Oʻzbekiston Respublikasining “Davlat boji toʻgʻrisida” 2020-yil 6-yanvardagi OʻRQ-600-sonli Qonuni qabul qilinishi, shuningdek qonunchilikka oʻzgartish va qoʻshimchalar kiritilganligi munosabati bilan, “Sudlar toʻgʻrisida”gi Qonunning 17-moddasiga asosan, Oʻzbekiston Respublikasi Oliy sudi Plenumi qaror qiladi:

I. Oʻzbekiston Respublikasi Oliy sudi Plenumi va Oʻzbekiston Respublikasi Oliy xoʻjalik sudi Plenumining quyidagi qarorlariga oʻzgartish va qoʻshimchalar kiritilsin:

1. Oʻzbekiston Respublikasi Oliy sudi Plenumining “Xususiylashtirilgan turar joylarga egalik qilish, ulardan foydalanish va ularni tasarruf qilish bilan bogʻliq ishlar boʻyicha sud amaliyoti haqida” 1997-yil 2-maydagi 3-sonli qarori 25-bandining birinchi xatboshisidagi “Vazirlar Mahkamasining 1994-yil 3-noyabrdagi 533-sonli “Davlat boji stavkalari toʻgʻrisida”gi Qaroriga muvofiq” degan soʻzlar “Oʻzbekiston Respublikasining “Davlat boji toʻgʻrisida”gi Qonuni bilan belgilangan davlat boji stavkalarining miqdorlariga muvofiq” degan soʻzlar bilan almashtirilsin.

2. Oʻzbekiston Respublikasi Oliy sudi Plenumining “Fuqarolik kodeksini tatbiq qilishda sud amaliyotida vujudga keladigan ayrim masalalar toʻgʻrisida” 1999-yil 24-sentabrdagi 16-sonli qarorining 24-bandi chiqarib tashlansin.

3. Oʻzbekiston Respublikasi Oliy sudi Plenumining “Maʼnaviy zararni qoplash haqidagi qonunlarni qoʻllashning ayrim masalalari toʻgʻrisida” 2000-yil 28-apreldagi 7-sonli qarorining 16-bandidagi “Oʻzbekiston Respublikasi Vazirlar Mahkamasining 1994-yil 3-noyabrdagi 533-sonli qarori bilan tasdiqlangan “Davlat boji stavkalari”ning 1-moddasining “d” bandiga binoan mulkka oid boʻlmagan daʼvo arizalardan” degan soʻzlar “Oʻzbekiston Respublikasining “Davlat boji toʻgʻrisida”gi Qonuni bilan belgilangan davlat boji stavkalarining miqdorlariga muvofiq mulkka oid boʻlmagan daʼvo arizalaridan” degan soʻzlar bilan almashtirilsin.

4. Oʻzbekiston Respublikasi Oliy xoʻjalik sudi Plenumining “Bankrotlik toʻgʻrisidagi qonun hujjatlarini iqtisodiy sudlar tomonidan qoʻllashning ayrim masalalari haqida” 2006-yil 27-yanvardagi 142-sonli qarori:

1-bandidagi “(budjet tashkilotlari bundan mustasno)” degan soʻzlar “(davlat korxonalariga va notijorat tashkilotlariga nisbatan tatbiq etilmaydi, bundan matlubot kooperativi yoki ijtimoiy fond shaklida ish yuritayotgan yuridik shaxslar mustasno)” degan soʻzlar bilan almashtirilsin;

birinchi xatboshisidagi “Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi” degan soʻzlar “Oʻzbekiston Respublikasi Davlat aktivlarini boshqarish agentligi” degan soʻzlar bilan almashtirilsin;

ikkinchi xatboshisi quyidagi tahrirda bayon etilsin:

