Oʻzbekiston Respublikasining “Davlat xaridlari toʻgʻrisida”gi Qonuniga asosan buyuraman:

1. Maxsus axborot portali operatorining davlat xaridlarini tashkil etish hamda oʻtkazish borasidagi faoliyati toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Ushbu Nizom Oʻzbekiston Respublikasi “Davlat xaridlari toʻgʻrisida”gi Qonuniga muvofiq maxsus axborot portali operatoriga (bundan buyon matnda Operator deb yuritiladi) nisbatan umumiy talablarni va maxsus axborot portalida (bundan buyon matnda portal deb yuritiladi) davlat xaridlarini tashkil etish boʻyicha uning faoliyati tartibini belgilaydi.

1. Operator sifatida ushbu Nizom talablariga javob beradigan yuridik shaxs Oʻzbekiston Respublikasi Prezidenti huzuridagi Loyiha boshqaruvi milliy agentligi tomonidan (bundan buyon matnda Agentlik deb yuritiladi) belgilanadi.

2. Mazkur Nizomda quyidagi asosiy tushunchalardan foydalaniladi:

avans toʻlovi — Agentlik tomonidan belgilanadigan, davlat buyurtmachisi (bundan buyon matnda buyurtmachi deb yuritiladi) va xarid qilish tartib-taomillari ishtirokchisi tomonidan kiritiladigan, operatorning vositachilik yigʻimlarini va tomonlarning zakalatini oʻz ichiga olgan moliyaviy mablagʻlar summasi;

elektron davlat xaridlariga kiritish — ushbu Nizomga muvofiq Operator tomonidan buyurtmachi va xarid qilish tartib-taomillari ishtirokchisini elektron xarid qilish tartib-taomillaridan foydalanishga kiritish tartib-taomili;

shaxsiy kabinet — elektron davlat xaridlarida ishtirok etish, hamda zarur axborotni joylashtirish va undan foydalana olishi taʼminlaydigan, buyurtmachi yoki xarid qilish tartib-taomili ishtirokchisining portaldagi individual sahifasi;

hisob-kitob-kliring palatasi (bundan buyon matnda HKKP deb yuritiladi) –buyurtmachi yoki xarid qilish tartib-taomili ishtirokchisi tomonidan kiritiladigan pul mablagʻlarini hisobga olish va ular oʻrtasidagi hisob-kitoblarni amalga oshirishni taʼminlaydigan Operatorning tarkibiy boʻlinmasi;

xarid qilish tartib-taomillari ishtirokchisi (bundan buyon matnda ishtirokchi deb yuritiladi) — xarid qilish tartib-taomilida davlat xaridlarini ijro etish uchun talabgor sifatida ishtirok etayotgan Oʻzbekiston Respublikasi rezidenti va norezidenti. Xarid qilish tartib-taomillari yakunlari boʻyicha gʻolib deb topilgan va u bilan shartnoma tuzilgan ishtirokchi davlat xaridlari ijrochisi hisoblanadi (bundan buyon matnda ijrochi deb yuritiladi).

3. Operatorlarga quyidagi talablar qoʻyiladi:

davlat xaridlari toʻgʻrisidagi axborotni joylashtirishni va undan foydalanishni, majburiyatlarni HKKP orqali bajarish kafolatlarini, davlat xaridlari boʻyicha statistik maʼlumotlarni qayta ishlashni taʼminlaydigan elektron axborot tizimining mavjudligi;

elektron tijorat va axborot texnologiyalari sohasida malakali xodimlar mavjudligi;

portalni Oʻzbekiston Respublikasi hududidagi apparat-texnika vositalarida joylashtirish;

unga nisbatan bankrotlik tartib-taomillari qoʻllanilmaganligi.

4. Agentlik Operator funksiyasini bajarishni istagan yuridik shaxsdan (bundan buyon matnda Arizachi deb yuritiladi) davlat xaridlari sohasida malakali xodimlar mavjudligi toʻgʻrisida maʼlumotlarni soʻrashga haqli.

