Qora va rangli metallar parchalari va chiqindilarini qayta ishlash quvvatlarining ish bilan toʻliq band qilinishini taʼminlash, shuningdek respublikaning xomashyo resurslaridan samarali foydalanish maqsadida Vazirlar Mahkamasi qaror qiladi:

1. Quyidagilar:

Qora va rangli metallar parchalari va chiqindilarini tayyorlash, saqlash, ehtiyotlash va topshirish tartibi 1-ilovaga muvofiq;

Qora va rangli metallar parchalari va chiqindilarini tayyorlash hamda qayta ishlashga topshirishni nazorat qilish va muvofiqlashtirish boʻyicha Respublika komissiyasining tarkibi va Komissiya toʻgʻrisidagi Nizom 2*, 3-ilovalarga muvofiq tasdiqlansin.

2. Qora va rangli metallar parchalari va chiqindilarini tayyorlash hamda qayta ishlashga topshirishni nazorat qilish va muvofiqlashtirish boʻyicha Respublika komissiyasi “Vazirliklar, idoralar, tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarini qora va rangli metallar parchalari va chiqindilarini tayyorlash (topshirish) topshiriqlarini bajarganligi uchun mukofotlash toʻgʻrisida Nizom”ni oʻn kun muddatda ishlab chiqsin va tasdiqlasin.

3. Vazirliklar, idoralar, korporatsiyalar, konsernlar va uyushmalar, shuningdek mulkchilik shakllaridan qatʼi nazar, korxonalar “Oʻzmetkombinat” aksionerlik-ishlab chiqarish birlashmasi va “Oʻzikkilamchiranglimetall” ochiq aksionerlik jamiyati bilan shartnomalar tuzishda Qora va rangli metallar parchalari va chiqindilarini tayyorlash, saqlash, ehtiyotlash va topshirishning ushbu tartibiga qatʼiy amal qilsinlar.

4. Maʼlumot uchun qabul qilinsinki, “Oʻzmetkombinat” aksionerlik-ishlab chiqarish birlashmasi va “Oʻzikkilamchiranglimetall” ochiq aksionerlik jamiyati boʻyicha qora va rangli metallar parchalarini va chiqindilarini tayyorlash topshiruvchi tashkilotlarni metall parchalarini va chiqindilarini topshirganlik uchun ragʻbatlantiruvchi erkin (shartnomaviy) narxda amalga oshiriladi.

5. Qora va rangli metallar parchalari va chiqindilarini yigʻish, saqlash, ulardan foydalanish hamda ularni “Oʻzmetkombinat” aksionerlik-ishlab chiqarish birlashmasi va “Oʻzikkilamchiranglimetall” ochiq aksionerlik jamiyatiga topshirish yuzasidan shaxsan javobgarlik Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari, vazirliklar, idoralar va tashkilotlar rahbarlari zimmasiga yuklansin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Ichki ishlar vazirligi, Davlat bojxona qoʻmitasi “Oʻzmetkombinat” aksionerlik-ishlab chiqarish birlashmasi hamda “Oʻzikkilamchiranglimetall” ochiq aksionerlik jamiyati bilan birgalikda qora, rangli metallar chiqindilarining hosil boʻlish manbalari hisobini takomillashtirish boʻyicha taʼsirchan chora-tadbirlar koʻrsinlar, ularni oʻgʻirlash va respublika tashqarisiga olib ketishga urinish hollarining qatʼiy oldini olsinlar.

7. Oʻzbekiston Respublikasi Vazirlar Mahkamasining 1995-yil 21-fevraldagi 61-son qarori va Vazirlar Mahkamasining 1994-yil 25-noyabrdagi 457-f-son farmoyishi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri, Komissiya raisi Oʻ.T. Sultonov zimmasiga yuklansin.

Ushbu Nizom qora va rangli metallar parchalari va chiqindilarini (bundan keyin “qora va rangli metallar parchalari va chiqindilari” soʻzlari oʻrniga “metall parchalari” soʻzlari qoʻllanadi) tayyorlash, saqlash, ehtiyotlash va yetkazib berish xususiyatlarini tartibga soladi hamda uni barcha vazirliklar, idoralar, korporatsiyalar, konsernlar, uyushmalar, birlashmalar, korxonalar, kompaniyalar, xoldinglar va mahalliy hokimiyat organlari tomonidan bajarish, mulkchilik shakllaridan qatʼi nazar, majburiy hisoblanadi.

1. Qora va rangli metallar parchalari va chiqindilarini tayyorlash (topshirish) boʻyicha topshiriqlar Oʻzbekiston Respublikasi Makroiqtisodiyot va statistika vazirligi tomonidan “Oʻzmetkombinat” aksionerlik-ishlab chiqarish birlashmasi va “Oʻzikkilamchiranglimetall” ochiq aksionerlik jamiyati bilan birgalikda, vazirliklar, idoralar, korporatsiyalar, konsernlar, uyushmalar, kompaniyalar, xoldinglar takliflarini hisobga olgan holda ishlab chiqiladi va joriy yilning oktyabr oyidan kechikmay Vazirlar Mahkamasiga tasdiqlash uchun kiritiladi.