“Bankrotlik toʻgʻrisidagi ishlar boʻyicha davlat organi, shuningdek davlat soliq xizmati organi va prokurorning qarzdorning bankrotligi toʻgʻrisida ish qoʻzgʻatish haqidagi arizalari iqtisodiy sudlar tomonidan davlat boji toʻlovisiz ish yuritishga qabul qilinadi. Iqtisodiy sud tomonidan ariza qanoatlantirilgan taqdirda, davlat boji qarzdordan undiriladi. Davlat boji toʻlashdan ozod qilingan davlat organlari hamda boshqa shaxslar tomonidan kreditorning manfaatlarini koʻzlab taqdim etilgan arizani qanoatlantirish rad etilgan taqdirda, davlat boji ariza qaysi shaxsning manfaatlarini koʻzlab taqdim etilgan boʻlsa, shu shaxsdan undiriladi”;

3-bandidagi “oʻzini bankrot deb topish toʻgʻrisidagi” degan soʻzlar “bankrotlik toʻgʻrisida ish qoʻzgʻatish haqidagi” degan soʻzlar bilan almashtirilsin;

4-bandining birinchi xatboshisidagi “qarzdorni bankrot deb topish toʻgʻrisidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

birinchi xatboshisidagi “qarzdorni bankrot deb topish toʻgʻrisidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

ikkinchi xatboshisidagi “qarzdorni bankrot deb topish toʻgʻrisidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

7-bandi quyidagi tahrirda bayon etilsin:

“7. Qonunda boshqacha qoida nazarda tutilgan boʻlmasa, qarzdorning bankrotligi toʻgʻrisida ish qoʻzgʻatish haqidagi arizani qabul qilishda sudya qarzdor yuridik shaxsga nisbatan bazaviy hisoblash miqdorining kamida uch yuz baravaridan, qarzdor shaharni tashkil etuvchi korxona hamda unga tenglashtirilgan korxonaga nisbatan bazaviy hisoblash miqdorining kamida besh ming baravaridan, qarzdor yakka tartibdagi tadbirkorga yoki yakka tartibdagi tadbirkor maqomini yoʻqotgan jismoniy shaxsga nisbatan esa bazaviy hisoblash miqdorining kamida yigirma baravaridan kam boʻlmagan miqdorda jami qarzi mavjudligini va bu majburiyatlar yuzaga kelgan kundan eʼtiboran uch oy, qarzdor shaharni tashkil etuvchi korxona hamda unga tenglashtirilgan korxona olti oy davomida bajarilmaganligini tasdiqlovchi hujjatlarni tekshirishi zarur. Agar bunday hujjatlar taqdim etilmagan boʻlsa, arizani qabul qilish Qonun 45-moddasining beshinchi qismi va IPK 154-moddasi birinchi qismining 1-bandiga asosan rad etiladi”;

ikkinchi xatboshisi quyidagi tahrirda bayon etilsin:

“Mol-mulki mavjud boʻlgan qarzdor yuridik shaxsga nisbatan bankrotlik toʻgʻrisidagi ish qoʻzgʻatish haqidagi ariza bilan iqtisodiy sudga murojaat qilinganda, unda muvaqqat boshqaruvchining nomzodi koʻrsatiladi. Arizada muvaqqat boshqaruvchining nomzodi koʻrsatilmagan boʻlsa, u holda iqtisodiy sud arizachidan yoki bankrotlik toʻgʻrisidagi ishlar boʻyicha davlat organidan yoxud sud boshqaruvchilarining professional birlashmasidan tegishli nomzodni taqdim etishni talab qiladi. Bunday holatda kuzatuv taomilini joriy etish va muvaqqat boshqaruvchini tayinlash masalasi Qonun 48-moddasining ikkinchi qismiga muvofiq bankrotlik toʻgʻrisidagi ish qoʻzgʻatish haqidagi ariza tushgan kundan eʼtiboran oʻn kundan kechiktirmay hal qilinadi”;

uchinchi xatboshisidagi “qarzdorni bankrot deb topish toʻgʻrisidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

toʻrtinchi xatboshisidagi “qarzdorni bankrot deb topish toʻgʻrisidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

10-bandi quyidagi tahrirda bayon etilsin:

“10. Bankrotlik toʻgʻrisidagi ish iqtisodiy sudning majlisida bankrotlik toʻgʻrisida ish qoʻzgʻatish haqidagi ariza ish yuritishga qabul qilinganligi toʻgʻrisida ajrim chiqarilgan kundan eʼtiboran bir oydan ortiq boʻlmagan muddatda koʻrib chiqilishi lozim.

Bankrotlik toʻgʻrisidagi ishni koʻrish alohida hollarda iqtisodiy sudning raisi tomonidan Qonunning 49-moddasiga muvofiq bir oydan oshmagan muddatga uzaytirilishi mumkin”;

13.3-bandining yettinchi va sakkizinchi xatboshilari chiqarib tashlansin;

birinchi xatboshisi quyidagi tahrirda bayon etilsin:

“Kreditorlarning birinchi yigʻilishini oʻtkazish uchun kreditorlarning talablari reyestriga kiritiladigan pul majburiyatlari va majburiy toʻlovlarning miqdori iqtisodiy sud tomonidan qarzdorga nisbatan bankrotlik toʻgʻrisidagi ish qoʻzgʻatish haqidagi arizani qabul qilish sanasiga belgilanadi. Qarzdorning bankrotligi toʻgʻrisida ish qoʻzgʻatish haqidagi ariza iqtisodiy sud tomonidan qabul qilingunga va bankrotlikning tegishli taomilini joriy etishga qadar ijro muddati kelgan qarzdorning kreditorlar oldidagi majburiyatlari kreditorlarning talablari reyestriga kiritiladi”;

ikkinchi xatboshisidagi “Qarzdorni bankrot deb topish toʻgʻrisidagi” degan soʻzlar “Qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

beshinchi xatboshisidagi “qarzdorni bankrot deb topish haqidagi” degan soʻzlar “qarzdorning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

yettinchi xatboshisi quyidagi tahrirda bayon etilsin:

“Qarzdorning chet el valyutasida qarzi mavjud boʻlganda, agar kreditor va qarzdor oʻrtasida tuzilgan shartnomada boshqacha tartib nazarda tutilgan boʻlmasa, kreditorlarning birinchi yigʻilishini oʻtkazish uchun kreditorlarning talablari reyestriga kiritiladigan kreditorlarning talablari miqdori qarzdorning bankrotligi toʻgʻrisida ish qoʻzgʻatish toʻgʻrisidagi ariza iqtisodiy sud tomonidan qabul qilingan sanadagi Oʻzbekiston Respublikasi Markaziy banki tomonidan belgilangan rasmiy kurs bilan, keyingi taomillarda esa Oʻzbekiston Respublikasi Buxgalteriya hisobining milliy standarti (22-sonli BHMS) “Chet el valyutasida ifodalangan aktivlar va majburiyatlarning hisobi”da nazarda tutilgan tartibda (Oʻzbekiston Respublikasi Adliya vazirligi tomonidan 2004-yil 21-mayda 1364-son bilan roʻyxatga olingan) belgilanadi”;

sakkizinchi xatboshisidagi “Qarzdorni bankrot deb topish toʻgʻrisidagi” degan soʻzlar “Qarzdorning bankrotligi toʻgʻrisida ish qoʻzgʻatish toʻgʻrisidagi” degan soʻzlar bilan almashtirilsin;

20-bandi:

quyidagi mazmundagi ikkinchi xatboshi bilan toʻldirilsin:

“Korxonaning rahbariga yoki muassislariga (ishtirokchilariga) yoxud mulkdoriga nisbatan korxonani bankrotlikka olib kelgan harakatlari (harakatsizligi) uchun jinoyat ishi qoʻzgʻatilgan taqdirda ham bankrotlik toʻgʻrisidagi ish boʻyicha ish yuritish toʻxtatib turiladi. Sudning qoʻzgʻatilgan jinoyat ishi boʻyicha qabul qilingan sud hujjati qonuniy kuchga kirganda yoki tergov harakatlari tugaganda bankrotlik toʻgʻrisidagi ish boʻyicha ish yuritish tiklanadi”;

ikkinchi xatboshisi uchinchi xatboshi deb hisoblansin;

21-bandining uchinchi va toʻrtinchi xatboshilaridagi “xoʻjalik sudining” degan soʻzlar “iqtisodiy sudning” degan soʻzlar bilan almashtirilsin;

28-bandining ikkinchi xatboshisidagi “oʻttiz olti” degan soʻzlar “oʻttiz” degan soʻz bilan almashtirilsin;

