Ўзбекистон Республикаси Президентининг «Республика давлат бошқаруви органлари тизимини такомиллаштириш тўғрисида» 2003 йил 9 декабрдаги ПФ-3358-сон Фармонини бажариш юзасидан ва республиканинг сафарбарлик тайёргарлигини янада такомиллаштириш, стратегик ва сафарбарлик аҳамиятига эга бўлган захиралар шаклланиши жараёнларининг давлат бошқарувини мақбуллаштириш юзасидан ягона давлат сиёсатини олиб бориш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2003 йил 9 декабрдаги ПФ-3358-сон Фармонига мувофиқ Ўзбекистон Республикаси Вазирлар Маҳкамаси ҳузуридаги Давлат моддий захиралари бош бошқармаси Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси («Ўздавзахира» қўмитаси) этиб қайта ташкил қилинганлиги маълумот учун қабул қилинсин.

2. Қуйидагилар Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитасининг асосий вазифалари этиб белгилансин:

Ўзбекистон Республикаси Иқтисодиёт вазирлиги билан биргаликда давлат стратегик захирасида моддий бойликлар тўпланиши, янгиланиши, алмаштирилиши, чиқарилишининг йиллик ҳажмларини аниқлаш;

давлат стратегик ва сафарбарлик захиралари шакллантирилишини, шу жумладан уларнинг тўпланиши, сақланиши ва янгиланишини таъминлаш;

вазирликлар, идоралар, маҳаллий давлат ҳокимияти органлари, хўжалик бирлашмалари, корхоналар ва ташкилотлар томонидан давлат стратегик ва сафарбарлик захиралари шакллантирилиши (тўпланиши, янгиланиши, алмаштирилиши, чиқарилиши), шунингдек қарз олинган товарлар ва маҳсулотларнинг сифатли ва миқдорий сақланиши ва ўз вақтида қайтарилиши таъминланиши бўйича топшириқлар бажарилишини доимий назорат қилиш;

давлат стратегик ва сафарбарлик захираларидан белгиланган тартибда тезкор фойдаланишга доимий тайёрликни таъминлаш.

3. Қуйидагилар:

«Ўздавзахира» қўмитаси тизимининг ташкилий тузилмаси ва унинг ходимларининг чекланган умумий сони 52 нафар, шу жумладан бошқарув ходимлари — 36 нафар бўлган марказий аппарати тузилмаси 1 ва 2-иловаларга мувофиқ;

Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси тўғрисидаги низом 3-иловага мувофиқ тасдиқлансин;

«Ўздавзахира» қўмитаси раисига бир нафар ўринбосарга ва етти кишидан иборат таркибда ҳайъатга эга бўлишга рухсат берилсин;

«Ўздавзахира» қўмитаси раисига марказий аппарат тузилмасига ходимларнинг чекланган белгиланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.

4. Белгилаб қўйилсинки, «Ўздавзахира» қўмитаси Ўзбекистон Республикаси Вазирлар Маҳкамаси ҳузуридаги Давлат моддий захиралари бош бошқармасининг шартномалари ва мажбуриятлари бўйича ҳуқуқий ворис ҳисобланади.

«Ўздавзахира» қўмитаси ва унга қарашли ташкилотлар ихтиёрида мавжуд асосий воситалар, шу жумладан улар эгаллаб турган ер участкалари билан биргаликда бинолар ва иншоотлар сақлаб қолинсин.

5. Белгилансинки, «Ўздавзахира» қўмитасининг ўз ваколатлари доирасида қабул қилган қарорлари вазирликлар, идоралар, маҳаллий давлат ҳокимияти органлари, хўжалик бирлашмалари, мулкчилик шаклларидан ва идоравий мансублилигидан қатъи назар корхоналар ва ташкилотлар томонидан бажарилиши мажбурий ҳисобланади.

6. Ўзбекистон Республикаси Вазирлар Маҳкамасининг «Ўзбекистон Республикаси Вазирлар Маҳкамаси ҳузурида Давлат моддий резервлар Бош бошқармаси («Ўздаврезерв»)ни ташкил этиш тўғрисида» 1992 йил 4 февралдаги 43-сон қарори ўз кучини йўқотган деб ҳисоблансин.

7. Ўзбекистон Республикаси Ҳукуматининг 4-иловага мувофиқ айрим қарорларига ўзгартиришлар киритилсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ў.Т. Султонов зиммасига юклансин.

1. Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси (кейинги ўринларда матнда қўмита деб юритилади) давлат стратегик ва сафарбарлик захираларини (кейинги ўринларда матнда давлат захираси деб юритилади) шакллантириш, сақлаш ва захираларга хизмат кўрсатишни бошқариш ва назорат қилишни таъминлаш соҳасидаги вазифаларни ҳал этиш учун махсус вакил қилинган Ўзбекистон Республикаси давлат бошқаруви органи ҳисобланади.

Қўмита ўз фаолиятида Ўзбекистон Республикаси Вазирлар Маҳкамасига ҳисобот беради.

2. Қўмита тизимига унга қарашли қуйидаги ташкилотлар киради: «Магнит» комбинати (Тошкент вилояти, Оҳангарон шаҳри), «Марказий» комбинати (Тошкент шаҳри), «Илғор» комбинати (Самарқанд вилояти, Жума шаҳри), «Озодлик» комбинати («Самарқанд вилояти, Булунғур шаҳри), «Ўзмахсустаъминот» агентлиги (Тошкент шаҳри).

3. Қўмита ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлисининг қарорлари ва бошқа ҳужжатларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига ҳамда мазкур Низомга амал қилади.

4. Қўмита ўз фаолиятини давлат бошқарувининг бошқа органлари, маҳаллий давлат ҳокимияти органлари, хўжалик бирлашмалари, мулкчилик шакллари ва идоравий мансублигидан қатъи назар корхоналар ва ташкилотлар билан ўзаро ҳамкорликда амалга оширади.

5. Қўмита ва унга қарашли давлат стратегик захирасининг моддий бойликларини сақлаш ташкилотлари сафарбарлик органларига тегишлидир ҳамда хавфсизлиги қонун ҳужжатларида белгиланган тартибда таъминланадиган, муҳимлигига кўра тоифалаштирилган объектлар рўйхатига киради.

6. Қўмита ва унга қарашли ташкилотларнинг моддий-техника таъминоти, шунингдек қўмита тизими ходимлари меҳнатига ҳақ тўлаш қўмитага ажратиладиган маблағлар доирасида давлат бюджетидан ва қонун ҳужжатларида тақиқланмаган бюджетдан ташқари манбалардан амалга оширади.

7. Қўмита ва унга қарашли ташкилотлар юридик шахслар ҳисобланади, мустақил балансга, банк муассасаларида ҳисоб рақамларига (шу жумладан валюта ҳисоб рақамларига), Ўзбекистон Республикаси Давлат герби тасвири туширилган ва ўз номи ёзилган муҳрга эга бўлади.

8. Қуйидагилар Қўмитанинг асосий вазифалари ҳисобланади:

Ўзбекистон Республикаси Иқтисодиёт вазирлиги билан биргаликда давлат стратегик захирасида моддий бойликлар тўпланиши, янгиланиши, алмаштирилиши, чиқарилишининг йиллик ҳажмларини аниқлаш;

давлат стратегик ва сафарбарлик захиралари шакллантирилишини, шу жумладан уларнинг тўпланиши, сақланиши ва янгиланишини таъминлаш;

вазирликлар, идоралар, маҳаллий давлат ҳокимияти органлари, хўжалик бирлашмалари, корхоналар ва ташкилотлар томонидан давлат стратегик ва сафарбарлик захиралари шакллантирилиши (тўпланиши, янгиланиши, алмаштирилиши, чиқарилиши), шунингдек қарз олинган товарлар ва маҳсулотларнинг сифатли ва миқдорий сақланиши ва ўз вақтида қайтарилиши таъминланиши бўйича топшириқлар бажарилишини доимий назорат қилиш;

давлат стратегик ва сафарбарлик захираларидан белгиланган тартибда тезкор фойдаланишга доимий тайёрликни таъминлаш.

