Fuqarolarning vijdon erkinligi va diniy eʼtiqodga boʻlgan konstitutsiyaviy huquqlarini toʻliq taʼminlash, “Haj” va “Umra” tadbirlarini tashkil etish va oʻtkazish bilan bogʻliq ishlarning samaradorligini yanada oshirish maqsadida Vazirlar Mahkamasi qaror qiladi:

1. “Haj” va “Umra” tadbirlarini tashkil etish va oʻtkazish tartibi toʻgʻrisida Nizom ilovaga muvofiq tasdiqlansin.

2. Oʻzbekiston Respublikasi Din ishlari boʻyicha qoʻmitasi hamda Oʻzbekiston musulmonlari idorasi Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari bilan birgalikda “Haj” va “Umra” tadbirlariga boradigan fuqarolar roʻyxatining xolisona va ijtimoiy adolat mezonlari asosida shakllantirilishini hamda muqaddas ziyoratlarni tashkil qilishda belgilangan tartibga qatʼiy rioya etilishini taʼminlasinlar.

4. “Haj” va “Umra” tadbirlariga borish uchun navbatda turgan ziyoratchilarning doimiy yashash yoki vaqtincha turgan joyi oʻzgargan taqdirda, ularning avvalgi manzili boʻyicha navbati saqlanib qolishi belgilab qoʻyilsin.

5. Oʻzbekiston Respublikasi Sogʻliqni saqlash vazirligi “Haj” va “Umra” tadbirlariga boradigan fuqarolarni tibbiy koʻrikdan oʻtkazishning barcha bosqichlari (ruhiy-asab, narkologiya, teri-tanosil, sil kasalliklari yuzasidan tibbiy koʻrik, emlash va boshqalarni) Qoraqalpogʻiston Respublikasi, viloyatlar, Toshkent shahri hamda tuman (shahar)lar tibbiyot birlashmalarining markaziy koʻp tarmoqli poliklinikalarida, shuningdek, murakkab va ziddiyatli holatlarda hududiy sogʻliqni saqlash boshqaruv organi tomonidan belgilanadigan markaziy poliklinikalaridan birida bepul amalga oshirishni taʼminlasin.

6. “Oʻzbekiston havo yoʻllari” milliy aviakompaniyasi aviaqatnovlarida fuqarolarning “Haj” va “Umra” tadbirlariga borish-kelishlari uchun qulay shart-sharoitlar yaratish, mazkur tadbirlar uchun aviachiptalar narxini arzonlashtirish choralarini koʻrsin.

7. Oʻzbekiston Respublikasi Din ishlari boʻyicha qoʻmitasi, Oʻzbekiston musulmonlari idorasi, Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda ikki oy muddatda Oʻzbekiston musulmonlari idorasining rasmiy veb-saytida “Haj” va “Umra” tadbirlariga boradigan ziyoratchilarning yagona onlayn navbat tizimini shakllantirilishini va mazkur onlayn tizimini doimiy ravishda yangilab borilishini taʼminlasin.

Belgilab qoʻyilsinki, tuman (shahar)lar hokimliklari huzuridagi har yilgi “Haj” va “Umra” tadbirlarini tashkil etish va oʻtkazish masalalari boʻyicha tashkiliy guruhlar fuqarolarning oʻzini oʻzi boshqarish organlari tomonidan taqdim etilgan ziyoratchilarning roʻyxati asosida ularni “Haj” va “Umra” tadbirlariga boradigan ziyoratchilarning yagona onlayn navbat tizimida roʻyxatdan oʻtkazib boradilar.

Tuman (shahar)lardagi fuqarolarning oʻzini oʻzi boshqarish organlari hozirgi vaqtga qadar mazkur oʻzini oʻzi boshqarish organlarida navbatda turgan ziyoratchilarni toʻliq xatlovdan oʻtkazib, xatlov natijalari boʻyicha tasdiqlangan roʻyxatlarni tuman (shahar)lar hokimliklari huzuridagi har yilgi “Haj” va “Umra” tadbirlarini tashkil etish va oʻtkazish masalalari boʻyicha tashkiliy guruhlarga taqdim etsin.

8. Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi Har yilgi “Haj” va “Umra” tadbirlarini tashkil etish va oʻtkazish boʻyicha hayʼatlar bilan birgalikda har yili “Haj” va “Umra” tadbirlariga boradigan fuqarolar kvotasining roʻyxatda turgan fuqarolarning umumiy sonidan kelib chiqib, mutanosib ravishda taqsimlanishini taʼminlasin.

9. Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi Har yilgi “Haj” va “Umra” tadbirlarini tashkil etish va oʻtkazish boʻyicha hayʼatlar “Haj” va “Umra” tadbirlarini tashkil etish va oʻtkazish tartibi toʻgʻrisidagi Nizom talablari hamda “Haj” va “Umra” safarlariga boradigan fuqarolarning kvotasi va uning hududlar boʻyicha taqsimoti haqida aholi oʻrtasida keng tushuntirish ishlarini olib borsinlar. “Haj” va “Umra” ziyoratlari bilan bogʻliq tadbirlar, Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashi tomonidan qabul qilingan qarorlar ommaviy axborot vositalari orqali yoritib borilishiga, xususan “Mahalla” telekanali imkoniyatidan koʻproq foydalanishga eʼtibor qaratsinlar.

10. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Yoshlar siyosati, axborot tizimlari va telekommunikatsiyalar masalalari axborot-tahlil departamentiga yuklansin.

1. Ushbu Nizom har yilgi “Haj” va “Umra” tadbirlarini tashkil etish va oʻtkazish tartibini belgilaydi.

2. “Haj” tadbiri Oʻzbekiston Respublikasi Din ishlari boʻyicha qoʻmita va Saudiya Arabistoni Podshohligi (keyingi oʻrinlarda Saudiya Arabistoni deb ataladi) Haj va umra vazirligi oʻrtasida har yili imzolanadigan shartnoma asosida Oʻzbekiston musulmonlari idorasi tomonidan amalga oshiriladi hamda bunday faoliyat bilan boshqa tashkilotlarning shugʻullanishiga yoʻl qoʻyilmaydi.

“Umra” tadbiri Oʻzbekiston musulmonlari idorasi va tegishli litsenziyaga ega yuridik shaxslar tomonidan amalga oshiriladi.

Oʻzbekiston musulmonlari idorasi tomonidan tashkil etiladigan “Umra” tadbiri uning Saudiya Arabistonidagi hamkor tashkiloti oʻrtasida Oʻzbekiston Respublikasi Prezidentining “Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashini tashkil etish toʻgʻrisida” 2006-yil 28-avgustdagi PF-3793-son Farmoni bilan tashkil qilingan Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashi (keyingi oʻrinlarda Jamoatchilik kengashi deb ataladi) bilan kelishgan holda har yili imzolanadigan shartnomaga muvofiq Ushbu Nizom talablari asosida amalga oshiriladi.

Yuridik shaxslar tomonidan “Umra” tadbirini tashkil etish va oʻtkazish bilan bogʻliq faoliyat Oʻzbekiston Respublikasi Vazirlar Mahkamasining alohida qarori bilan tartibga solinadi.

