Mamlakatda chiqindilar bilan bogʻliq ishlarni amalga oshirish tizimini isloh qilish doirasida hududlarni sanitar tozalash boʻyicha koʻrsatiladigan xizmatlar sifatini oshirish, maishiy chiqindilarni toʻplash va hududlardan olib chiqishning samarali mexanizmlarini joriy etish yuzasidan izchil ishlar olib borilmoqda.

Aholiga sanitar tozalash xizmatlarini koʻrsatish koʻlami ortmoqda, shu jumladan hududlarda 174 ta tuman (shahar) filiallaridan iborat 13 ta “Toza hudud” davlat unitar korxonalari tashkil etildi, ushbu sohaga elektron tanlovlar asosida hududlarni biriktirishning shaffof mexanizmlari orqali tadbirkorlik subyektlari faol jalb qilinmoqda.

Chiqindilar bilan bogʻliq infratuzilma takomillashtirilmoqda, tasdiqlangan dasturlar doirasida yangi chiqindi toʻplash shoxobchalari qurilmoqda va konteynerlar bilan jihozlanmoqda, chiqindilarni toʻplash va olib chiqish ishlari bilan shugʻullanuvchi tashkilotlarning transport saroylari yangilanmoqda.

Shu bilan birga hududlarda maishiy chiqindilarni toʻplash va olib chiqish ishlarida ayrim muammolarning mavjudligi chiqindilar bilan bogʻliq samarali tizimni shakllantirishga hamda sohani yanada rivojlantirishga toʻsqinlik qilmoqda, jumladan:

birinchidan, toʻlov intizomi darajasining pastligi qattiq maishiy chiqindilarni toʻplash va olib chiqish xizmatlarini koʻrsatuvchi tashkilotlarning (keyingi oʻrinlarda — xizmat koʻrsatuvchi tashkilotlar) moliyaviy koʻrsatkichlariga salbiy taʼsir koʻrsatib, asosiy fondlarni yangilash va xizmatlar sifatini oshirishga investitsiya kiritish imkoniyatlarini cheklamoqda, shuningdek, ushbu sohaga tadbirkorlik subyektlarini jalb qilishga toʻsiq boʻlmoqda;

ikkinchidan, isteʼmolchilarning va ular tomonidan toʻlangan toʻlovlarning yagona hisobi amalda yuritilmayapti, bu esa ushbu sohada naqd pul mablagʻlari bankdan tashqari aylanishiga va ularni oʻzlashtirish holatlariga zamin yaratmoqda;

uchinchidan, mahalliy ijro etuvchi hokimiyat organlari hududlarni sanitar tozalash va ulardagi ekologik holatni yaxshilash boʻyicha oʻzlariga yuklatilgan vazifalarni bajarish uchun yetarli moliyaviy va tashkiliy imkoniyatlarga ega emas;

toʻrtinchidan, mahalliy ijro etuvchi hokimiyat organlari va xizmat koʻrsatuvchi tashkilotlar oʻrtasida oʻzaro hamkorlikning, shu jumladan, davlat-xususiy sheriklik bitimlari doirasida hamkorlikning aniq maʼmuriy va bozor mexanizmlari ishlab chiqilmagan.

Maishiy chiqindilar bilan bogʻliq tizimni yanada rivojlantirish, qattiq maishiy chiqindilarni toʻplash va olib chiqish sohasida toʻlov intizomini mustahkamlash, aholining sifatli sanitar tozalash xizmatlari bilan taʼminlanganlik darajasini oshirish maqsadida:

1. Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda — Byuro) zimmasiga 2019-yil 1-yanvardan boshlab qattiq maishiy chiqindilarni toʻplash va olib chiqish xizmatlari uchun aholi tomonidan majburiy toʻlovlar toʻliq va oʻz vaqtida toʻlanishini taʼminlash boʻyicha qoʻshimcha vazifa yuklatilsin.

2. 2019-yil 1-yanvardan boshlab shunday tartib joriy etilsinki, unga koʻra:

a) qattiq maishiy chiqindilarni toʻplash va olib chiqish xizmatlari uchun majburiy toʻlovlar aholi tomonidan toʻlov amalga oshirilgan oʻtgan oydan keyingi oyning oʻninchi sanasidan kechikmay yagona tranzit bank hisobvaraqlariga toʻlanadi va keyinchalik Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus gʻazna hisobvaraqlariga oʻtkaziladi;

b) xizmat koʻrsatuvchi tashkilotlar tomonidan qattiq maishiy chiqindilarni toʻplash va olib chiqish boʻyicha aholiga koʻrsatilgan xizmatlar uchun toʻlov Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari va xizmat koʻrsatuvchi tashkilotlar oʻrtasida tuziladigan davlat-xususiy sheriklik bitimlari va shartnomalarga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan markazlashtirilgan holda amalga oshiriladi;

v) qattiq maishiy chiqindilarni toʻplash va olib chiqish xizmatlari uchun yuridik shaxslar va yakka tartibdagi tadbirkorlar tomonidan toʻlov isteʼmolchilar va xizmat koʻrsatuvchi tashkilotlar oʻrtasida tuziladigan shartnomalarga muvofiq bevosita xizmat koʻrsatuvchi tashkilotlarga 100 foiz oldindan toʻlash asosida amalga oshiriladi;

