Vazirlar Mahkamasi qaror qiladi:

1. Oʻzbekiston Respublikasi Hukumatning qarorlariga ilovaga muvofiq oʻzgartirishlar va qoʻshimchalar kiritilsin.

2. Oʻzbekiston Respublikasi Vazirlar Mahkamasining 1996-yil 18-iyuldagi 256-son qarori bilan tashkil etilgan Aksiz markalari tizimini joriy etish boʻyicha idoralararo komissiyaning yangilangan tarkibi tasdiqlansin (ilova* qilinadi).

1. Vazirlar Mahkamasining “Aholi bilan pul hisob-kitoblarini amalga oshirishda nazorat-kassa mashinalarini majburiy qoʻllash tartibi toʻgʻrisida” 1994-yil 26-dekabrdagi 621-son qarori quyidagi mazmundagi 8-band bilan toʻldirilsin:

“8. Savdo qilishda va xizmatlar koʻrsatishda nazorat-kassa mashinalarini qoʻllamasdan aholi bilan pul hisob-kitoblarini amalga oshirayotgan yuridik shaxslar hisob-kitob schyotidan eng kam oylik ish haqining 100 baravari miqdorida jarima chorasi qoʻllanilgandan keyin bir yil mobaynida huquq buzish takroran sodir etilganda esa eng kam oylik ish haqining 200 baravari miqdorida, undan undirilgan summa budjet daromadiga oʻtkazilgan holda jarima undiriladi”.

8 va 9-bandlar tegishli ravishda 9 va 10-bandlar deb hisoblansin.

2. Vazirlar Mahkamasining 1996-yil 14-avgustdagi 285-son qarori (Oʻzbekiston Respublikasi QT, 1996-yil, 8-son, 24-modda) bilan tasdiqlangan Oʻzbekiston Respublikasida chetdan keltiriladigan va respublikaning oʻzida ishlab chiqariladigan tamaki mahsulotlari va spirtli ichimliklarga aksiz markalarini qoʻllash tartibi toʻgʻrisidagi Nizomda:

a) 8-bandning birinchi xatboshidagi “Qoraqalpogʻiston Respublikasi, viloyatlar va Toshkent shahar davlat soliq boshqarmalari va bojxona xizmatlarida” soʻzlari “Davlat soliq qoʻmitasi va Davlat bojxona qoʻmitasining hududiy organlarida” soʻzlari bilan almashtirilsin;

b) 8-bandning ikkinchi xatboshi quyidagi tahrirda bayon qilinsin:

“Mahsulot ishlab chiqaruvchilar hamda import qiluvchilar tomonidan nominal qiymati boʻyicha sotib olinayotgan aksiz markalari uchun pul mablagʻlari respublika budjetiga oʻtkaziladi.

“Goznak” davlat ishlab chiqarish birlashmasiga aksiz markalarini ishlab chiqarish boʻyicha xarajatlar ularning nominal qiymati doirasida Oʻzbekiston Respublikasi Moliya vazirligi tomonidan respublika budjeti mablagʻlari hisobiga qoplanadi”;

v) 9-banddagi “Moliya vazirligi” soʻzlaridan keyin “Davlat bojxona qoʻmitasi” soʻzlari kiritilsin;

g) 14-band quyidagi tahrirda bayon qilinsin:

“14. Aksiz markalari aksiz soligʻi toʻlanganligi dalili hisoblanadi.

Mahalliy tamaki mahsulotlari va spirtli ichimliklar ishlab chiqaruvchilar hamda ularni import qiluvchilar aksiz markalarini ularning nominal qiymati boʻyicha sotib oladilar.

Aksiz markalarining qiymati aksiz soligʻi toʻlashda hisobga qoʻshilmaydi. Aksiz markalarini sotib olish xarajatlari (shu jumladan, ularning nominal qiymati), shuningdek, aksiz markalari bilan markalash boʻyicha xarajatlar tamaki mahsulotlari va spirtli ichimliklar ishlab chiqaruvchilar hamda import qiluvchilar chiqimlariga tegishli boʻladi.

Tamaki mahsulotlari va spirtli ichimliklarni import qiluvchilar aksiz soligʻini toʻliq miqdorda toʻlaganlaridan keyin aksiz markalarini sotib oladilar.

Toʻlangan aksiz soligʻi import qiluvchilarga yuridik shaxslarga faqat kontrakt bekor qilinganda, foydalanilmagan (shu jumladan, shikastlangan) aksiz markalari topshirilgan shartlarda, jismoniy shaxslarga esa foydalanilmagan (shu jumladan, shikastlangan) aksiz markalari taqdim etilgan shartlarda qaytarilishi mumkin”.