Oʻzbekiston Respublikasi Prezidentining “Tadbirkorlik faoliyatining jadal rivojlanishini taʼminlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qoʻshimcha chora-tadbirlar toʻgʻrisida” 2016-yil 5-oktabrdagi PF-4848-sonli Farmoni 3-bandining ikkinchi va uchinchi xatboshilari va Oʻzbekiston Respublikasi Prezidentining “Pul muomalasini yanada takomillashtirish va bank plastik kartochkalaridan foydalangan holda hisob-kitoblarni rivojlantirish chora-tadbirlari toʻgʻrisida” 2017-yil 15-fevraldagi PQ-2777-sonli qarori 2-bandining uchinchi xatboshiga muvofiq:

1. Oʻzbekiston Respublikasi Prezidentining ayrim hujjatlariga ilovaga muvofiq oʻzgartish va qoʻshimchalar kiritilsin.

2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining “Tekshirishlarni tartibga solish va nazorat qiluvchi organlar faoliyatini muvofiqlashtirishni takomillashtirish toʻgʻrisida” 1996-yil 8-avgustdagi PF-1503-sonli Farmonining 3-bandi quyidagi mazmundagi xatboshi bilan toʻldirilsin:

“Davlat soliq xizmati organlari tomonidan tadbirkorlik subyektlarini naqd pul mablagʻlari yoki plastik kartochkalar boʻyicha toʻlov shakliga qarab narxlarni sunʼiy ravishda oshirish yoki pasaytirish, nazorat-kassa mashinalaridan, hisob-kitob terminallaridan foydalanish, shuningdek, belgilangan tartibda chek va talonlarni berish, naqd tushumni oʻz vaqtida va toʻla hajmda inkassatsiya qilish masalalari yuzasidan oʻtkaziladigan tekshiruvlar, oʻrnatilgan tartibga muvofiq, nazorat organlari faoliyatini muvofiqlashtiruvchi Respublika kengashining maxsus ruxsatnomasini talab etadigan soliq tekshiruvi hisoblanmaydi”.

2. Oʻzbekiston Respublikasi Prezidentining “Xoʻjalik yurituvchi subyektlarni tekshirishni tashkil qilishni tartibga solish toʻgʻrisida” 1998-yil 19-noyabrdagi PF-2114-sonli Farmonida:

a) 1-bandida;

uchinchi xatboshi chiqarib tashlansin;

toʻrtinchi — toʻqqizinchi xatboshilar tegishli ravishda uchinchi — sakkizinchi xatboshilar deb hisoblansin;

yettinchi xatboshi quyidagi tahrirda bayon etilsin:

“davlat soliq xizmati organlari jismoniy va yuridik shaxslarning qonunchilik buzilganligi holatlari toʻgʻrisidagi murojaatlari asosida nazorat organlari faoliyatini muvofiqlashtiruvchi Respublika kengashi qaroriga binoan bozorlar, savdo komplekslari va ularga tutash avtotransport vositalarini vaqtincha saqlash joylarida bir martalik yigʻimlar, ijara haqi toʻlovi topshirilishi va hisobi toʻliq yuritilishini, savdo va xizmatlar koʻrsatish qoidalariga rioya qilinishini, ushbu bandning toʻqqizinchi xatboshida koʻrsatilgan holatlardan mustasno tarzda, qisqa muddatli tekshiruvlar oʻtkazish huquqiga egadirlar”;

quyidagi mazmundagi xatboshi bilan toʻldirilsin:

“davlat soliq xizmati organlari tomonidan tadbirkorlik subyektlarini naqd pul mablagʻlari yoki plastik kartochkalar boʻyicha toʻlov shakliga qarab narxlarni sunʼiy ravishda oshirish yoki pasaytirish, nazorat- kassa mashinalaridan, hisob-kitob terminallaridan foydalanish, shuningdek, belgilangan tartibda chek va talonlarni berish, naqd tushumni oʻz vaqtida va toʻla hajmda inkassatsiya qilish masalalari yuzasidan oʻtkaziladigan tekshiruvlar, oʻrnatilgan tartibga muvofiq, nazorat organlari faoliyatini muvofiqlashtiruvchi Respublika kengashining maxsus ruxsatnomasini talab etadigan soliq tekshiruvi hisoblanmaydi”;

b) 4-banddagi “va muqobil tekshiruvlar” soʻzlari chiqarib tashlansin;

v) 2-ilovada:

2.2.-bandning beshinchi xatboshidagi “rejadan tashqari, muqobil tekshiruvlar” soʻzlari “rejadan tashqari tekshiruvlar hamda” soʻzlari bilan almashtirilsin;

3.1-bandning oltinchi xatboshi chiqarib tashlansin.

3. Oʻzbekiston Respublikasi Prezidentining “Tadbirkorlik subyektlarini huquqiy himoya qilish tizimini yanada takomillashtirish chora-tadbirlari toʻgʻrisida” 2005-yil 14-iyundagi PF-3619-sonli Farmoni 2-bandidan toʻrtinchi va beshinchi xatboshilar chiqarib tashlansin.

4. Oʻzbekiston Respublikasi Prezidentining “Tadbirkorlik subyektlarini tekshirishni yanada qisqartirish va uning tizimini takomillashtirish chora-tadbirlari toʻgʻrisida” 2005-yil 5-oktabrdagi PF-3665-sonli Farmonida:

a) 1-band quyidagi mazmundagi beshinchi xatboshi bilan toʻldirilsin:

“mazkur bandning ikkinchi, uchinchi va toʻrtinchi xatboshlarida koʻrsatilgan tadbirkorlik subyektlarining moliya-xoʻjalik faoliyati moliya yili davomida soliq va boshqa majburiy toʻlovlar muntazam toʻlanmay kelgan taqdirda rejali tekshiruvlardan oʻtkazilishi mumkin”;

beshinchi va oltinchi xatboshilar tegishli ravishda oltinchi va yettinchi xatboshilar deb hisoblansin;

b) 4-bandning toʻrtinchi xatboshidagi “rejadan tashqari” soʻzlari “qisqa muddatli” soʻzlari bilan almashtirilsin.

5. Oʻzbekiston Respublikasi Prezidentining 2006-yil 21-apreldagi PQ-331-sonli qarori bilan tasdiqlangan Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti toʻgʻrisidagi Nizom 9-bandining yettinchi xatboshi quyidagi tahrirda bayon etilsin:

“jinoiy daromadlarni legallashtirish va terrorizmni moliyalashtirishga aloqador boʻlishi mumkin boʻlgan tadbirkorlik subyektlarining moliya-xoʻjalik faoliyatini jismoniy va yuridik shaxslarning qonunchilik buzilganligi holatlari toʻgʻrisidagi murojaatlari asosida, qonun hujjatlarida belgilangan tartibda, nazorat organlari faoliyatini muvofiqlashtiruvchi Respublika kengashi qaroriga muvofiq, qisqa muddatli tekshiruvlar oʻtkazish.”.

6. Oʻzbekiston Respublikasi Prezidentining “Tadbirkorlik subyektlarini tekshirishlarni yanada qisqartirish va ular faoliyatini nazorat qilishni tashkil etish tizimini takomillashtirish borasidagi qoʻshimcha chora-tadbirlar toʻgʻrisida” 2011-yil 4-apreldagi PF-4296-sonli Farmonining 1-bandi:

quyidagi mazmundagi uchinchi xatboshi bilan toʻldirilsin:

“mazkur bandning ikkinchi xatboshida koʻrsatilgan tadbirkorlik subyektlarining moliya-xoʻjalik faoliyati moliya yili davomida soliq va boshqa majburiy toʻlovlar muntazam toʻlanmay kelgan taqdirda rejali tekshiruvlardan oʻtkazilishi mumkin”;

uchinchi-toʻrtinchi xatboshilar tegishli ravishda toʻrtinchi-beshinchi xatboshilar deb hisoblansin.