g) qattiq maishiy chiqindilarni toʻplash va olib chiqish xizmatlari uchun majburiy toʻlovlar toʻlash boʻyicha jismoniy shaxslardan qarzdorlikni undirish toʻgʻrisidagi arizalar Oʻzbekiston Respublikasi Ekologiya va atrof-muhitni muhofaza qilish davlat qoʻmitasining (keyingi oʻrinlarda — Davlat ekologiya qoʻmitasi) hududiy organlari tomonidan toʻlov olti oydan ortiq toʻlanmagan taqdirda sudlarga kiritiladi;

d) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus gʻazna hisobvaraqlarida jamlangan mablagʻlar faqatgina Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari va xizmat koʻrsatuvchi tashkilotlar oʻrtasida tuzilgan shartnomalarga muvofiq xizmat koʻrsatuvchi tashkilotlar tomonidan qattiq maishiy chiqindilarni toʻplash va olib chiqish boʻyicha aholiga koʻrsatilgan xizmatlar haqini markazlashgan tartibda toʻlashga, shuningdek ushbu Farmonning 4-bandida nazarda tutilgan maqsadlarga sarflanadi.

3. Davlat ekologiya qoʻmitasi hududiy organlari huzurida yuridik shaxs tashkil qilmagan holda sanitar tozalash xizmatlarini tashkil etish markazlari (keyingi oʻrinlarda — sanitar tozalash markazlari) 1-ilovaga muvofiq namunaviy tuzilma asosida tashkil etilsin.

Bunda, har bir tuman (shahar)ga sanitar tozalash markazining bir nafardan mutaxassisi biriktirilib, ular tegishli tuman (shahar)da faoliyat yuritishi hamda tuman (shahar) hokimliklari va fuqarolarning oʻzini oʻzi boshqarish organlari bilan oʻzaro hamkorlik qilish ishlariga, shuningdek, fuqarolarning murojaatlari bilan ishlashga masʼul ekanligi belgilansin.

Quyidagilar sanitar tozalash markazlarining asosiy vazifalari etib belgilansin:

maishiy chiqindilarni toʻplash va olib chiqish xizmatlari koʻrsatilishini tashkil etish uchun hududlarni tadbirkorlik subyektlariga biriktirish maqsadida elektron tanlovlarni uyushtirishda buyurtmachining ishchi organi vazifasini amalga oshirish;

qattiq maishiy chiqindilarni toʻplash va olib chiqish xizmatlari uchun majburiy toʻlovlarni toʻlovchi jismoniy shaxslarning (shu jumladan, ular bilan birga yashaydigan shaxslarning) haqqoniy hisobi tuman (shahar) hokimliklari va fuqarolarning oʻzini oʻzi boshqarish organlari bilan hamkorlikda yuritilishini, shuningdek, ushbu axborot qattiq maishiy chiqindilarni toʻplash va olib chiqish xizmatlari uchun aholi tomonidan majburiy toʻlovlarni toʻlash va hisobini yuritishning yagona elektron tizimiga oʻz vaqtida kiritilishini tashkil etish;

davlat-xususiy sheriklik toʻgʻrisidagi bitimlar hamda aholiga qattiq maishiy chiqindilarni toʻplash va olib chiqish xizmatlarini koʻrsatish haqidagi shartnomalar boʻyicha majburiyatlar xizmat koʻrsatuvchi tashkilotlar tomonidan bajarilishi ustidan nazoratni amalga oshirish;

qattiq maishiy chiqindilarni toʻplash va olib chiqish xizmatlari uchun tariflarni belgilangan tartibda shakllantirishni tashkil etish;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari maxsus gʻazna hisobvaraqlarida jamlangan mablagʻlar hisobidan markazlashgan toʻlovlarni amalga oshirish orqali aholiga koʻrsatilgan qattiq maishiy chiqindilarni toʻplash va olib chiqish xizmatlari uchun xizmat koʻrsatuvchi tashkilotlar bilan oʻzaro hisob-kitoblarni taʼminlash;

jismoniy va yuridik shaxslar murojaatlarini koʻrib chiqish, fuqarolarning oʻzini oʻzi boshqarish organlari bilan hamkorlikda hududlarni sanitar tozalash va chiqindilar bilan bogʻliq masalalar yuzasidan tushuntirish ishlari olib borish;

Byuro, tuman (shahar) hokimliklari, xizmat koʻrsatuvchi tashkilotlar hamda fuqarolarning oʻzini oʻzi boshqarish organlari bilan oʻzaro hamkorlikni amalga oshirish.

4. Belgilansinki, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari maxsus gʻazna hisobvaraqlarida jamlangan mablagʻlarning:

5 foizidan koʻp boʻlmagan miqdori har yili tasdiqlanadigan xarajatlar smetasi doirasida sanitar tozalash markazlari faoliyatini moliyalashtirishga yoʻnaltiriladi;

5 foizi Davlat ekologiya qoʻmitasi tomonidan tasdiqlanadigan smeta boʻyicha Sanitar tozalash boʻyicha ixtisoslashtirilgan korxonalar respublika birlashmasi faoliyatini moliyalashtirishga, shuningdek, chiqindilar bilan bogʻliq infratuzilmani rivojlantirish tadbirlarini amalga oshirishga yoʻnaltiriladi.