5. Arizachi oʻzining ushbu Nizom talablariga muvofiqligini tasdiqlovchi hujjatlarini hamda qonunchilik talablariga muvofiq ishlab chiqilgan Odob-axloq qoidalari loyihasini ilova qilgan holda Agentlikka ariza yuboradi.

6. Agentlik ariza olingandan boshlab bir oy muddatda taqdim etilgan hujjatlarni ushbu Nizomda oʻrnatilgan talablarga muvofiqligini oʻrganadi.

arizani qanoatlantirish va Operator funksiyalarini Arizachiga yuklash haqida;

arizani qanoatlantirishni rad etish haqida.

8. Arizachiga Operator funksiyalari yuklatilganda, u bilan kelishuv tuziladi, unda buyurtmachi va ishtirokchilardan Operator foydasiga olinadigan vositachilik yigʻimi miqdori nazarda tutiladi. Vositachilik yigʻimi miqdori barcha Operatorlar uchun yagona hisoblanadi.

9. Operator kelishuvni bekor qilishdan besh oy oldin, bu haqda Agentlikka xabarnoma yuborgan holda oʻz tashabbusi bilan Operatorlik funksiyalarini bajarishdan voz kechishga haqli.

10. Agentlik qarori bilan, Operator quyidagi hollarda oʻz funksiyalarini bajarishidan chetlashtirilishi mumkin:

u tomonidan davlat xaridlari toʻgʻrisidagi qonun hujjatlari jiddiy buzilganda;

unga nisbatan bankrotlik tartib-taomillari qoʻllanilganda.

11. Operator oʻz vazifalarini bajarishdan chetlashtirilgan taqdirda Agentlik va Operator oʻrtasida tuzilgan kelishuv ushbu kelishuvda oʻrnatilgan tartibda bekor qilinadi.

12. Operator quyidagi funksiyalarni amalga oshiradi:

portalning uzluksiz ishlashini, unga joylashtirilgan axborotning but saqlanishini va bir butunligini, mazkur portalning tegishli davlat boshqaruvi organlarining rasmiy veb-saytlari va axborot tizimlari bilan belgilangan tartibda uygʻun ishlashini taʼminlaydi;

qonun hujjatlariga muvofiq axborotning elektron shaklda saqlanishini, shu jumladan elektron hujjatlar va elektron xabarlar saqlanishini taʼminlaydi;

portalda davlat boshqaruvi organlari oʻrtasida axborot almashinuvini tashkil etadi;

portalni Oʻzbekiston Respublikasi hududidagi apparat-texnika vositalariga joylashtiradi;

portalni texnik qoʻllab-quvvatlash ishlarini amalga oshiradi;

Agentlik, Oʻzbekiston Respublikasi Investitsiyalar boʻyicha davlat qoʻmitasi, Oʻzbekiston Respublikasi Vazirlar Mahkamasi huzuridagi “Oʻzinjiniring” respublika loyihalashtirish instituti bilan hamkorlikni amalga oshiradi;

qonun hujjatlarida oʻrnatilgan tartibda Davlat xaridlari sohasidagi shikoyatlarni koʻrib chiqish boʻyicha komissiyani tuzadi va uning faoliyatini tashkil etadi, uning ishchi organi funksiyalarini bajaradi.

Operator qonun hujjatlariga muvofiq boshqa funksiyalarni ham amalga oshirishi mumkin.

13. Operatorning majburiyatlari:

oʻz faoliyatini qonun hujjatlariga muvofiq amalga oshirish;

davlat xaridlarida ishtirok etish uchun buyurtmachilarga va ishtirokchilarga portaldan bepul erkin foydalanishlarini taʼminlash;

qonun hujjatlariga muvofiq portalda mavjud boʻlgan axborotdan jismoniy va yuridik shaxslarning bepul erkin foydalanishni taʼminlash;

davlat xaridlari sohasidagi hisobotni texnik qoʻllab-quvvatlashni taʼminlash;

integratsiya masalalari hamda davlat axborot tizimlari va davlat elektron axborot resurslari xavfsizligini taʼminlash boʻyicha maxsus vakolatli organ bilan hamkorlikni amalga oshirish;

davlat xaridlariga taalluqli axborotning butligini taʼminlash;

portalda Insofsiz ijrochilarning yagona reyestrini joylashtirish;

tuzilgan shartnomalar reyestrini shakllantirish;

davlat xaridlari natijalari haqida portal orqali Agentlikni xabardor etish;

