O‘zbekiston Respublikasi Qishloq xo‘jaligi vazirligi va Misr Arab Respublikasi Qishloq xo‘jaligi va yerlarni o‘zlashtirish vazirligi, keyingi o‘rinlarda “Tomonlar” deb ataluvchilar,
kelgusida ikki mamlakat o‘rtasida mavjud bo‘lgan do‘stona aloqalarni mustahkamlash istagini bildirib,
qishloq xo‘jaligi sohasidagi iqtisodiy, ilmiy va texnikaviy aloqalarni o‘zaro manfaatdorlik va tenglik asosida rivojlantirishni istab,
texnologiyalar va tajribalar almashinuvini rivojlantirish uchun qishloq xo‘jaligida hamkorlikdagi harakatlarni olib borish zarurligini e’tirof etib,
Tomonlar o‘z davlatlarining qonunlariga muvofiq qishloq xo‘jaligi sohasida iqtisodiy, ilmiy, tadqiqot va texnikaviy hamkorlikni amalga oshirishga ko‘maklashadilar.
Tomonlar qishloq xo‘jaligining quyidagi sohalarida o‘zaro manfaatli hamkorlikni rivojlantirish uchun sa’y-harakatlarni amalga oshiradilar:
qishloq xo‘jaligi ishlab chiqarishini mexanizatsiyalash va avtomatlashtirish, jumladan, yangi texnologiyalar va asbob-uskunalarni loyihalashtirish va sinovdan o‘tkazish;
zamonaviy texnika vositalari va tadqiqot natijalarini ko‘llash orqali qar ikki mamlakatda chorvachilik resurslarining unumdorligi va reproduktiv samaradorligini oshirish.
olimlar va mutaxassislar bilan almashinuv, dala ekinlarini yetishtirish, kengaytirish, urug‘chilik va turli xil sinovlarni o‘tkazish masalalari bo‘yicha uchrashuvlarni tashkil etish;
davlat sirini tashkil etmaydigan tajriba, ilmiy-tadqiqot va texnikaviy ma’lumotlar, shuningdek, yangi texnologiyalar va jihozlar namunalari bilan almashinuv;
qishloq xo‘jaligi sohasida qo‘shma iqtisodiy, ilmiy-tadqiqot na texnikaviy tadbirlarni tashkil qilish (konferensiyalar, simpoziumlar, seminarlar, yarmarkalar, ko‘rgazmalar va hokazo);
epidemik kasalliklarga qarshi chorva mollarini himoya qilish uchun virusli va bakteriologik veterinariya vaksinalarini, zardobga qarshi, shuningdek, bakterial diagnostika mahsulotlarini ishlab chiqarish va keng tatbiq qilish sohasida ikki mamlakat ilmiy-tadqiqot institutlari va tashkilotlari o‘rtasida qo‘shma tadqiqotlar olib borish;
Mazkur Memorandumni samarali amalga oshirish maqsadida Tomonlar rahbarlar va mutaxassislar darajasida hamkorlikning ustuvor yo‘nalishlarini belgilash, qo‘shma loyihalar/dasturlarni muvofiqlashtirish va o‘zaro manfaat uyg‘otadigan masalalar bo‘yicha maslahatlashish uchun muntazam ravishda uchrashuvlar o‘tkazadilar.
1. Har bir Tomon tegishli qo‘shma loyihaning ishchi dasturiga binoan belgilangan ishlarning o‘ziga tegishli qismini to‘liq moliyalashtiradi.
2. Qo‘shma ilmiy loyihalar uchun olimlar va mutaxassislar almashinuvi beg‘arazlik asosida amalga oshiriladi, xususan, xalqaro sayohat va sog‘liq sug‘urtasi xarajatlari yuboruvchi Tomon tarafidan qoplanadi, turarjoy, oziq-ovqat va ichki transport xarajatlari esa qabul qiluvchi Tomon tarafidan qoplanadi.
Mazkur Memorandum qoidalarini talqin qilish va qo‘llash yuzasidan vujudga keladigan kelishmovchiliklar Tomonlar o‘rtasida muzokaralar va maslahatlashuvlar orqali hal qilinadi.
Tomonlarning o‘zaro yozma roziligi asosida mazkur Memorandum qoidalariga uning ajralmas qismi hisoblanadigan alohida bayonnomalar orqali o‘zgartirish va qo‘shimchalar kiritilishi mumkin.
Tomonlar o‘rtasida almashiladigan barcha ma’lumotlar qat’iy ravishda maxfiy hisoblanadi va boshqa Tomonning oldindan yozma roziligisiz uchinchi tomonga oshkor etilishi mumkin emas. Shuningdek, ulardan mazkur Memorandumda nazarda tutilmagan maqsadlarda ham foydalanilmaydi.
Mazkur Memorandum besh yil muddatga tuziladi va imzolangan sanadan boshlab kuchga kiradi. Mazkur Memorandum Tomonlardan birining dastlabki muddat tugashidan kamida 6 (olti) oy avval yoki har qanday keyingi (besh yillik) muddat tugashidan avval mazkur Memorandumning amal qilishini tugatish haqidagi o‘z niyati to‘g‘risida yozma xabarnomasi olinmaguniga qadar Tomonlarning yozma roziligi bilan xuddi shunday muddatlarga uzaytiriladi.