5. Davlat ekologiya qoʻmitasi 2019-yil 1-yanvarga qadar:

Byuroga tegishli vazifalar oʻtkazilishini inobatga olib, “Toza hudud” va “Maxsustrans” davlat unitar korxonalaridagi yakka tartibdagi va koʻp kvartirali uy-joylar uchastkalari nazoratchilari shtatlar sonining qisqartirilishini taʼminlasin;

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda qattiq maishiy chiqindilarni toʻplash va olib chiqish xizmatlari uchun aholi tomonidan majburiy toʻlovlarni toʻlash va hisobini yuritishning yagona elektron tizimi ishlashini, shuningdek, tizimga sanitar tozalash markazlari va Byuroning ulanishini taʼminlasin;

Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari va xizmat koʻrsatuvchi tashkilotlar bilan birgalikda qattiq maishiy chiqindilarni toʻplash va olib chiqish xizmatlari uchun majburiy toʻlovlarni toʻlovchi jismoniy shaxslarni xatlovdan oʻtkazsin, ularga shaxsiy hisobvaraqlar ochilishini, shuningdek, mavjud qarzdorlik toʻgʻrisida axborot qattiq maishiy chiqindilarni toʻplash va olib chiqish xizmatlari uchun aholi tomonidan majburiy toʻlovlarni toʻlash va hisobini yuritishning yagona elektron tizimiga kiritilishini taʼminlasin.

6. Belgilansinki, qattiq maishiy chiqindilarni toʻplash va olib chiqish xizmatlarini koʻrsatish sohasida:

a) Byuro qattiq maishiy chiqindilarni toʻplash va olib chiqish xizmatlari uchun aholidan majburiy toʻlovlar toʻliq va oʻz vaqtida tushishini taʼminlash, ushbu sohadagi qarzdorlikni kamaytirish uchun javobgardir;

b) xizmat koʻrsatuvchi tashkilotlar Qattiq va suyuq maishiy chiqindilarni toʻplash va olib chiqib ketish xizmatlari koʻrsatish qoidalariga qatʼiy muvofiq holda qattiq maishiy chiqindilarni toʻplash va olib chiqish xizmatlarini koʻrsatish, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan tuziladigan davlat-xususiy sheriklik toʻgʻrisidagi bitimlar va shartnomalardagi majburiyatlarga rioya etish uchun javobgardir;

v) Davlat ekologiya qoʻmitasi:

qattiq maishiy chiqindilarni toʻplash va olib chiqish xizmatlari uchun aholi tomonidan majburiy toʻlovlarni toʻlash va hisobini yuritishning yagona elektron tizimini shakllantirish, mazkur tizimning boshqarilishini va uzluksiz faoliyat yuritishini taʼminlash;

chiqindilar bilan bogʻliq sohadagi qonun hujjatlariga rioya etilishi ustidan davlat nazoratini belgilangan tartibda amalga oshirish uchun javobgardir;

g) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻzlarining maxsus gʻazna hisobvaraqlarida jamlangan mablagʻlarning ushbu Farmonning 2-bandi “d” kichik bandida va 4-bandida nazarda tutilgan maqsadlarga oʻz vaqtida yoʻnaltirilishini tashkil etish uchun javobgardir.

7. Byuro bir oy muddatda:

Oʻzbekiston Respublikasi Markaziy banki bilan birgalikda aholi qattiq maishiy chiqindilarni toʻplash va olib chiqish xizmatlari uchun majburiy toʻlovlarni toʻlashi uchun tushumlarning haqqoniy hisobini va monitoringini yuritish imkonini beradigan yagona tranzit bank hisobvaraqlari ochilishini taʼminlasin;

fuqarolarning oʻzini oʻzi boshqarish organlari va aholi yagona tranzit bank hisobvaraqlari hamda qattiq maishiy chiqindilarni toʻplash va olib chiqish xizmatlari uchun majburiy toʻlovlarni aholi tomonidan toʻlash tartibi haqida xabardor qilinishini taʼminlasin.

8. Davlat ekologiya qoʻmitasi va Bosh prokuratura boshqa vazirlik va idoralar bilan birgalikda 2018-yil 20-dekabrga qadar Qattiq va suyuq maishiy chiqindilarni toʻplash va olib chiqib ketish xizmatlari koʻrsatish qoidalarining yangi tahrirdagi loyihasini belgilangan tartibda Oʻzbekiston Respublikasi Vazirlar Mahkamasiga kiritsin, unda:

chiqindilar bilan bogʻliq sohadagi oxirgi oʻzgarishlarni inobatga olgan holda isteʼmolchilar, xizmat koʻrsatuvchi tashkilotlar, davlat organlari va fuqarolarning oʻzini oʻzi boshqarish organlari oʻrtasidagi yangi huquqiy munosabatlar tartibi;

qattiq maishiy chiqindilarni toʻplash va olib chiqish xizmatlari uchun majburiy toʻlovlarni toʻlovchi jismoniy shaxslar hisobini yuritish, shuningdek, belgilangan tarifdan kelib chiqib toʻlanishi lozim boʻlgan oylik majburiy toʻlovlar miqdorini belgilash mexanizmlari;

Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari va xizmat koʻrsatuvchi tashkilotlar oʻrtasida davlat-xususiy sheriklik toʻgʻrisidagi namunaviy bitimni hamda aholiga qattiq maishiy chiqindilarni toʻplash va olib chiqish xizmatlarini koʻrsatish toʻgʻrisidagi namunaviy shartnomani tasdiqlash nazarda tutilsin.