Agentlikka davlat xaridlari bilan bogʻliq axborotni taqdim etish;

yagona yetkazib beruvchilar reyestrini yuritish;

davlat xaridlari natijalari boʻyicha tovarlar, ishlar, xizmatlar narxlari maʼlumotlar bazasini tashkil etish va yangilab borish;

odob-axloq qoidalariga rioya etish;

Operator qonun hujjatlariga muvofiq boshqa majburiyatlarni ham bajarishi mumkin.

14. Operator quyidagi huquqlarga ega:

portalga joylashtiriladigan fayllarga nisbatan texnologik talablar, shuningdek, axborot xavfsizligi boʻyicha talablar oʻrnatishga;

buyurtmachi tomonidan xaridlarni amalga oshirish toʻgʻrisida eʼlon va xaridlar reja-jadvallar joylashtirilmagan hollarda, xaridlarni amalga oshirish natijalari haqidagi axborotni chop etish.

Operator qonun hujjatlariga muvofiq boshqa huquqlarga ega boʻlishi mumkin.

15. Operator:

ishtirokchi, ijrochi sifatida davlat xaridlarida ishtirok etishga, ularning affillangan shaxsi boʻlishga;

davlat xaridlarini amalga oshirish va narx belgilash jarayoniga aralashishga, kontragentlarni tanlashda va shartnomalar tuzishda davlat xaridlari subyektlarining erkinligini cheklashga, shuningdek davlat xaridlari subyektlarining huquqlarini boshqacha tarzda cheklashga, bundan qonun hujjatlarida nazarda tutilgan hollar mustasno;

oʻtkazib beriladigan, olinadigan va saqlanadigan elektron hujjatlar hamda elektron xabarlarning ishonchliligini, shuningdek agar qonun hujjatlarida yoki shartnomada boshqacha qoida nazarda tutilmagan boʻlsa, ularning qonun hujjatlariga muvofiqligini nazorat qilishga yoki tekshirishga;

davlat xaridlari subyektlari tomonidan joylashtiriladigan elektron hujjatlar va elektron xabarlarning mazmunini oʻzgartirishga haqli emas.

16. Buyurtmachilar va ishtirokchilarni elektron davlat xaridlariga kiritish (bundan buyon matnda xaridga kiritish deb yuritiladi) tartib-taomili ularda elektron raqamli imzo (bundan buyon matnda ERI deb yuritiladi) mavjud boʻlgan holda amalga oshiriladi.

17. Budjet buyurtmachilarni xaridga kiritish avtomatik rejimda Oʻzbekiston Respublikasi Moliya vazirligi va Operatorning maʼlumotlar bazasini elektron hamkorlik orqali Operator tomonidan markazlashtirilgan tartibda amalga oshiriladi.

18. Korporativ buyurtmachilarni xaridga kiritish ular tomonidan portaldagi elektron shakldagi soʻrovnoma-arizani (bundan buyon matnda soʻrovnoma deb yuritiladi) toʻldirish yoʻli bilan amalga oshiriladi.

19. Ishtirokchilarni xaridga kiritish ular tomonidan portaldagi soʻrovnomani toʻldirish yoʻli bilan amalga oshiriladi.

20. Ishtirokchilarni xaridga kiritish, ularning quyidagi mezonlarga muvofiq boʻlganda amalga oshiriladi:

shartnoma tuzish uchun qonuniy huquqqa egalik;

soliqlar va boshqa majburiy toʻlovlarni toʻlash boʻyicha qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

Insofsiz ijrochilarning yagona reyestrida qayd etilmaganligi.