2. Tasarrufida, mulkchilik shakllaridan qatʼi nazar, ishlab chiqarish birlashmalari, korxonalar va metall parchalari topshiruvchi tashkilotlar (bundan keyin “mulkchilik shakllaridan qatʼi nazar, ishlab chiqarish birlashmalari, korxonalar va metall parchalari topshiruvchi tashkilotlar” soʻzlari oʻrniga “metall parchalari topshiruvchi tashkilotlar” soʻzlari qoʻllanadi) boʻlgan vazirliklar, idoralar, korporatsiyalar, konsernlar, uyushmalar, kompaniyalar, xoldinglar metall parchalari tayyorlash (topshirish) boʻyicha topshiriqlar Oʻzbekiston Respublikasi Vazirlar Mahkamasi tomonidan tasdiqlangandan keyin bir oy muddatda metall parchalari tayyorlash (topshirish)ning, uning turlari koʻrsatilgan holdagi, bir yil uchun belgilangan topshiriqlarini tasarruflaridagi metall parchalari topshiruvchilarga yetkazadilar. Tayyorlash (topshirish) topshirigʻi boʻlmagan taqdirda har qanday yuridik shaxsda toʻplangan metall parchalarining hammasi “Oʻzmetkombinat” aksionerlik-ishlab chiqarish birlashmasining “Ikkilamchiqorametall” korxonalar xoʻjalik hisobidagi boshqarmasi va “Oʻzikkilamchiranglimetall” ochiq aksionerlik jamiyati (bundan keyin “Oʻzmetkombinat” aksionerlik-ishlab chiqarish birlashmasi va “Oʻzikkilamchiranglimetall” ochiq aksionerlik jamiyati oʻrniga “tayyorlovchi” qoʻllanadi) korxonalariga topshirilish majburiydir.

3. Xuddi shu muddatda vazirliklar, idoralar, korporatsiyalar, kompaniyalar, xoldinglar, uyushmalar tasdiqlangan topshiriqlar asosida oʻz tasarruflaridagi metall parchalari topshiruvchilarga, metall parchalari tayyorlash (topshirish) topshiriqlarini, ularni shaharlar, tumanlar, viloyatlar (Qoraqalpogʻiston Respublikasi) boʻyicha jamlash hamda metall parchalari topshirish yuzasidan shartnomalar tuzish uchun, tayyorlovchilar rekvizitlari koʻrsatilgan holda joʻnatadilar.

4. Metall parchalari tayyorlash (topshirish) hajmlari boʻyicha tasdiqlangan topshiriqlarga oʻzgartirishlar kiritishga yoʻl qoʻyilmaydi. Istisno hollarda Qora va rangli metallar parchalari va chiqindilarini tayyorlash va qayta ishlashga topshirishni nazorat qilish va muvofiqlashtirish boʻyicha Respublika komissiyasi metall parchalarini topshirish va yetkazib berish nazarda tutilgan yil choragi (oy) boshlangungacha 30 kundan kechikmay topshiriqqa tuzatish kiritishi mumkin.

5. Metall parchalaridan oʻzining metall quyish ishlab chiqarishida foydalanish toʻgʻrisidagi takliflar metall parchalari topshiruvchilar tomonidan kiritiladi hamda Qora va rangli metall parchalari va chiqindilarini tayyorlash va qayta ishlashga topshirishni nazorat qilish va muvofiqlashtirish boʻyicha Respublika komissiyasining roziligi bilan, Oʻzbekiston Respublikasi Vazirlar Mahkamasi farmoyishiga binoan amalga oshiriladi. Bunda oʻzining metall quyish ishlab chiqarishi uchun foydalanilgan metall parchalari hajmlari tayyorlovchiga berilgan maʼlumotnoma asosida metall parchalari tayyorlash (topshirish) topshirigʻi bajarilishiga qoʻshiladi.

6. Oʻzbekiston Respublikasi hududida qora metall parchalari boʻyicha — “Oʻzmetkombinat” aksionerlik-ishlab chiqarish birlashmasining “Ikkilamchiqorametall” korxonalar xoʻjalik hisobidagi boshqarmasi, rangli metall parchalari boʻyicha — “Oʻzikkilamchiranglimetall” ochiq aksionerlik jamiyati vakolatli tayyorlovchilar hisoblanadilar.