9. Oʻzbekiston Milliy axborot agentligi, Oʻzbekiston Milliy teleradiokompaniyasi, Oʻzbekiston Respublikasi Bosh prokuraturasi, Davlat ekologiya qoʻmitasi boshqa manfaatdor vazirlik va idoralar bilan birgalikda mazkur Farmonning mazmuni va mohiyati, shu jumladan, maishiy chiqindilarni toʻplash va olib chiqish xizmatlari uchun toʻlovlarni oʻz vaqtida amalga oshirish zarurligi, ushbu sohadagi huquqbuzarliklar uchun qoʻllaniladigan javobgarlik choralari ommaviy axborot vositalarida keng yoritilishini tashkil etsin.

10. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartish va qoʻshimchalar kiritilsin.

11. Davlat ekologiya qoʻmitasi Adliya vazirligi, Byuro, boshqa manfaatdor idoralar bilan birgalikda bir oy muddatda:

qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin;

idoraviy normativ-huquqiy hujjatlarni ushbu Farmonga muvofiqlashtirilishini taʼminlasin.

12. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Bosh prokurori O.B. Murodov va Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov zimmasiga yuklansin.

1. Oʻzbekiston Respublikasi Prezidentining 2017-yil 29-maydagi PF-5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi Farmoni:

1) 2-bandida:

uchinchi xatboshidagi “tarmoqlariga” soʻzi “vodoprovod va kanalizatsiya tarmoqlariga, suv quvurlariga” soʻzlari bilan almashtirilsin;

toʻrtinchi xatboshidagi “uchun toʻlovlarning” soʻzlari “va suv uchun toʻlovlarning, qattiq maishiy chiqindilarni toʻplash va olib chiqish uchun aholidan kelib tushadigan majburiy toʻlovlarning” soʻzlari bilan almashtirilsin;

beshinchi xatboshi “energiya resurslari” soʻzlaridan keyin “va suv” soʻzlari bilan toʻldirilsin;

oltinchi xatboshi “energiya resurslarini” soʻzlaridan keyin “va suvni” soʻzlari bilan toʻldirilsin;

yettinchi xatboshi quyidagi tahrirda bayon etilsin:

“energiya resurslari va suvni ehtiyot qilish va ulardan oqilona foydalanish, shuningdek, qattiq maishiy chiqindilar bilan bogʻliq ishlarni amalga oshirish boʻyicha isteʼmolchilarning masʼuliyati va huquqiy madaniyatini oshirish choralarini koʻrish”;

sakkizinchi xatboshi quyidagi tahrirda bayon etilsin:

“kompleks tahlil oʻtkazish, tizimli muammolarni aniqlash, energiya resurslari hamda suv taʼminoti va suv chiqarish xizmati toʻlovlari hisob-kitob qilinishini, kattiq maishiy chiqindilarni toʻplash va olib chiqish uchun aholidan majburiy toʻlovlarning toʻlanishini taʼminlash, majburiy ijro tizimini takomillashtirish boʻyicha takliflar ishlab chiqish”;

2) 6-bandida:

beshinchi — toʻqqizinchi xatboshilar quyidagi mazmundagi beshinchi — oʻn ikkinchi xatboshilar bilan almashtirilsin:

“respublika isteʼmolchilariga energiya resurslari sotishdan, shuningdek, suv taʼminoti va suv chiqarish xizmati koʻrsatishdan tushgan mablaglarning 10 foizi;

vakolatli organlar tomonidan olib koʻyilgan va davlat daromadiga oʻtkazilgan mol-mulklarni sotishdan, shuningdek, karzdorning mol-mulkini sotish hisobiga soliq qarzdorligini (davlat bojidan tashqari) undirishdan tushgan mablagʻlarning 8 foizi;

Byuro organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan mol-mulklarni sotishdan tushgan mablagʻlarning 8 foizi;

davlat ijrochilari tomonidan undiriladigan ijro yigʻimi mablagʻlarining 80 foizi;

Byuro xodimlari tomonidan koʻllaniladigan va undiriladigan jarimalar summasining 80 foizi;

Jamgʻarmaning vaqtincha boʻsh mablagʻlarini joylashtirishdan olinadigan daromadlar;

Byuro boʻlinmalari, shuningdek, prokuratura organlarining Jamgʻarma mablagʻlari hisobidan xarid qilingan asosiy vositalarini sotishdan olingan mablagʻlarning 50 foizi;

qonun hujjatlari bilan taqiqlanmagan boshqa daromadlar.”;

oʻninchi — oʻn uchinchi xatboshilar tegishlicha oʻn uchinchi — oʻn oltinchi xatboshilar deb hisoblansin.