21. Soliq organlari tomonidan berilgan ERI mavjudligi ishtirokchini shartnoma tuzishga huquqini belgilaydi.

22. Ishtirokchi soʻrovnomada oʻzi yetkazib bermoqchi boʻlgan tovarlar guruhlari yoki toifalariga tegishli qatorlarni toʻldiradi.

23. Ishtirokchi soʻrovnomada unga nisbatan qoʻllanilgan bankrotlik tartib-taomillari mavjud emasligi hamda soliq va boshqa majburiy toʻlovlar boʻyicha qarzdorlik mavjud emasligi haqida maʼlumotlarni tasdiqlaydi.

24. Ishtirokchi tomonidan soʻrovnoma toʻldirilgandan soʻng, portal tomonidan Insofsiz ijrochilarning yagona reyestri maʼlumotlarini unda ishtirokchi haqida yozuv mavjud emaslik holati tekshiriladi.

25. Operator ishtirokchilarga nisbatan ushbu Nizomning 20-bandida nazarda tutilmagan qoʻshimcha mezonlarni oʻrnatishga haqli emas.

26. Buyurtmachilar va ishtirokchilarni xaridga kiritish bepul amalga oshiriladi.

27. Buyurtmachilar va ishtirokchilarni xaridga kiritish portalga zarur maʼlumotlar kiritilgandan soʻng bir ish kuni davomida amalga oshiriladi.

28. Korporativ buyurtmachilarga va ishtirokchilarga beriladigan individual login va parol ularning soʻrovnomada koʻrsatilgan elektron pochta manziliga yuboriladi.

29. Buyurtmachilar va ishtirokchilar oʻzlarining login va parollari haqidagi maʼlumotlarning butligi hamda uchinchi shaxslarga tarqatilmasligini, shuningdek ERIdan belgilangan tartibda foydalanishni mustaqil ravishda taʼminlaydilar va javobgar boʻladilar.

30. Operator:

buyurtmachilar va ishtirokchilarga HKKPda alohida shaxsiy hisob raqamlar ochadi;

buyurtmachilar va ishtirokchilarga shaxsiy kabinetlar tashkil etadi.

31. Ishtirokchini elektron xaridlardan chetlatish qonun hujjatlarida oʻrnatilgan tartibda amalga oshiriladi.

32. Buyurtmachi va ishtirokchi elektron davlat xaridlarida oʻzlarining ishtiroklarini faqatgina ERI orqali amalga oshiradilar.

Buyurtmachi va ishtirokchi oʻrtasida ERIdan foydalangan holda portalda tuzilgan shartnoma tegishli shaklda tuzilgan hisoblanadi.

33. Operator hisob-kitoblarni tashkil etish, hisobini yuritish, hamda korporativ buyurtmachilar va ishtirokchilarning shartnomaviy majburiyatlarini bajarilishini taʼminlash maqsadida Operatorga xizmat koʻrsatuvchi bankda HKKP uchun alohida ikkilamchi hisob ochadi.

Operator shartnomaviy majburiyatlarni bajarilishini taʼminlash va alohida hisobini yuritish boʻyicha korporativ buyurtmachilar va ishtirokchilar uchun HKKPda hisob raqam ochadi.

34. Korporativ buyurtmachi va ishtirokchi elektron davlat xaridlarida ishtirok etish uchun oʻzlarining HKKPdagi hisob raqamlariga zakalat toʻlovlarini oʻtkazadilar.

35. Oʻzbekiston Respublikasi Moliya vazirligi budjet buyurtmachilarining hisob-kitoblarini tashkil etish, shartnoma boʻyicha majburiyatlarini bajarilishini hisobini yuritish va taʼminlanishi maqsadida Operator uchun Moliya vazirligida maxsus hisob raqamlar ochadi va unga ushbu hisob raqamlardagi pul mablagʻlarini boshqarish uchun ruxsat beradi.

Operator budjet buyurtmachilariga hisobini alohida-alohida yuritish va shartnoma boʻyicha majburiyatlarni bajarilishini taʼminlash uchun HKKPda hisob raqamlar ochadi.