7. Oʻzbekiston Respublikasi Prezidentining “Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora- tadbirlari toʻgʻrisida” 2015-yil 15-maydagi PF-4725-sonli Farmonining 2-bandi quyidagi mazmundagi xatboshi bilan toʻldirilsin:

“Tadbirkorlik subyektlarining moliya-xoʻjalik faoliyati moliya yili davomida soliq va boshqa majburiy toʻlovlar muntazam toʻlanmay kelgan taqdirda rejali tekshiruvlardan oʻtkazilishi mumkin”.

8. Oʻzbekiston Respublikasi Prezidentining “Respublika soliq organlari tizimini yanada modernizatsiya qilish chora-tadbirlari toʻgʻrisida” 2010-yil 8-yanvardagi PQ-1257-sonli qarorining 3-bandida:

uchinchi xatboshi quyidagi tahrirda bayon etilsin:

“davlat soliq xizmati organlari jismoniy va yuridik shaxslarning qonunchilik buzilganligi holatlari toʻgʻrisidagi murojaatlari asosida nazorat organlari faoliyatini muvofiqlashtiruvchi Respublika kengashi qaroriga binoan bozorlar, savdo komplekslari va ularga tutash avtotransport vositalarini vaqtincha saqlash joylarida bir martalik yigʻimlar, ijara haqi toʻlovi topshirilishi va hisobi toʻliq yuritilishini, savdo va xizmatlar koʻrsatish qoidalariga rioya qilinishini, ushbu bandning toʻrtinchi xatboshida koʻrsatilgan holatlardan mustasno tarzda, qisqa muddatli tekshiruvlar oʻtkazish huquqiga egadirlar”;

quyidagi mazmundagi toʻrtinchi xatboshi bilan toʻldirilsin:

“davlat soliq xizmati organlari tomonidan bozorlarda, savdo komplekslari va ularga tutash avtomobil toʻxtash joylarida faoliyat koʻrsatuvchi tadbirkorlik subyektlarini naqd pul mablagʻlari yoki plastik kartochkalar boʻyicha toʻlov shakliga qarab narxlarni sunʼiy ravishda oshirish yoki pasaytirish, nazorat-kassa mashinalaridan, hisob-kitob terminallaridan foydalanish, shuningdek, belgilangan tartibda chek va talonlarni berish, naqd tushumni oʻz vaqtida va toʻla hajmda inkassatsiya qilish masalalari yuzasidan oʻtkaziladigan tekshiruvlar, oʻrnatilgan tartibga muvofiq, nazorat organlari faoliyatini muvofiqlashtiruvchi Respublika kengashining maxsus ruxsatnomasini talab etadigan soliq tekshiruvi hisoblanmaydi”;

toʻrtinchi va beshinchi xatboshilar tegishli ravishda beshinchi va oltinchi xatboshilar deb hisoblansin;

9. Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish chora-tadbirlari toʻgʻrisida” 2011-yil 28-noyabrdagi PQ-1652-sonli qarori 6-bandining toʻrtinchi xatboshi chiqarib tashlansin.

10. Oʻzbekiston Respublikasi Prezidentining “Chakana savdo va xizmat koʻrsatish sohasida hisob-kitoblar mexanizmini yanada tartibga solish toʻgʻrisida” 2013-yil 24-yanvardagi PQ-1910-sonli qarorining 2-bandi:

quyidagi mazmundagi uchinchi xatboshi bilan toʻldirilsin:

“tadbirkorlik subyektlarini naqd pul mablagʻlari yoki plastik kartochkalar boʻyicha toʻlov shakliga qarab narxlarni sunʼiy ravishda oshirish yoki pasaytirish, nazorat-kassa mashinalaridan, hisob-kitob terminallaridan foydalanish, shuningdek, belgilangan tartibda chek va talonlarni berish, naqd tushumni oʻz vaqtida va toʻla hajmda inkassatsiya qilish masalalari yuzasidan tekshiruvlarni belgilangan tartibga muvofiq oʻtkazish”;

uchinchi — beshinchi xatboshilar tegishli ravishda toʻrtinchi — oltinchi xatboshilar deb hisoblansin.