2. Oʻzbekiston Respublikasi Prezidentining 2018-yil 15-fevraldagi PF-5343-son “Prokuratura organlarining qabul qilinayotgan normativ-huquqiy hujjatlar ijrosini taʼminlashdagi faoliyati samaradorligini oshirish boʻyicha qoʻshimcha chora-tadbirlar toʻgʻrisida”gi Farmoni 8-bandi birinchi xatboshidagi “suv chiqarish xizmati” soʻzlaridan keyin “koʻrsatilgan qattiq maishiy chiqindilarni toʻplash va olib chiqib ketish xizmatlari uchun majburiy toʻlovlar” soʻzlari bilan toʻldirilsin.

3. Oʻzbekiston Respublikasi Prezidentining 2017-yil 30-maydagi PQ-3016-son “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida”gi qarorida:

1) 2-bandi birinchi xatboshi quyidagi tahrirda bayon etilsin:

“Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda Byuro deb ataladi) boshqaruv va ishlab chiqarish xodimlarining cheklangan soni 12 074 nafar, shu jumladan, markaziy apparatda 142 nafar etib belgilansin, shundan 1301 nafari Oʻzbekiston Respublikasining Davlat budjetidan, 10 773 nafari Majburiy ijro byurosini rivojlantirish jamgʻarmasi mablagʻlari hisobidan moliyalashtiriladi”;

2) 1 — 3-ilovalar (Oʻzbekiston Respublikasi Bosh prokuraturasi huzuridagi Majburiy ijro byurosi markaziy apparatining tashkiliy-shtat tuzilmasi, Majburiy ijro byurosi Qoraqalpogʻiston Respublikasi, viloyatlar va Toshkent shahar boshqarmalarining namunaviy tashkiliy-shtat tuzilmasi, Majburiy ijro byurosi tuman (shahar) boʻlimlarining namunaviy tashkiliy-shtat tuzilmasi) quyidagi tahrirda bayon etilsin:

3) 4-ilovada (Oʻzbekiston Respublikasi Bosh prokuraturasi huzuridagi Majburiy ijro byurosi toʻgʻrisidagi nizom):

a) 9-band quyidagi tahrirda bayon etilsin:

“9. Quyidagilar Byuroning asosiy vazifalari hisoblanadi:

sud hujjatlari va boshqa organlar hujjatlarining soʻzsiz ijrosini taʼminlash, ijro hujjatlari hamda undirilgan mablagʻlarning haqqoniy hisobini yuritish, ijro ishi yuritishda sansalorlik va suiisteʼmolchilik holatlarini oldini olish;

elektr, gaz uzatish va gaz taqsimlash, vodoprovod va kanalizatsiya tarmoqlariga, suv quvurlariga noqonuniy ulanish, talon-toroj holatlarini aniqlash, bartaraf etish va oldini olish;

elektr energiyasi va tabiiy gaz (keyingi oʻrinlarda energiya resurslari deb ataladi), suv uchun toʻlovlarning, qattiq maishiy chiqindilarni toʻplash va olib chiqish uchun aholidan kelib tushadigan majburiy toʻlovlarning oʻz vaqtida va toʻliq undirilishini, isteʼmolchilarning qarzdorligi kamaytirilishini taʼminlash;

energiya resurslari va suv isteʼmolini nazorat qilish va hisobga olishning zamonaviy avtomatlashtirilgan tizimlari, shuningdek, muqobil energiya manbalarining joriy etilishi ustidan monitoring oʻtkazish;

energiya resurslarini va suvni sotish va isteʼmoli hisobini yuritishda ishtirok etish;

energiya resurslari va suvni ehtiyot qilish va ulardan oqilona foydalanish, shuningdek, qattiq maishiy chiqindilar bilan bogʻliq ishlarni amalga oshirish boʻyicha isteʼmolchilarning masʼuliyati va huquqiy madaniyatini oshirish choralarini koʻrish;

kompleks tahlil oʻtkazish, tizimli muammolarni aniqlash, energiya resurslari hamda suv taʼminoti va suv chiqarish xizmati toʻlovlari hisob-kitob qilinishini, qattiq maishiy chiqindilarni toʻplash va olib chiqish uchun aholidan kelib tushadigan majburiy toʻlovlarning toʻlanishini taʼminlash, majburiy ijro tizimini takomillashtirish boʻyicha takliflar ishlab chiqish;

qonun hujjatlarida belgilangan tartibda maʼmuriy huquqbuzarliklar toʻgʻrisidagi ishlarni yuritish, surishtiruv va tezkor-qidiruv faoliyatini amalga oshirish”;

b) 10-bandda:

“v” kichik bandi quyidagi tahrirda bayon etilsin:

“v) energiya resurslari, suv taʼminoti va suv chiqarish xizmati toʻlovlari, qattiq maishiy chiqindilarni toʻplash va olib chiqish uchun majburiy toʻlovlarning oʻz vaqtida va toʻliq undirilishini, isteʼmolchilarning qarzdorligini kamaytirishni taʼminlash sohasida:

isteʼmolchilar, isteʼmol kilingan energiya resurslari, suv hajmlari, ular uchun amalga oshirilgan toʻlovlar, yuzaga kelgan qarzdorlik, shuningdek, qattik maishiy chiqindilarni toʻplash va olib chiqish uchun aholi tomonidan amalga oshirilgan majburiy toʻlovlar hisobini shakllantirish va yuritishda qatnashadi;

isteʼmolchilar, elektr, gaz, suv taʼminoti va kanalizatsiya tarmoqlariga ulanish nuqtalari toʻgʻrisida, shuningdek, isteʼmol qilingan energiya resurslari va suv hajmlarini aniqlashda elektr, gaz taʼminoti, vodoprovod-kanalizatsiya xoʻjaligi hamda boshqa tashkilotlar bilan maʼlumotlar almashinuvini amalga oshiradi;

energiya resurslari, suv taʼminoti va suv chiqarish xizmati uchun toʻlovlarni, shuningdek, qattiq maishiy chiqindilarni toʻplash va olib chiqish uchun aholidan majburiy toʻlovlarni toʻliq va oʻz vaqtida undirilishini tashkil qiladi;

isteʼmolchi — yuridik shaxslar va yakka tartibdagi tadbirkorlarning qarzdorligi soʻzsiz undirilishini amalga oshiradi, elektr energiyasi va tabiiy gaz taʼminoti, vodoprovod-kanalizatsiya xoʻjaligi korxonalari manfaatida qarzdorlikni undirish boʻyicha talabnoma-daʼvo ishlarini olib boradi;

ijro hujjatlari asosida energiya resurslari, suv taʼminoti va suv chiqarish xizmati uchun toʻlovlar, shuningdek, qattiq maishiy chiqindilarni toʻplash va olib chiqish uchun majburiy toʻlovlar boʻyicha qarzdorlikni majburiy undirishni amalga oshiradi”;

“e” kichik bandining birinchi va ikkinchi xatboshilari quyidagi tahrirda bayon etilsin:

“e) energiya resurslari va suvni ehtiyot qilish va ulardan oqilona foydalanish, shuningdek, qattiq maishiy chiqindilar bilan bogʻliq ishlarni amalga oshirish boʻyicha isteʼmolchilarning masʼuliyati va huquqiy madaniyatini oshirish choralarini koʻrish sohasida:

energiya resurslari, suv taʼminoti va suv chiqarish xizmati uchun toʻlovlarning, shuningdek, qattiq maishiy chiqindilarni toʻplash va olib chiqish uchun majburiy toʻlovlarning oʻz vaqtida va toʻliq amalga oshirilishi, sud hujjatlari va boshqa organlar hujjatlari soʻzsiz va ixtiyoriy ijro etilishi yuzasidan isteʼmolchilarning madaniyatini yuksaltirish boʻyicha kompleks chora-tadbirlar koʻradi”;

“j” kichik bandining birinchi — toʻrtinchi xatboshilari quyidagi tahrirda bayon etilsin:

“j) kompleks tahlil oʻtkazish, tizimli muammolarni aniqlash, energiya resurslari hamda suv taʼminoti va suv chiqarish xizmati toʻlovlari hisob-kitob qilinishini, qattiq maishiy chiqindilarni toʻplash va olib chiqish uchun aholidan kelib tushadigan majburiy toʻlovlarning toʻlanishini taʼminlash, majburiy ijro tizimini takomillashtirish boʻyicha takliflar ishlab chiqish sohasida:

sud hujjatlari va boshqa organlar hujjatlarini ijro etish, energiya resurslari, suv taʼminoti va suv chiqarish xizmati uchun toʻlovlar hisob-kitob qilinishini, qattiq maishiy chiqindilarni toʻplash va olib chiqish uchun aholidan majburiy toʻlovlarni undirishni taʼminlash sohasida huquqni qoʻllash amaliyotini taxdil qiladi va umumlashtiradi, shuningdek, uni takomillashtirish boʻyicha takliflar kiritadi;

Byuro faoliyatining natijalari, ijro ishi yuritish va energiya resurslari, suv taʼminoti va suv chiqarish xizmati uchun toʻlovlarning, shuningdek, qattiq maishiy chiqindilarni toʻplash va olib chiqish uchun majburiy toʻlovlarning undirilishi haqida statistik maʼlumotlar bazasini shakllantiradi hamda ularning haqqoniyligini taʼminlaydi;

energiya resurslaridan foydalanish, suv taʼminoti va suv chiqarish xizmati, qattiq maishiy chiqindilar sohasida shartnoma-toʻlov intizomini mustahkamlash, shuningdek, ijro ishi yuritish tizimini takomillashtirishga qaratilgan normativ-huquqiy hujjatlar loyihalarini ishlab chiqadi va ularni tayyorlashda ishtirok etadi”;

v) 11-bandning “b” kichik bandida:

birinchi xatboshidagi “energiya resurslari” soʻzlaridan keyin “suv taʼminoti va suv chiqarish xizmati toʻlovlari, shuningdek, qattiq maishiy chiqindilarni toʻplash va olib chiqish uchun majburiy toʻlovlar” soʻzlari bilan toʻldirilsin;

uchinchi xatboshi quyidagi tahrirda bayon etilsin:

“energiya resurslari, suv taʼminoti va suv chiqarish xizmati isteʼmoli, toʻlovlarning oʻz vaqtida va toʻliqligini nazorat qilish va monitoringini amalga oshirish, shuningdek, qattiq maishiy chiqindilarni toʻplash va olib chiqish uchun majburiy toʻlovlarni toʻlovchi jismoniy shaxslarning hamda ular tomonidan kiritilgan toʻlovlarning hisobi toʻgʻri olib borishini nazorat qilish uchun zarur boʻlgan maʼlumotlarni vazirliklar, idoralar, boshqa tashkilotlar va fuqarolardan talab qilib olish”;

toʻrtinchi xatboshidagi “energiya resurslari” soʻzlaridan keyin “suv taʼminoti va suv chiqarish xizmati toʻlovlari, shuningdek qattiq maishiy chiqindilarni toʻplash va olib chiqish uchun majburiy toʻlovlar boʻyicha qarzdorliklar” soʻzlari bilan toʻldirilsin;

oʻninchi xatboshi quyidagi tahrirda bayon etilsin:

“vazirliklar, idoralar, boshqa tashkilotlar, shu jumladan, fuqarolarning oʻzini oʻzi boshqarish organlariga energiya resurslarini va suvni yetkazib berish qamda isteʼmol qilish, qattiq maishiy chikindilarni toʻplash va olib chiqish boʻyicha xizmat koʻrsatish sohasidagi hukuqbuzarliklar sodir etilishiga imkon berayotgan sabab va shart-sharoitlarni bartaraf etish, shuningdek, energiya resurslari, suv taʼminoti va suv chiqarish xizmati toʻlovlari hamda qattiq maishiy chiqindilarni toʻplash va olib chiqish uchun majburiy toʻlovlar boʻyicha hisob-kitoblarni muntazam ravishda amalga oshirmayotgan isteʼmolchilarga nisbatan jamoat taʼsir choralarini koʻrish haqida takdimnomalar kiritish”.

oʻn ikkinchi xatboshidagi “energiya resurslari” soʻzlari “energiya resurslari, suv taʼminoti va suv chiqarish xizmati toʻlovlari, shuningdek, qattiq maishiy chiqindilarni toʻplash va olib chiqish uchun majburiy toʻlovlar” soʻzlari bilan almashtirilsin;

oʻzbek tilidagi matni oʻn uchinchi xatboshi bilan toʻldirilsin:

“yetkazib berilgan energiya resurslari, suv taʼminoti va suv chiqarish xizmati toʻlovlari hamda qattiq maishiy chiqindilarni toʻplash va olib chiqib ketish uchun majburiy toʻlovlar uchun har oyda eng kam ish haqining ikki baravaridan koʻp boʻlmagan miqdordagi qarzdorlikni isteʼmolchilarning plastik kartalariga xizmat koʻrsatiladigan bank hisobraqamlaridan nizosiz tartibda hisobdan chiqarish”;

oʻn uchinchi — oʻn oltinchi xatboshilar tegishli ravishda oʻn toʻrtinchi — oʻn yettinchi xatboshilar deb hisoblansin.

g) 12-bandning uchinchi xatboshi quyidagi tahrirda bayon etilsin:

“energiya resurslari, suv taʼminoti va suv chiqarish xizmati toʻlovlari, shuningdek, qattiq maishiy chiqindilarni toʻplash va olib chiqish uchun majburiy toʻlovlarning oʻz vaqtida va toʻliq undirilishini, isteʼmolchilarning qarzdorligi kamaytirilishini taʼminlash”;

d) 21-band quyidagi tahrirda bayon etilsin:

“21. Prokuratura organlari xodimlari oʻz maqomiga koʻra:

markaziy apparati boshqaruv xodimlari;

Byuroning hududiy boshqarmalari boshqaruv xodimlari (moliya-xoʻjalik tuzilmalari bundan mustasno);

tuman (shahar) boʻlimlari boshliqlari, ularning oʻrinbosarlari, davlat ijrochilari, surishtiruvchilar, shuningdek, Byuro boʻlinmalarining tezkor shuʼbalari va qidiruv boʻyicha guruhlari (shuʼbalari) xodimlari.

Ushbu xodimlarga darajali unvonlar beriladi va ular Oʻzbekiston Respublikasi Prezidenti tomonidan tasdiqlanadigan Oʻzbekiston Respublikasi Bosh prokuraturasi huzuridagi Majburiy ijro byurosida xizmatni oʻtash toʻgʻrisidagi nizomga muvofiq xizmatni oʻtaydilar.

Byuroning boshqa xodimlari faoliyatni mehnat shartnomalariga asosan, prokuratura organlariga qabul qilishda koʻyiladigan talablar hisobga olingan holda, amalga oshiradi. Byuroningtuman (shahar) boʻlimlari energiya resurslari, suv va maishiy chiqindilar boʻyicha qarzdorlikni undirish va nazorat qilish guruhlari (shuʼbalari)ning davlat inspektorlari, qoida tariqasida, olti oy muddatga tuziladigan mehnat shartnomalariga asosan ishga qabul qilinadi. Ushbu xodimlar bilan mehnat munosabatlarini davom ettirishning asosiy sharti — biriktirilgan hududda energiya resurslari, suv taʼminoti va suv chiqarish xizmati uchun toʻlovlar, shuningdek, qattiq maishiy chiqindilar toʻplash va olib chiqish uchun majburiy toʻlovlardan qarzdorlikning kamida 80 foizdan kam boʻlmagan miqdorda undirilishini taʼminlash hisoblanadi.

