Oʻzbekiston Respublikasining 2024-yil 28-avgustdagi OʻRQ-948-son “Oʻzbekiston Respublikasining Jinoyat-ijroiya kodeksiga mahkumlarning huquqlari va qonuniy manfaatlarini taʼminlashga qaratilgan oʻzgartirish va qoʻshimchalar kiritish toʻgʻrisida” Qonuni hamda Vazirlar Mahkamasining 2024-yil 27-iyundagi 358-son “Oʻzbekiston Respublikasi Ichki ishlar vazirligi huzuridagi Jazoni ijro etish departamenti va uning tizimidagi jazoni ijro etish muassasalarining bino va inshootlaridan samarali foydalanish hamda sohaga zamonaviy axborot-kommunikatsiya texnologiyalarini joriy etish chora-tadbirlari toʻgʻrisida” qaroriga muvofiq buyuraman:

1. Oʻzbekiston Respublikasi ichki ishlar vazirining 2012-yil 29-dekabrdagi 174-son buyrugʻi (roʻyxat raqami 2495, 2013-yil 29-iyul) (Oʻzbekiston Respublikasi qonun hujjatlari toʻplami, 2013-y., 31-son, 414-modda) bilan tasdiqlangan Oʻzbekiston Respublikasi Ichki ishlar vazirligi ozodlikdan mahrum qilish turidagi jazoni ijro etish muassasalarining ichki tartib qoidalariga ilovaga muvofiq qoʻshimcha va oʻzgartirishlar kiritilsin.

2. Mazkur buyruq Oʻzbekiston Respublikasi Oliy Majlisining Inson huquqlari boʻyicha vakili (ombudsman), Oliy sud va Bosh prokuratura bilan kelishilgan.

3. Ushbu buyruq rasmiy eʼlon qilingan kundan eʼtiboran kuchga kiradi.

1. 69-band quyidagi tahrirdagi oʻn toʻrtinchi — oʻn oltinchi xatboshilar bilan toʻldirilsin:

“Mahkumlar oʻziga nisbatan insoniy muomalada boʻlinishi hamda inson shaxsiga xos boʻlgan shaʼni va qadr-qimmati hurmat qilinishi huquqiga ega.

Mahkumlarda ularning roziligisiz tibbiy va ilmiy tajribalar oʻtkazilishi mumkin emas.

Mahkumlarga Oʻzbekiston Respublikasining qonunchiligiga va xalqaro shartnomalariga muvofiq, agar davlatning huquqiy himoyaga doir barcha ichki vositalaridan foydalanib boʻlingan boʻlsa, insonning huquq va erkinliklarini himoya qiluvchi xalqaro organlarga murojaat etish huquqi beriladi.”.

2. 196-band quyidagi tahrirda bayon etilsin:

“196. JIEMda mahkumlarning ishdan boʻsh vaqtida oziq-ovqat mahsulotlari va eng zarur narsalarni sotib olishlari uchun Face-ID identifikatsiya tizimi mavjud boʻlgan infokiosk (bundan buyon matnda infokiosk deb yuritiladi) tashkil etiladi hamda ushbu infokiosk har kuni ishlashi taʼminlanadi.

Mahkum infokioskdan foydalanish uchun Face-ID identifikatsiya tizimi orqali yuz qiyofasidan uning shaxsi identifikatsiya qilinadi va unga infokioskning shaxsiy menyusiga kirish uchun shaxsiy identifikatsiya ID- raqami beriladi.

Shaxsiy menyuda har bir mahkumga uning shaxsiy hisobida mavjud mablagʻ, oy davomida xarid qilish mumkin boʻlgan mablagʻ limiti hamda xaridlar tarixi aks ettiriladi.”.

3. 197-band quyidagi tahrirda bayon etilsin:

“197. Mahkum oziq-ovqat mahsulotlari va eng zarur narsalarni sotib olish uchun infokioskning buyurtma menyusiga kirib, zarur mahsulotlarni tanlaydi va buyurtma beradi.

Infokiosk orqali amalga oshirilgan buyurtmaning yetkazib berish muddati mahkumning shaxsiy menyusida koʻrsatiladi hamda infokiosk qurilmadan mahkumga buyurtma cheki chiqariladi.

Buyurtma berilgan mahsulotning besh kun muddatda JIEMga yetib kelishi JIEM maʼmuriyati tomonidan nazorat qilinadi.

Buyurtma berilgan mahsulot JIEMga yetib kelgandan soʻng ushbu mahsulot JIEM maʼmuriyati tomonidan mahkumlarga imzo qoʻydirilgan holda tarqatiladi.

Turmalarning kameralarida hamda umumiy, qattiq va maxsus tartibli koloniyalarning karserlarida saqlanayotgan mahkumlarni infokioskga olib chiqish taqiqlanadi. Ular oziq-ovqat mahsulotlari va eng zarur narsalarni, odatda, ijtimoiy xodim orqali planshetga oʻrnatilgan elektron dasturdan foydalanib sotib oladi.”.

4. 198-band oʻz kuchini yoʻqotgan deb topilsin.

5. Quyidagi mazmundagi 241¹ va 241²-bandlar bilan toʻldirilsin:

“241¹. JIEMning har bir turar joy sektorida, sanoat zonalarida, qisqa va uzoq muddatli uchrashuvlarni oʻtkazish uchun moʻljallangan binolarda, mahkumlar murojaatlarni qoldirishi uchun qulay boʻlgan joyda Oʻzbekiston Respublikasi Oliy Majlisining Inson huquqlari boʻyicha vakiliga (ombudsmanga) murojaatlar qutisi, tarbiya koloniyalarida esa qoʻshimcha ravishda Oʻzbekiston Respublikasi Oliy Majlisining Bola huquqlari boʻyicha vakiliga (Bolalar ombudsmaniga) murojaatlar qutisi oʻrnatiladi (bundan buyon matnda Ombudsman qutisi deb yuritiladi).

Ombudsman qutisiga murojaatlarni mahkumlar toʻgʻridan-toʻgʻri oʻzlari tashlaydi va mazkur murojaatlar JIEM maʼmuriyati tomonidan koʻzdan kechirilmaydi.

241². Ombudsman qutisi tegishincha faqat Oʻzbekiston Respublikasi Oliy Majlisining Inson huquqlari boʻyicha vakili (ombudsman) yoki uning Devoni xodimlari tomonidan, Oʻzbekiston Respublikasi Oliy Majlisining Bola huquqlari boʻyicha vakili (Bolalar ombudsmani) yoki uning kotibiyati xodimlari tomonidan ochiladi.

Oʻzbekiston Respublikasi Oliy Majlisining Inson huquqlari boʻyicha vakili (ombudsman) yoki uning Devoni xodimlari tomonidan, Oʻzbekiston Respublikasi Oliy Majlisining Bola huquqlari boʻyicha vakili (Bolalar ombudsmani) yoki uning kotibiyati xodimlari tomonidan qutidan murojaatlarni olgandan soʻng ushbu qutining muhrlanishini taʼminlaydi.”.

6. 21-ilova oʻz kuchini yoʻqotgan deb topilsin.