Bozor munosabatlarini rivojlantirish sharoitida Oʻzbekiston Respublikasida koʻmir qazib olish va sotish tizimini takomillashtirish maqsadida Vazirlar Mahkamasi qaror qiladi:

1. Koʻmir qazib olish Oʻrta Osiyo ishlab chiqarish birlashmasi (“Oʻrtaosiyokoʻmir” IB) korxonalari va tashkilotlarining birlashmani 1-ilovaga* muvofiq korxonalar va tashkilotlar negizida koʻmir qazib olish va sotish aksionerlik birlashmasi (“Koʻmir” AB)ga aylantirish toʻgʻrisidagi takliflari qabul qilinsin.

2. Belgilab qoʻyilsinki:

“Koʻmir” aksionerlik birlashmasi mustaqil yuridik shaxs sifatida ochiq turdagi aksionerlik jamiyati shaklida tashkil etiladi;

davlat nomidan Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi, respublika hamda xorijiy yuridik va jismoniy shaxslar aksionerlik birlashmasining qatnashchilari hisoblanadilar;

“Koʻmir” aksionerlik birlashmasining dastlabki ustav fondi davlat tasarrufidan chiqarilayotgan korxonalar va tashkilotlarning davlat mulki hamda amaldagi qonunchilikka muvofiq davlat tasarrufidan chiqarilmaydigan va xususiylashtirilmaydigan korxonalarning davlat mulki asosida tashkil etiladi;

“Koʻmir” aksionerlik birlashmasi “Oʻrtaosiyokoʻmir” ishlab chiqarish birlashmasining majburiyatlari va u tuzgan shartnomalar boʻyicha uning huquqiy vorisi hisoblangan holda, Oʻzbekiston Respublikasining amaldagi qonunchiligi asosida, aksionerlarning umumiy yigʻilishi tomonidan tasdiqlangan va Adliya vazirligida roʻyxatdan oʻtkazilgan birlashma Ustaviga muvofiq, moliya-xoʻjalik faoliyatini mustaqil ravishda amalga oshiradi.

3. Belgilab qoʻyilsinki, “Koʻmir” aksionerlik birlashmasining asosiy vazifalari quyidagilar hisoblanadi:

bozor konyunkturasidan va mahsulot marketingidan kelib chiqqan holda ishlab chiqarishni rivojlantirish strategiyasini belgilash, respublika koʻmir sanoati korxonalari –– mulkchilikning barcha shakllaridagi aksionerlarning faoliyatini tashkil etish, ularning moliyaviy-iqtisodiy ahvolini mustahkamlash;

tarmoqda yagona texnika siyosatini yurgizish, ilmiy-tadqiqot va loyiha ishlarini tashkil etish, ijtimoiy vazifalarni hal qilish, koʻmir va boshqa foydali qazilmalarni qidirish, qazib olish va qayta ishlash, tijoratchilik faoliyatini amalga oshirish;

“Oʻzistiqbolstat” davlat qoʻmitasi bilan birgalikda koʻmir ishlab chiqarish va respublikaning unga boʻlgan ehtiyoji, uni aholiga va xalq xoʻjaligiga sotish balansini ishlab chiqish.

4. “Koʻmir” aksionerlik birlashmasining ijro etuvchi organi tuzilmasiga 2 va 2a* ilovalarga muvofiq rozilik berilsin.

Bosh direktor va uning oʻrinbosarlari Vazirlar Mahkamasi bilan kelishgan holda birlashma Kengashi tomonidan saylanadilar. “Koʻmir” aksionerlik birlashmasining yuqori organi aksionerlarning yigʻilishi hisoblanadi.

5. “Koʻmir” aksionerlik birlashmasi korxonalari va tashkilotlarini davlat tasarrufidan chiqarish va xususiylashtirish boʻyicha tashkiliy chora-tadbirlar 3-ilovaga* muvofiq tasdiqlansin.

Savdo va maishiy xizmat korxonalaridan tashqari davlat korxonalari va tashkilotlarini ochiq turdagi aksionerlik jamiyatlariga aylantirishda chiqariladigan aksiyalarning kamida 51 foizini davlat ixtiyorida saqlab qolish, 29 foizigachasini mehnat jamoalariga sotish, aksiyalarning kamida 20 foizini oʻzbekistonlik va xorijiy yuridik hamda jismoniy shaxslarga erkin sotish nazarda tutilsin.

6. Davlat mulkini boshqarish va tadbirkorlikni qoʻllab-quvvatlash davlat qoʻmitasi “Koʻmir” aksionerlik birlashmasi Boshqaruviga tarmoq korxonalarining davlat mulkini hamda aksiyalarning davlatga tegishli ulushini boshqarish huquqini bersin.

7. “Koʻmir” aksionerlik birlashmasi bir oy muddatda Ustavni ishlab chiqsin va Vazirlar Mahkamasi bilan kelishgan holda uni qabul qilsin.

8. “Koʻmir” aksionerlik birlashmasi Toshkent shahar, M-14, 27-uyga joylashtirilsin.

9. Ushbu qarorning bajarilishini nazorat qilish Bosh vazir oʻrinbosari Q.J. Haqqulov zimmasiga yuklansin.

Rahbariyat

Yer osti kon ishlari texnologiyalari va koʻmir qazib olish boʻlimi

Ochiq kon ishlari texnologiyalari va koʻmir qazib olish boʻlimi

Mehnatni muhofaza qilish, xavfsizlik texnikasi va tabiatni muhofaza qilish boʻlimi

Marksheyderlik-geologiya boʻlimi

Ilmiy-texnika taraqqiyoti va yangi texnika boshqarmasi

Mexanizatsiya va aloqa boʻlimi

Rejalashtirish va moliya boshqarmasi

Buxgalteriya hisobi va hisoboti boʻlimi

Asosli qurilish va ijtimoiy rivojlantirish boʻlimi

Moddiy-texnika taʼminoti va butlash boshqarmasi (“Oʻzkoʻmirbutlash”)

Avtomobil transporti boʻlimi

Marketing va mahsulot sotish boshqarmasi

Davlat tasarrufidan chiqarish va xususiylashtirish boʻlimi

Tashqi iqtisodiy faoliyat boʻlimi

Maxsus boʻlim

Ishlar boshqarmasi

Rahbariyat huzuridagi apparat