LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Narx-navo hamon oshib borayotganini va shu munosabat bilan aholi manfaatlarini hamda turmush darajasini himoya qilish zarurligini e’tiborga olib:
1. 1992-yilning 1-yanvaridan boshlab xalq ta’limi, sog‘liqni saqlash, madaniyat, ijtimoiy ta’minot, fan, davlat muassasalari va uy-joy-kommunal tarmoq xodimlarining ish haqi 1991-yildagiga nisbatan 2 baravar va asos qilib olingan (1990) yilga nisbatan 4,5 baravar oshirilsin.
2. Oliy o‘quv yurtlari studentlarining, texnikumlar hamda respublika hukumatining qarorlariga binoan kiyim-kechak va ovqat bilan ta’minlanmayotgan hunar-texnika bilim yurtlari talabalarining stipendiyalari 1992-yilning 1-yanvaridan boshlab o‘rta hisobda 2,2 baravar oshirilib, imtiyozli ovqatlanishga qo‘shimcha haq avvalgi miqdorda saqlab qolinsin.
3. 1992-yilning 1-yanvaridan boshlab O‘zbekiston Respublikasi hududida ish haqi va mehnat nafaqasining eng kam miqdori (kompensatsiyani hisobga olib) oyiga 350 so‘m belgilansin.
4. 1992-yilning 1-yanvaridan boshlab fuqarolarning soliq olinmaydigan daromadlarining eng kam miqdori oyiga 350 so‘m hajmida belgilansin.
5. Vazirliklar, idoralar, korxonalar va xo‘jaliklar ushbu Farmonda belgilangan eng kam ish haqi va mehnat nafaqasini hisobga olib, erkin va shartnomaviy narxlardan keng foydalanilayotganligini nazarda tutib, 1992-yilda ishlovchilarning ish haqi yanada oshirilishini ta’minlovchi tadbirlarni ro‘yobga chiqarishni, iste’mol fondi bo‘yicha ilgari belgilangan har qanday cheklashlarni bekor qilishni, ishlab chiqarishni o‘stirishning mavjud zaxiralarini jalb etishni ko‘zda tutsinlar.
6. O‘zbekiston Respublikasi Prezidentining “Barcha turdagi maktablarning o‘qituvchilari, bolalar uylarining tarbiyachilariga qo‘shimcha imtiyozlar berish, yuqori sinf o‘qituvchilarining ish haqini oshirish haqida”gi 1990-yil 13-noyabr Farmoni 1992-yil 1-yanvaridan boshlab respublika maktabgacha tarbiya bolalar muassasalari va maktabdan tashqari muassasalar tarbiyachilariga, o‘qituvchilariga, hunar-texnika ta’limi sistemasi muallimlari va ishlab chiqarish ta’limi ustalariga ham joriy etilsin.
7. O‘zbekiston Respublikasi Prezidenti huzuridagi Vazirlar Mahkamasi mazkur Farmonni amalga oshirish yuzasidan tashkiliy chora-tadbirlarni nazarda tutuvchi qaror loyihasini tayyorlasin va ko‘rib chiqish uchun taqdim etsin.
8. O‘zbekiston Respublikasi Adliya vazirligi bir oy muddat ichida amaldagi qonunchilikni mazkur Farmonga muvofiqlashtirish haqida takliflar tayyorlasin.
9. “Respublikaning davlat ta’minotidagi aholisi turmush darajasiga madad berish chora-tadbirlari to‘g‘risida”gi O‘zbekiston Respublikasi Prezidentining 1991-yil 16-noyabr 291-son Farmoni o‘z kuchini yo‘qotgan deb hisoblansin.