30-bandi:

birinchi xatboshisidagi “bir yildan” degan soʻzlar “toʻqqiz oydan” degan soʻzlar bilan almashtirilsin;

ikkinchi xatboshisi quyidagi tahrirda bayon etilsin:

“Zarurat boʻlganda Qonun 124-moddasining uchinchi qismida sanab oʻtilgan holatlar mavjud boʻlsa, bankrotlik toʻgʻrisidagi ishda ishtirok etuvchi shaxsning iltimosnomasiga koʻra yoki iqtisodiy sudning tashabbusi bilan bu muddat koʻpi bilan uch oyga uzaytirilishi mumkin”;

31-bandi quyidagi mazmundagi uchinchi xatboshisi bilan toʻldirilsin:

“Sudlar eʼtiborga olishi kerakki, kelishuv bitimini tuzish masalasi koʻrilayotgan kreditorlar yigʻilishida birinchi, ikkinchi va uchinchi guruh kreditorlari ovozga ega va qaror, basharti kreditorlar yigʻilishida ishtirok etayotgan ushbu guruhlar kreditorlarining koʻpchiligi uni yoqlab ovoz bergan boʻlsa, qabul qilingan deb hisoblanadi”;

34-bandidagi “Shaharni tashkil etuvchi va ularga tenglashtirilgan korxonalarni bankrot deb topish toʻgʻrisidagi” degan soʻzlar “Shaharni tashkil etuvchi va unga tenglashtirilgan korxonaning bankrotligi toʻgʻrisida ish qoʻzgʻatish haqidagi” degan soʻzlar bilan almashtirilsin;

38-bandi chiqarib tashlansin.

5. Oʻzbekiston Respublikasi Oliy sudi Plenumining “Fuqarolik ishlari boʻyicha sud xarajatlarini undirish amaliyoti toʻgʻrisida” 2009-yil 24-noyabrdagi 14-sonli qarori:

2-bandining birinchi xatboshisi quyidagi tahrirda bayon etilsin:

“Oʻzbekiston Respublikasining “Davlat boji toʻgʻrisida”gi Qonuni (bundan buyon matnda “Davlat boji toʻgʻrisida”gi Qonun deb yuritiladi) 3-moddasiga muvofiq davlat boji deganda, yuridik ahamiyatga molik harakatlarni amalga oshirganlik va (yoki) bunday harakatlar uchun vakolatli muassasalar va (yoki) mansabdor shaxslar tomonidan hujjatlar berganlik uchun olinadigan majburiy toʻlov tushuniladi”;

3-bandi quyidagi tahrirda bayon etilsin:

“Tushuntirilsinki, fuqarolik ishlari boʻyicha davlat boji quyidagilardan undiriladi:

1) sudlarga beriladigan daʼvo arizalaridan, alohida tartibda yuritiladigan ishlarga doir arizalardan;

2) hakamlik sudining hal qiluv qarorlari yuzasidan nizolashish haqidagi arizalardan;

3) hakamlik sudining hal qiluv qarorlarini majburiy ijro etish uchun ijro varaqasi berish toʻgʻrisidagi arizalardan;

4) chet davlat sudining hamda chet davlat hakamlik sudining (arbitrajining) hal qiluv qarorini tan olish va ijroga qaratish haqidagi arizalardan;

5) apellatsiya, kassatsiya shikoyatlaridan va nazorat tartibidagi shikoyatlardan:

a) fuqarolik ishlari boʻyicha sudlarning hal qiluv qarorlari ustidan;

b) ish yuritishni tugatish toʻgʻrisidagi, daʼvoni koʻrmasdan qoldirish toʻgʻrisidagi, sud jarimalarini solish toʻgʻrisidagi ajrimlar ustidan;

v) hakamlik sudining hal qiluv qarorlari yuzasidan nizolashish haqidagi ajrimlar ustidan;

g) hakamlik sudining hal qiluv qarorlarini majburiy ijro etish uchun ijro varaqasi berish toʻgʻrisidagi ajrimlar ustidan;

d) chet davlat sudining hamda chet davlat hakamlik sudining (arbitrajining) hal qiluv qarorini tan olish va ijroga qaratish toʻgʻrisidagi ajrimlar ustidan;