3. Oʻzbekiston Respublikasi Prezidentining “Haj” va “Umra” tadbirlarini ado etuvchi dindorlarni davlat tomonidan qoʻllab-quvvatlashga doir qoʻshimcha chora-tadbirlar toʻgʻrisida” 2008-yil 20-maydagi PQ-869-son qaroriga muvofiq Oʻzbekiston Respublikasining Jidda shahridagi (Saudiya Arabistoni) Bosh konsulxonaning “Haj” va “Umra” ishlari boʻyicha attashesi (keyingi oʻrinlarda Bosh konsulxonaning attashesi deb ataladi) Saudiya Arabistonida “Haj” va “Umra” tadbirlariga borgan fuqarolarning (keyingi oʻrinlarda ziyoratchilar deb ataladi) tadbirlarni toʻliq bajarishida hamda ularning xavfsizligini taʼminlashda amaliy yordam koʻrsatadi.

4. “Haj” va “Umra” tadbirlarini tashkil etish ushbu Nizomga 1-ilovada keltirilgan sxema boʻyicha amalga oshiriladi.

5. “Haj” va “Umra” tadbirlari bilan bogʻliq tashkiliy ishlarni va ziyoratchilarga sifatli xizmat koʻrsatilishini muvofiqlashtirish uchun Oʻzbekiston Respublikasi Din ishlari boʻyicha qoʻmitasi hamda Oʻzbekiston musulmonlari idorasi masʼuldir.

6. “Haj” va “Umra” tadbirlarini tashkil etish va oʻtkazish bilan bogʻliq maʼlumotlar (fuqarolarning haj va umra safarlariga navbati, safar uchun ajratilgan oʻrinlar, toʻlovlarning miqdori va boshqalar) muntazam ravishda Oʻzbekiston musulmonlari idorasi rasmiy veb-saytida eʼlon qilib boriladi.

7. Har yilgi “Haj” va “Umra” tadbirlari:

respublika miqyosida Jamoatchilik kengashi;

Qoraqalpogʻiston Respublikasi, viloyatlar va Toshkent shahri miqyosida Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi har yilgi “Haj” va “Umra” tadbirlarini tashkil etish va oʻtkazish boʻyicha hayʼatlar (keyingi oʻrinlarda hayʼatlar deb ataladi);

tuman (shahar)lar miqyosida tuman (shahar)lar hokimliklari huzuridagi har yilgi “Haj” va “Umra” tadbirlarini tashkil etish va oʻtkazish masalalari boʻyicha tashkiliy guruhlar (keyingi oʻrinlarda tashkiliy guruhlar deb ataladi) tomonidan tashkil etiladi.

8. Jamoatchilik kengashi oʻz faoliyatini Oʻzbekiston Respublikasi Prezidentining “Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashini tashkil etish toʻgʻrisida” 2006-yil 28-avgustdagi PF-3793-son Farmoniga muvofiq amalga oshiradi.

9. Hayʼatlar Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzurida tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari tomonidan 9 kishidan iborat tarkibda tuziladi.

Hayʼatlar quyidagi tashkilotlar masʼul xodimlaridan iborat tarkibda shakllantiriladi:

Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining jamoat va diniy tashkilotlar bilan aloqalar boʻyicha oʻrinbosari (hayʼat raisi);

Oʻzbekiston musulmonlari idorasining Qoraqalpogʻiston Respublikasi, viloyatlar va Toshkent shahridagi vakili;

Qoraqalpogʻiston Respublikasi Ichki ishlar vazirligi, viloyatlar va Toshkent shahar Ichki ishlar bosh boshqarmalarining migratsiya va fuqarolikni rasmiylashtirish boʻlinmasi rahbari;

Qoraqalpogʻiston Respublikasi Sogʻliqni saqlash vaziri, viloyatlar va Toshkent shahar sogʻliqni saqlash boshqarmasi boshligʻi;

“Oʻzbekiston havo yoʻllari” milliy aviakompaniyasi vakili;

Davlat bojxona qoʻmitasining Qoraqalpogʻiston Respublikasi, viloyatlar va Toshkent shahar boshqarmasi boshligʻi;

Qoraqalpogʻiston Respublikasi Oila va xotin-qizlar qoʻmitasi raisi, viloyatlar va Toshkent shahar oila va xotin-qizlar boshqarmalari boshliqlari;

Oʻzbekiston “Mahalla” xayriya jamoat fondining hududiy boʻlinmasi rahbari;

Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasining hududiy boʻlinmasi rahbari.

10. Quyidagilar hayʼatlarning asosiy vazifalari hisoblanadi:

“Haj” tadbiriga borishga nomzodlarni saralash ishlarini Haj mavsumidan kamida besh oy avval boshlashni tashkil etish;

“Haj” tadbiriga borishga nomzodlarni saralashni ushbu Nizomda belgilangan talablar asosida amalga oshirilishini hamda ijtimoiy adolat tamoyiliga amal qilinishini taʼminlash;

ziyoratchilarning toʻliq tibbiy koʻrikdan oʻtishini taʼminlash;

jamiyatdagi ijtimoiy muhitni yanada sogʻlomlashtirishda hamda mahallalardagi yoʻldan adashganlarni sogʻlom eʼtiqodga qaytarishda alohida namuna koʻrsatgan imom-xatiblarning imtiyozli ravishda Haj safariga borishiga tavsiya berish;

tegishli hududda davlat va nodavlat tashkilotlari mansabdor shaxslari tomonidan fuqarolarning “Haj” va “Umra” tadbirlari bilan bogʻliq qonunchilik hujjatlari talablari bajarilishini nazorat qilish hamda muvofiqlashtirish, mazkur ziyoratlarni tashkil etish va amalga oshirishda xizmat mavqeyini suiisteʼmol qilishga, boshqa huquqbuzarliklarga yoʻl qoʻyilmasligini taʼminlash;

“Haj” va “Umra” tadbirlarini tashkil etish va oʻtkazish jarayoni monitoringini olib borish hamda tahlil qilish;

tegishli hududda “Haj” va “Umra” tadbirlarining amalga oshirilish vaqti, tartibi yuzasidan tushuntirish berish hamda “Haj” va “Umra” tadbirlarini tashkil etish va oʻtkazish bilan bogʻliq qonun buzilishi holatlari yuzasidan fuqarolarning murojaatlarini belgilangan tartibda koʻrib chiqish, aniqlangan salbiy holatlarni oʻz vaqtida bartaraf etish;

ushbu Nizomning 26-bandiga muvofiq Jamoatchilik kengashi tomonidan Qoraqalpogʻiston Respublikasi, viloyatlar va Toshkent shahriga taqdim etiladigan kvota asosida tumanlar (shaharlar) boʻyicha kvotani ishlab chiqish hamda har yili tegishli hududda “Haj” va “Umra” tadbirlariga boradigan ziyoratchilar roʻyxatini tuzish va tasdiqlash. Belgilangan muddatlarda Jamoatchilik kengashiga mazkur roʻyxat va kerakli hujjatlarni taqdim etish;

tegishli hududdagi fuqarolarning “Haj” va “Umra” tadbirlari uchun chet elga chiqish jarayonini hisobga olish va tizimlashtirish maqsadida ziyoratchilarning shaxsiy maʼlumotnomalari yagona bazasini yuritish;

ziyoratchilarning Toshkent shahriga kelish-ketishi, yashashi, ovqatlanishi, transport xarajatlarining qoplanishi uchun Jamoatchilik kengashi tomonidan tasdiqlangan har bir ziyoratchi uchun safar xarajatlari smetasiga qoʻshimcha tarzda Qoraqalpogʻiston Respublikasi va viloyatlar boʻyicha alohida smeta ishlab chiqish va tasdiqlash;

tegishli hududda diniy va konfessiyalararo bagʻrikenglikni targʻib etish, islomning anʼanaviy hanafiy mazhabiga zid boʻlgan radikal-ekstremistik mafkuralarning oʻz mohiyati boʻyicha buzgʻunchi ekanligini fosh qilishga doir Oʻzbekistonda diniy sohada olib borilayotgan chora-tadbirlarni axborot bilan taʼminlash ishlarini amalga oshirish.

