O‘zbekiston Respublikasi Hukumati va Pokiston Islom Respublikasi Hukumati, keyingi o‘rinlarda alohida “Tomon” va birgalikda “Tomonlar” deb ataluvchilar,
savdo, iqtisodiyot, investitsiya va turizm sohalaridagi ikki tomonlama hamkorlikni yanada rivojlantirish maqsadida,
Tomonlar, o‘zarolik shartlarida hamda o‘z davlatlarining amaldagi qonunchiligiga muvofiq, Tomonlar davlatlarining ishbilarmon doiralari vakillari va turistik guruhlari uchun vizalar berishning soddalashtirilgan jarayonini joriy etadilar.
“Ishbilarmon doiralar vakillari” — bir Tomon davlati hududida investitsiya va tadbirkorlik faoliyatini olib boruvchi boshqa Tomon davlatining fuqarolari;
“Turistik guruh” — 5 (besh) yoki undan ortiq kishi bo‘lib sayohat qiluvchi va bir vaqtning o‘zida bir Tomon davlati hududiga turizm maqsadda kiruvchi boshqa Tomon davlatining fuqarolari.
“Vakolatli organlar” — mazkur Bitimni amalga oshirish uchun mas’ul bo‘lgan Tomonlarning davlat organlari.
Tomonlar davlatlarining vakolatli organlari, Tomonlar davlatlari qonunlarida talab qilingan tegishli hujjatlarni qabul qilinganidan so‘ng, ularni 3 (uch) ish kunida (hujjat qabul qilingan kundan tashqari) ko‘rib chiqadilar va ma’qullagan taqdirda, viza berish uchun tasdiqnoma rasmiylashtiradilar.
Tomonlar davlatlarining diplomatik vakolatxonalari va konsullik muassasalari viza berish tasdiqnomasiga asosan quyidagilarni rasmiylashtiradilar:
bir Tomon davlatiga tadbirkorlik maqsadida tashrif buyuruvchi boshqa Tomon davlatining tadbirkor doiralari vakillari uchun 6 (olti) oygacha amal qiladigan ko‘p martalik viza;
bir Tomon davlatiga turistlar guruhlari tarkibida, turist sifatida tashrif buyuruvchi boshqa Tomon davlatining fuqarolariga 30 (o‘ttiz) kungacha turistik viza;
Istisno hollarda, qo‘shimcha ko‘rib chiqish talab etilsa, vizani rasmiylashtirish 10 (o‘n) kundan oshmagan muddatga uzaytirilishi mumkin.
Basharti mazkur vakolatli organlarning rasmiy nomi va funksiyalari o‘zgartirilsa, Tomonlar diplomatik kanallar orqali bir-birini o‘z vaqtida xabardor qiladilar.
Mazkur Bitim Tomonlarning bir Tomon davlati hududida bo‘lishi nomaqbul deb topilgan boshqa Tomon davlati fuqarolarining kirishini taqiqlash yoki o‘z hududida bo‘lishini cheklash huquqiga daxl qilmaydi.
Mazkur Bitimning 1-moddasida ko‘rsatilgan Tomonlar davlatlari fuqarolari boshqa Tomon davlatining milliy qonunchiligi va qoidalarini, shu jumladan chet el fuqarolarining kirish, chiqish va bo‘lish jarayonlarini hurmat qilishlari va ularga rioya qilishlari shart.
Tomonlar mazkur Bitimni milliy xavfsizlik, jamoat tartibi va aholi salomatligi sabablariga ko‘ra vaqtincha, qisman yoki to‘liq to‘xtatib qo‘yish huquqini saqlab qoladilar.
Bunday choralarni ko‘ruvchi Tomon imkon qadar tezroq, ammo kamida 24 (yigirma to‘rt) soat oldin, diplomatik kanallar orqali ushbu choralarning ko‘rilishi hamda tegishlicha uning bekor qilinishi to‘g‘risida boshqa Tomonni xabardor qiladi.
Mazkur Bitim Tomonlar davlatlari ishtirokchi bo‘lgan boshqa xalqaro shartnomalardan kelib chiqadigan Tomonlarning huquqlari va majburiyatlariga ta’sir qilmaydi.
Tomonlarning o‘zaro roziligi asosida mazkur Bitimga uning ajralmas qismi hisoblanadigan, alohida bayonnomalar bilan rasmiylashtiriladigan va mazkur Bitimning 11-moddasida belgilangan tartibda kuchga kiradigan o‘zgartirish va qo‘shimchalar kiritilishi mumkin.
Mazkur Bitim qoidalarini talqin qilish yoki qo‘llash bo‘yicha nizo va kelishmovchiliklar yuzaga kelgan taqdirda, Tomonlar ularni ikki tomonlama muzokaralar va maslahatlashuvlar orqali hal qiladilar.
Mazkur Bitim u imzolangan sanadan 30 (o‘ttiz) kun o‘tgach kuchga kiradi va bir Tomon mazkur Bitimni bekor qilish niyati to‘g‘risida boshqa Tomonning rasmiy xabarnomasini olgan kundan boshlab 90 (to‘qson) kunga qadar amal qiladi.
Toshkent shahrida 2021-yil 15-iyulda, ikki asl nusxada, har biri o‘zbek va ingliz tillarida tuzildi, bunda barcha matnlar teng autentikdir.