ПФ-2240-сонли Фармони билан тасдиқланган Ўзбекистон Республикасида паспорт тизими тўғрисидаги низом, Ўзбекистон Республикаси фуқаросининг амалдаги паспорти ва фуқаролиги бўлмаган шахснинг шахсини тасдиқловчи гувоҳнома 2015 йил 31 декабргача ҳақиқийлиги маълумот учун қабул қилинсин.

3. Ўзбекистон Миллий телерадиокомпанияси (А. Хўжаев), Ўзбекистон Миллий ахборот агентлиги (М. Ҳазратқулов) оммавий ахборот воситаларида (матбуот, телевидение, радиоэшиттириш) фуқаролар ўртасида мазкур Фармоннинг асосий қоидаларини кенг тарғиб қилиш бўйича чиқишлар ва мавзуга оид кўрсатувлар тайёрлашни таъминласин.

4. Ўзбекистон Республикаси Ташқи ишлар вазирлиги (Э. Ғаниев) белгиланган тартибда хорижий давлатлар ҳукуматларини, Халқаро фуқаро авиацияси ташкилотини ва Халқаро стандартлаштириш ташкилотини Ўзбекистонда миллий паспорт тизимини такомиллаштириш бўйича амалга оширилаётган тадбирлар тўғрисида хабардор қилсин.

5. Ўзбекистон Республикаси Президентининг 2003 йил 9 декабрда қабул қилинган ПФ-3358-сонли Фармони билан тасдиқланган Республика давлат бошқаруви органлари рўйхатининг V бўлими қуйидаги мазмундаги 7-банд билан тўлдирилсин:

«7. Ўзбекистон Республикаси Вазирлар Маҳкамаси ҳузуридаги Давлат персоналлаштириш маркази».

6. Ўзбекистон Республикаси Ички ишлар вазирлиги (Б. Матлюбов) Адлия вазирлиги (Р. Муҳитдинов) ва бошқа манфаатдор вазирликлар, идоралар билан биргаликда икки ой муддатда қонун ҳужжатларига мазкур Фармондан келиб чиққан ҳолда тегишли ўзгартиш ва қўшимчалар киритиш тўғрисида Ўзбекистон Республикаси Вазирлар Маҳкамасига таклифлар киритсин.

7. Ушбу Фармоннинг ижросини назорат қилиш Ўзбекистон Республикаси Бош вазири Ш. Мирзиёев зиммасига юклансин.

1. Ўзбекистон Республикасида паспорт тизими тўғрисидаги Низом (кейинги ўринларда — Низом) Ўзбекистон Республикаси фуқаросининг биометрик паспортини расмийлаштириш, бериш, алмаштириш, ундан фойдаланиш, рўйхатга олиш, рўйхатдан чиқариш тартибини, шунингдек паспорт тизими қоидаларини бузганлик учун жавобгарликни белгилайди.

2. Ушбу Низомда қуйидаги асосий тушунчалардан фойдаланилади:

Ўзбекистон Республикаси фуқаросининг биометрик паспорти (кейинги ўринларда — паспорт) — Ўзбекистон Республикасининг фуқаролигини ва эгасининг шахсини тасдиқловчи, паспорт эгасининг шахсий биографик маълумотлари ва биометрик параметрлари киритилган электрон ташувчи қурилма (чип)га эга бўлган ҳужжат;

персоналлаштириш — паспорт эгасининг биографик маълумотларини ва биометрик параметрларини паспорт бланкасига киритиш;

верификация — паспортга киритилган биометрик параметрларнинг паспорт эгасининг биометрик параметрлари билан мослигини машина ёрдамида текшириш;

фуқарони рўйхатга олиш ва рўйхатдан чиқариш — фуқаронинг Ўзбекистон Республикаси ҳудудидаги муайян жойда доимий ёки вақтинча яшаш фактининг Ўзбекистон Республикаси Ички ишлар вазирлигининг тегишли хизматлари томонидан ушбу Низомда белгиланган тартибда қайд қилиниши;

хорижда доимий яшайдиган Ўзбекистон Республикаси фуқаролари — Ўзбекистон Республикасидаги доимий яшаш жойидан рўйхатдан чиқиб, хорижга доимий яшашга чиқиш учун белгиланган тартибда рухсатнома расмийлаштирган Ўзбекистон Республикаси фуқаролари;

хорижда вақтинча бўладиган Ўзбекистон Республикаси фуқаролари — Ўзбекистон Республикасида доимий яшайдиган, хорижга чиқиб, вақтинча у ерда бўладиган Ўзбекистон Республикаси фуқаролари;

консуллик муассасаси — Ўзбекистон Республикаси дипломатик ваколатхонасининг консуллик бўлими, Ўзбекистон Республикасининг хорижий давлатда таъсис этиладиган бош консулхонаси, консулхонаси, вице-консулхонаси ва консуллик агентлиги;

консуллик рўйхати — тегишли консуллик округи ҳудудига келган Ўзбекистон Республикаси фуқароларини хориждаги Ўзбекистон Республикасининг консуллик муассасалари қошида белгиланган тартибда қайддан ўтказиш;

доимий консуллик рўйхати — доимий яшаш учун хорижга чиқиш рухсатномаси белгиланган тартибда расмийлаштирилган, Ўзбекистон Республикасининг хориждаги консуллик муассасаси консуллик округи ҳудудида доимий яшаётган Ўзбекистон Республикаси фуқароларини қайддан ўтказиш;

вақтинча консуллик рўйхати — Ўзбекистон Республикасида доимий яшайдиган, хорижда вақтинча бўладиган, хорижга вақтинча чиқиш рухсатномасини белгиланган тартибда расмийлаштирган Ўзбекистон Республикаси фуқароларини хориждаги Ўзбекистон Республикаси консуллик муассасалари томонидан қайддан ўтказиш;

консуллик округи — консуллик муассасасига консуллик вазифаларини бажариш учун бириктирилган бир ёки бир неча давлат ҳудуди;

маълумотларни йиғиш пункти — паспорт олиш учун мурожаат қилган фуқароларнинг биографик маълумотларини ва биометрик параметрларини жамлаш, ушбу маълумотларни Ўзбекистон Республикаси Вазирлар Маҳкамаси ҳузуридаги Давлат персоналлаштириш марказига (кейинги ўринларда — ДПМ) топшириш ҳамда фуқароларга биометрик параметрларга эга паспортлар бериш бўйича вазифаларни бажарувчи ички ишлар идораларининг хорижга чиқиш-келиш ва фуқароликни расмийлаштириш хизматлари, Ўзбекистон Республикаси Ташқи ишлар вазирлигининг консуллик бошқармаси, Ўзбекистон Республикасининг хориждаги консуллик муассасалари;

паспорт олиш учун талабнома — паспорт олувчи ҳақида маълумотларни йиғиш пункти томонидан шакллантирилган биографик маълумотлар ва биометрик параметрларни ўз ичига олган электрон ҳужжат (кейинги ўринларда — талабнома).

3. Паспорт Ўзбекистон Республикаси ҳудудида ва ундан ташқарида Ўзбекистон Республикасининг фуқаролигини ва эгасининг шахсини тасдиқловчи асосий ҳужжатдир.

4. Паспорт Ўзбекистон Республикаси мулкидир ва унинг эгаси Ўзбекистон Республикаси ҳимоясидадир.

5. 16 ёшга тўлган, Ўзбекистон Республикаси ҳудудида ва ундан ташқарида яшовчи Ўзбекистон Республикаси фуқаролари (кейинги ўринларда — фуқаролар) паспортга эга бўлишлари шарт.

6. Паспорт фуқароларга 10 йил муддатга берилади.

Ҳали 16 ёшга тўлмаган ва Ўзбекистон Республикасидан ташқарига чиқаётган шахсларга паспорт 5 йилдан ортиқ бўлмаган муддатга берилади.

Паспортнинг амал қилиш муддати тугагач, 16 ёшга тўлмаган шахс уни маълумотларни йиғиш пунктига топшириши шарт.

7. Фуқаро паспорт олиш учун доимий рўйхатда турадиган ёки консуллик рўйхатида турадиган жойидаги маълумотларни йиғиш пунктига паспортининг амал қилиш муддати тугагач бир ойдан кечикмасдан, биринчи марта паспорт олаётган шахс эса 16 ёшга тўлганидан кейин бир ойдан кечикмасдан мурожаат этади.

8. Паспорт бланки қатъий ҳисобга олинадиган ҳужжат ҳисобланади.

Паспорт бланкларини ишлаб чиқариш «Давлат белгиси» Давлат ишлаб чиқариш бирлашмасида, биометрик паспортларни персоналлаштириш ва йўқ қилиш — ДПМда, паспортларни эгаларига топшириш — маълумотларни йиғиш пунктларида амалга оширилади.

Паспортларни Ўзбекистон Республикаси ҳудудида етказиб бериш Ўзбекистон Республикаси Вазирлар Маҳкамаси томонидан белгиланган тартибда Ўзбекистон Алоқа ва ахборотлаштириш агентлиги Давлат фельдъегерлик хизмати (кейинги ўринларда — ДФХ) томонидан амалга оширилади.

Паспортларни хориждаги маълумотларни йиғиш пунктларига ва консуллик муассасаларидан Ўзбекистон Республикасига етказиб бериш белгиланган тартибда дипломатик почта воситаси орқали амалга оширилади.

9. Ўзбекистон Республикаси Қуролли Кучлари сафига муддатли ҳарбий хизматни ўташга чақирилган фуқароларнинг паспортлари мудофаа ишлари бўйича бўлимлар томонидан олиб қўйилади ва хизмат тугагунича сақланади. Муддатли ҳарбий хизмат тугагач мудофаа ишлари бўйича бўлимлар бир ой муддат ичида фуқароларга олиб қўйилган паспортларини қайтаришлари шарт.

Контракт асосида ҳарбий хизматга кирган, олий ҳарбий-таълим муассасаларига ўқишга кирган фуқароларнинг паспортлари ҳарбий қисмларнинг ва олий ҳарбий-таълим муассасаларининг кадрлар бўлимлари томонидан олиб қўйилиб, штабларда сақланади.

Ўзбекистон Республикасидан ташқарига чиқаётган ҳарбий хизматчиларнинг паспорти бўлмаса, шунингдек уларга паспорт бериш зарурати билан боғлиқ бошқа ҳолларда, паспортлар Ўзбекистон Республикаси мудофаа, ички ишлар, фавқулодда вазиятлар вазирликлари, Миллий хавфсизлик хизмати (кейинги ўринларда — вазирликлар ва идоралар)нинг ёзма илтимосномалари асосида ушбу Низомда белгиланган тартибда маълумотларни йиғиш пунктлари томонидан берилади.

Ҳарбий хизматчи хизмат тугаганидан кейин бир ой муддатдан кечикмай доимий рўйхатда турадиган жойидаги маълумотларни йиғиш пунктига паспортни расмийлаштириш учун мурожаат этиши шарт.

Ҳарбий хизматчиларнинг вазирликлар ва идораларнинг тегишли бўлинмаларида сақланаётган паспортлари амал қилиш муддати тугагандан кейин белгиланган тартибда йўқ қилиш учун маълумотларни йиғиш пунктига жўнатилади.

10. Талабнома ДПМга юборилганидан кейин паспорт Ўзбекистон Республикаси ҳудудида ўн иш куни мобайнида, хорижда — ўн беш иш куни мобайнида берилади.

Фуқаро паспортини йўқотиб қўйган тақдирда, йўқолгани ҳақида ариза берилган кундан сўнг бир ой мобайнида белгиланган тартибда янги паспорт берилади.

11. Паспорт белгиланган намуна бўйича тайёрланади ва ўзбек ҳамда инглиз тилларида, Қорақалпоғистон Республикаси учун эса — қорақалпоқ, ўзбек ва инглиз тилларида персоналлаштирилади.

12. Паспорт бланкасига қуйидаги асосий маълумотлар киритилади:

паспортни берган давлатнинг номи;

ҳужжатнинг номи;

ҳужжатнинг тури;

паспортни берган давлатнинг коди;

паспортнинг рақами;

фамилияси, исми, отасининг исми;

миллати;

фуқаролиги;

туғилган санаси;

туғилган жойи;

жинси;

берилган вақти;

ким томонидан берилгани;

персоналлаштирувчи идора;

амал қилиш муддати тугайдиган сана;

эгасининг рақамли сурати;

эгаси ҳақидаги машина ўқийдиган маълумотлар.

13. Чипга қуйидаги маълумотлар киритилади:

паспорт эгаси тўғрисидаги биографик маълумотлар;

эгасининг рақамли сурати;

қўл бармоқ излари.

14. Паспортдаги миллати ҳақидаги ёзув ота-онанинг миллатига мувофиқ ёзилади. Агар ота-оналар турли миллатга мансуб бўлишса, биринчи марта паспорт берилаётганда паспорт эгасининг хоҳишига қараб отасининг ёки онасининг миллати ёзилади. Кейинчалик, фуқаронинг ёзма аризасига кўра миллати ҳақидаги ёзув фақат бир марта отаси ёки онасининг миллатига ўзгартирилиши мумкин.

15. Паспортга:

ҳарбий мажбурият тўғрисидаги;

никоҳ қайд этилганлиги ёки бекор қилинганлиги тўғрисидаги;

паспорт эгасининг рўйхатдан ўтганлиги ва рўйхатдан чиққанлиги тўғрисидаги;

хорижга чиқиш учун рухсатнома ёзуви тўғрисидаги (стикер);

ҳамроҳлик қилаётган шахслар тўғрисидаги (16 ёшгача бўлган болалар учун);

Ўзбекистон Республикасининг Давлат чегарасидан ўтиш тўғрисидаги;

консуллик рўйхатига олингани ёки консуллик рўйхатидан чиқарилгани тўғрисидаги;

хорижий давлатларга кириш учун рухсатнома (виза) тўғрисидаги;

илгари қўйилган қайдларни бекор қилиш тўғрисидаги маълумотлар киритилади.

Паспортда эгасининг имзоси бўлиши лозим.

Фуқароларнинг розилигига кўра уларнинг паспортларига паспорт эгасининг қон гуруҳи ва қайси резусга мансублиги тўғрисидаги маълумотлар киритилади.

16. Паспортга:

ички ишлар идоралари бўлинмалари томонидан — паспорт эгасининг рўйхатдан ўтганлиги ва рўйхатдан чиққанлиги, хорижга чиқиш учун рухсатнома ёзувлари, ҳамроҳлик қилувчи шахслар (16 ёшгача бўлган болалар учун) ҳақидаги, илгари қўйилган қайдларни бекор қилиш ҳақидаги, шунингдек ҳарбий мажбурият ва паспорт алмаштирилган ҳолларда никоҳ қайд қилинганлиги ҳақидаги;

мудофаа ишлари бўйича бўлимлар томонидан — ҳарбий мажбурият тўғрисидаги;

чегара назорати бўлинмалари томонидан — Ўзбекистон Республикасининг Давлат чегарасидан ўтганлик ҳолати ҳақидаги ва илгари қўйилган қайдларни бекор қилиш ҳақидаги;

фуқаролик ҳолатлари далолатномаларини ёзиш идоралари томонидан — никоҳни қайд этиш ва бекор қилиш ҳақидаги;

соғлиқни сақлаш муассасалари томонидан — қон гуруҳи ва қайси резусга мансублиги ҳақидаги;

Ўзбекистон Республикасининг консуллик муассасалари томонидан — консуллик рўйхатига олиш ёки консуллик рўйхатидан чиқариш ҳақидаги, хорижга чиқиш учун рухсатнома ёзуви ҳақидаги, ҳамроҳлик қилувчи шахслар ҳақидаги (16 ёшга тўлмаган болалар учун), никоҳни қайд этиш ва бекор қилиш ҳақидаги, илгари қўйилган қайдларни бекор қилиш ҳақидаги;

хорижий давлатларнинг дипломатик ваколатхоналари ва консуллик муассасалари томонидан — хорижий давлатларга кириш рухсатномалари (визалар) ҳақидаги қайдлар киритилади.

Паспортга ушбу Низомда кўзда тутилмаган ёзувлар ва қайдларни киритиш тақиқланади.

17. Қуйидаги ҳолларда паспорт расмийлаштирилади ва берилади:

шахс 16 ёшга тўлганда;

16 ёшга тўлмаган шахс Ўзбекистон Республикасидан ташқарига чиқаётганида;

фарзанд хорижда туғилганида;

Ўзбекистон Республикаси фуқаролиги олинганида;

паспортнинг амал қилиш муддати тугаганида;

фамилияси, исми, отасининг исми, миллати, туғилган санаси ўзгарганида;

ёзувларда ноаниқликлар ва хатолар мавжудлиги аниқланганида;

рўйхатга олиш (рўйхатдан чиқариш), алоҳида маълумотлар ёки визалар учун мўлжалланган бетлар ишлатилиб бўлинганида;

паспорт бланкаси яроқсиз ҳолга келганида;

паспорт йўқотиб қўйилганида.

Паспорт эгасининг фамилияси, исми, отасининг исми, миллати, туғилган санаси ўзгарганлиги ёки ёзувларда ноаниқликлар мавжудлиги аниқланганлиги муносабати билан алмаштирилаётганида, фуқаро маълумотларни йиғиш пунктига ушбу ҳолатларни тасдиқловчи ҳужжатларни тақдим этади.

Агар фуқаро Ўзбекистон Республикасидан ташқарига чиқаётганида паспортнинг амал қилиш муддати бир йилдан камроқ вақтни ташкил этса, ушбу ҳужжат алмаштирилиши мумкин.

Алоҳида ҳолатларда — агар шахс республика ҳудудидан ташқарига чиқаётган вақтда унинг ёши 15 дан ошган бўлса, Ўзбекистон Республикаси фуқароси паспорти 16 ёшга тўлмаган шахсга берилиши мумкин.

18. Ўзбекистон Республикаси ҳудудида доимий яшовчи фуқаро паспорт олиши учун доимий рўйхатда турадиган жойидаги маълумотларни йиғиш пунктига қуйидагиларни тақдим этади:

белгиланган шаклдаги ариза;

илгари берилган паспорт;

туғилганлик ҳақида гувоҳнома (биринчи марта расмийлаштирилаётганда);

35 x 45 мм ўлчамдаги фотосурат;

давлат божи тўланганлиги ҳақида квитанция.

19. Ҳақиқий ҳарбий хизматни ўтаб, Ўзбекистон Республикаси Қуролли Кучлари резервига бўшатилган ва паспорти бўлмаган ҳарбий хизматчиларга паспорт контракт асосида хизмат қилган ҳарбий хизматчининг шахсини тасдиқловчи гувоҳнома ёки Ўзбекистон Республикаси Қуролли Кучлари офицерининг шахсини тасдиқловчи гувоҳнома асосида улар доимий рўйхатда турадиган маълумотларни йиғиш пункти томонидан берилади.

Ўзбекистон Республикаси Қуролли Кучларининг ҳақиқий ҳарбий хизматни ўтаётган ҳарбий хизматчиларига паспортлар ҳарбий қисм жойлашган жойдаги маълумотларни йиғиш пункти томонидан тегишли вазирликлар ва идоралар раҳбарларининг илтимосномалари асосида берилади.

20. Ўзбекистон Республикасининг хориждаги консуллик муассасаларида доимий ва вақтинча консуллик рўйхатига олинган фуқаролар ушбу Низомнинг 17-бандида кўрсатилган ҳолларда паспортни расмийлаштириш учун маълумотларни йиғиш пунктига қуйидаги ҳужжатларни тақдим этадилар:

белгиланган шаклдаги ариза;

илгари берилган паспорт;

туғилганлик ҳақидаги гувоҳнома (биринчи марта паспорт расмийлаштирилаётганда);

35 x 45 мм ўлчамдаги фотосурат:

паспортни йўқотиб қўйганлиги ҳақидаги маълумотнома (паспортни йўқотиб қўйганда);

консуллик йиғими ва бошқа йиғимлар тўланганлиги ҳақида квитанция.

21. Маълумотларни йиғиш пункти тақдим этилган ҳужжатлар асосида аризачининг биографик маълумотларини, электрон кўринишдаги қўл бармоқ изларини йиғади, шахсни олд томондан рақамли форматда суратга олади ва паспортни расмийлаштириш учун талабнома тузиб, сўнг ДПМ га жўнатади.

22. Агар фуқаро қўл бармоқ излари олинишидан бош тортса ва кўзойнакда ёки бош кийимда суратга тушиш истагидан қайтмаса, маълумотларни йиғиш пункти унга паспорт расмийлаштиришни рад этиш ҳуқуқига эга.

23. Маълумотларни йиғиш пункти фуқарога янги паспорт бериш чоғида илгари берилган паспортни олиб қўяди ва уни йўқ қилиш учун ДПМга жўнатади.

24. ДПМ Ўзбекистон Республикаси фуқаросининг тайёр бўлган паспортини ДФХ орқали паспорт расмийлаштириш учун талабнома жўнатган маълумотларни йиғиш пунктига ёки дипломатик каналлар орқали маълумотларни йиғиш пунктларига етказиб бериш учун Ўзбекистон Республикаси Ташқи ишлар вазирлигига топширади. Маълумотларни йиғиш пунктлари эса паспортларни эгаларига беришни таъминлашлари керак.

25. Ўзбекистон Республикасининг хориждаги консуллик муассасаларида доимий консуллик рўйхатига олинган ва вақтинча Ўзбекистон Республикасида бўладиган фуқаролар ушбу Низомнинг 17-бандида кўрсатилган ҳолларда паспорт олиш ва алмаштириш учун ушбу Низомнинг 20-бандида кўрсатилган ҳужжатлар билан Ўзбекистон Республикаси Ташқи ишлар вазирлигига мурожаат этадилар.

26. Хорижга доимий яшаш учун белгиланган тартибда чиққан, аммо Ўзбекистон Республикасининг консуллик муассасасида консуллик рўйхатида турмаган ва Ўзбекистон Республикасида бўлган пайтида паспортини йўқотиб қўйган фуқаролар сўнгги доимий рўйхатда турган жойларидаги маълумотларни йиғиш пунктига мурожаат этадилар.

Агар аризачининг турар жойи бўлса, ички ишлар идоралари уни вақтинча рўйхатдан ўтказади ва манфаатдор вазирликлар ҳамда идоралар билан бирга унга паспорт расмийлаштиради.

Агар аризачини вақтинча рўйхатдан ўтказиш учун унинг турар жойи бўлмаса, ички ишлар идоралари Ўзбекистон Республикаси Ташқи ишлар вазирлиги билан келишган ҳолда унга истисно тариқасида паспорт расмийлаштиради.

27. Агар фуқаро келган мамлакатда Ўзбекистон Республикасининг консуллик муассасаси бўлмаса, у Ўзбекистон Республикасининг мазкур мамлакат консуллик округига кирадиган хориждаги консуллик муассасасига мурожаат этади.

28. Фуқаро паспортини эҳтиёт қилиб сақлаши шарт.

Паспортини йўқотиб қўйган фуқаро зудлик билан доимий рўйхатда турадиган жойидаги маълумотларни йиғиш пунктига хабар бериши лозим. Мазкур маълумотларни йиғиш пункти қонун ҳужжатларида кўзда тутилган амалларни бажарганидан кейин унга ушбу Низомда назарда тутилган тартибда янги паспорт беради.

Вақтинча хорижда бўлган фуқаролар паспортларини йўқотиб қўйсалар, паспорт яроқсиз ҳолга келса ёки унинг амал қилиш муддати тугаса, Ўзбекистон Республикасига қайтиш гувоҳномасини олиш учун Ўзбекистон Республикасининг консуллик ваколатхонасига мурожаат этадилар, ушбу Низомнинг 20-бандида кўрсатилган шахслар бундан мустасно.

29. Топиб олинган паспорт ички ишлар идорасига ёки Ўзбекистон Республикасининг хориждаги консуллик муассасасига топширилиши лозим.

30. Вафот этган шахснинг паспорти фуқаролик ҳолатлари далолатномаларини ёзиш идорасига топширилади. Ушбу идора ҳужжатни йўқ қилиш мақсадида ДПМга топшириш учун маълумотларни йиғиш пунктига жўнатади.

Хорижда вафот этган фуқаронинг паспорти Ўзбекистон Республикасининг консуллик муассасаси томонидан Ўзбекистон Республикаси Ташқи ишлар вазирлигига жўнатилади. Ушбу вазирлик эса ҳужжатни йўқ қилиш учун ДПМга юборади.

31. Ҳибсга олинган ёки озодликдан маҳрум этишга ёхуд қамоққа ҳукм қилинган шахснинг паспорти суриштирув, тергов идоралари ёки суд томонидан олиб қўйилади. Агар шахс суднинг ҳукми билан қамоқда қолдирилса, унинг паспорти Ўзбекистон Республикаси Ички ишлар вазирлиги Жазони ижро этиш бош бошқармасига жўнатилади.

Шахс қамоқдан озод этилганида ёки жазо муддатини ўтаб бўлгач, унга паспорти тергов, суд идоралари ёки жазони ижро этиш муассасаси маъмурияти томонидан қайтарилади.

Ҳибсга олинган ёки озодликдан маҳрум этишга ҳукм қилинган шахсларнинг тергов, суд идораларида ёки жазони ижро этиш муассасаси маъмуриятида сақланаётган муддати ўтган паспортлари ушбу Низомда белгиланган тартибда йўқ қилиш учун маълумотларни йиғиш пунктига жўнатилади.

32. Текшириш, верификация (солиштириб ўқиш) жараёнида ноаниқликлар ёки чегара (миграция) белгилари, хорижий визалар, рухсатнома ёзувлари қалбакилаштирилгани аломатлари аниқланган, шунингдек белгиланган тартибда ҳақиқий эмас деб топилган паспортлар тегишли вазирликлар ва идораларга жўнатиш учун чегара назорати бўлинмалари томонидан олиб қўйилиши мумкин.

33. Ушбу Низомнинг 9, 18, 20, 23, 30, 31 ва 32-бандларида кўзда тутилган ҳоллардан ташқари, фуқаролардан паспортларини олиб қўйиш тақиқланади.

Мажбуриятни бажариш мақсадида паспортни гаров сифатида қабул қилиш ва топшириш тақиқланади.

34. Ушбу Низом талабларини амалга ошириш учун зарур бўлган штамплар ва бланкалар намуналари тегишли равишда Ўзбекистон Республикаси Ички ишлар, Ташқи ишлар, Соғлиқни сақлаш, Адлия, Мудофаа вазирликлари ва Миллий хавфсизлик хизмати томонидан тасдиқланади.

35. Паспорт бериш учун Ўзбекистон Республикаси Вазирлар Маҳкамаси томонидан белгиланган миқдорда давлат божи ундирилади. Тўлиқ давлат таъминотида бўлган шахслар давлат божи тўлашдан озод этиладилар.

36. Фуқаролар доимий ёки вақтинча яшаш жойида рўйхатдан ўтишлари шарт.

37. Вақтинча рўйхатдан ўтказиш шахснинг муайян яшаш жойида бўлиш муддатида амалга оширилади.

38. Ўзбекистон Республикаси ҳудуди доирасида бошқа жойга олти ойдан ортиқ муддатга борадиган фуқаролар аввалги яшаш жойидан рўйхатдан чиқишлари шарт, хизмат сафарига, таътилга, ўқишга ва даволанишга борадиган фуқаролар бундан мустасно.

39. Фуқарони рўйхатдан ўтказиш ва рўйхатдан чиқариш ички ишлар идораси томонидан амалга оширилади. Ушбу ички ишлар идораси кетиш ва келиш варақаларини ўз вақтида ҳудудий манзил-маълумотнома бюросига юбориши шарт. Меҳмонхоналар, даволаш муассасалари, санаторийлар ва дам олиш уйларининг масъул ходимлари бу ерларга жойлашган, рўйхатдан ўтиши лозим бўлган шахслар бўйича анкета-аризаларни ҳисобга олиш учун бир сутка ичида ушбу муассасалар жойлашган ҳудуддаги манзил-маълумотнома бюросига жўнатишлари шарт.

Ички ишлар идоралари ҳар ойда камида бир марта ҳудудий статистика идораларига фуқароларнинг рўйхатдан ўтиши — рўйхатдан чиқиши ҳақида маълумотнома жўнатади.

40. Фуқаро яшаши мўлжалланаётган жойга доимий рўйхатдан ўтиши учун қуйидагиларни тақдим этади:

белгиланган шаклдаги ариза;

Ўзбекистон Республикаси фуқаросининг паспорти;

туғилганлик ҳақида гувоҳнома (16 ёшга тўлмаган, ота-онасидан, васийларидан ёки ҳомийларидан алоҳида яшайдиган шахслар учун);

контракт асосидаги ҳарбий хизматчининг шахсини тасдиқловчи гувоҳнома ёки Ўзбекистон Республикаси Қуролли Кучлари офицерининг шахсини тасдиқловчи гувоҳнома (казармадан, кемадан ташқарида яшовчи ҳарбий хизматчилар учун);

турар жой ҳужжатлари;

давлат божи тўланганлиги ҳақида квитанция.

Ҳали 16 ёшга тўлмаган ва ота-оналари (васийлари, ҳомийлари) билан бирга яшайдиган болаларни рўйхатдан ўтказиш туғилганлик тўғрисидаги гувоҳнома бўйича улар ҳақидаги маълумотларни уй дафтарларига (рўйхатдан ўтказиш карточкаларига) киритиш орқали амалга оширилади.

Чегара зонасида жойлашган аҳоли пунктларида рўйхатдан ўтказиш қонун ҳужжатларида белгиланган тартибда амалга оширилади.

41. Фуқаролар янги яшаш жойига келгандан сўнг уч иш куни мобайнида ҳужжатларини рўйхатдан ўтиш учун келган жойларидаги ички ишлар идораларининг бўлинмаларига топширишлари шарт.

Рўйхатдан чиқиш ҳужжатлари доимий яшаш жойларидаги ички ишлар идораларининг бўлинмалари томонидан расмийлаштирилади.

42. Қуйидаги Ўзбекистон Республикаси фуқаролари, шунингдек белгиланган тартибда Ўзбекистон Республикаси ҳудудида истиқомат учун берилган гувоҳномага эга бўлган чет эл фуқаролари ва фуқаролиги бўлмаган шахслар, яшаш жойи майдони қанчалигидан қатъи назар, доимий рўйхатдан ўтиш ҳуқуқига эга:

турар жой мулкдори;

ота-оналар — фарзандларининг яшаш жойига;

хотин (эр) — эри (хотини)нинг яшаш жойига;

вояга етмаган фарзандлар ва васийликка олинганлар — ота-оналарининг ва васийларининг яшаш жойларига;

ўз оилаларига эга бўлмаган ёки вояга етмаган фарзандлари бўлган, аммо никоҳдан ўтмаган вояга етган фарзандлар — ота-оналарининг яшаш жойларига;

вояга етмаган ва ота-онаси бўлмаган туғишган ака-укалар ва опа-сингиллар, шунингдек ёшидан қатъи назар, меҳнатга лаёқатсиз туғишган ака-укалар ва опа-сингиллар, агар улар ўз оилаларига эга бўлмасалар — акаси ва опасининг (укаси ва синглисининг) яшаш жойига;

илгари мазкур аҳоли пунктида яшаган, меҳнат шартномаси бўйича ишлаш учун вақтинча бошқа жойга кетган шахслар, шунингдек амалдаги қонун ҳужжатларига кўра вақтинча бошқа жойга кетганда турар жойдан фойдаланиш ҳуқуқи сақланиб қоладиган фуқаролар — илгариги турар жойларига ёки қариндошлариникига;

жазони ижро этиш жойларидан озодликка чиққан шахслар — илгариги турар жойларига, оила аъзолариникига, қариндошлариникига ёки ҳукм этилгунларигача яшаган шахсларникига;

Мудофаа, Ички ишлар, Фавқулодда вазиятлар вазирликлари, Миллий хавфсизлик хизмати, Ўзбекистон Алоқа ва ахборотлаштириш агентлигининг контракт асосидаги ҳарбий хизматчилари (ва уларнинг оила аъзолари), шу жумладан резервга ёки истеъфога бўшатилганлар — қариндошлариникига ёки бошқа шахсларникига, яшаш жойи олгунича (сотиб олгунича) бўлган даврга.

43. Рўйхатдан ўтказиш ва рўйхатдан чиқариш учун Ўзбекистон Республикаси Вазирлар Маҳкамаси томонидан белгиланган миқдорда давлат божи ундирилади.

44. Ўзбекистон Республикасининг қонун ҳужжатларига кўра айрим минтақаларда рўйхатдан ўтказишнинг бошқача тартиби жорий этилиши, шунингдек баъзи жойларда аҳолининг соғлиғини ва хавфсизлигини муҳофаза қилиш мақсадида фуқароларнинг келишига чекловлар ўрнатилиши мумкин.

Чекловлар амалда бўлган жойларда рўйхатдан ўтишларига рухсат этилмаган шахслар шу жойларда жойлашган ташкилотларга ишга қабул қилинишлари мумкин эмас ва етти кун ичида ушбу жойни тарк этишлари лозим. Улар чиқиб кетишдан бўйин товласалар, ички ишлар идоралари томонидан қонун ҳужжатларида белгиланган тартибда чиқариб юбориладилар.

45. Турар жой мулкдори яшаш жойи майдонидан қатъи назар, ўз оила аъзоларини ва бошқа яқин қариндошларини рўйхатдан ўтказиш ҳуқуқига эга.

Турар жой мулкдори қонун талабларига риоя этилган тақдирда Ўзбекистон Республикасининг бошқа фуқароларини, шунингдек белгиланган тартибда Ўзбекистон Республикаси ҳудудида истиқомат учун берилган гувоҳномага эга бўлган чет эл фуқароларини ва фуқаролиги бўлмаган шахсларни рўйхатдан ўтказиш ҳуқуқига эга.

46. Бир нечта уйга ёки хонадонга эга бўлган мулкдор улардан фақат биттасигагина доимий рўйхатдан ўтиши мумкин.

47. Суднинг эгаллаб турган турар жойидан кўчириб юбориш ёки ушбу турар жойдан фойдаланиш ҳуқуқи бекор бўлган деб топиш тўғрисидаги кучга кирган қарорига биноан рўйхатдан ўтиш бекор қилиниши лозим.

Рўйхатдан ўтиш қонунда кўзда тутилган бошқа ҳолларда ҳам суд қарорига кўра бекор қилиниши мумкин.

48. Озодликдан маҳрум этишга ҳукм қилинган шахсларни рўйхатдан чиқариш ушбу шахсларга нисбатан ҳукмлар қонуний кучга кирганидан сўнг амалга оширилади.

49. Вафот этганлар ўлим қайд этилганидан кейин рўйхатдан чиқарилиши лозим.

Ўлим тўғрисидаги гувоҳнома шакли Ўзбекистон Республикаси Адлия вазирлиги томонидан белгиланади.

50. Фуқароларни рўйхатдан ўтказиш ва рўйхатдан чиқаришга тааллуқли рўйхатдан ўтказиш (рўйхатдан чиқариш) ҳақидаги аризалар, уй дафтарлари (рўйхатдан ўтказиш карточкалари), манзил варақалари ва бошқа ҳужжатларнинг шакллари Ўзбекистон Республикаси Ички ишлар вазирлиги томонидан белгиланади.

51. Белгиланган тартибда хорижга доимий яшаш учун чиқиб кетган, шунингдек вақтинча хорижда бўладиган фуқаролар Ўзбекистон Республикасининг хориждаги консуллик муассасаларида доимий ёки вақтинча консуллик рўйхатига олинадилар.

52. Хорижга доимий яшаш учун чиққан ва хорижга доимий яшаш учун чиқишларини белгиланган тартибда расмийлаштирган фуқаролар доимий консуллик рўйхатига олинадилар.

53. Хорижга хизмат сафарига, ўқиш, даволаниш ва шартнома бўйича ишлашга чиққан ва хорижга вақтинча чиқишларини белгиланган тартибда расмийлаштирган фуқаролар вақтинча консуллик рўйхатига олинадилар.

Фуқаро ўзи бораётган мамлакатга қонуний тарзда ва олти ойдан ортиқ муддатга келган тақдирда, у вақтинча консуллик рўйхатига олинади.

54. Агар фуқаролар доимий яшаш, иш, ўқиш ёки хизмат сафари жойи ўзгариши муносабати билан олти ойдан ортиқ муддатга Ўзбекистон Республикасининг бошқа консуллик муассасасининг консуллик округи ҳудудига кўчиб ўтишса, илгари турган жойларидаги консуллик рўйхатидан (доимий, вақтинча) чиқишлари ва янги келган жойларида консуллик рўйхатига олинишлари лозим.

55. Консуллик рўйхатига олиш учун Ўзбекистон Республикаси Вазирлар Маҳкамаси томонидан белгиланган миқдорда йиғим ундирилади.

56. Фуқароларнинг консуллик рўйхатига олиш ва консуллик рўйхатидан чиқариш тўғрисидаги аризаларининг, уларни консуллик рўйхатига олиш ва консуллик рўйхатидан чиқаришга тааллуқли қайд қилиш китоблари ва бошқа ҳужжатларнинг шакллари Ўзбекистон Республикаси Ташқи ишлар вазирлиги томонидан белгиланади.

57. Қонун ҳужжатларида қуйидагилар учун жавобгарлик белгиланади:

паспортга эга бўлиши шарт бўлган фуқаронинг паспортсиз ёки ҳақиқий бўлмаган паспорт билан, вақтинча ёки доимий рўйхатдан ўтмай яшаши, паспортни атайлаб яроқсиз ҳолга келтирганлиги, шунингдек паспортни эҳтиёт қилиб сақламаганлиги оқибатида йўқотиб қўйганлиги;

фуқаролар ўз паспортларидан ғаразли мақсадлари йўлида фойдаланганлиги, сўнг уларни йўқотиб қўйганлиги тўғрисида ариза берганлиги, шунингдек бошқа фуқароларга тегишли паспортлардан фойдаланганлиги;

паспорт тизими қоидаларига риоя этилиши учун масъул бўлган шахслар томонидан фуқароларнинг паспортсиз ёки ҳақиқий бўлмаган паспорт билан ёхуд вақтинча ёки доимий рўйхатдан ўтмай яшашига йўл қўйганлиги, шунинг баробарида фуқароларнинг ўзлари эгаллаб турган турар жойларда паспортсиз, вақтинча ёки доимий рўйхатдан ўтмаган шахсларнинг яшашига йўл қўйганлиги;

паспортсиз ёки паспорти ҳақиқий бўлмаган фуқароларни, шунинг баробарида вақтинча ёки доимий рўйхатдан ўтмаган фуқароларни ишга қабул қилиш, шунингдек фуқароларнинг паспортларини ноқонуний олиб қўйиш ёки паспортларни гаров сифатида қабул қилиш;

чегара зонасига кириш ёки бу зонада яшаш, шунингдек фуқароларнинг кириши ва бўлиши вақтинча чекланган жойларга кириш ва бу жойларда бўлиш қоидаларини бузиш;

ғаразли ёки бошқа тубан мақсадларда паспортни эгаллаб олиш, худди шунингдек уни йўқ қилиш, яроқсиз ҳолга келтириш, яшириш.

1. Фуқаролиги бўлмаган шахсларнинг биометрик ҳаракатланиш ҳужжати тўғрисидаги Низом (кейинги ўринларда — Низом) фуқаролиги бўлмаган шахсларнинг хорижга чиқиши учун биометрик ҳаракатланиш ҳужжатини расмийлаштириш, бериш, алмаштириш тартибини белгилаб беради.

2. Ушбу Низомда қуйидаги асосий тушунчалардан фойдаланилади:

фуқаролиги бўлмаган шахснинг биометрик ҳаракатланиш ҳужжати (кейинги ўринларда — ҳаракатланиш ҳужжати) — Ўзбекистон Республикасида доимий яшовчи фуқаролиги бўлмаган шахснинг хорижда шахсини тасдиқловчи, ҳаракатланиш ҳужжати эгасининг шахсий биографик маълумотлари ва биометрик параметрлари киритилган электрон ташувчи қурилма (чип)га эга бўлган ҳужжат;

персоналлаштириш — ҳаракатланиш ҳужжати бланкасига унинг эгаси тўғрисидаги биографик маълумотлар ва биометрик параметрларни киритиш;

верификация — ҳаракатланиш ҳужжатига киритилган биометрик параметрларнинг ҳаракатланиш ҳужжати эгасининг биометрик параметрлари билан мослигини машина ёрдамида текшириш;

консуллик муассасаси — Ўзбекистон Республикаси дипломатик ваколатхонасининг консуллик бўлими, Ўзбекистон Республикасининг хорижий давлатда таъсис этиладиган бош консулхонаси, консулхонаси, вице-консулхонаси ва консуллик агентлиги;

консуллик рўйхати — тегишли консуллик округи ҳудудига келган фуқаролиги бўлмаган шахсни хориждаги Ўзбекистон Республикасининг консуллик муассасалари қошида белгиланган тартибда қайддан ўтказиш;

доимий консуллик рўйхати — доимий яшаш учун хорижга чиқиш рухсатномасини белгиланган тартибда расмийлаштирган, Ўзбекистон Республикасининг хориждаги консуллик муассасаси консуллик округи ҳудудида доимий яшаётган фуқаролиги бўлмаган шахсни қайддан ўтказиш;

вақтинча консуллик рўйхати — хорижга вақтинча чиқиш рухсатномасини белгиланган тартибда расмийлаштирган, Ўзбекистон Республикасида доимий яшовчи фуқаролиги бўлмаган шахсларни Ўзбекистон Республикасининг хориждаги консуллик муассасалари томонидан қайддан ўтказиш;

консуллик округи — консуллик муассасасига консуллик вазифаларини бажариш учун бириктирилган бир ёки бир неча давлат ҳудуди;

маълумотларни йиғиш пункти — паспорт олиш учун мурожаат қилган фуқароларнинг биографик маълумотларини ва биометрик параметрларини жамлаш, ушбу маълумотларни Ўзбекистон Республикаси Вазирлар Маҳкамаси ҳузуридаги Давлат персоналлаштириш марказига (кейинги ўринларда — ДПМ) топшириш ҳамда фуқароларга биометрик параметрларга эга паспортлар бериш бўйича вазифаларни бажарувчи ички ишлар идораларининг хорижга чиқиш-келиш ва фуқароликни расмийлаштириш хизматлари, Ўзбекистон Республикаси Ташқи ишлар вазирлигининг консуллик бошқармаси, Ўзбекистон Республикасининг хориждаги консуллик муассасалари;

ҳаракатланиш ҳужжати олиш учун талабнома — ҳаракатланиш ҳужжати олувчи ҳақида маълумотларни йиғиш пункти томонидан шакллантирилган биографик маълумотлар ва биометрик параметрларни ўз ичига олган электрон ҳужжат (кейинги ўринларда — талабнома).

3. Фуқаролиги бўлмаган шахсларга ҳаракатланиш ҳужжати беш йил муддатга берилади.

16 ёшга тўлмаган шахсларга ҳаракатланиш ҳужжати Ўзбекистон Республикаси Вазирлар Маҳкамаси томонидан белгиланган тартибда беш йилдан ортиқ бўлмаган муддатга берилади.

Ҳаракатланиш ҳужжатининг амал қилиш муддати тугагач, шахс уни маълумотларни йиғиш пунктига топшириши шарт.

4. Ҳаракатланиш ҳужжати бланки қатъий ҳисобга олинадиган ҳужжат ҳисобланади.

Ҳаракатланиш ҳужжати бланкларини ишлаб чиқариш «Давлат белгиси» Давлат ишлаб чиқариш бирлашмасида, ҳаракатланиш ҳужжатини персоналлаштириш ва йўқ қилиш — ДПМда, ҳаракатланиш ҳужжатини эгаларига бериш — маълумотларни йиғиш пунктларида амалга оширилади.

Ҳаракатланиш ҳужжатларини Ўзбекистон Республикаси ҳудудидаги маълумотларни йиғиш пунктларига етказиб бериш Ўзбекистон Республикаси Вазирлар Маҳкамаси томонидан белгиланган тартибда Ўзбекистон Алоқа ва ахборотлаштириш агентлиги Давлат фельдъегерлик хизмати (кейинги ўринларда — ДФХ) томонидан амалга оширилади.

Ҳаракатланиш ҳужжатларини хориждаги маълумотларни йиғиш пунктларига ва консуллик муассасаларидан Ўзбекистон Республикасига етказиб бериш белгиланган тартибда дипломатик почта воситаси орқали амалга оширилади.

5. Ўзбекистон Республикаси ҳудудида ҳаракатланиш ҳужжати талабнома ДПМга жўнатилганидан кейин маълумотларни йиғиш пунктида ўн иш куни мобайнида, хорижда — ўн беш иш куни мобайнида берилади.

6. Ҳаракатланиш ҳужжати белгиланган намуна бўйича тайёрланади ва ўзбек ҳамда инглиз тилларида, Қорақалпоғистон Республикаси учун эса қорақалпоқ, ўзбек ва инглиз тилларида персоналлаштирилади.

7. Ҳаракатланиш ҳужжати бланкасига қуйидаги асосий маълумотлар киритилади:

ҳаракатланиш ҳужжатини берган давлатнинг номи;

ҳужжатнинг номи;

ҳужжатнинг тури;

ҳаракатланиш ҳужжатини берган давлатнинг коди;

ҳаракатланиш ҳужжатининг рақами;

фамилияси, исми, отасининг исми;

миллати;

фуқаролиги;

туғилган санаси;

туғилган жойи;

жинси;

берилган санаси;

ким томонидан берилгани;

персоналлаштирувчи идора;

амал қилиш муддати тугайдиган сана;

эгасининг рақамли сурати;

эгаси ҳақидаги машина ўқийдиган маълумотлар.

8. Чипга қуйидаги маълумотлар киритилади:

ҳаракатланиш ҳужжатининг эгаси тўғрисидаги биографик маълумотлар;

эгасининг рақамли сурати;

қўл бармоқ излари.

9. Ҳаракатланиш ҳужжатига:

хорижга чиқиш учун рухсатнома ёзуви тўғрисидаги (стикер);

ҳамроҳлик қилаётган шахслар тўғрисидаги (16 ёшгача бўлган болалар учун);

Ўзбекистон Республикасининг Давлат чегарасидан ўтиш тўғрисидаги;

консуллик рўйхатига олингани ёки консуллик рўйхатидан чиқарилгани тўғрисидаги;

хорижий давлатларга кириш учун рухсатнома (виза) тўғрисидаги;

вақтинча қайд тўғрисидаги;

илгари қўйилган қайдларни бекор қилиш тўғрисидаги маълумотлар киритилади.

Фуқаролиги бўлмаган шахсларнинг розилигига кўра уларнинг ҳаракатланиш ҳужжатларига ҳужжат эгасининг қон гуруҳи ва қайси резусга мансублиги тўғрисидаги қайдлар киритилади.

10. Ҳаракатланиш ҳужжатига:

ички ишлар идоралари бўлинмалари томонидан — хорижга чиқиш учун рухсатнома ёзувлари, ҳамроҳлик қилувчи шахслар (16 ёшгача бўлган болалар учун) ҳақидаги, вақтинча рўйхатдан ўтганлик ҳақидаги, илгари қўйилган қайдларни бекор қилиш ҳақидаги;

чегара назорати бўлинмалари томонидан — Ўзбекистон Республикасининг Давлат чегарасидан ўтганлик ҳолати ҳақидаги ва илгари қўйилган қайдларни бекор қилиш ҳақидаги;

соғлиқни сақлаш муассасалари томонидан — қон гуруҳи ва қайси резусга мансублиги ҳақидаги;

Ўзбекистон Республикасининг консуллик муассасалари томонидан — консуллик рўйхатига олиш ёки консуллик рўйхатидан чиқариш ҳақидаги, хорижга чиқиш учун рухсатнома ёзувчи ҳақидаги, ҳамроҳлик қилувчи шахслар ҳақидаги (16 ёшга тўлмаган болалар учун), илгари қўйилган қайдларни бекор қилиш ҳақидаги;

хорижий давлатларнинг дипломатик ваколатхоналари ва консуллик муассасалари томонидан — хорижий давлатларга кириш рухсатномалари (визалар) ҳақидаги қайдлар киритилади.

Ҳаракатланиш ҳужжатига ушбу Низомда назарда тутилмаган ёзув ва қайдларни киритиш тақиқланади.

11. Ҳаракатланиш ҳужжати қуйидаги ҳолларда расмийлаштирилади ва берилади:

фуқаролиги бўлмаган шахс хорижга чиқаётганда;

фуқаролиги бўлмаган шахслар учун Ўзбекистон Республикаси ҳаракатланиш ҳужжатлари билан ҳужжатлаштирилган шахсларнинг фарзанди Ўзбекистон Республикасидан ташқарида туғилганида;

амал қилиш муддати тугаганида;

шахснинг фамилияси, исми, отасининг исми, миллати, туғилган санаси ўзгарганида;

ёзувларда ноаниқликлар ва хатолар мавжудлиги аниқланганда;

алоҳида маълумотлар ёки визалар учун мўлжалланган бетлари ишлатилиб бўлинганида;

ҳаракатланиш ҳужжати бланкаси яроқсиз ҳолга келганида;

ҳаракатланиш ҳужжати йўқотиб қўйилганида.

Ҳаракатланиш ҳужжати эгасининг фамилияси, исми, отасининг исми, миллати, туғилган санаси ўзгарганлиги ёки ёзувларда ноаниқликлар мавжудлиги аниқланганлиги муносабати билан алмаштирилаётганда, фуқаролиги бўлмаган шахс маълумотларни йиғиш пунктига ушбу ҳолатларни тасдиқловчи ҳужжатларни тақдим этади.

Агар фуқаролиги бўлмаган шахс Ўзбекистон Республикасидан ташқарига чиқаётганида ҳаракатланиш ҳужжатининг амал қилиш муддати бир йилдан камроқ вақтни ташкил этса, ушбу ҳужжат алмаштирилиши мумкин.

12. Ўзбекистон Республикаси ҳудудида доимий яшовчи фуқаролиги бўлмаган шахс ҳаракатланиш ҳужжатини олиш ва алмаштириш учун ўзи доимий рўйхатда турадиган жойдаги маълумотларни йиғиш пунктига қуйидагиларни тақдим этади:

белгиланган шаклдаги ариза;

илгари берилган ҳаракатланиш ҳужжати;

фуқаролиги бўлмаган шахснинг Ўзбекистон Республикасида истиқомат учун берилган гувоҳномаси;

туғилганлик ҳақида гувоҳнома (16 ёшга тўлмаган шахслар учун);

35 x 45 мм ўлчамдаги 3 та фотосурат;

давлат божи тўланганлиги ҳақида квитанция.

13. Ўзбекистон Республикасининг хориждаги консуллик муассасаларида доимий ва вақтинча консуллик рўйхатига олинган фуқаролиги бўлмаган шахслар ушбу Низомнинг 11-бандида кўрсатилган ҳолларда ҳаракатланиш ҳужжатини олиш учун маълумотларни йиғиш пунктига қуйидаги ҳужжатларни тақдим этадилар:

белгиланган шаклдаги ариза;

илгари берилган ҳаракатланиш ҳужжати;

туғилганлик ҳақида гувоҳнома (биринчи марта ҳаракатланиш ҳужжатини олиш пайтида);

35 x 45 мм ўлчамдаги 3 та фотосурат;

ҳаракатланиш ҳужжати йўқотиб қўйилганлиги тўғрисида маълумотнома (у йўқотиб қўйилган ҳолда);

консуллик йиғими ва бошқа йиғимлар тўланганлиги тўғрисида квитанция.

14. Маълумотларни йиғиш пункти тақдим этилган ҳужжатлар асосида аризачининг биографик маълумотларини, электрон кўринишдаги қўл бармоқ изларини йиғади, шахсни олд томонидан рақамли форматда суратга олади ва ҳаракатланиш ҳужжатини расмийлаштириш учун талабнома тузиб, сўнг ДПМга жўнатади.

15. Агар фуқаролиги бўлмаган шахс қўл бармоқ излари олинишидан бош тортса ва кўзойнакда ёки бош кийимда суратга тушиш истагидан қайтмаса, маълумотларни йиғиш пункти унга ҳаракатланиш ҳужжати расмийлаштиришни рад этиш ҳуқуқига эга.

16. Маълумотларни йиғиш пункти фуқаролиги бўлмаган шахсга янги ҳаракатланиш ҳужжати бериш чоғида илгари берилган ҳужжатни олиб қўяди ва уни йўқ қилиш учун ДПМга жўнатади.

17. ДПМ фуқаролиги бўлмаган шахснинг тайёр ҳаракатланиш ҳужжатини ДФХ орқали ҳужжат расмийлаштириш учун талабнома жўнатган маълумотларни йиғиш пунктига ёки дипломатик каналлар орқали маълумотларни йиғиш пунктларига етказиб бериш учун Ўзбекистон Республикаси Ташқи ишлар вазирлигига топширади. Маълумотларни йиғиш пунктлари эса ҳаракатланиш ҳужжатларини эгаларига беришни таъминлашлари керак.

18. Ўзбекистон Республикасининг хориждаги консуллик муассасаларида доимий консуллик рўйхатига олинган ва вақтинча Ўзбекистон Республикасида бўладиган фуқаролиги бўлмаган шахслар ушбу Низомнинг 11-бандида кўрсатилган ҳолларда ҳаракатланиш ҳужжатини олиш ва алмаштириш учун ушбу Низомнинг 13-бандида кўрсатилган ҳужжатлар билан Ўзбекистон Республикаси Ташқи ишлар вазирлигига мурожаат этадилар.

19. Хорижга доимий яшаш учун белгиланган тартибда чиққан, аммо Ўзбекистон Республикасининг консуллик муассасасида консуллик рўйхатига олинмаган ва Ўзбекистон Республикасида бўлган пайтларида ҳаракатланиш ҳужжатларини йўқотиб қўйган фуқаролиги бўлмаган шахслар сўнгги доимий рўйхатда турган жойларидаги маълумотларни йиғиш пунктларига мурожаат этадилар.

20. Агар фуқаролиги бўлмаган шахс келган мамлакатда Ўзбекистон Республикасининг консуллик муассасаси бўлмаса, у Ўзбекистон Республикасининг мазкур мамлакат консуллик округига кирадиган хориждаги консуллик муассасасига мурожаат этади.

21. Фуқаролиги бўлмаган шахс ҳаракатланиш ҳужжатини эҳтиёт қилиб сақлаши шарт.

Фуқаролиги бўлмаган шахс ҳаракатланиш ҳужжатини Ўзбекистон Республикаси ҳудудида йўқотиб қўйган тақдирда бу ҳақда ўз вақтида уни берган маълумотларни йиғиш пунктига хабар бериши лозим. Мазкур маълумотларни йиғиш пункти қонунда назарда тутилган чораларни кўрганидан кейин унга ушбу Низомда кўзда тутилган тартибда янги ҳаракатланиш ҳужжатини беради.

22. Фуқаролиги бўлмаган шахслар бошқа давлат фуқаролигини олган тақдирда ҳаракатланиш ҳужжатини кейин ДПМга йўқ қилиш мақсадида топшириш учун ўзлари келган жойдаги маълумотларни йиғиш пунктига топширишлари шарт.

23. Топиб олинган ҳаракатланиш ҳужжати ички ишлар идорасига ёки Ўзбекистон Республикасининг хориждаги консуллик муассасасига топширилиши лозим.

24. Вафот этган шахснинг ҳаракатланиш ҳужжати фуқаролик ҳолатлари далолатномаларини ёзиш идорасига топширилади. Ушбу идора эса ҳужжатни йўқ қилиш мақсадида ДПМга топшириш учун маълумотларни йиғиш пунктига жўнатади.

Хорижда вафот этган фуқаролиги бўлмаган шахснинг ҳаракатланиш ҳужжати Ўзбекистон Республикасининг консуллик муассасаси томонидан Ўзбекистон Республикаси Ташқи ишлар вазирлигига жўнатилади. Ушбу вазирлик эса ҳужжатни йўқ қилиш учун ДПМга юборади.

25. Ҳибсга олинган ёки озодликдан маҳрум этишга ёхуд қамоққа ҳукм қилинган фуқаролиги бўлмаган шахснинг ҳаракатланиш ҳужжати суриштирув, тергов идоралари ёки суд томонидан олиб қўйилади. Агар шахс суднинг ҳукми билан қамоқда қолдирилса, унинг ҳаракатланиш ҳужжати Ўзбекистон Республикаси Ички ишлар вазирлиги Жазони ижро этиш бош бошқармасига жўнатилади.

Шахс қамоқдан озод этилганида ёки жазо муддатини ўтаб бўлгач, унга ҳаракатланиш ҳужжати тергов, суд идоралари ёки жазони ижро этиш муассасаси маъмурияти томонидан қайтарилади.

Ҳибсга олинган ёки озодликдан маҳрум этишга ҳукм қилинган шахсларнинг тергов, суд идораларида ёки жазони ижро этиш муассасаси маъмуриятида сақланаётган муддати ўтган ҳаракатланиш ҳужжатлари ушбу Низомда белгиланган тартибда йўқ қилиш учун маълумотларни йиғиш пунктига жўнатилади.

26. Текшириш, верификация (солиштириб ўқиш) жараёнида ноаниқликлар ёки чегара (миграция) белгилари, хорижий визалар, рухсатнома ёзувлари қалбакилаштирилгани аломатлари аниқланган, белгиланган тартибда ҳақиқий эмас деб топилган ҳаракатланиш ҳужжатлари тегишли вазирликлар ва идораларга жўнатиш учун чегара назорати бўлинмалари томонидан олиб қўйилиши мумкин.

27. Ушбу Низомнинг 16, 25 ва 26-бандларида кўзда тутилган холлардан ташқари фуқаролиги бўлмаган шахслардан ҳаракатланиш ҳужжатларини олиб қўйиш тақиқланади.

Мажбуриятни бажариш мақсадида ҳаракатланиш ҳужжатини гаров сифатида қабул қилиш ва топшириш тақиқланади.

28. Ҳаракатланиш ҳужжати:

амал қилиш муддати тугаганида;

ҳаракатланиш ҳужжати бланкаси яроқсиз ҳолга келганида;

эгаси бирор-бир давлат фуқаролигини қабул қилганида;

уни расмийлаштириш чоғида атайлаб ёлғон маълумотлар тақдим қилинганида ўз кучини йўқотади.

29. Ушбу Низом талабларини амалга ошириш учун зарур бўлган штамплар ва бланкалар намуналари тегишли равишда Ўзбекистон Республикаси Ички ишлар, Ташқи ишлар, Соғлиқни сақлаш вазирликлари ва Миллий хавфсизлик хизмати томонидан тасдиқланади.

30. Ҳаракатланиш ҳужжатини бериш учун Ўзбекистон Республикаси Вазирлар Маҳкамаси томонидан белгиланган миқдорда давлат божи ундирилади.

31. Белгиланган тартибда хорижга доимий яшаш учун чиққан, шунингдек вақтинча хорижда бўладиган фуқаролиги бўлмаган шахслар Ўзбекистон Республикасининг хориждаги консуллик муассасаларида доимий ёки вақтинча консуллик рўйхатида туришлари шарт.

32. Хорижга доимий яшаш учун чиққан ва хорижга доимий яшаш учун чиқишларини белгиланган тартибда расмийлаштирган фуқаролиги бўлмаган шахслар доимий консуллик рўйхатига олинадилар.

33. Хорижга хизмат сафарига, ўқиш, даволаниш ва шартнома бўйича ишлаш учун чиққан ва хорижга вақтинча чиқишларини белгиланган тартибда расмийлаштирган фуқаролиги бўлмаган шахслар вақтинча консуллик рўйхатига олинадилар.

Фуқаролиги бўлмаган шахс ўзи бораётган мамлакатга қонуний тарзда ва олти ойдан ортиқ вақтга келган тақдирда, у вақтинча консуллик рўйхатига олинади.

34. Агар фуқаролиги бўлмаган шахслар доимий яшаш, шунингдек иш, ўқиш ёки хизмат сафари жойи ўзгариши муносабати билан олти ойдан ортиқ муддатга Ўзбекистон Республикасининг бошқа консуллик муассасасининг консуллик округи ҳудудига кўчиб ўтишса, илгари турган жойларидаги консуллик рўйхатидан (доимий, вақтинча) чиқишлари ва янги келган жойларида консуллик рўйхатига туришлари лозим.

35. Консуллик рўйхатига олиш учун Ўзбекистон Республикаси Вазирлар Маҳкамаси томонидан белгиланган миқдорда йиғим ундирилади.

36. Фуқаролиги бўлмаган шахсларнинг консуллик рўйхатига олиш ва консуллик рўйхатидан чиқариш тўғрисидаги аризаларининг, уларни консуллик рўйхатига олиш ва консуллик рўйхатидан чиқаришга тааллуқли қайд қилиш китоблари ва бошқа ҳужжатларнинг шакллари Ўзбекистон Республикаси Ташқи ишлар вазирлиги томонидан белгиланади.

37. Қонун ҳужжатларида қуйидагилар учун жавобгарлик белгиланади:

фуқаролиги бўлмаган шахснинг ҳақиқий бўлмаган ҳаракатланиш ҳужжатидан фойдаланганлиги, ҳаракатланиш ҳужжатини атайлаб яроқсиз ҳолга келтирганлиги, шунингдек уни эҳтиёт қилиб сақламаганлиги оқибатида йўқотиб қўйганлиги;

фуқаролиги бўлмаган шахслар ўзларининг ҳаракатланиш ҳужжатларидан ғаразли мақсадлари йўлида фойдаланганлиги, сўнг уларни йўқотиб қўйганлиги тўғрисида ариза берганлиги, шунингдек бошқа шахсларга тегишли ҳаракатланиш ҳужжатларидан фойдаланганлиги;

ғаразли ёки бошқа мақсадларда ҳаракатланиш ҳужжатига эгалик қилганлиги, уни йўқ қилганлиги, яроқсиз ҳолга келтирганлиги, яширганлиги.