11. Oʻzbekiston musulmonlari idorasining Qoraqalpogʻiston Respublikasidagi qoziyoti, viloyatlar va Toshkent shahridagi vakilliklari hayʼatning ishchi organi funksiyasini bajaradilar.

12. Ishchi organ quyidagi ishlarni tashkil etadi:

hayʼat tomonidan tasdiqlangan roʻyxatlar asosida ziyoratchilarning chet elga chiqish uchun ruxsat beruvchi yozuv stikerini rasmiylashtirilishini taʼminlash;

toʻlovlarni (Saudiya Arabistonida har bir “Haj” va “Umra” ziyoratchisi uchun shartnomaga koʻra sarflanadigan xarajat, aviachiptalar, vaksinalar, tibbiy dori qutichasi uchun dori vositalari, “Haj” va “Umra” qoʻllanmasi va DVD disk, ziyoratchilar kiyim-kechagi, sumka va boshqalar uchun sarflanadigan xarajatlarni) ziyoratchilar tomonidan Oʻzbekiston musulmonlari idorasining depozit hisobvaragʻiga naqd yoki naqd pulsiz tartibda milliy valyutada oʻtkazilishini taʼminlash;

ziyoratchilarni tibbiy koʻrikdan oʻtkazish, emlash, ular bilan safaroldi mashgʻulotlari oʻtkazish;

“Haj” va “Umra” mavsumlarida ziyoratchilarni kuzatish va kutib olish ishlarini amalga oshirish.

13. Tashkiliy guruhlar tuman (shahar) hokimliklari huzurida tuman (shahar) hokimlari tomonidan 7 kishidan iborat tarkibda tuziladi.

Tashkiliy guruhlar tarkibiga, qoidaga koʻra, tuman (shahar) hokimining oʻrinbosari (tashkiliy guruh raisi), bosh imom-xatib, ichki ishlar organining migratsiya va fuqarolikni rasmiylashtirish boʻlinmasi, tuman (shahar) tibbiyot birlashmasi, Oʻzbekiston Respublikasi Oila va xotin-qizlar davlat qoʻmitasi, Oʻzbekiston “Mahalla” xayriya jamoat fondi, Oʻzbekiston Respublikasi Mahalla va nuroniylarni qoʻllab-quvvatlash vazirligining tuman (shahar) boʻlimlari rahbarlari kiritiladi.

14. Quyidagilar tashkiliy guruhlarning asosiy vazifalari hisoblanadi:

tegishli tuman (shahar)da davlat va nodavlat tashkilotlari mansabdor shaxslari tomonidan fuqarolarning “Haj” va “Umra” ibodatlari bilan bogʻliq qonunchilik hujjatlari talablari bajarilishini nazorat qilish hamda muvofiqlashtirish, mazkur ziyoratlarni tashkil etish va amalga oshirishda xizmat mavqeyini suiisteʼmol qilishga, boshqa huquqbuzarliklarga yoʻl qoʻyilmasligini taʼminlash;

tegishli tuman (shahar)da ziyoratlarni tashkil etish va amalga oshirish jarayoni monitoringini olib borish hamda tahlil qilish;

tegishli tuman (shahar)da “Haj” va “Umra” tadbirlarining amalga oshirilishi vaqti, tartibi yuzasidan tushuntirish berish hamda yoʻl qoʻyilayotgan qonun buzilishlari yuzasidan fuqarolarning murojaatlarini belgilangan tartibda koʻrib chiqish, aniqlangan salbiy holatlarni oʻz vaqtida bartaraf etish;

ushbu Nizomning 26-bandiga muvofiq hayʼatlar tomonidan tuman (shahar) boʻyicha taqdim etiladigan kvota asosida hududdagi fuqarolarning oʻzini oʻzi boshqarish organlari uchun kvotani belgilash hamda tegishli yilda “Haj” va “Umra” tadbirlariga boradigan ziyoratchilar roʻyxatini tuzish va tasdiqlash. Belgilangan muddatlarda tegishli hayʼatlarga mazkur roʻyxat va boshqa zarur hujjatlarni taqdim etish;

tegishli tuman (shahar)lardagi fuqarolarning “Haj” va “Umra” tadbirlari uchun chet elga chiqish jarayonini hisobga olish va tizimlashtirish maqsadida ziyoratchilarning shaxsiy maʼlumotnomalari yagona bazasini yuritish;

tegishli tuman (shahar)da diniy va konfessiyalararo bagʻrikenglikni targʻib etish, islomning anʼanaviy hanafiy mazhabiga zid boʻlgan radikal-ekstremistik mafkuralarning oʻz mohiyati boʻyicha buzgʻunchi ekanligini fosh qilishga doir Oʻzbekistonda diniy sohada olib borilayotgan chora-tadbirlarni axborot bilan taʼminlash ishlarini amalga oshirish.

14¹. “Haj” tadbiriga borishga nomzodlarni mahalla fuqarolar yigʻini miqyosida saralab olish uchun fuqarolarning oʻzini oʻzi boshqarish organlarida tuman (shahar) hokimi tomonidan 7 kishidan iborat tarkibda ishchi guruh tuziladi (keyingi oʻrinlarda ishchi guruh deb ataladi).

Ishchi guruh tarkibiga, qoidaga koʻra, tuman bosh imomi, mahallaga biriktirilgan imom, mahalla raisi, mahalladagi xotin-qizlar faoli, fuqarolar yigʻini raisining Keksalar va faxriylar ishlari boʻyicha maslahatchisi kiritiladi.

15. Jamoatchilik kengashi, hayʼatlar, tashkiliy guruhlar va ishchi guruhlar oʻzlariga yuklangan vazifalarning samarali bajarilishi uchun masʼuldirlar.

16. Quyidagilar Oʻzbekiston Respublikasi Din ishlari boʻyicha qoʻmitasining asosiy vazifalari hisoblanadi:

vazirliklar, idoralar hamda boshqa davlat va nodavlat tashkilotlarining “Haj” va “Umra” tadbirlari bilan bogʻliq faoliyati monitoringini olib borish hamda bu haqda Jamoatchilik kengashiga axborot berish;

Oʻzbekiston musulmonlari idorasi tomonidan har bir ziyoratchi uchun safar xarajatlari smetasi loyihalarining tayyorlanishida ishtirok etish;

hayʼatlar tomonidan tegishli yilda “Haj” va “Umra” tadbirlariga boradigan ziyoratchilar roʻyxatining tuzilishini, ziyoratchilarning tibbiy koʻrikdan oʻtkazilishini, emlanishini, ularga chet elga chiqish uchun ruxsat beruvchi yozuv stikerining olinishini va “Haj” va “Umra” tadbirlari uchun toʻlovlarning oʻz vaqtida amalga oshirilishini nazorat qilish;

Oʻzbekiston musulmonlari idorasi bilan birgalikda islom ahkomlari va shariat qonun-qoidalarini biladigan, jamoat ishlarida faol boʻlgan davlat va nodavlat tashkilotlari vakillari orasidan ziyoratchilarga xizmat koʻrsatuvchi ishchi guruhlar va ziyoratchilarning guruh rahbarlari, shuningdek, tibbiy xodimlar, tajribali oshpazlar roʻyxatini shakllantirish va tasdiqlash uchun Jamoatchilik kengashiga kiritish;