36. Budjet buyurtmachisi tomonidan shaxsiy kabinet orqali elektron auksion oʻtkazilishi toʻgʻrisidagi eʼlon (bundan buyon matnda eʼlon deb ataladi) joylashtirilgandan yoki elektron doʻkonda ishtirokchining ofertasini tanlangandan (bundan buyon matnda oferta deb ataladi) soʻng, portal zarur boʻladigan avans toʻlovi summasini xarajat moddasini koʻrsatgan holda, oferta yoki eʼlon summasini shakllantiradi va uni Operator va Moliya vazirligi oʻrtasida elektron axborot almashinuvi orqali Moliya vazirligiga yuboradi.

Axborot olingandan soʻng, Moliya vazirligining davlat moliyasini boshqarish axborot tizimi (bundan buyon matnda DMBAT deb ataladi) elektron davlat xaridlari yakunlariga koʻra tuzilgan shartnomaviy majburiyatlarni bajarish uchun, moliyalashtirish manbalarini inobatga olgan holda, kerakli summaga band qoʻyadi va Operatorning maxsus hisob raqamiga avans mablagʻlarini oʻtkazadi.

Avans toʻlovi kelib tushgandan soʻng, portal budjet buyurtmachisi tomonidan tanlangan oferta boʻyicha narxlar soʻrovi mexanizmini yoki joylashtirilgan eʼlonni aktivlashtiradi.

Operatorning maxsus hisob raqamiga avans toʻlovlari kelib tushgandan soʻng, HKKP ularni budjet buyurtmachisining HKKPda ochilgan hisob-raqamlarida hisobga oladi.

37. Buyurtmachilar va ishtirokchilar, ularning HKKPdagi hisob-raqamlarida avans toʻlovining yetarli miqdori mavjud boʻlgan taqdirda elektron davlat xaridlarida ishtirok etadilar.

38. Auksion ishtirokchilarining kiritilgan avans toʻlovlari boshqa ishtirokchilar tomonidan beriladigan past narx taklifi kelib tushgunga qadar band qilib qoʻyiladi.

Elektron doʻkon ishtirokchilarining kiritgan avans toʻlovlari gʻolib aniqlangunga qadar band qilib qoʻyiladi.

Davlat xaridlari buyurtmachilari va ishtirokchilari kiritgan zakalatlari (bundan buyon matnda ijrochi deb ataladi) shartnoma boʻyicha majburiyatlar toʻliq bajarilgan yoki belgilangan tartibda bekor qilingunga qadar band qilib qoʻyiladi.

39. Elektron davlat xaridlarining yakuniga koʻra, portal tomonidan avtomatik ravishda namunaviy shakl asosida shartnoma shakllantiriladi va shartnoma tomonlarining shaxsiy kabinetlariga yuboriladi, shuningdek tuzilgan shartnomalar elektron reyestriga kiritish orqali roʻyxatdan oʻtkaziladi.

40. Operator tuzilgan shartnomalar boʻyicha axborotni Agentlik, Moliya vazirligi va Operatorning maʼlumotlar bazasi elektron hamkorlik orqali Agentlikka va Moliya vazirligiga yuboradi.

41. Oʻzbekiston Respublikasi Moliya vazirligi Gʻaznachiligi (bundan buyon matnda gʻaznachilik deb ataladi) shartnomalar tuzilganligi toʻgʻrisidagi axborotni qabul qilgandan soʻng bir ish kuni mobaynida avtomatik tartibda DMBATda roʻyxatdan oʻtkazadi yoki qonunchilikda belgilangan tartibda hisobga oladi.

42. Korporativ buyurtmachilar shartnoma portalda roʻyxatga olingan paytdan boshlab, shartnoma boʻyicha toʻlovlarni toʻliq hajmda amalga oshirish uchun oʻn kun mobaynida oʻzlarining HKKPdagi hisob raqamlariga pul mablagʻlarini oʻtkazadilar. Bunda zakalat, shartnoma boʻyicha toʻlash summasiga qoʻshib hisoblanadi.