7. Tayyorlovchilarning vakillari hech bir istisnosiz barcha metall parchalari yigʻuvchilarni, topshiruvchilarni va ulardan foydalanuvchilarni metall parchalarini yigʻish, saqlash, ishlatish va joʻnatishning toʻgʻriligi boʻyicha, shuningdek metall parchalari hosil boʻladigan joylarni tekshirishga haqlidirlar.

8. Metall parchalari topshiruvchilarda hosil boʻladigan metall parchalarining hammasi tayyorlovchiga topshirilishi majburiydir.

9. Metall parchalari topshiruvchilar metall parchalarini yigʻish, saqlash va joʻnatishni oʻz kuchi va vositalari bilan bajarishga majburdirlar. Metall parchalarini joʻnatish muddatlari har oyda, teng ulushlarda belgilanadi.

10. Yuridik va jismoniy shaxslar tomonidan ushbu Tartibning buzilishi, shuningdek metall parchalarining yoʻq qilinishi va yaroqsizlantirilishi, ularning axlatxonaga hamda ushbu korxona va tashkilotlarga biriktirilmagan hududlarga olib borib tashlanishi hollari aniqlangan taqdirda tayyorlovchining vakili metall topshiruvchining vakili bilan birgalikda dalolatnoma tuzadi. Ushbu dalolatnoma mazkur Tartibda nazarda tutilgan iqtisodiy sanksiyalarni qoʻllash uchun asos boʻladi.

11. Metall parchalarining joʻnatish vaqtida aniqlanadigan miqdori (ogʻirligi) va sorti tayyorlovchi tomonidan metall parchalari qabul qilib olingandan keyin qabul qilish dalolatnomalarida aniqlashtiriladi. Qabul qilish dalolatnomalari hisob-kitob qilish va tayyorlash topshirigʻining bajarilishini hisobga olish uchun asos boʻladi.

12. Avtomobil transportida tayyorlovchiga yetkazib beriladigan metall parchalari topshirish joyida miqdori va sifatiga koʻra qabul qilinadi hamda qabul qilish natijalari topshirish-qabul qilish dalolatnomasi bilan rasmiylashtiriladi. Bunda tayyorlovchiga yetkazib berilgan metall parchalari yuzasidan topshirish-qabul qilish dalolatnomasi uch nusxada tuziladi, ularning ikkitasi tayyorlovchida qoladi, uchinchisi esa metall parchalari topshiruvchiga beriladi.

13. Metall parchalari tayyorlovchiga temir yoʻl transporti bilan yetkazib berilgan taqdirda har bir temir yoʻl vagoni, konteyner uchun topshirish-qabul qilish dalolatnomasi vagon, konteyner oluvchiga yetib kelgan vaqtdan boshlab, vagon, konteyner yetib kelgan kunni hisobga olmasdan, koʻpi bilan ikki sutka mobaynida uch nusxada tuziladi. Tayyorlovchida olib kelingan metall parchalari sifati boʻyicha eʼtiroz paydo boʻlgan taqdirda, u ushbu metall parchalarini masʼul saqlovchida qoldiradi va metall parchalari topshiruvchining vakilini chaqirtiradi.

14. Metall parchalari topshiruvchi tomonidan tayyorlovchiga portlash xavfi boʻlgan, kimyoviy jihatdan toza boʻlmagan va radioaktivli metall parchalarining joʻnatilishi taqiqlanadi.

15. Metall parchalari topshiruvchilar bilan hisob-kitoblar pul mablagʻlari, shuningdek ham tayyorlovchining oʻz mahsuloti, ham tayyorlovchi topshirilgan metall parchalari summasida ushbu maqsadlar uchun sotib olgan mahsulot bilan amalga oshiriladi.

16. Ushbu Tartibning 8, 9, 10-bandlarida nazarda tutilgan talablarni buzganlik uchun metall parchalari topshiruvchidan Oʻzbekiston Respublikasi qonunchiligida nazarda tutilgan miqdorlarda jarima undiriladi.

17. Iqtisodiy sanksiyalarning qoʻllanishi metall parchalarini majburiy topshirishdan ozod qilmaydi.

18. Metall parchalarini yoʻq qilganlik va yaroqsizlantirganlik, axlatxonaga va metall parchalari topshiruvchiga biriktirilmagan hududga olib borib tashlaganlik uchun metall parchalari topshiruvchi korxona, tashkilot rahbariga tayyorlovchining vakolatli vakillari tomonidan metall parchalari topshiruvchining vakillari bilan birgalikda tuzilgan dalolatnomalar asosida, Oʻzbekiston Respublikasi qonunchiligida nazarda tutilgan pul jarimasi solinadi.

19. Shartnoma majburiyatlarini bajarmaganlik, shuningdek metall parchalarini qabul qilishni asossiz rad etganlik uchun tayyorlovchi metall parchalari topshiruvchiga Oʻzbekiston Respublikasi qonunchiligida nazarda tutilgan miqdorlarda jarima toʻlaydi.

20. Metall parchalari topshiruvchilar ikki hafta muddatda tayyorlovchi vakilining iqtisodiy sanksiyalarni qoʻllash boʻyicha xatti-harakati yuzasidan “Oʻzmetkombinat” aksionerlik-ishlab chiqarish birlashmasining “Ikkilamchiqorametall” korxonalar xoʻjalik hisobidagi boshqarmasiga va “Oʻzikkilamchiranglimetall” ochiq aksionerlik jamiyatiga, ularning qaroriga rozi boʻlmagan taqdirda esa — xoʻjalik sudiga shikoyat qilishga haqlidir.

1. Qora va rangli metallar parchalari va chiqindilarini tayyorlash hamda qayta ishlashga topshirishni nazorat qilish va muvofiqlashtirish boʻyicha Respublika komissiyasi (keyingi oʻrinlarda “komissiya” deb ataladi) davlat organi hisoblanadi.

Komissiya tomonidan qabul qilinadigan qarorlar barcha vazirliklar, idoralar, korporatsiyalar, konsernlar, kompaniyalar, uyushmalar, birlashmalar, mulkchilik shakllaridan qatʼi nazar, korxonalar va mahalliy hokimiyat organlari tomonidan bajarilishi majburiydir.

2. Komissiya oʻz faoliyatida Oʻzbekiston Respublikasi qonunlariga, Oliy Majlisning qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga va boshqa normativ hujjatlarga amal qiladi.

3. Komissiya oʻz majlislarini zaruriyatga koʻra, biroq yil choragida kamida bir marta oʻtkazadi.

Quyidagilar komissiyaning asosiy vazifalari hisoblanadi:

qora va rangli metallar parchalari va chiqindilaridan foydalanishning yagona strategik siyosatini shakllantirish va amalga oshirish;

vazirliklar, idoralar, hokimliklarning metall parchalari tayyorlash, saqlash, topshirish va ulardan foydalanish boʻyicha faoliyatini muvofiqlashtirish;

komissiya majlislarini oʻtkazishni tashkil etish;

Oʻzbekiston Respublikasi Vazirlar Mahkamasining metall parchalarini tayyorlash, saqlash, topshirish va ulardan foydalanishga doir qarorlari va farmoyishlari bajarilishi ustidan nazoratni amalga oshirish.

Komissiya quyidagi funksiyalarni bajaradi:

metall parchalari tayyorlash (topshirish) hajmlari boʻyicha tasdiqlangan topshiriqlarga favqulodda hollarda oʻzgartirishlar kiritadi;

korxonalarning metall parchalaridan oʻzining metall quyish ishlab chiqarishi uchun foydalanish toʻgʻrisidagi takliflarini Oʻzbekiston Respublikasi Vazirlar Mahkamasida tasdiqlashdan oldin kelishadi;

vazirliklar, idoralar, korporatsiyalar, konsernlar, xoldinglar, uyushmalar, birlashmalar, korxonalar va mahalliy organlar mansabdor shaxslarini metall parchalari tayyorlash (topshirish) boʻyicha vazifalar bajarilganligi uchun mukofotlash toʻgʻrisida qaror qabul qiladi;

metall parchalari tayyorlash (topshirish) boʻyicha vazifalar bajarilganligi uchun mukofotlash va ragʻbatlantirish toʻgʻrisidagi Nizomni tasdiqlaydi.

Komissiya quyidagi huquqlarga egadir:

metall parchalari resurslarini aniqlash, saqlash qoidalariga rioya qilinishini tekshirish uchun istalgan mintaqaga, har qanday korxonaga taftish guruhini yuborish;

tayyorlash boʻyicha topshiriqlar bajarilishi ustidan nazoratni amalga oshirish;

“Oʻzmetkombinat” aksionerlik-ishlab chiqarish birlashmasidan va “Oʻzikkilamchiranglimetall” ochiq aksiyadorlik jamiyatidan viloyatlar va vazirliklar boʻyicha metall parchalari tayyorlanishi (topshirilishi) boʻyicha topshiriqlarning bajarilishi toʻgʻrisidagi axborotni soʻrab olish;

mazkur Nizomdan kelib chiquvchi barcha majburiyatlarni bajarish.

Komissiya raisi Vazirlar Mahkamasi tomonidan tayinlanadi.

Komissiya raisi:

komissiya ishini tashkil etadi va unga umumiy rahbarlik qiladi;

qora va rangli metallar parchalari va chiqindilarini tayyorlash hamda qayta ishlashga topshirish boʻyicha vazifalarni shakllantirish va amalga oshirish ishlarini muvofiqlashtiradi;

komissiya ish rejalarini tasdiqlaydi, uning soni va shaxsiy tarkibi yuzasidan takliflar kiritadi.

Komissiya faoliyati qonun hujjatlarida belgilangan tartibda toʻxtatiladi.