Oʻzbekiston musulmonlari idorasi bilan birgalikda ziyoratchilarga xizmat koʻrsatuvchi ishchi guruhlar, ziyoratchilarning guruh rahbarlari va ziyoratchilar bilan safaroldi uchrashuvlari hamda mashgʻulotlari oʻtkazilishini tashkil qilish;

“Haj” va “Umra” mavsumida hududlarda ziyoratchilarni kuzatish va kutib olish ishlarini tashkil etish chora-tadbirlarini belgilash, shu jumladan ziyoratchilarning tasdiqlangan jadval asosida Saudiya Arabistoniga borishi, u yerda boʻlishi va u yerdan qaytib kelishlarini nazorat qilish;

“Haj” va “Umra” mavsumi davomida ziyoratchilarning sogʻ-salomat va ibodatlarni toʻla-toʻkis bajarib kelishini taʼminlash maqsadida Saudiya Arabistonidagi tegishli tashkilotlar bilan doimiy aloqada boʻlish, ziyoratchilarga xizmat koʻrsatuvchi ishchi guruhlar, ziyoratchilar guruh rahbarlarining faoliyatini nazorat qilish;

17. Quyidagilar Oʻzbekiston musulmonlari idorasining asosiy vazifalari hisoblanadi:

Bosh konsulxonaning attashesi yordamida Saudiya Arabistonida “Haj” va “Umra” mavsumlarida ziyoratchilarga xizmat koʻrsatuvchi mehmonxona, transport va oziq-ovqat tashkilotlari bilan shartnomalar tuzish;

Oʻzbekiston musulmonlari idorasining rasmiy veb-sayti orqali “Haj” va “Umra” tadbirlariga boradigan ziyoratchilarning yagona onlayn navbat tizimiga (keyingi oʻrinlarda ziyoratchilarning onlayn navbat tizimi deb ataladi) shakllantirilishini va mazkur onlayn tizimni doimiy ravishda yangilab borilishini taʼminlash;

har bir ziyoratchi uchun safar xarajatlari smetasi loyihalarini tayyorlash va Jamoatchilik kengashiga tasdiqlash uchun kiritish;

“Haj” va “Umra” mavsumlari boshlanishidan bir oy oldin ziyoratchilarni emlash uchun vaksina yetkazib beruvchi, ziyoratchilar uchun kiyim-kechak va sumka tayyorlab beruvchi tashkilotlarni tanlash uchun alohida-alohida tender (tanlov) oʻtkazish va tender (tanlov) xulosalarini Jamoatchilik kengashiga kiritib, Jamoatchilik kengashi qaroriga asosan tender (tanlov)da gʻolib chiqqan tashkilotlar bilan shartnomalar tuzish;

ziyoratchilarni emlash uchun zarur miqdordagi vaksinalarning tegishli tashkilotlar tomonidan hayʼatlar belgilaydigan tibbiyot muassasalariga oʻz vaqtida yetkazilishini va ziyoratchilarni emlashni tashkil etish;

joylarda “Haj” va “Umra” tadbirlari uchun ziyoratchilar tomonidan amalga oshirilgan toʻlovlarning Oʻzbekiston musulmonlari idorasi depozit hisobvargʻiga qabul qilinishini taʼminlash;

ziyoratchilar uchun xizmat koʻrsatadigan xorijiy tashkilotlarga toʻlanadigan mablagʻlarning oʻz vaqtida konvertatsiya qilinishini hamda ushbu mablagʻlarning Bosh konsulxonaning attashesi tomonidan Oʻzbekiston musulmonlari idorasi bergan ishonchnoma asosida boshqariladigan Oʻzbekiston musulmonlari idorasining depozit hisobvargʻiga shartnomada koʻrsatilgan muddatdan kechiktirmay oʻtkazilishini taʼminlash;

ziyoratchilarning hujjatlarini rasmiylashtirish (pasportlarning arab tilidagi nusxasini tayyorlash) va ziyoratchilar uchun Saudiya Arabistonining Oʻzbekiston Respublikasidagi elchixonasi orqali vizalar olinishini taʼminlash;

ziyoratchilarning Oʻzbekiston Respublikasidan Saudiya Arabistoniga va Saudiya Arabistonidan Oʻzbekiston Respublikasiga borish-kelishlari yuzasidan “Oʻzbekiston havo yoʻllari” milliy aviakompaniyasi bilan birgalikda aviaqatnovlar jadvallarini ishlab chiqish, “Oʻzbekiston havo yoʻllari” milliy aviakompaniyasi bilan tegishli shartnomalarni imzolash hamda ziyoratchilarning safardan kamida oʻn besh kun oldin ushbu aviaqatnovlar jadvali bilan tanishtirilishini taʼminlash;

“Haj” va “Umra” mavsumida ziyoratchilarning guruh rahbarlari roʻyxatini tuzib, Oʻzbekiston Respublikasi Din ishlari boʻyicha qoʻmitasiga taqdim etish;

ziyoratchilarga xizmat koʻrsatuvchi ishchi guruhlar, ziyoratchilarning guruh rahbarlari va ziyoratchilar bilan safaroldi uchrashuvlar hamda mashgʻulotlar oʻtkazish;

ziyoratchilarning guruh rahbarlari tomonidan ziyoratchilarning “Haj” va “Umra” amallarini toʻliq ado etishlari maqsadida ziyorat joylarining maketlari yordamida hamda taqdimot shaklida tushuntirish ishlari olib borilishini taʼminlash;

tegishli tashkilotlar bilan belgilangan tartibda tuziladigan shartnomalar asosida “Haj” va “Umra” tadbirlari toʻgʻrisida bosma va video qoʻllanmalarni tayyorlash hamda ziyoratchilarga safardan kamida oʻn besh kun oldin yetkazib berish;

“Haj” va “Umra” mavsumlarida ziyoratchilarning Saudiya Arabistoniga borishi va u yerdan qaytishi jadvaliga qatʼiy rioya etishlarini taʼminlash;

“Haj” va “Umra” mavsumlari oldidan ommaviy axborot vositalari orqali muqaddas joylarga ziyoratga borish tartib-qoidalari, ziyoratlarning mazmun-mohiyati haqida, shuningdek fuqarolarning noqonuniy yoʻllar bilan “Haj” va “Umra” tadbirlariga borishga urinishlarining oldini olishga doir keng koʻlamli tushuntirish ishlarini tashkil etish;

18. Quyidagilar Oʻzbekiston Respublikasi Ichki ishlar vazirligining asosiy vazifalari hisoblanadi:

ziyoratchilarga belgilangan tartibda chet elga chiqish uchun ruxsat beruvchi yozuv stikerini oʻz vaqtida rasmiylashtirish;

ziyoratchilarni kuzatish va kutib olish vaqtida, shuningdek ziyoratchilar va ziyoratchilarning guruh rahbarlari bilan safaroldi uchrashuvlari va oʻquv mashgʻulotlari oʻtkaziladigan joylarda harakat xavfsizligini va jamoat xavfsizligini taʼminlash. Ziyoratchilarning belgilangan yoʻnalishlarda harakatlanishini yoʻl-patrul xizmati kuzatuvida amalga oshirish;

ziyoratchilarni kuzatish va kutib olish vaqtida Jamoatchilik kengashi tomonidan tasdiqlangan “Haj” va “Umra” tadbirlariga boradigan fuqarolarni kuzatish va kutib olish guruhi bilan bevosita hamkorlikda ish olib borilishini taʼminlash.

