Vazirlar Mahkamasi qaror qiladi:

1. Oʻzbekiston Respublikasi Prezidentining “Nafaqalar, stipendiyalar hamda budjet hisobidagi muassasalar xodimlarining ish haqi miqdorlarini oshirish toʻgʻrisida” 1992-yil 26-martdagi Farmoniga muvofiq Oʻzbekiston davlat banki, tegishli tijorat banklari, respublika vazirliklari va idoralari tomonidan nafaqalar, stipendiyalar va ish haqining Farmon bilan belgilangan yangi miqdorlaridan kelib chiqib, avans toʻlovlar amalga oshirilayotganligi maʼlumot uchun qabul qilinsin.

2. Oʻzbekiston Respublikasi Ijtimoiy taʼminot vazirligi:

nafaqalar eng kam miqdorining 1992-yil 16-martgacha amal qilgan qayta hisob-kitobini oʻtkazsin;

Oʻzbekiston Respublikasi Moliya vazirligi, Pensiya fondi, Mehnat vazirligi va Adliya vazirligi bilan birgalikda 10 kun muddat ichida yuqorida qayd qilingan Farmon bilan belgilangan eng kam miqdordan kelib chiqqan holda ish stajining davomiyligiga va fuqarolarning xizmatlariga bogʻliq ravishda mehnat va shaxsiy pensiyalarni tabaqalashtirish tartibini nazarda tutuvchi Vazirlar Mahkamasi qarorining loyihasini tayyorlasin.

3. Mehnat vazirligi Moliya vazirligi hamda tegishli vazirliklar va idoralar, respublika budjetidan mablagʻ bilan taʼminlanadigan boshqa tashkilotlar va muassasalar bilan birgalikda Oʻzbekiston Kasaba uyushmalari Federatsiyasi Kengashi bilan kelishib, tarif stavkalari va okladlarning — ish haqiga qoʻshimchalarning boshqa turlarini hisobga olgan holda — xalq taʼlimi, sogʻliqni saqlash, madaniyat, ijtimoiy taʼminot, fan, uy-joy-kommunal xoʻjaligi tarmoqlari (nomoddiy ishlab chiqarish sohalari) xodimlari mehnatining ragʻbatlantirilishini taʼminlaydigan yangi miqdorlarini ishlab chiqsin va tasdiqlasin.

4. Oʻzbekiston Respublikasi Moliya vazirligi 2 va 3-bandlarda qayd etilgan aholi toifalari uchun 1992-yil budjetida nafaqalar, stipendiyalar va ish haqini oshirish uchun zarur boʻlgan mablagʻlarni nazarda tutsin, bunda ushbu maqsadlar uchun budjetdan tashqari mablagʻlarni va boshqa manbalarni jalb etishni taʼminlash eʼtiborga olinsin.

5. Vazirliklar, idoralar, uyushmalar, konsernlar, birlashmalar, korxonalar va xoʻjaliklar 1992-yilda va undan keyingi yillarda mehnat unumdorligining oʻsishi va ishlab chiqarish (ishlar, xizmatlar) hajmini oshirish hisobiga ish haqining belgilangan eng kam miqdorini hisobga olgan holda ishlovchilarning ish haqi yanada oʻsishini taʼminlovchi chora-tadbirlarni amalga oshirsinlar.

6. Oʻzbekiston davlat banki, “Oʻzsanoatqurilishbank”, “Oʻzdehqonchiliksanoatbank”, “Oʻzjamgʻarmabank”:

ish haqi, stipendiyalar va nafaqalar toʻlash uchun respublika korxonalari, muassasalari va tashkilotlarini naqd pul bilan oʻz vaqtida taʼminlasinlar;

korxonalar va tashkilotlar tomonidan respublika Pensiya fondiga sugʻurta badallarining oʻz vaqtida va toʻla oʻtkazilishi ustidan qattiq nazorat oʻrnatsinlar.

7. Choʻl va suvsiz joylarda, baland togʻlarda va ogʻir tabiiy-iqlim ish sharoitlarida ishlaganligi uchun avval imtiyozlar joriy etilgan korxonalar, tashkilotlar va muassasalar xodimlarining ish haqiga 1992-yil 1-apreldan boshlab 2500 soʻm miqdorida koeffitsiyentlar hisoblash uchun chegaralangan miqdor belgilansin, ish haqining 2500 soʻmdan oshuvchi qismiga esa koeffitsiyent hisoblanmaydi.

Koeffitsiyentlar hisoblash uchun chegaralangan miqdorning oshishi munosabati bilan ish haqiga sarf-xarajatlar korxonalar, tashkilotlar va muassasalar hisobidan va ularning oʻzlarining mablagʻlari doirasida amalga oshiriladi.

8. Oʻzbekiston Respublikasi Moliya vazirligi 3 kun muddat ichida Oʻzbekiston Respublikasi Oliy Kengashi Rayosatiga keyinchalik ularni Oʻzbekiston Respublikasi Oliy Kengashining navbatdagi sessiyasida koʻrib chiqish uchun fuqarolardan soliq olishning vaqtinchalik tartibi toʻgʻrisida taklif kiritsin.

9. Oʻzbekiston Respublikasi Adliya vazirligi, Mehnat vazirligi manfaatdor vazirliklar va idoralar bilan birgalikda bir oy muddat ichida amaldagi qonunchilikka oʻzgartishlar va qoʻshimchalar kiritish toʻgʻrisidagi taklifni ishlab chiqsinlar va Vazirlar Mahkamasiga kiritsinlar.

10. Vazirlar Mahkamasining 1992-yil 21-yanvardagi 22-son qarorining 6-bandi oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Bosh vazirning oʻrinbosarlari, Vazirlar Mahkamasi komplekslari rahbarlari, Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari zimmasiga yuklatilsin.