9. Қўмита ўзига юкланган вазифаларни бажариш учун қуйидаги функцияларни амалга оширади:

давлат стратегик захирасида моддий бойликлар ҳаракатининг (тўплаш, янгилаш, алмаштириш, чиқариш) йиллик ҳажмларини шакллантиришга доир таклифларни ишлаб чиқади ва кўриб чиқиш учун Ўзбекистон Республикаси Иқтисодиёт вазирлигига киритади;

давлат стратегик захираси товарлари ва маҳсулотлари тўпланиши, жойлаштирилиши, сақланиши ва чиқарилишини белгиланган тартибда таъминлайди;

вазирликлар, идоралар, маҳаллий давлат ҳокимияти органлари, хўжалик бирлашмалари, корхоналар ва ташкилотлар томонидан давлат стратегик ва сафарбарлик захиралари шакллантирилиши (тўпланиши, янгиланиши, алмаштирилиши, чиқарилиши), шунингдек қарз олинган товарлар ва маҳсулотларнинг сифатли ва миқдорий сақланиши ва ўз вақтида қайтарилиши таъминланиши бўйича топшириқлар бажарилишини назорат қилади;

давлат стратегик ва сафарбарлик захиралари моддий бойликлари билан ишлашда қонун бузилишлари аниқланганда қонун ҳужжатларида назарда тутилган чора-тадбирларни қўллайди;

республика бюджетидан ажратилган маблағлар доирасида вазирликлар, идоралар, маҳаллий давлат ҳокимияти органлари, хўжалик бирлашмалари, корхоналар ва ташкилотларнинг давлат стратегик ва сафарбарлик захираларини шакллантириш бўйича харажатлари молиялаштирилишини, шунингдек қўмита таркибий бўлинмалари фаолияти молиялаштирилишини белгиланган тартибда амалга оширади;

Вазирлар Маҳкамасига ва Ўзбекистон Республикаси Иқтисодиёт вазирлигига давлат стратегик ва сафарбарлик захираларидаги моддий бойликлар тўғрисидаги йиғма ҳисоботларни, уларни тўплашга доир топшириқлар бажарилиши ҳамда давлат стратегик ва сафарбарлик захирасига қайтарилиши тўғрисидаги маълумотларни тақдим этади;

Вазирлар Маҳкамасининг топшириғига кўра давлат захиралари масалалари бўйича халқаро ҳамкорликни белгиланган тартибда амалга оширади.

10. Қўмита ўзига юкланган вазифалар ва функцияларни бевосита ҳамда ўзига қарашли ташкилотлар орқали ҳал этади.

11. Қўмита ўзига юкланган вазифалар ва функцияларни бажариш учун қуйидаги ҳуқуқларга эга:

ўз ваколатлари доирасида вазирликлар, идоралар, маҳаллий давлат ҳокимияти органлари, хўжалик бирлашмалари, мулкчилик шакллари ва идоравий мансублигидан қатъи назар корхоналар ва ташкилотлар томонидан бажарилиши мажбурий бўлган норматив-ҳуқуқий ҳужжатлар қабул қилиш;

давлат стратегик ва сафарбарлик захиралари ҳажмларига ва уларни сақлаш учун жойлаштириш жойларига белгиланган тартибда ўзгартиришлар киритиш;

мустақил равишда ёки ўзига қарашли ташкилотлар орқали, шунингдек вазирликлар, идоралар, маҳаллий давлат ҳокимияти органлари, хўжалик бирлашмалари, корхоналар ва ташкилотлар орқали давлат стратегик ва сафарбарлик захиралари товарлари ва маҳсулотларини харид қилишни (импорт ҳам шу жумлага киради) ва реализация қилишни (экспорт ҳам шу жумлага киради) белгиланган тартибда амалга ошириш;

вазирликлар, идоралар, маҳаллий давлат ҳокимияти органлари, хўжалик бирлашмалари, мулкчилик шакллари ва идоравий мансублигидан қатъи назар корхоналар ва ташкилотларда давлат стратегик ва сафарбарлик захиралари моддий бойликларининг ҳисоби тўғри юритилиши, тўпланиши, сақлаш шароитлари таъминланиши, уларнинг сифатли ва миқдорий сақланиши ва улардан фойдаланиш таъминланиши юзасидан белгиланган тартибда текширишлар ўтказиш;

давлат стратегик ва сафарбарлик захиралари корхоналарда масъулиятли сақланишини текшириш учун зарурат бўлганда, белгиланган тартибда вазирликлар, идоралар, ихтисослаштирилган ташкилотларнинг мутахассисларини (шу жумладан пулли асосда) жалб этиш;

янгиланиши керак бўлган маҳсулотлар ўз вақтида чиқарилиши (шу жумладан қайта ишланиши) чора-тадбирларини кўриш;

давлат захиралари товарлари ва маҳсулотларини узоқ вақт сақлаш муаммолари бўйича белгиланган тартибда идоравий ўқув марказлари ва тадқиқотлар олиб борувчи илмий марказлар ташкил этиш, кадрлар тайёрлаш ва давлат захиралари тизими, шунингдек давлат стратегик ва сафарбарлик захираларига хизмат кўрсатиш бўйича хўжалик ҳисобидаги таъмирлаш-қурилиш, қайта ишлаш корхоналари ва бошқа корхоналарнинг ходимлари малакасини ошириш.

12. Қўмита ўзига юкланган вазифаларнинг самарали бажарилиши учун жавоб беради.

13. Қўмитага қонун ҳужжатларида белгиланган тартибда лавозимга тайинланадиган ва лавозимдан озод этиладиган раис бошчилик қилади.

Қўмита раисининг бир нафар ўринбосари бўлади.

Қўмита раиси меҳнатга ҳақ тўлаш, тиббий ва маиший хизмат кўрсатиш шарт-шароитларига кўра вазирнинг биринчи ўринбосарига, раис ўринбосари эса — вазир ўринбосарига тенглаштирилади.

14. Қўмита раиси:

қўмита фаолиятига умумий раҳбарлик қилади ҳамда қўмитага юкланган вазифалар ва функцияларнинг бажарилиши учун шахсан жавоб беради;

ходимларнинг белгиланган сони доирасида қўмита тузилмасига ўзгартиришлар киритади, унинг марказий аппарати штат жадвалини, шунингдек қўмита марказий аппарати ва унга қарашли ташкилотларнинг харажатлари сметасини тасдиқлайди;

қўмитага қарашли ташкилотларнинг тузилмасини ва улар тўғрисидаги низомни белгиланган тартибда тасдиқлайди;

қўмита марказий аппарати ходимларини, қўмита тизимига кирадиган унга қарашли ташкилотлар раҳбарларини белгиланган тартибда лавозимга тайинлайди ва лавозимдан озод қилади.

Қўмита қонун ҳужжатларига мувофиқ бошқа ваколатларни амалга оширади.

15. Қўмитада қўмита раиси (ҳайъат раиси) ва унинг ўринбосаридан ҳамда қўмита тизимининг бошқа раҳбар ходимларидан иборат таркибда етти кишидан иборат ҳайъат ташкил этилади.

Ҳайъатнинг шахсий таркиби қўмита раисининг тақдимномаси бўйича Ўзбекистон Республикаси Вазирлар Маҳкамаси томонидан тасдиқланади.

Қўмита ҳайъати қўмита фаолиятининг асосий масалаларини кўриб чиқади, қўмитага қарашли ташкилотлар раҳбарларининг ҳисоботини эшитади, қўмитанинг энг муҳим қарорлари ва бошқа ҳужжатлари лойиҳаларини муҳокама қилади.

Ҳайъат қарорлари қўмита қарорлари билан амалга оширилади.

16. Қўмита қонун ҳужжатларида белгиланган тартибда қайта ташкил этилади ва тугатилади.

1. Вазирлар Маҳкамасининг «Ўзбекистон Республикаси объектларида, шаҳарларида, шаҳар кўринишидаги шаҳарчаларида, туманларнинг марказларида ва аҳоли яшайдиган бошқа жойларда Ички ишлар вазирлигининг ёнғин соқчилигини ташкил этиш тартиби тўғрисида» 1996 йил 20 мартдаги 112-сон қарорининг 1-бандидаги «Ўздаврезерв» сўзи «Ўздавзахира» қўмитаси» сўзлари билан алмаштирилсин.

2. Вазирлар Маҳкамасининг «Давлат эҳтиёжлари учун асосий озиқ-овқат турларини харид қилиш тизимини такомиллаштириш тўғрисида» 1997 йил 14 августдаги 397-сон қарорининг 1 ва 5-бандларидаги «Ўздаврезерв» сўзи «Ўздавзахира» қўмитаси» сўзлари билан алмаштирилсин.

3. Вазирлар Маҳкамасининг «2004 йил учун Ўзбекистон Республикасининг Инвестиция дастури тўғрисида» 2003 йил 11 ноябрдаги 500-сон қарорига 3-иловадаги «Ўздаврезерв» сўзи «Ўздавзахира» қўмитаси» сўзлари билан алмаштирилсин.