19. Quyidagilar Oʻzbekiston Respublikasi Sogʻliqni saqlash vazirligining asosiy vazifalari hisoblanadi:

ziyoratchilarni emlash uchun vaksina yetkazib beruvchi tashkilotni tanlash maqsadida Oʻzbekiston musulmonlari idorasi tomonidan oʻtkaziladigan tender (tanlov)ni tashkil etishda amaliy yordam koʻrsatish;

Saudiya Arabistoni Haj ishlari vazirligi tomonidan qoʻyilgan tibbiy talablarni va Saudiya Arabistonining iqlim sharoitlarini hisobga olgan holda, ziyoratchilarni oʻz vaqtida tibbiy koʻrikdan oʻtkazish, emlash va Saudiya Arabistoni Sogʻliqni saqlash vazirligi talablaridan kelib chiqib, ziyoratchilarga emlanganlik toʻgʻrisida tibbiy sertifikatlar taqdim etilishini taʼminlash. Bunda ziyoratchilarni tibbiy koʻrikdan oʻtkazishning barcha bosqichlari (ruhiy-asab, narkologiya, teri-tanosil, sil kasalliklari yuzasidan tibbiy koʻrik, emlash va boshqalarni) Qoraqalpogʻiston Respublikasi, viloyatlar, Toshkent shahri hamda tuman (shahar)lar tibbiyot birlashmalarining markaziy koʻp tarmoqli poliklinikalarida, shuningdek, murakkab va ziddiyatli holatlarda hududiy sogʻliqni saqlash boshqaruv organi tomonidan belgilanadigan markaziy poliklinikalaridan birida bepul amalga oshirilishini taʼminlash;

ziyoratchilar uchun Oʻzbekiston musulmonlari idorasi mablagʻlari hisobiga xarid qilinadigan dori vositalari va tibbiy buyumlar roʻyxatini tayyorlash, hamda mazkur dori vositalari va tibbiy buyumlarning ishchi guruh vakillari koʻmagida Saudiya Arabistoniga ziyoratchilar bilan birga yuborilishini taʼminlash;

“Haj” va “Umra” mavsumlarida Saudiya Arabistonida ziyoratchilarga xizmat koʻrsatuvchi tibbiy xodimlar nomzodlari roʻyxatini Oʻzbekiston Respublikasi Din ishlari boʻyicha qoʻmitasiga taqdim etish. “Haj” va “Umra” mavsumlarida Saudiya Arabistonida ziyoratchilarga xizmat koʻrsatuvchi tibbiy xodimlar roʻyxati Jamoatchilik kengashi tomonidan tasdiqlangandan soʻng mazkur tibbiy xodimlar bilan safaroldi oʻquv mashgʻulotlarini oʻtkazish;

“Haj” va “Umra” tadbirlari davomida ziyoratchilarga oʻz vaqtida va sifatli tibbiy yordam koʻrsatilishini, profilaktika ishlari amalga oshirilishini tashkil etish.

20. Quyidagilar Oʻzbekiston Respublikasi Tashqi ishlar vazirligining asosiy vazifalari hisoblanadi:

Saudiya Arabistoni Haj vazirligining taklifiga binoan Oʻzbekiston Respublikasi delegatsiyasining har yilgi Jidda shahriga safari bilan bogʻliq tashkiliy ishlarda Oʻzbekiston Respublikasi Din ishlari boʻyicha qoʻmitasi va Oʻzbekiston musulmonlari idorasi bilan hamkorlik qilish;

ziyoratchilar uchun Saudiya Arabistonining Oʻzbekiston Respublikasidagi elchixonasi tomonidan vizalar rasmiylashtirilishida Oʻzbekiston Respublikasi Din ishlari boʻyicha qoʻmitasi va Oʻzbekiston musulmonlari idorasiga amaliy yordam koʻrsatish;

Bosh konsulxonaning attashesi ishtirokida “Haj” va “Umra” tadbirlari boʻyicha tuziladigan shartnomalarni oʻz vaqtida legallashtirishni amalga oshirish;

“Haj” va “Umra” mavsumlari davomida ziyoratchilarning sogʻ-salomat va ibodatlarni toʻla-toʻkis bajarib kelishini taʼminlash maqsadida Saudiya Arabistonidagi mutasaddi tashkilotlar bilan doimiy aloqada boʻlish.

21. Oʻzbekiston Respublikasi Markaziy banki va Oʻzbekiston Respublikasi Tashqi iqtisodiy faoliyat milliy banki” AJ Oʻzbekiston musulmonlari idorasining murojaatiga binoan joylarda “Haj” va “Umra” tadbirlari uchun ziyoratchilardan qabul qilingan mablagʻlarni oʻz vaqtida konvertatsiya qilib, Bosh konsulxonaning attashesi tomonidan Oʻzbekiston musulmonlari idorasi bergan ishonchnoma asosida boshqariladigan Oʻzbekiston musulmonlari idorasining depozit hisobvaragʻiga va Oʻzbekiston musulmonlari idorasining Saudiya Arabistonidagi hamkor tashkilotining hisobvaraqlariga oʻz vaqtida oʻtkazishni tashkil etadi.

22. Quyidagilar “Oʻzbekiston havo yoʻllari” milliy aviakompaniyasining asosiy vazifalari hisoblanadi:

Oʻzbekiston musulmonlari idorasi bilan ziyoratchilarni tashish yuzasidan shartnomalar tuzish hamda Saudiya Arabistoniga ziyoratchilarni olib borish va olib kelish boʻyicha aviaqatnovlar jadvallarini Saudiya Arabistonining mutasaddi tashkilotlari bilan muvofiqlashtirish;

“Haj” va “Umra” mavsumlarida ziyoratchilarni tegishli yoʻnalishlarda tashishni tashkil qilish;

“Haj” va “Umra” tadbirlari yil davomida doimiy amalga oshirilishini hamda mazkur ziyoratlarga boradigan fuqarolarning soni koʻpligini inobatga olib, ziyoratchilar uchun turli noqulayliklar va qiyinchiliklar kelib chiqishining oldini olish maqsadida aeroportda ziyoratchilarga samolyotning uchish vaqtini kutish, dam olish, ovqatlanish, ibodat qilish imkonini beradigan alohida bino ajratish;

“Haj” mavsumida mehmonxonalarda ziyoratdan qaytayotgan ziyoratchilarni roʻyxatdan oʻtkazish va ularning yuklarini qabul qilish choralarini koʻrish;

“Haj” va “Umra” mavsumlarida ziyoratchilarga xizmat koʻrsatuvchi ishchi guruhlar, ziyoratchilarning guruh rahbarlari va ziyoratchilar bilan safaroldi uchrashuvlarida ishtirok etish.

23. Quyidagilar Oʻzbekiston Respublikasi Davlat bojxona qoʻmitasining asosiy vazifalari hisoblanadi:

aeroportlarda ziyoratchilarning yuklarini belgilangan tartibda bojxona koʻrigidan oʻtkazish;

“Haj” va “Umra” mavsumlarida ziyoratchilarga xizmat koʻrsatuvchi ishchi guruhlar, ziyoratchilarning guruh rahbarlari va ziyoratchilar bilan safaroldi uchrashuvlarida tegishli tushuntirish ishlari olib borilishini taʼminlash;

aeroportlar orqali harakatlanayotgan “Haj” va “Umra” ziyoratchilarining respublikadan uchib ketishlari va unga uchib kelishlarida qulayliklar yaratish, bojxona nazorati zonasida uzoq vaqt turib qolishlarining oldini olish maqsadida aeroportlarning uchib ketish va uchib kelish zallarida alohida yoʻlakchalar ajratilib, bojxona nazorati va rasmiylashtiruvini belgilangan tartibda tezkorlik bilan amalga oshirish;

“Haj” va “Umra” ziyoratiga uchib ketayotgan ziyoratchilarga qulayliklar yaratish maqsadida oldindan tarqatilishini taʼminlash uchun Oʻzbekiston musulmonlari idorasiga zarur miqdorda Yoʻlovchi bojxona deklaratsiyasi blankalarini ajratish;

“Haj” ziyoratchilarining uchib kelishlarida bojxona rasmiylashtiruvini havo kemasining oʻzida amalga oshirish uchun guruh tashkil etish va uni tasdiqlash.