43. Budjet buyurtmachilari:

shartnoma roʻyxatga olingan yoki DMBATda hisobga olingan paytdan boshlab oʻn kun mobaynida pul mablagʻlarini, shartnoma boʻyicha toʻlovlarni toʻliq hajmda amalga oshirish uchun Operatorning Gʻaznachilikdagi maxsus hisob raqamiga oʻtkazadilar;

budjetdan tashqari mablagʻlar hisobidan tuzilgan shartnomalarni portalda roʻyxatga olingan paytdan boshlab oʻn kun mobaynida, pul mablagʻlarini shartnoma boʻyicha toʻlovlarni toʻliq hajmda amalga oshirish uchun Operatorning Gʻaznachilikdagi maxsus hisob raqamiga oʻtkazadilar.

Bunda oldindan toʻlov shartlari qonunchilik talablariga muvofiq shartnomada nazarda tutiladi.

44. Agarda, buyurtmachi shartnomada belgilangan muddatda toʻlovni amalga oshirmagan taqdirda, uning zakalati uch ish kunida, mazkur muddat tugaganidan soʻng, keyinchalik unga xizmat koʻrsatuvchi bank hisobiga oʻtkazish uchun, ijrochining HKKPdagi tegishli hisob raqamiga oʻtkaziladi.

45. HKKP buyurtmachidan shartnoma boʻyicha kelib tushgan toʻlov summasini band qilib qoʻyadi va pul mablagʻlari kelib tushgan kunning ertasidan bir ish kunidan kechikmagan muddatda elektron shaklda toʻlovni amalga oshirish boʻyicha ijrochiga xabarnoma yuboradi.

Mazkur xabarnoma ijrochiga tovarlarni (ishlarni, xizmatlarni) yetkazib berish uchun asos boʻlib xizmat qiladi.

46. Ijrochi tomonidan tovarlar (ishlar, xizmatlar) HKKP tomonidan toʻlov amalga oshirilishi toʻgʻrisidagi xabarnomasiz yetkazib berilgan taqdirda, buyurtmachi tomonidan tovarlar uchun toʻlovni amalga oshirmaslik xavfi ijrochining zimmasida boʻladi.

47. Korporativ buyurtmachi tovarni (ishni, xizmatni) qabul qilgandan keyin uch ish kuni mobaynida Operatorga oʻzining shaxsiy kabineti orqali tovarni (ishni, xizmatni) toʻliq hajmda qabul qilganlik toʻgʻrisidagi axborotni yuborishga majbur.

48. Budjet buyurtmachisi tovarni (ishni, xizmatni) qabul qilgandan soʻng uch ish kuni mobaynida shartnoma asosida tovarni (ishni, xizmatni) toʻliq hajmda qabul qilganlik toʻgʻrisidagi axborotni, budjet tashkilotlarining hisobi va hisobotlari avtomatlashtirilgan tizimining dasturiy kompleksi (bundan buyon matnda OʻzBTAD deb yuritiladi) orqali DMBATga kiritishga va yuborishga majbur.

49. DMBAT, budjet buyurtmachisi tomonidan shartnoma asosida tovarni (ishni, xizmatni) yetkazib berganlik toʻgʻrisidagi axborotni olgandan keyin bir ish kuni mobaynida maʼlumotlar bazalarining elektron almashinuvi orqali Operatorga yuboradi.

50. Operator, tovarlar (ishlar, xizmatlar) shartnoma boʻyicha toʻliq hajmda yetkazilganligi haqida maʼlumotni olgandan soʻng, bir ish kuni davomida:

elektron toʻlov topshiriqnomasini shakllantiradi va DMBATga yuboradi, u esa toʻlov topshiriqnomasini olgandan soʻng bir ish kuni davomida budjet buyurtmachilarining pul mablagʻlarini ijrochiga yuboradi;

elektron toʻlov topshiriqnomasini shakllantiradi va Operatorga xizmat koʻrsatuvchi bankka yuboradi, u esa toʻlov topshiriqnomasini olgandan soʻng, bir ish kuni mobaynida korporativ buyurtmachilarning pul mablagʻlarini ijrochiga yuboradi;

ijrochining zakalatiga qoʻyilgan bandni bekor qiladi;

zakalatni banddan yechadi va buyurtmachining tegishli shaxsiy hisob raqamiga qaytaradi;

shartnomaviy majburiyatlarning bajarilganligi haqidagi maʼlumotni portalga joylashtiradi.

51. Shartnoma boʻyicha yetkazib berish muddati tugagandan soʻng, tovarlarni (ishlarni, xizmatlarni) yetkazib berganligi haqidagi maʼlumot mavjud boʻlmasa, portal bir ish kuni mobaynida avtomatik rejimda buyurtmachi, vakolatli organ va Oʻzbekiston Respublikasi Moliya vazirligini (budjet buyurtmachilari boʻyicha) xabardor qiladi.

52. Buyurtmachi tomonidan shartnoma boʻyicha tovarlar (ishlar, xizmatlar) yetkazib berilganligi haqidagi maʼlumot taqdim qilinmaganda, HKKP shartnoma boʻyicha tovarlar (ishlar, xizmatlar) yetkazib berish muddati tugagach uch ish kunidan soʻng:

budjet buyurtmachisi tomonidan shartnoma boʻyicha Gʻaznachilikdagi budjet buyurtmachisining shaxsiy hisob varagʻiga kiritilgan pul mablagʻlaridan, zakalatdan tashqari, bandni bekor qiladi va budjet buyurtmachisiga qaytaradi;

korporativ buyurtmachi tomonidan shartnoma boʻyicha kiritilgan mablagʻlardan, zakalatdan tashqari, bandni bekor qiladi;

sud yoki Davlat xaridlari sohasidagi shikoyatlarni koʻrib chiqish boʻyicha komissiyaning tegishli qarori qabul qilinguniga qadar buyurtmachi va ijrochining zakalatiga band qoʻyadi;

bajarilmagan shartnomalar boʻyicha maʼlumotlarni Agentlik va Oʻzbekiston Respublikasi Moliya vazirligiga yuboradi.

Shuningdek oziq-ovqat mahsulotlari xarid qilish uchun tuzilgan shartnoma boʻyicha majburiyatlari bajarilmaganligi sababli buyurtmachiga qaytarilgan mablagʻlar, ushbu maqsadlar uchun takroran xarid tartib-taomilini amalga oshirish yoʻli orqali foydalanilishi mumkin.

53. HKKP sudning qonuniy kuchga kirgan hukmi yoki davlat xaridlari sohasidagi shikoyatlarni koʻrib chiqish boʻyicha komissiya qarori asosida zakalatni banddan yechishni va/yoki oʻtkazishni amalga oshiradi.

54. Portal, elektron davlat xaridlarining yakunlariga koʻra, bitimning haqiqiy summasidan operatorning vositachilik yigʻimini buyurtmachi va ishtirokchining avans toʻlovlaridan ushlab qoladi.

55. Ishtirokchilarning va korporativ buyurtmachilarning bandi bekor qilingan pul mablagʻlari, ularning topshiriqlariga asosan boshqa elektron davlat xaridlarida avans toʻlovlari sifatida foydalanilishi mumkin yoki xizmat koʻrsatadigan banklardagi ularning hisob raqamlariga qaytariladi.

56. Operator mazkur Nizomni buzganlik uchun qonun hujjatlariga muvofiq javobgar boʻladi.

57. Buyurtmachilar va ishtirokchilar Operatorga taqdim etilgan maʼlumotlarning haqiqiy emasligi uchun javobgar boʻladi.

58. Operator davlat xaridlari subyektlarining ushbu operatorga beriladigan elektron hujjatlari va elektron xabarlarining, shu jumladan boʻlajak davlat xaridlari toʻgʻrisida maxsus axborot portalida joylashtiriladigan axborotning mazmuni bilan bogʻliq huquqiy oqibatlar uchun javobgar boʻlmaydi.

59. Mazkur Nizom Oʻzbekiston Respublikasi Moliya vazirligi bilan kelishilgan.