6) hujjatlarning dublikatlarini va koʻchirma nusxalarini (shu jumladan, takroriy ravishda beriladigan sud hujjatlarining koʻchirma nusxalarini) berganlik uchun”;

4-bandi quyidagi tahrirda bayon etilsin:

“Fuqarolik ishlari boʻyicha davlat bojini toʻlash bilan bogʻliq masalalar “Oʻzbekiston Respublikasining “Davlat boji toʻgʻrisida”gi Qonuni bilan belgilangan davlat boji stavkalarining miqdorlari, shuningdek Oʻzbekiston Respublikasi Fuqarolik protsessual kodeksining (bundan buyon matnda FPK deb yuritiladi) 13-bobiga muvofiq tartibga solinadi”;

5-bandining ikkinchi, uchinchi va toʻrtinchi xatboshilari quyidagi tahrirda bayon etilsin:

“Davlat bojini naqd pulsiz shaklda toʻlaganligi fakti qogʻozdagi yoki elektron shakldagi toʻlov hujjati bilan tasdiqlanadi.

Davlat bojini naqd pul shaklida toʻlaganligi fakti:

bank tomonidan toʻlovchiga beriladigan belgilangan shakldagi kvitansiya bilan;

belgilangan shaklda toʻlovni amalga oshirgan mansabdor shaxs yoki davlat organi va tashkilotning kassasi tomonidan toʻlovchiga beriladigan kvitansiya bilan tasdiqlanadi.

Daʼvo bahosi chet el valyutasida belgilangan mulkiy nizo boʻyicha sudga ariza berilganda, davlat bojining miqdori ariza taqdim etilgan sanada Oʻzbekiston Respublikasi Markaziy banki tomonidan belgilangan kurs boʻyicha milliy valyutada belgilanadi va undiriladi”;

birinchi xatboshisi quyidagi tahrirda bayon etilsin:

“Shuni nazarda tutish lozimki, toʻlanishi lozim boʻlgan davlat boji miqdori arz qilingan talabning xususiyatiga (mulkiy yoki nomulkiy) bogʻliq boʻladi va “Davlat boji toʻgʻrisida”gi Qonunning 6-moddasiga koʻra, stavkalar boʻyicha aniqlanadi”;

quyidagi mazmundagi uchinchi va toʻrtinchi xatboshilar bilan toʻldirilsin:

“Mulkiy xususiyatga ega boʻlgan, bir necha mustaqil talablardan iborat daʼvo arizalaridan, umumiy daʼvo summasidan kelib chiqqan holda davlat boji undiriladi”.

Sudlarning eʼtibori shunga qaratilsinki, bir necha mustaqil talablarni oʻz ichiga olgan, nomulkiy xususiyatga ega boʻlgan daʼvo arizalaridan har bir talab uchun alohida davlat boji undiriladi”;

uchinchi va toʻrtinchi xatboshilari beshinchi va oltinchi xatboshilar deb hisoblansin;

7-bandining birinchi xatboshisidagi “qonunga koʻra, (SK 337-moddasi)” degan soʻzlar “Davlat boji toʻgʻrisida”gi Qonunning 19-moddasiga koʻra,” degan soʻzlar bilan almashtirilsin;

birinchi xatboshisidagi “toʻlanadi” degan soʻzdan keyin “Davlat boji toʻgʻrisida”gi Qonun 19-moddasining oʻninchi qismi” degan soʻzlar bilan toʻldirilsin;

ikkinchi xatboshisidagi “undiriladi” degan soʻzdan keyin “Davlat boji toʻgʻrisida”gi Qonun 19-moddasining oʻn birinchi qismi” degan soʻzlar bilan toʻldirilsin;

9-bandining ikkinchi xatboshisi quyidagi tahrirda bayon etilsin:

“Shu bilan birga, agar ariza koʻrmasdan qoldirilganligi munosabati bilan davlat boji qaytarilishi lozim boʻlgan, lekin qaytarilmagan boʻlsa, basharti davlat boji budjetga oʻtkazilgan kundan eʼtiboran Oʻzbekiston Respublikasi Fuqarolik kodeksining 150-moddasida belgilangan umumiy daʼvo muddati oʻtmagan boʻlsa, davlat boji toʻlanganligi toʻgʻrisidagi dastlabki hujjat takroran berilgan arizaga ilova qilinishi mumkin (“Davlat boji toʻgʻrisida”gi Qonun 19-moddasining beshinchi qismi)”;

10-bandining birinchi xatboshisi quyidagi tahrirda bayon etilsin:

“Sudga davlat boji toʻlanmagan ariza kelib tushganda, sudya arizachi qonun bilan davlat bojini toʻlashdan ozod qilingan-qilinmaganligini tekshirishi shart. Bunda “Davlat boji toʻgʻrisida”gi Qonunning 8-moddasi fuqarolik ishlari boʻyicha sudlarda davlat bojidan ozod qilingan jismoniy va yuridik shaxslarning qatʼiy roʻyxatiga ega ekanligini nazarda tutish zarur”;

12-bandi:

birinchi xatboshisidagi “FPK 123-moddasining ikkinchi qismi va SK 342-moddasida” degan soʻzlar “Davlat boji toʻgʻrisida”gi Qonun 18-moddasining birinchi qismida” degan soʻzlar bilan almashtirilsin;

ikkinchi xatboshisi quyidagi tahrirda bayon etilsin:

“Sudlarning eʼtibori shunga qaratilsinki, davlat boji summalarining qaytarilishi “Davlat boji toʻgʻrisida”gi Qonun 18-moddasining ikkinchi qismida belgilangan tartibda sudning ajrimiga asosan amalga oshiriladi”;

13-bandi quyidagi mazmundagi sakkizinchi xatboshi bilan toʻldirilsin:

“Sudlarning eʼtibori shunga qaratilsinki, FPK 137-moddasida nazarda tutilgan yoʻqotilgan vaqt uchun haq sud tomonidan ishda mavjud hujjatlar asosida:

daʼvogardan — insofsizlik bilan asossiz daʼvo taqdim etilganda yoxud ishning toʻgʻri va oʻz vaqtida koʻrib chiqilishiga muntazam qarshilik qilingan holda;

javobgardan — insofsizlik bilan daʼvoga qarshi eʼtiroz bildirilganda yoxud ishning toʻgʻri va oʻz vaqtida koʻrib chiqilishiga muntazam qarshilik qilingan holda undirilishi mumkin”;

18-bandi:

toʻrtinchi xatboshisi “undiriladi” degan soʻzdan keyin “(“Davlat boji toʻgʻrisida”gi Qonun 19-moddasining oʻn beshinchi qismi)” degan soʻzlar bilan toʻldirilsin;

quyidagi mazmundagi beshinchi xatboshi bilan toʻldirilsin:

“Sudlarning eʼtibori shunga qaratilsinki, “Davlat boji toʻgʻrisida”gi Qonun 19-moddasining yettinchi qismiga muvofiq ishni sud muhokamasiga tayyorlash muddati tugagunga qadar daʼvogar daʼvodan voz kechganligi munosabati bilan alimentlarni undirish toʻgʻrisidagi ish boʻyicha ish yuritish tugatilgan holda, javobgardan davlat boji undirilmaydi”;

19-bandi birinchi xatboshisining birinchi jumlasi “hisoblab chiqiladi” degan soʻzlardan keyin “Davlat boji toʻgʻrisida”gi Qonun 19-moddasining toʻqqizinchi qismi” degan soʻzlar bilan toʻldirilsin;

21-bandining uchinchi xatboshisidagi “12 oy”, “12 oydan”, “oʻrtacha oylik ish haqi miqdoridan” degan soʻzlar tegishincha “bir yil”, “bir yildan”, “mehnatga haq toʻlashning eng kam miqdoridan” degan soʻzlar bilan almashtirilsin;

22-bandining birinchi xatboshisi “mutanosib ravishda undiriladi” degan soʻzlardan keyin “(“Davlat boji toʻgʻrisida”gi Qonun 19-moddasining oʻn yettinchi qismi)” degan soʻzlar bilan toʻldirilsin;

23-bandi quyidagi tahrirda bayon etilsin:

“FPK 262-moddasi birinchi qismining 3-bandiga koʻra, sud xarajatlari masalasiga doir qoʻshimcha hal qiluv qarori faqat hal qiluv qarorida sud xarajatlarini taqsimlash nazarda tutilmagan holda chiqarilishi mumkin”.