Bojxona xodimlari havo kemasida bojxona rasmiylashtiruvini amalga oshirish uchun Saudiya Arabistoniga uchib borib kelishida ushbu bojxona xodimlariga nisbatan Oʻzbekiston Respublikasi Vazirlar Mahkamasining “Mansabdor shaxslarning xorijiy mamlakatlarga xizmat safarlarini tashkil etish qoidalarini tasdiqlash toʻgʻrisida” 2014-yil 30-oktabrdagi 299-son qarori talablari tatbiq etilmaydi.

24. Oʻzbekiston “Mahalla” xayriya jamoat fondi, Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasi, Oʻzbekiston Respublikasi Oila va xotin-qizlar davlat qoʻmitasi aholiga “Haj” va “Umra” tadbirlarini qonunchilik hujjatlari talablariga muvofiq amalga oshirish hamda noqonuniy yoʻllar bilan ziyoratga borishning oldini olishga doir tushuntirish ishlarini olib borishda ishtirok etishi mumkin.

25. Vazirliklar, idoralar va boshqa tashkilotlar oʻzlariga yuklangan “Haj” va “Umra” tadbirlarining tashkil etilishi va oʻtkazilishi bilan bogʻliq barcha vazifalarning samarali bajarilishi uchun masʼuldir.

26. Har yili “Haj” va “Umra” tadbirlariga boradigan fuqarolar kvotalari Qoraqalpogʻiston Respublikasiga, viloyatlar va Toshkent shahriga — Jamoatchilik kengashi tomonidan, tumanlarga — Hayʼatlar tomonidan, fuqarolarning oʻzini oʻzi boshqarish organlariga — Tashkiliy guruhlar tomonidan roʻyxatda turgan fuqarolarning umumiy sonidan kelib chiqib mutanosib ravishda taqsimlanadi.

Jamoatchilik kengashi, hayʼatlar va tashkiliy guruhlar kvotalarni belgilashni ziyoratchilarning onlayn navbat tizimiga muvofiq amalga oshiradilar.

27. “Haj” va “Umra” tadbirlariga borish uchun ariza beruvchi doimiy yashash yoki vaqtincha turgan joyidagi fuqarolarning oʻzini oʻzi boshqarish organiga ariza hamda pasporti nusxasini taqdim etishi lozim.

28. Fuqarolarning “Haj” va “Umra” tadbirlariga borish uchun arizasi ularning doimiy yashash yoki vaqtincha turgan joylaridagi fuqarolarning oʻzini oʻzi boshqarish organlari tomonidan yil davomida qabul qilinib, navbatga qoʻyib boriladi.

28¹. “Haj” tadbiriga borishga nomzodlar navbatga qoʻyilishidan avval ushbu Nizomning 28²-bandida nazarda tutilgan talablar asosida ishchi guruh tomonidan suhbatdan oʻtkaziladi va saralanadi.

Buning uchun fuqarolar yigʻini raisi tomonidan nomzodlarning alohida roʻyxati shakllantiriladi. Nomzodlarga ular suhbatdan oʻtkazish va saralash uchun roʻyxatga qoʻshilganligi hamda suhbatdan oʻtkazish sanasi va joyi toʻgʻrisida fuqarolar yigʻining raisi tomonidan xabar beriladi.

Ishchi guruh har oyning 5 sanasidan kech boʻlmagan muddatda shakllangan roʻyxat asosida “Haj” tadbiriga boradigan zayoratchi sifatida navbatga qoʻyish uchun nomzodlarni suhbatdan oʻtkazadi va saralaydi.

28². “Haj” tadbiriga borishga navbatga qoʻyiladigan nomzodlar quyidagi talablarga javob berishi lozim:

a) nomzod moddiy va jismoniy jihatdan “Haj” tadbiriga qodir boʻlishi;

b) “Haj” amallarini toʻgʻri va toʻla-toʻkis ado etishi uchun yetarli diniy bilimga ega boʻlishi;

v) nomzod maʼnaviyati, maʼrifati va odob-axloqi bilan mahallada obroʻ-eʼtiborga ega boʻlishi;

g) oilasidagi muhitning sogʻlomligi va farzandlarining ijobiy tavsiflanishi, mahalla fuqarolar yigʻinidagi ijtimoiy-maʼnaviy muhitni yaxshilashda ibrat boʻla olishi;

d) yoʻldan adashganlarni sogʻlom turmush tarziga qaytarish, ularning ijtimoiy moslashuviga yordam berishi, mahalla fuqarolar yigʻinida oʻtkaziladigan xayriya tadbirlarida ishtirok etishi;

e) ushbu Nizomning 46-bandi talablariga javob berishi.

28³. Saralash natijasiga koʻra “Haj” tadbiriga borishga navbatga qoʻyiladigan nomzodlar roʻyxati tegishli hududdagi masjid va fuqarolarning oʻzini oʻzi boshqarish organlari binolarida eʼlon qilinadi hamda 15 kun mobaynida ular boʻyicha jamoatchilik fikri oʻrganiladi.

Jamoatchilik tomonidan bildirilgan taklif yoki eʼtirozlar ishchi guruh tomonidan 5 kun muddatda koʻrib chiqiladi va tekshiriladi.

Ishchi guruh jamoatchilik fikri asosida fuqaroni “Haj” tadbiriga boradigan zayoratchi sifatida navbatga qoʻyish uchun fuqarolarning oʻzini oʻzi boshqarish organiga 1 kun muddatda tavsiya beradi”.

29. “Haj” va “Umra” tadbirlariga boradigan ziyoratchilarni roʻyxatga olish uchun fuqarolarning oʻzini oʻzi boshqarish organlari tuman (shahar) hokimligi muhri bilan tasdiqlangan, varaqlari raqamlangan, ip oʻtkazib tikilgan, ushbu Nizomga 2 va 3-ilovalarda keltirilgan namunaga muvofiq maxsus jurnallarni yuritadi.

30. Fuqarolarning oʻzini oʻzi boshqarish organi arizani qabul qilib olgandan soʻng ariza beruvchiga ushbu Nizomga 4-ilovada keltirilgan shaklda maʼlumotnoma berishi shart.

31. Fuqarolarning oʻzini oʻzi boshqarish organi “Haj” va “Umra” tadbirlariga borish uchun navbatda turganlar roʻyxatini tegishli hududdagi fuqarolarining tanishishi uchun qulay joy (eʼlonlar taxtasi)ga doimiy ravishda joylashtirib boradi.

32. Fuqarolarning oʻzini oʻzi boshqarish organi har oyning 5-sanasiga qadar oʻzining hududidan “Haj” va “Umra” tadbirlariga boradigan ziyoratchilar roʻyxatini ziyoratchilarning onlayn navbat tizimida roʻyxatga olish uchun tashkiliy guruhga taqdim etib boradi.

33. Har yili “Haj” va “Umra” mavsumlari boshlanishidan oldin fuqarolarning oʻzini oʻzi boshqarish organlari tashkiliy guruh kvotani tasdiqlagandan keyin ikki kun mobaynida, ajratilgan kvotaga muvofiq tegishli yilda oʻzining hududidan “Haj” va “Umra” tadbirlariga boradigan ziyoratchilar roʻyxatini navbat boʻyicha tuzadi hamda imzo va muhr bilan tasdiqlagan holda tashkiliy guruhlarga taqdim etadi.