Mazkur bandning oltinchi xatboshida koʻrsatilgan:

xodimlarga Bosh prokuror tomonidan oʻrnatilgan tartibda maxsus toifalar beriladi, shuningdek, ularga maxsus toifalar va uzoq yil xizmat qilganlik uchun ustama haqi toʻlanadi;

prokuratura organlaridan oʻtkazilgan xodimlarda prokuratura organlari xodimlari uchun qonun hujjatlarida nazarda tutilgan huquq, imtiyoz va boshqa afzalliklar saqlanib qolinadi”.

4. Oʻzbekiston Respublikasi Prezidentining 2017-yil 15-iyundagi PQ-3060-son qarori bilan tasdiqlangan Majburiy ijro byurosini rivojlantirish jamgʻarmasi toʻgʻrisidagi nizomning 4-bandi:

quyidagi mazmundagi toʻrtinchi xatboshi bilan toʻldirilsin:

“Byuro organlari tomonidan olib qoʻyilgan va qonun hujjatlarida belgilangan tartibda davlat daromadiga oʻtkazilgan mol-mulkni sotishdan tushgan mablagʻlarning 8 foizi;”

toʻrtinchi — sakkizinchi xatboshilari tegishlicha beshinchi — toʻqqizinchi xatboshilar deb hisoblansin.

5. Oʻzbekiston Respublikasi Prezidentining 2017-yil 27-iyuldagi PQ-3149-son qarori bilan tasdiqlangan Sud hujjatlari va boshqa organlar hujjatlarini ijro etishda mol-mulkni realizatsiya qilish boʻyicha elektron onlayn-auksionlarni tashkil etish va oʻtkazish tartibi toʻgʻrisidagi nizomda:

1) 3-band quyidagi mazmundagi xatboshi bilan toʻldirilsin:

“yetkazib berilgan energiya resurslari, suv taʼminoti va suv chiqarish xizmati uchun toʻlovlar, qattiq maishiy chiqindilarni toʻplash va olib chiqish uchun majburiy toʻlovlar, shuningdek, ijro hujjatlari boʻyicha qarzi boʻlgan shaxslar”;

2) 18-bandning toʻrtinchi xatboshidagi “beshinchi” soʻzi “oltinchi” soʻzi bilan almashtirilsin;

3) 37-band quyidagi tahrirda bayon etilsin:

“37. Mol-mulk takroriy auksionga elektron onlayn-auksion yakunlangan kundan boshlab oʻn ikki ish kunidan kechiktirmasdan koʻyiladi. Takroriy auksion xabarnomada koʻrsatilgan kun va vaqtda boshlanadi”;

4) 46-bandda:

ikkinchi xatboshi quyidagi mazmundagi ikkinchi va uchinchi xatboshilar bilan almashtirilsin:

“bironta auksion ishtirokchisi elektron onlayn-auksionda ishtirok etish uchun qoʻyilmagan boʻlsa, shu jumladan, unda ishtirok etish uchun bironta buyurtmanoma tushmagan boʻlsa;

auksionda ishtirok etish uchun faqat bitta ishtirokchi qoʻyilgan va u ushbu Nizomning 48¹-bandida nazarda tutilgan tartibda auksion obyektini qoʻlga kiritishni rad etgan boʻlsa;”

uchinchi — beshinchi xatboshilari tegishlicha toʻrtinchi — oltinchi xatboshilar deb hisoblansin;

5) 48-bandda:

birinchi xatboshida “toʻrtinchi va beshinchi” soʻzlari “beshinchi va oltinchi” soʻzlari bilan almashtirilsin;

ikkinchi xatboshida “toʻrtinchi va beshinchi” soʻzlari “beshinchi va oltinchi” soʻzlari bilan almashtirilsin;

6) 6-bob quyidagi mazmundagi 48¹-band bilan toʻldirilsin:

“48¹. Agar buyurtmanoma berish vaqti yakunlangan paytga kelib faqat bir ishtirokchi tomonidan buyurtmanoma berilgan boʻlsa, operator takroriy auksion oʻtkazilishi kunida ushbu ishtirokchiga auksion obyektining boshlangʻich narxdan bitta kadamga tushirilgan narxdagi qiymatini besh ish kuni ichida toʻlagan holda sotib olish haqidagi taklifni elektron xat bilan yuboradi.

Agar ishtirokchi mol-mulkning boshlangʻich narxdan bitta qadamga tushirilgan narxdagi qiymatini besh ish kuni davomida toʻliq toʻlasa, u auksion gʻolibi deb topiladi va unga mazkur Nizomning 50-51-bandlarida belgilangan tartibda auksion natijalari haqidagi bayonnoma rasmiylashtiriladi.

Agar auksion ishtirokchisi taklif yuborilgan kundan boshlab besh ish kuni davomida mol-mulkni sotib olish istagi yoʻqligi haqida operatorni xabardor qilsa yoki ushbu muddat ichida mol-mulkning boshlangʻich narxdan bitta qadamga tushirilgan narxdagi qiymatini toʻliqtoʻlamasa, u auksion obyektini olishdan bosh tortgan deb hisoblanadi”;

7) 55-band “36” raqamidan keyin “48¹” raqami bilan toʻldirilsin.