6. Oʻzbekiston Respublikasi Oliy sudi Plenumining “Maʼmuriy ishlar boʻyicha sud xarajatlarini undirish amaliyoti haqida” 2019-yil 25-oktabrdagi 20-sonli qarori:

2-bandining birinchi xatboshisi quyidagi tahrirda bayon etilsin:

“Oʻzbekiston Respublikasining “Davlat boji toʻgʻrisida”gi Qonuni (bundan buyon matnda “Davlat boji toʻgʻrisida”gi Qonun deb yuritiladi) 3-moddasining birinchi qismiga muvofiq davlat boji deganda, yuridik ahamiyatga molik harakatlarni amalga oshirganlik va (yoki) bunday harakatlar uchun vakolatli muassasalar va (yoki) mansabdor shaxslar tomonidan hujjatlar berganlik uchun undiriladigan majburiy toʻlov tushuniladi”;

4-bandi quyidagi tahrirda bayon etilsin:

“Maʼmuriy ishlar boʻyicha davlat bojini toʻlash bilan bogʻliq munosabatlar Oʻzbekiston Respublikasi Maʼmuriy sud ishlarini yuritish toʻgʻrisidagi kodeksining (bundan buyon matnda MSIYutK deb yuritiladi) 12-bobi hamda “Davlat boji toʻgʻrisida”gi Qonun bilan tartibga solinadi”;

7-bandining birinchi xatboshisidagi “qonunga koʻra, (SK 337-moddasi)” degan soʻzlar “Davlat boji toʻgʻrisida”gi Qonunning 19-moddasiga koʻra,” degan soʻzlar bilan almashtirilsin;

9-bandining ikkinchi xatboshisidagi “(SK 337-moddasining beshinchi va yigirma ikkinchi qismlari)” degan soʻzlar “(“Davlat boji toʻgʻrisida”gi Qonun 19-moddasining beshinchi va yigirma ikkinchi qismlari)” degan soʻzlar bilan almashtirilsin;

10-bandining birinchi xatboshisidagi “(SK 330¹-moddasi)” degan soʻzlar “(“Davlat boji toʻgʻrisida”gi Qonunning 10-moddasi)” degan soʻzlar bilan almashtirilsin;

12-bandi:

birinchi xatboshisidagi “SK 342-moddasida” degan soʻzlar “Davlat boji toʻgʻrisida”gi Qonunning 10-moddasida” degan soʻzlar bilan almashtirilsin;

ikkinchi va uchinchi xatboshilari chiqarib tashlansin;

21-bandidagi “SK 330¹-moddasining” degan soʻzlar “Davlat boji toʻgʻrisida”gi Qonun 10-moddasining” degan soʻzlar bilan almashtirilsin.

II. Oʻzbekiston Respublikasi Oliy xoʻjalik sudi Plenumining quyidagi qarorlari oʻz kuchini yoʻqotgan deb hisoblansin:

1) “Iqtisodiy sudlar tomonidan davlat boji toʻgʻrisidagi qonun hujjatlarini qoʻllashning ayrim masalalari haqida” 2008-yil 18-apreldagi 180-sonli qarori;

2) “Iqtisodiy sudlar tomonidan Oʻzbekiston Respublikasi Soliq kodeksi umumiy qismini qoʻllashning ayrim masalalari haqida” 2010-yil 18-iyundagi 210-sonli qarori;

3) “Moliya-xoʻjalik faoliyatini amalga oshirmayotgan va qonunchilikda belgilangan muddatlarda oʻzlarining ustav fondlarini shakllantirmagan korxonalarni tugatishga oid ishlar boʻyicha sud amaliyotining ayrim masalalari toʻgʻrisida” 2010-yil 19-noyabrdagi 221-sonli qarori.