34. Roʻyxat boʻyicha navbati kelgan fuqarolar tashkiliy guruh tomonidan Saudiya Arabistoniga joʻnashdan kamida bir oy oldin yozma shaklda pochta orqali xabardor qilinadi. Fuqaroning pochta orqali xabardor qilinganligini tasdiqlovchi hujjat tashkiliy guruhda saqlanadi.

35. Roʻyxat boʻyicha navbati kelgan, biroq ziyoratga bormaydigan yoki ziyoratga borish imkoni boʻlmagan fuqarolardan bu haqda ariza olinadi.

Ushbu Nizomning 46-bandi toʻrtinchi xatboshiga muvofiq “Haj” va “Umra” tadbirlariga mahrami bilan borishi lozim boʻlgan ayollarning navbatga yozilgan mahrami ziyoratga bora olmagan taqdirda uning oʻrniga ayolning ushbu Nizomning 46-bandi talablariga javob beradigan boshqa mahrami borishi mumkin.

36. “Haj” va “Umra” tadbirlariga borish uchun roʻyxatda turgan fuqaroning oʻz navbati kelganda muayyan sabablarga koʻra ziyoratga borish imkoni boʻlmasa, u ariza bilan navbatini bir yilgacha muddatga orqaga surishi mumkin.

Bir yildan soʻng ham fuqaroning muayyan sabablarga koʻra ziyoratga borish imkoni boʻlmasa uning navbati bekor qilinadi.

37. Pochta orqali xabardor qilingan fuqaro ziyoratga oid ishlarni amalga oshirish uchun tashkiliy guruhga murojaat qilmasa, tashkiliy guruh vakili mazkur fuqaroning yashaydigan manziliga borib, fuqaroni yoki uning yaqin qarindoshlarini yoxud u bilan birga yashaydigan boshqa shaxslarni yozma tarzda xabardor qiladi.

Ushbu bandning birinchi xatboshida belgilangan tartibda xabardor qilingan fuqaro tashkiliy guruhga murojaat qilmasa yoki fuqaroning yaqin qarindoshlari yoxud u bilan birga yashaydigan boshqa shaxslar navbatda turgan fuqaroning muayyan sabablarga koʻra ziyoratga bora olmasligini maʼlum qilsa, tashkiliy guruh tomonidan fuqaroning yaqin qarindoshlari yoki u bilan birga yashaydigan boshqa shaxslar bilan hududdagi fuqarolar yigʻini raisi ishtirokida dalolatnoma tuzilib, mazkur fuqaroning navbati bekor qilinadi.

38. Xuddi shunday dalolatnoma tashkiliy guruh vakilining fuqaro yashaydigan manzilga borib ariza beruvchini, uning yaqin qarindoshlari yoki u bilan birga yashaydigan boshqa shaxslarni topa olmagan taqdirda ham tuziladi va fuqaroning navbati bekor qilinadi.

39. Fuqaroning navbati bekor qilinganda uning oʻrniga fuqarolarning oʻzini oʻzi boshqarish organida undan keyin navbatda turgan fuqaro ziyoratga borish huquqiga ega boʻladi hamda bu haqda ushbu fuqaro uch kun mobaynida fuqarolarning oʻzini oʻzi boshqarish organi tomonidan yozma tarzda xabardor qilinadi.

Ushbu Nizomga muvofiq navbati bekor qilingan fuqarolar “Haj” va “Umra” tadbirlariga borish uchun belgilangan tartibda roʻyxatga qaytadan yoziladi.

Navbatda turgan fuqarolarning oʻz navbatini oʻzaro almashtirishiga yoki uni roʻyxatda turmagan fuqarolarga berishiga yoʻl qoʻyilmaydi.

40. Haj” va “Umra” tadbirlariga borish uchun navbatda turgan ziyoratchilarning doimiy yashash yoki vaqtincha turgan joyi oʻzgargan taqdirda ularning avvalgi manzili boʻyicha navbati saqlanib qolinadi.

41. Tashkiliy guruhlar fuqarolarning oʻzini oʻzi boshqarish organlari tomonidan taqdim etilgan ziyoratchilarning roʻyxati asosida ularni “Haj” va “Umra” tadbirlariga boradigan ziyoratchilarning yagona onlayn navbat tizimida roʻyxatdan oʻtkazib boradilar.

Fuqarolarning oʻzini oʻzi boshqarish organlari tomonidan yuritiladigan “Haj” va “Umra” safariga borish istagini bildirgan fuqarolarni qayd etish jurnali hamda tegishli hudud boʻyicha onlayn navbat tizimiga kiritilgan ziyoratchilarning roʻyxatining oʻzaro muvofiqligini taʼminlash fuqarolarning oʻzini oʻzi boshqarish organlari hamda tashkiliy guruhlarga yuklatiladi.

42. Tashkiliy guruhlar tegishli yilda fuqarolarning oʻzini oʻzi boshqarish organlari tomonidan “Haj” va “Umra” tadbirlariga boradigan ziyoratchilar roʻyxatiga kiritilgan fuqarolardan oʻzlari hisobda turgan tibbiyot muassasalaridan salomatligi, ziyoratga borishga qodir ekanligi haqidagi maʼlumotnomani va rangli fotosuratlarini qabul qilib oladi.

Tashkiliy guruhlar fuqarolarning oʻzini oʻzi boshqarish organlaridan olingan roʻyxatlar asosida kvotaga muvofiq tegishli yilda tuman (shahar) miqyosida “Haj” va “Umra” tadbirlariga boradigan ziyoratchilar roʻyxatini hayʼatlar kvotani tasdiqlagandan keyin oʻn kun mobaynida umumlashtiradi. Umumlashtirilgan roʻyxat ikki nusxada tayyorlanadi va tasdiqlanadi. Mazkur roʻyxatning birinchi nusxasi elektron varianti bilan birga hayʼatlarga taqdim etiladi. Roʻyxatning ikkinchi nusxasi tashkiliy guruhda saqlanadi.

43. Hayʼatlar tashkiliy guruhlardan olingan roʻyxatlar asosida tegishli yilda oʻzining hududidan “Haj” va “Umra” tadbirlariga boradigan ziyoratchilar roʻyxatini umumlashtiradi va ziyoratchilar pasportlarining amal qilish muddati, chet elga chiqish uchun ruxsat beruvchi yozuv stikeri borligini tekshirish, ziyoratchilarni tibbiy koʻrikdan oʻtkazish ishlarini amalga oshiradi.

Hayʼatlar oʻzining hududidan tegishli yilda “Haj” va “Umra” tadbirlariga boradigan fuqarolarning roʻyxatini Jamoatchilik kengashi kvotani tasdiqlagandan keyin yigirma kun mobaynida umumlashtiradi.

Umumlashtirilgan roʻyxat ikki nusxada tayyorlanadi va tasdiqlanadi. Hayʼatlar mazkur roʻyxatning birinchi nusxasini elektron varianti bilan birga Jamoatchilik kengashiga taqdim etadi. Roʻyxatning ikkinchi nusxasi hayʼatlarda saqlanadi.

44. Ziyoratchilarni ziyoratga yuborishdan kamida oʻn kun oldin Jamoatchilik kengashi hayʼatlardan olingan roʻyxatlar asosida tegishli yilda respublika miqyosida “Haj” va “Umra” tadbirlariga boradigan ziyoratchilar roʻyxatini umumlashtiradi, ziyoratchilarni guruhlarga ajratadi, ziyoratchilarning guruh rahbarlarini tayinlaydi, ziyoratchilarning guruhlarini tegishli aviaqatnovlarga taqsimlaydi, ziyoratchilarni Saudiya Arabistoniga olib borish va olib kelish bilan bogʻliq barcha ishlarni amalga oshiradi.

45. Jamoatchilik kengashi va hayʼatlar tomonidan ziyorat bilan bogʻliq barcha shart-sharoitlar (ziyorat toʻlovlari, shartlari va muddati) haqida ziyoratchilarga “Haj” tadbiri boshlanishidan kamida bir oy, “Umra” tadbiri boshlanishidan kamida oʻn toʻrt kun oldin maʼlum qilinadi.

46. Tegishli yilda “Haj” va “Umra” tadbirlariga boradigan fuqarolar roʻyxatini shakllantirishda quyidagi qoʻshimcha shartlar inobatga olinishi lozim:

“Haj” tadbiriga bormoqchi boʻlgan fuqaro “Haj” tadbiriga bormagan boʻlishi;

“Umra” tadbiriga bormoqchi boʻlgan fuqaro soʻnggi ikki yil mobaynida “Umra” yoki soʻnggi besh yil mobaynida “Haj” tadbiriga bormagan boʻlishi;

“Haj” va “Umra” tadbirlariga bormoqchi boʻlgan fuqarolar voyaga yetgan boʻlishi;

“Haj” va “Umra” tadbirlariga 45 yoshgacha boʻlgan ayollar uchun mahramlari (eri, otasi, oʻgʻli, akasi, ukasi va h.k.)ning ham birga borishi hamda mahram ekanligini tasdiqlovchi hujjat (pasport, tugʻilganlik haqida guvohnoma va nikoh tuzilganligi haqida guvohnoma) nusxasi taqdim etilganligi.

47. “Haj” va “Umra” tadbirlarini tartibli tashkil qilish, ziyoratchilarning ibodatlari toʻliq boʻlishi maqsadida Jamoatchilik kengashi tomonidan ziyoratchilarga xizmat koʻrsatuvchi ishchi guruhlar, tibbiy xodimlar va oshpazlar bilan uchrashuvlar oʻtkaziladi.

48. Ziyoratchilarning guruh rahbarlari uchun Jamoatchilik kengashi raisi tomonidan tasdiqlangan oʻquv dasturi asosida mashgʻulotlar tashkil qilinadi.

49. Ziyoratchilarning guruh rahbarlari joylarda ziyoratchilar bilan “Haj” va “Umra” tadbirlarining odoblari, ularni amalga oshirish tartibi, safarga borish-kelish qoidalari, shartlari va talablari haqida uchrashuvlar hamda mashgʻulotlar oʻtkazadi.

Ziyoratchilarning guruh rahbarlari ziyoratchilarga qulay sharoitlar yaratish maqsadida ularni doimiy ravishda kuzatib borish va safar davomida ularga amaliy yordam berish uchun masʼuldirlar.

50. Oʻzbekiston Respublikasi Sogʻliqni saqlash vazirligi, Ichki ishlar vazirligi, Tashqi ishlar vazirligi, Davlat bojxona qoʻmitasi, “Oʻzbekiston havo yoʻllari” milliy aviakompaniyasi tomonidan ziyoratchilarga xizmat koʻrsatuvchi ishchi guruhlar, tibbiy xodimlar, oshpazlar, ziyoratchilarning guruh rahbarlari va ziyoratchilar bilan yakuniy uchrashuvlar oʻtkaziladi hamda bunda mazkur tashkilotlar vakillari oʻz sohalariga oid tegishli tushuntirish ishlarini amalga oshiradilar.

51. Oʻzbekiston musulmonlari idorasi va uning Qoraqalpogʻiston Respublikasidagi qoziyoti hamda viloyatlar va Toshkent shahri vakilligi tomonidan banklarda “Haj” va “Umra” tadbirlari uchun ziyoratchilardan yigʻiladigan mablagʻlarning maqsadli ishlatilishini taʼminlash maqsadida depozit hisobvaraqlar ochiladi.

Qoraqalpogʻiston Respublikasi, viloyatlar va Toshkent shahridagi ziyoratchilardan olinadigan toʻlovlar belgilangan “Haj” va “Umra” mavsumidan kamida ikki oy oldin, bir yoʻla umumiy summani toʻligʻicha toʻlash yoʻli bilan naqd pul yoki naqd pulsiz tartibda amalga oshiriladi.

Toʻlovlar Qoraqalpogʻiston Respublikasi, viloyatlar va Toshkent shahrida ochilgan depozit hisobvaraqlar ochilgan bankning barcha hududiy filiallarida amalga oshirilishi mumkin.

Toʻlovlar Hayʼatning ishchi organi tomonidan ochilgan maxsus hisobvaraqda toʻplanadi hamda Oʻzbekiston musulmonlari idorasining depozit hisobvaragʻiga oʻtkaziladi.

“Haj” va “Umra” tadbirlari bilan bogʻliq barcha sarf-xarajatlar har bir ziyoratchi uchun safar xarajatlari smetasi asosida Oʻzbekiston musulmonlari idorasi depozit hisobvaragʻiga yigʻilgan mablagʻlar hisobidan qoplanadi.

52. Turli tashkilotlar vakillaridan iborat ziyoratchilarga xizmat koʻrsatuvchi ishchi guruhlarning Saudiya Arabistoniga borish-kelishi bilan bogʻliq barcha xarajatlar har bir ziyoratchi uchun safar xarajatlari smetasi asosida Oʻzbekiston musulmonlari idorasining depozit hisobvaragʻiga yigʻilgan mablagʻlar hisobidan vazirliklar, idoralar, korxonalar va tashkilotlar xodimlariga Oʻzbekiston Respublikasidan tashqaridagi xizmat safari xarajatlari uchun mablagʻlar berishning belgilangan tartibiga muvofiq qoplanadi.

53. Oʻzbekiston musulmonlari idorasining Qoraqalpogʻiston Respublikasidagi qoziyoti, viloyatlar va Toshkent shahridagi vakilliklarining “Haj” va “Umra” masalalari bilan shugʻullanuvchi xodimlarining xarajatlari, mazkur xodimlarning ish haqlari har bir ziyoratchi uchun safar xarajatlari smetasi asosida belgilangan tartibda qoplanadi.

54. Ziyoratchilarning Toshkent shahriga kelish-ketishi, yashashi, ovqatlanishi, transport xarajatlari ziyoratchilar hisobidan, hayʼatlar tomonidan tasdiqlanadigan alohida smetalar asosida qoplanadi.

55. “Haj” va “Umra” tadbirlari uchun toʻlovni amalga oshirgan, biroq maʼlum sabablarga koʻra mazkur tadbirlarga bora olmagan yoki bora olmaydigan fuqaroga shaxsan oʻzining arizasi yoki uning nomidan ishonchnomaga asosan harakat qilayotgan shaxsning arizasiga muvofiq toʻlangan toʻlovlar toʻlaligicha ariza taqdim etilgan paytdan boshlab oʻn ish kunida fuqaro (ishonchli vakil) tomonidan taqdim etilgan maxsus hisobvaraqqa oʻtkazib beriladi.

Fuqaroning vafot etishi munosabati bilan “Haj” va “Umra” tadbirlariga borish uchun toʻlangan toʻlovlar vafot etgan fuqaro qonuniy merosxoʻrining arizasiga asosan merosxoʻr taqdim qilgan maxsus hisobvaraqqa oʻtkazib beriladi.

56. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradi.